ပဲခူးတိုင်းဒေသကြီး၊ မိုးညိုမြို့နယ်တွင် စပါးသည် အဓိထားစိုက်ပျိုးသော သီးနှံအမျိုးအစားတွင် ပါဝင်ပြီး နှစ်စဉ် မိုးစပါး စိုက်ဧက (၄၈၆၉၂) ဧကကျော် စိုက်ပျိုးလျှက်ရှိပါသည်။ တောင်သူများမှ မတ်လတွင်စတင်၍ မိုးစပါး ကြဲခင်းမြေယာများ စတင်ပြုပြင်ခဲ့ပြီး ယခင်နှစ်ထက် စောလျင်စွာ စိုက်ပျိုးနိုင်ခဲ့ပါသည်။ ယခုနှစ်တွင် ဧပြီလမှစ၍ မိုးအဆက်မပြတ်ရွာသွန်းမှုကြောင့် တောင်သူများအနေဖြင့် မိုးစပါးကြဲခင်းများကို တစ်မြို့နယ်လုံးအနေဖြင့် မိုးစပါးစိုက်ဧက (၃၀%)နှုန်းခန့် စိုက်ပျိုးပြီးစီးခဲ့ပြီး ဖြစ်ပါသည်။
ယခုနှစ်တွင် မျိုးစပါးဈေးနှုန်း မြင့်တက်ခြင်း၊ စက်သုံးဆီဈေးမြင့်မားခြင်း၊ ဓါတ်မြေဩဇာ မြင့်တက်ခြင်း၊ လုပ်သားငှားရမ်းခ မြင့်တက်ခြင်း၊ သွင်းအားစုဈေးနှုန်းများ မြင့်တက်မှုတို့ကို တောင်သူများအနေဖြင့် ကြုံတွေ့နေရခြင်းကြောင့် မျိုးစပါး ပျိုးထောင်ပြီး လယ်စိုက်စနစ်ထက် ကြဲခင်းစနစ်ကိုသာ ပိုမိုအသုံးပြုစိုက်ပျိုးနေလျှက်ရှိသည်ကို ကွင်းဆင်းလေ့လာတွေ့ရှိရပါသည်။
မိုးညိုမြို့နယ်တွင် စိုက်ပျိုးသော စပါးမျိုးများမှာ (မနောသုခ၊ ဆင်းသုခ၊ ကျော်ဇေယျ၊ သီးထပ်ရင်၊ ဆင်းနွယ်ရင်၊ ဧရာမင်း၊ ကောက်ညှင်း၊ အင်းမရဲဘော်၊ တစ်တောင်ပို၊ ကရင်မ) စပါးမျိုးများ ဖြစ်ပါသည်။ ၎င်းမျိုးများထဲမှ မိမိမြို့နယ်၏ ရေမြေသဘာဝနှင့် ကိုက်ညီသော ကရင်မ စပါးမျိုးများနှင့် ဆင်းသုခစပါးမျိုးများကိုသာ အများဆုံးစိုက်ပျိုးထားရှိသည်ကို တွေ့ရှိရပါသည်။
DOCA(ပဲခူး)