မန္တလေးတိုင်းဒေသကြီး၊ ကျောက်ဆည်ခရိုင်အတွင်းရှိ တောင်သူများသည် စပါး၊ ပဲမျိုးစုံနှင့် ဆီထွက်သီးနှံများကို အဓိကထားစိုက်ပျိုးကြပြီး၊ ၄င်းသီးနှံများအနက်မှ ပဲတီစိမ်း(မိုးကြို/မိုး)ကိုလည်း အများအပြားစိုက်ပျိုးလျှက်ရှိကြောင်း၊ စိုက်ပျိုးမှုအနေဖြင့် ယခင်(၂၀၂၁-၂၀၂၂)ဘဏ္ဍာနှစ်တွင် (၄၃၁၉၄)ဧက စိုက်ပျိုးနိုင်ခဲ့ပြီး ယခုနှစ် (၂၀၂၂-၂၀၂၃)ဘဏ္ဍာနှစ်တွင် (၂၅၆၈၀)ဧက စိုက်ပျိုးကြောင်း၊ စိုက်ပျိုးမှုအနေဖြင့် သွင်းအားစုစရိတ်များ မြှင့်တက်နေမှုကြောင့် ယခင်နှစ်ထက် လျော့နည်းစိုက်ပျိုးပြီး ပဲတီစိမ်း(မိုးကြို/မိုး)ကို မတ်လတွင် စတင်စိုက်ပျိုးကြပြီး၊ မျိုးအနေဖြင့် ကျောက်စိမ်းမျိုးနှင့် ရေဆင်း(၁၁)မျိုးများကိုသာ အများဆုံးစိုက်ပျိုးကြကြောင်း၊ မျိုးစေ့အနေဖြင့် တစ်ဧကလျှင် (၅-၆)ပြည်ခန့်ကုန်ကျကြောင်း တစ်ဧကကုန်ကျစရိတ်မှာ မျိုး၊ သွင်းအားစု၊ လုပ်သားခ စုစုပေါင်း (၃၀၀၀၀၀/-)ဝန်းကျင် ကုန်ကျကြောင်းသိရှိရပါသည်။ ယခုအချိန် ပဲတီစိမ်းများ ဖြိုင်ဖြိုင်ရိတ်သိမ်းလျှက်ရှိကြောင်း၊ ဇွန်လ တတိယပတ်အထိ မြို့နယ်များ ရိတ်သိမ်းပြီးဧကများမှာ ကျောက်ဆည်မြို့နယ်တွင် (၅၀၀၀)ဧက၊ စဥ့်ကိုင်မြို့နယ် (၃၅၀၀)ဧက၊ မြစ်သားမြို့နယ်တွင် (၁၃၃၉)ဧက ရိတ်သိမ်းပြီး တံတားဦးမြို့နယ်တွင် ရိတ်သိမ်းမှုမရှိသေးကြောင်း သက်ဆိုင်ရာဌာန၏ စာရင်းများအရ သိရှိရပါသည်။ ယခုနှစ်တွင် မိုးကောင်း၍ ထွက်နှုန်းကောင်းပြီး တစ်ဧကအထွက်နှုန်းအနေဖြင့် (၁၅)တင်းထိထွက်ရှိကြောင်း၊ စျေးနှုန်းအနေဖြင့် ယခင်နှစ် ပဲတီစိမ်းတစ်တင်းလျှင် (၃၃၀၀ဝိ/-)စျေးရှိပြီး ယခုနှစ် ပေါ်ဦးပေါ်စအချိန်တွင် ပဲတီစိမ်းတစ်တင်းလျှင် (၄၈၀၀၀/-)ကျပ်စျေးနှုန်းများဖြင့် အရောင်းအဝယ်ဖြစ်ပြီး ယခုဖြိုင်ဖြိုင်ပေါ်ချိန်တွင် ပဲတီစိမ်း တစ်တင်းလျှင် (၄၄၀၀၀/-)ကျပ် စျေးနှုန်းသာရှိပြီး စျေးနှုန်းအနည်းငယ်ကျသွားကြောင်း၊ ယခုနှစ် ပဲတီစိမ်းစျေးနှုန်းမှာ ယခင်နှစ်ထက် စျေးပိုမိုရရှိသောကြောင့် ယခုနှစ်မှာတော့ တောင်သူများအတွက် တွက်ချေကိုက်သီးနှံဖြစ်ပါကြောင်း ပဲတီစိမ်းစိုက်တောင်သူတစ်ဦး၏ ပြောကြားချက်အရ သိရှိရပါသည်။
DOCA(မန္တလေး)