စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ရွှေဘိုခရိုင် ပြည်တွင်းကုန်သွယ်ရေးဖွံ့ဖြိုးမှုနှင့် သုတေသနဌာနခွဲအနေဖြင့် သီးနှံများ၏ ဈေးနှုန်းဆိုင်ရာ အချက်အလက်များနှင့် အရောင်းအဝယ်ဖြစ်မှုစာရင်းများကို ရွှေဘိုမြို့၊ ပဲ၊ နှမ်းကုန်စည်ဒိုင် မှတာဝန်ရှိသူများနှင့် ချိတ်ဆက်၍ စာရင်းများပြုစုပြီး အထက်အဆင့်ဌာနများသို့ တင်ပြဆောင်ရွက်လျှက် ရှိပါသည်။
စစ်ကိုင်းတိုင်းဒေသကြီး၊ ရွှေဘိုခရိုင်၌ ၂၀၂၁-၂၀၂၂ခုနှစ်တွင် နွေသီးနှံအနေဖြင့် နွေနှမ်း(၈၅၃၂၆) ဧက၊ ပဲတီစိမ်း(မိုးကြို)(၄၃၀၂၈)ဧက၊ မတ်ပဲ(မိုးကြို)(၃၅)ဧက၊ နေကြာ(မိုးကြို)(၆၀)ဧကနှင့် ချည်မျှင်ရှည်ဝါ (မိုးကြို)(၁၀)ဧက၊ စုစုပေါင်း(၁၂၈၄၅၉)ဧက စိုက်ပျိုးခဲ့ကြောင်း၊ နွေနှမ်း(၈၅၃၂၆)ဧကမှာ ရွှေဘိုမြို့နယ်တွင် (၉၄၈၅)ဧက၊ ဝက်လက်မြို့နယ်တွင်(၆၆၇၂၉)ဧက၊ ခင်ဦးမြို့နယ်တွင်(၇၃၇)ဧက၊ တန့်ဆည်မြို့နယ်တွင် (၉၅)ဧကနှင့် ဒီပဲယင်းမြို့နယ်တွင် (၈၂၈၀)ဧက စိုက်ပျိုးကြောင်းသိရသည်။ ဝက်လက်မြို့နယ်သည် ရွှေဘိုတစ်ခရိုင်လုံးရှိ စိုက်ဧက၏(၇၈%)ကျော်စိုက်ပျိုးပြီး နှစ်စဉ်ခရိုင်တွင် အများဆုံးစိုက်ပျိုးသည့်မြို့နယ်တစ်ခု ဖြစ်ပါသည်။ နွေနှမ်းကို ၂၀၂၀-၂၀၂၁ခုနှစ်တွင် (၇၉၅၆၉)ဧက စိုက်ပျိုးခဲ့ပြီး ၂၀၂၁-၂၀၂၂ခုနှစ်တွင် (၈၅၃၂၆)ဧကစိုက်ပျိုးခဲ့သဖြင့် ယခင်နှစ်ထက် (၅၇၅၇)ဧက ပိုမိုစိုက်ပျိုးကြောင်း သက်ဆိုင်ရာဌာန၏ စာရင်းများအရ သိရှိရပါသည်။
စစ်ကိုင်းတိုင်းဒေသကြီး၊ ရွှေဘိုခရိုင်၌ ၂၀၂၀-၂၀၂၁ခုနှစ်၊ နွေသီးနှံအထွက်နှုန်းအနေဖြင့် နှမ်း (၁၄၅၂၇၃၇)တင်း၊ ပဲတီစိမ်း တစ်ဧကလျှင် (၁၇.၅၇)တင်း၊ နေကြာ တစ်ဧကလျှင် (၂၂.၂၅)တင်း၊ ဝါတစ်ဧကလျှင် (၄၀၀ပိဿမှ ၈၀၀ပိဿာ)၊ မတ်ပဲ တစ်ဧကလျှင် (၁၆.၃၈) တင်း ထွက်ရှိခဲ့ကြောင်း သိရှိရပါသည်။ ၂၀၂၁-၂၀၂၂ခုနှစ်တွင် ရွှေဘိုခရိုင်၌ နှမ်းစိုက်ဧက(၈၅၃၂၆) နှမ်းတစ်ဧကလျှင် (၁၈)တင်းနှုန်း ဖြင့် (၁၅၃၅၈၆၈) တင်းထွက်ရှိကြောင်း သိရှိရပါသည်။
ရွှေဘိုခရိုင်တွင် နှမ်းနက်နှင့်နှမ်းနီ(ဆီကြိတ်နှမ်း)များကိုသာ အဓိကစိုက်ပျိုးကြကြောင်း ၊ ၎င်းစိုက်ပျိုးထားသောနွေနှမ်းများကို မေလဆန်းတွင် စတင်ရိတ်သိမ်းကြပြီး တတိယပတ်ခန့်မှစတင်၍ ဈေးကွက်အတွင်း လာရောက်ရောင်းချခြင်းများရှိကြောင်း၊ တောင်သူများအနေဖြင့် ဝက်လက်မြို့နယ်မှ ထွက်ရှိသော နှမ်းများကို ဝက်လက်မြို့ပေါ်ရှိ ပွဲရုံများသို့ရောင်းချခြင်း၊ မန္တလေးမြို့ရှိပွဲရုံများသို့ တိုက်ရိုက် ရောင်းချခြင်း များအပြင် ရွှေဘိုမြို့ ပဲ၊ နှမ်းကုန်စည်ဒိုင်နှင့် အခြားသောပွဲရုံများသို့ လာရောက်ရောင်းချခြင်းများလည်း ရှိကြောင်းသိရှိရပါသည်။ ဇွန်လဒုတိယပတ်၌ ရွှေဘို့ပဲ၊ နှမ်းကုန်စည်ဒိုင်၏ ဖြတ်ဈေးမှာ နှမ်းနက် (၁)တင်းလျှင် (၆၈၀၀ဝိ/-)မှ(၇၀၀၀ဝိ/-)ထိ ပေါက်ဈေးရှိပြီး နှမ်းနီ(၁)တင်းလျှင်(၄၈၀၀ဝိ/-)မှ(၅၀၀၀ဝိ/-) ထိပေါက်ဈေးရှိကြောင်း၊ ရွှေဘိုဈေးကွက်သို့ ရွှေဘိုမြို့နယ်နှင့် ဒီပဲယင်းမြို့နယ်ရှိ တောင်သူများအပြင် မြို့၏တောင်ဘက်ခြမ်းရှိ ဝက်လက်မြို့နယ်ရှိ တောင်သူများမှ အများဆုံးလာရောက် ရောင်းချကြကြောင်း၊ ဝယ်ယူရရှိသည့် နှမ်းများကို မန္တလေးဈေးကွက်သို့ ဆက်လက်တင်ပို့ ရောင်းချကြကြောင်းနှင့် မေလအတွင်း ရွှေဘိုမြို့ ပဲ၊ နှမ်းကုန်စည်ဒိုင်အနေဖြင့် နှမ်းနက်(၇၅၀)တင်းနှင့် နှမ်းနီ(၁၁၂၅)တင်း (ခန့်မှန်း)အရောင်းအဝယ်ဖြစ်ကြောင်း ကုန်စည်ဒိုင်တာဝန်ရှိသူများထံမှ သိရှိရပါသည်။
DOCA(စစ်ကိုင်း)