ဈေးနှုန်းမှတ်တမ်းများမှ အာလူးဈေးကွက်အပေါ် ခန့်မှန်းသုံးသပ်ခြင်း

           မြန်မာနိုင်ငံတွင် အာလူးသီးနှံအား ရှမ်းပြည်နယ်(တောင်ပိုင်း)နှင့် ဆင်ဖြူကျွန်းတို့တွင် အမြောက်အများစိုက်ပျိုး ထုတ်လုပ်ကြပါသည်။ အာလူး၏ ၂၀၂၂-၂၀၂၃ ဘဏ္ဍာနှစ်အတွင်း ဖြစ်ပေါ်လာနိုင်သည့် ဈေးနှုန်းဈေးကွက်အခြေအနေအား ဖြစ်ပေါ်ခဲ့သည့် ဈေးနှုန်း မှတ်တမ်းများအရ လေ့လာသုံးသပ်ရသော် စိုက်ပျိုးထုတ်လုပ်ခြင်း၊ ဈေးကွက်တည်ငြိမ်ခြင်းရှိနိုင်ကြောင်း တွေ့ရှိရပါသည်။ အာလူးသည် မည်သည့်ဘဏ္ဍာနှစ်တွင်မဆို မေလနှင့် ဇွန်လတို့တွင် ဈေးနှုန်းကျဆင်း ဖြစ်ပေါ်တတ်ပြီး ယခုနှစ်တွင် တောင်သူတွက်ခြေကိုက်ဈေးနှုန်းဖြစ်သော တစ်ပိဿာလျှင် ၁၂၀၀ကျပ် ဈေးအောက်ရောက်ရှိခြင်း မရှိသည်ကို လေ့လာတွေ့ရှိရပါသည်။ ဈေးကွက်လိုအပ်ချက်ထက်သာလွန်အောင် မထုတ်လုပ်နိုင်ခြင်း၊ ထုတ်လုပ်နိုင်မှု အရေအတွက်သည် ဈေးကွက်လိုအပ်ချက်နှင့်ညီမျှနေခြင်းတို့ကြောင့် ထုတ်ကုန်နှင့်ဈေးကွက် မျှခြေညီပြီးဈေးနှုန်း တည်ငြိမ်ကြောင်းတွေ့ရှိရပါသည်။

နှစ်အလိုက်အာလူးဈေးနှုန်းများ

          စိုက်ပျိုးထုတ်လုပ်မှုအခြေအနေမှာ မျိုးဈေး၊ သွင်းအားစု၊ လုပ်အားခနှင့် အခြားကုန်စည်တန်ဖိုးများ မြင့်တက်လာမှုအရ အာလူးစိုက်ပျိုးထုတ်လုပ်မှု တစ်ဧကကုန်ကျစရတ် ကျပ် သိန်း (၅၀)ခန့်ရှိကြောင်း တွေ့ရှိရပြီး စိုက်ပျိုးထုတ်လုပ်မှု လျော့နည်းကျဆင်းလာပါသည်။ စိုက်ပျိုးမှု လျော့ကျသည်အတွက် ကုန်ထွက်ရှိမှု လျော့နည်းသဖြင့် ကုန်ထွက်ဖောင်းပွမှု လျော့နည်းလာမည်ဖြစ်သော်လည်း ဈေးကွက်လိုအပ်ချက်ပြည့်မီအောင် ထုတ်လုပ်နိုင်မည့်အခြေအနေ တွေ့ရှိရပါသည်။ ၂၀၂၂-၂၀၂၃ ဘဏ္ဍာနှစ်တွင် အာလူးစိုက်ပျိုးထုတ်လုပ်မှုမှ စားသုံးသူ၊ တောင်သူ၊ ကုန်သည် ညီမျှစွာ တွက်ခြေကိုက်နိုင်သည့် ဈေးနှုန်းအတိုင်းသာ တည်ငြိမ်နိုင်ကြောင်း၊ ဈေးနှုန်းတည်ငြိမ်ပြီး ဈေးကွက်ခိုင်မာသော သီးနှံဖြစ်ကြောင်း နှစ်စဉ်လအလိုက် ဖြစ်ပေါ်ခဲ့သည့် ဈေးနှုန်းမှတ်တမ်းများအပေါ် အခြေခံ၍ သုံးသပ်ရပါသည်။

DOCA(ရှမ်း)