![](http://www.doca.gov.mm/sites/default/files/styles/consumer_inner_image__847x424_/public/မျက်မှန်.jpg?itok=VTi6ql42)
စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ၊ မုံရွာမြို့သို့ မျက်မှန်ကိုင်းအဟောင်းကို မှန်အသစ်လဲရာတွင် အဆင်မပြေခြင်းကိစ္စတိုင်ကြားလာပါသည်။ မှန်အသစ်ဖိုးငွေကျပ် (၁၈၀၀၀) ပေးချေထားပြီးချိန်းဆိုထားသည့်ရက်တွင် ဆိုင်သို့သွားရွေးရာ မျက်မှန်ကိုင်းအဟောင်းကြောင့် ပါဝါထည့်သွေးထားသည့် မှန်(၁)စုံကွဲသွားသဖြင့် မျက်မှန်ကိုင်းအသစ်ကို ရွေးချယ်ဝယ်ယူပါ၊ မှန်ဖိုးငွေထပ်ပေးရန် မလိုပါဟုပြောဆိုရာအပ်နှံထားခဲ့သည့်အတိုင်း မရရှိသဖြင့် တိုင်ကြားခြင်း ဖြစ်ပါသည်။ ဦးစီးမှူးရုံးသည်စားသုံးသူနှင့် မျက်မှန်ဆိုင်လုပ်ငန်းရှင်တို့အကြား ညှိနှိုင်းဖြေရှင်းပေးနိုင်ရန် လိုအပ်သောပြေစာကို စစ်ဆေးခဲ့ပါသည်။ ထို့နောက် တိုင်ကြားခံရသည့် မျက်မှန်ဆိုင်ပိုင်ရှင်ကို ညှိနှိုင်းဖြေရှင်းရန်ခေါ်ယူရာ တရားဝင်ကိုယ်စားလှယ်သည်လွှဲစာဖြင့် လာရောက်ခဲ့ပါသည်။ စားသုံးသူကာကွယ်ရေးဆိုင်ရာကိုသိရှိသော ကျွမ်းကျင်သူများ ရှေ့တွင်ခေါ်ယူ စစ်ဆေးခဲ့ပါသည်။ ထိုအခါမျက်မှန်ဆိုင်တိုင်းသည် မျက်မှန်ကိုင်းအဟောင်းကို မှန်အသစ်လဲတပ်ခြင်းဆောင်ရွက်ပါက ကိုင်းကျိုးခြင်း၊ အဆင်မပြေခြင်းဖြစ်နိုင်ကြောင်း ပြောကြားအသိပေးပြီးမှအလုပ်လက်ခံခဲ့ခြင်းဖြစ်ကြောင်း၊ ယခုဖြစ်စဉ်မှာ ကိုင်းကြောင့် မှန်တစ်စုံဆုံးရှုံးခဲ့ပြီးဖြစ်သဖြင့် အဆိုပါကိုင်းကို ထပ်မံတပ်မပေးနိုင်သော်လည်းတာဝန်ယူမှုအနေဖြင့် မှန်တစ်စုံပြန်လည်ပေးအပ်မည်ဖြစ်ကြောင်း၊ ပြန်ယူသွားပြီးအခြားဆိုင်မှာ သွားတပ်ခိုင်းလိုပါက ပေးလိုက်မည်ဖြစ်ကြောင်း၊ စားသုံးသူတောင်းဆိုသလို မဖြစ်မနေတပ်ပေးရန် မဖြစ်နိုင်ပါကြောင်း စိစစ်သိရှိရပါသည်။
တိုင်ကြားသူဘက်ကို အသိပေးရာ အခြားဆိုင်သွားတပ်ခိုင်းလျှင်ရမရ မသေချာဘဲတပ်ခ ထပ်မံကုန်ကျမည်၊ မျက်မှန်ကိုင်းအသစ်ဝယ်ယူပါကလည်း ပိုက်ဆံထပ်မံ ကုန်ကျမည်၊ ပိုက်ဆံ ထပ်သုံးရမည့် မည်သည့်နည်းမျှမလုပ်လိုပါ၊ နည်းလမ်းတစ်ခုခုအရ အရေးယူ သတိပေးခြင်း ဆောင်ရွက်ပေးနိုင်ပါက ကျေနပ်ပါသည်ဟု တောင်းဆိုလာပါသည်။ ဖြစ်စဉ်နှင့် ပတ်သက်ပြီး စားသုံးသူကာကွယ်ရေးဥပဒေအရ ဖောက်ဖျက်မှုကိုစိစစ်ရာ ပုဒ်မ၂၇(ခ) အာမခံထားသော အချိန်ကာလအတွင်းသဘောတူညီထားသော ဝန်ဆောင်မှုကိုမရရှိခဲ့လျှင် စားသုံးသူ၏ နစ်နာမှု အတွက်ကုစားခွင့်ပေးရန်ဟုပါရှိရာ စားသုံးသူက ငွေကျပ် (၁၈၀၀၀) နစ်နာပြီးမျက်မှန် ရရှိအောင် ဝန်ဆောင်မှုမပေးနိုင်သဖြင့် စားသုံးသူရေးရာဦးစီးဌာနဦးစီးမှူးရုံးက ပုဒ်မ ၅၂ စီမံ ခန့်ခွဲမှုနည်းလမ်းအရအရေးယူခြင်းဖြင့် မျက်မှန်ဆိုင်ရှင်အား ဥပဒေပါ တာဝန်များကို အကျိုးအကြောင်းဖော်ပြလျက် သတိပေးခြင်း ဆောင်ရွက်ခဲ့ခြင်းဖြင့် တိုင်ကြားမှုတစ်ခုကို ပိတ်သိမ်း မှတ်တမ်းတင်ခဲ့ပါသည်။
DOCA(စစ်ကိုင်း)