ကယားပြည်နယ်အတွင်း ထွက်ရှိသော ဒေသထွက် အာလူးသည် ပြည်နယ်အတွင်း စားသုံးသူများအတွက် အရေးပါသော စားဖိုဆောင်သီးနှံတမျိုးဖြစ်သည်။ အာလူးမှာ အသီးသီး သည့်အာလူးနှင့် မြေထဲမှတူးဖော်ရသော အာလူးဟူ၍ (၂) မျိုးရှိသည့် အာလူးများအနက် မြေထဲ မှတူးဖော်ရသောအာလူးကို လူအများဆုံးကြိုက်နှစ်သက်ကြပါသည်။ အာလူးကို ဒေသအတွင်း ဒီးမောဆိုမြို့နယ်၊သေးဆူလဲကျေးရွာ၊ ကုန်းသာကျေးရွာ ၊ဒေါပေါ်ကလဲကျေးရွာတို့တွင် စိုက်ပျိုး ထွက်ရှိသော်လည်း အခြားဒေသများဖြစ်သည့် ပင်လောင်း၊ အောင်ပန်း၊ ကလော၊ နောင်တရား မြို့တို့မှအများဆုံး ဝင်ရောက်လျက်ရှိပါသည်။ ယခုအပတ်တွင် ပြည်နယ်အတွင်း အာလူးဝင်ရောက်မှုမှာ ( ၆ )အိတ် ( ၁၂၀ ) ပိဿာရှိခဲ့ပြီး ယခုလက်ရှိ ဈေးကွက်တွင်ဖြစ်ပေါ်နေသော အာလူး ဈေးနှုန်းမှာ အလုံးကြီး တစ်ပိဿာလျှင် (၂၀၀၀)ကျပ်၊ အလုံးသေး တစ်ပိဿာလျှင် (၁၇၀၀)၊ ၁၈၀၀ ကျပ်ဈေးဖြင့် အရောင်းအဝယ်ဖြစ်လျက်ရှိပြီး ယခင် ဇွန်လ ဒုတိယပတ်တွင် အာလူးအလုံးကြီး တစ်ပိဿာလျှင် (၂၅၀၀)ကျပ်၊ အလုံးသေး တစ်ပိဿာလျှင် (၂၃၀၀) ကျပ်သာ ရှိခဲ့ပြီး ယခင်ဇွန်လ ဒုတိယပတ်နှင့် ယခုဇူလိုင်လ ဒုတိယပတ်နှိုင်းယှဉ်မည်ဆိုလျှင် အာလူး အလုံးကြီး တစ်ပိဿာ (၅၀၀)ကျပ်၊ အလုံးသေး တစ်ပိဿာ( ၄၀၀ - ၅၀၀ ) ကျပ်ခန့်ဈေးနှုန်း ကျဆင်းလာကြောင်း၊ ဈေးနှုန်းကျဆင်းရခြင်းမှာ ဈေးကွက်အတွင်း ဒေသထွက် အာလူးများဝင် ရောက်မှုများပြားလာသောကြောင့် ဖြစ်သည်ဟု နောင်ယားဈေးရှိ အာလူးရောင်းချသူတစ်ဦးထံမှ သိရပါတယ်။
DOCA(ကယား)