ပြည်ခရိုင်၊ ပေါင်းတည်မြို့နယ်တွင် တပိုင်တနိုင်စီးပွားရေးလုပ်ငန်းအဖြစ် ကွမ်းရွက်ခြံများ စိုက်ပျိုးလျှက်ရှိပါသည်။ ကွမ်းစိုက်ပျိုးသူတောင်သူများအနေဖြင့် ကွမ်းတိုင်(၁)ထောင်စိုက်ပျိုးလျှင် ကုန်ကျစရိတ်အနေဖြင့် (၁၈)သိန်းခန့်ကုန်ကျ၍ စိုက်ပျိုးပြီး (၃)လအကြာတွင် ကွမ်းရွက်များ စတင်ခူးဆွတ်ရပါသည်။ ကွမ်းခူးရာတွင် (၁၅)ရက်ကြာလျှင် တစ်ကြိမ်ခူးဆွတ်ရ၍ တစ်လလျှင် (၂)ကြိမ်ခန့်ခူးဆွတ်ရပါသည်။ ဆောင်းရာသီအချိန်တွင် ကွမ်းတိုင် (၁)ထောင်ဆွတ်ခူးလျှင် ကွမ်းရွက် ပိဿာချိန် (၈၀-၁၀၀)ခန့်ထွက်ရှိပြီး၊ နွေရာသီတွင် ကွမ်းရွက်ထွက်ရှိမှုနည်းသွားသဖြင့် ပိဿာချိန် ၄၀-၅၀ခန့်ထွက်ရှိသည်ဟု သိရပါသည်။ ကွမ်းရွက်ဈေးနှုန်းများမှာ မိုးရာသီနှင့် ဆောင်းရာသီတွင် ကွမ်းရွက်တစ်ပိဿာလျှင် ၂၀၀၀ကျပ်ခန့်ရရှိပြီး နွေရာသီတွင်ကွမ်းရွက်ထွက်ရှိမှုနည်းသွားသဖြင့် တစ်ပိဿာလျှင် ၈၀၀၀ကျပ်ဈေးအထိရောင်းချရသည်ဟု သိရပါသည်။ ထွက်ရှိလာသော ကွမ်းရွက် များကို ပဲခူးတိုင်းအတွင်းရှိ မြို့နယ်များနှင့် ရန်ကုန်မြို့သို့ တင်ပို့ရောင်းချကြောင်း သိရပါသည်။
ကွမ်းရွက်ကို ကွမ်းယာအဖြစ် မြန်မာလူမျိုးအများစုမှာ ရှေးမြန်မာမင်းများလက်ထက်မှစ၍ စားသုံးလာကြပြီး ယခုအချိန်အထိ လူကြီး၊ လူငယ်မရွေး စားသုံးကြသည့်အတွက် ကွမ်းစိုက်တောင်သူများအနေဖြင့် ပုံမှန်ဝင်ငွေရရှိပြီး တပိုင်တနိုင်စိုက်ပျိုးခြင်းမှ စီးပွားဖြစ် စိုက်ပျိုးလာမည် ဆိုပါက ပိုမိုအကျိုးအမြတ်များဖြစ်ထွန်းလာမည်ဖြစ်ကြောင်းလေ့လာ သိရှိရပါသည်။
DOCA(ပဲခူး)