ယခုအချိန်သည် မိုးရာသီကာလဖြစ်သည့်အတွက် မိုးရာသီအစားအစာထဲမှာ ချက်စားတာ တစ်မျိုး၊ ကြော်စားတာတစ်မျိုး၊ အတို့အမြုပ်အဖြစ် စားသုံးလို့ရသည့် သီးနှံတစ်မျိုးမှာ မျှစ်ဖြစ် ပါသည်။ ဈေးကွက်သို့ မျှစ်များသည် ဇွန်လ၊ ဇူလိုင်လ၊ ဩဂုတ်လနှင့် စက်တင်ဘာလများတွင် မျှစ်များ ရောက်ရှိလာပြီဖြစ်သဖြင့် စားသုံးသူများ ဝယ်ယူစားသုံးကြပါသည်။ မျှစ်များပေါ်ခါစ အချိန်တွင် ဈေးကောင်းများရရှိပြီး၊ အထွက်လှိုင်လာချိန်တွင် ဈေးများကျလာပါသည်။ ပြည်မြို့ရှိ ဈေးကွက်သို့ ပေါင်းခေါင်း၊ ပေါင်းတလည်နှင့် ပန်းတောင်းဘက်မှ မျှစ်အများဆုံး ဝင်ရောက်လျှက် ရှိပါသည်။ ဝင်ရောက်လာသည့် မျှစ်များထဲတွင် မျှစ်အစိမ်းများပါသလို မျှစ်အကျက်ပြုတ် များလည်းပါကြောင်း သိရှိရပါသည်။ မျှစ်အစိမ်းများကို မျှစ်စပ်များပြုလုပ်၍ရောင်းချသလို မျှစ်ပြုတ်များလုပ်၍ ဒေသတွင်း သာမကဘဲ ရန်ကုန်မြို့သို့ပါ တင်ပို့ရောင်းချကြပါသည်။ မျှစ်များ လှိုင်လှိုင်ပေါ်ချိန်တွင်လည်း မျှစ်ချဉ်များပြုလုပ်ပြီး ရန်ကုန်မြို့ရှိ သီရိမင်္ဂလာ ဈေးသို့တင်ပို့ ရောင်းချကြသလို မြို့တွင်းသို့လည်း ပြန်လည်ရောင်းချကြောင်းသိရပါသည်။ မျှစ်ဈေးနှုန်းများ အနေဖြင့် မျှစ်စပ်တစ်ပိဿာလျှင် (၄၀၀၀) ကျပ်၊ မျှစ်အကျက်ပြုတ် တစ်ပိဿာလျှင် (၇၀၀၀) ကျပ်ဖြင့် ဈေးကွက်တွင် ရောင်းချလျှက်ရှိကြောင်း သိရှိရပါသည်။
DOCA(ပဲခူး)