ပြည်မြို့ဈေးကွက်တွင်ရောင်းချနေသော ဖူးစားပြောင်းများကို သဲကုန်းမြို့နယ် ပုတီးကုန်း၊ သဲကုန်း နှင့် ပြည်မြို့နယ်အတွင်းရှိ မှော်ဇာကျေးရွာများ၌ အများဆုံး စိုက်ပျိုးကြောင်း သိရှိရပါသည်။ ထွက်ရှိ လာသော ဖူးစားပြောင်းများကို ဒေသတွင်းစားသုံးရန်နှင့် ရန်ကုန်ဈေးကွက်သို့ တင်ပို့ ရောင်းချ လျှက်ရှိပါသည်။ ပုတီးကုန်းပြောင်းကို ဒေသအခေါ် နတ်ပြည်မွှေး နှင့် ကာလာဖိုက်လို့ ခေါ်ဆိုကြပါသည်။ ဈေးနှုန်းများအနေဖြင့် တစ်ဖူးလျှင် ၂၀၀ ကျပ်ဖြင့်ရောင်းချလျှက်ရှိပြီး ပြောင်းဝါခေါ် သကြားပြောင်း တစ်ဖူးလျှင် ၃၀၀ကျပ်ဖြင့် ရောင်းချကြောင်း သိရှိရပါသည်။
ပဲခူးတိုင်းဒေသကြီး၊ ပြည်ခရိုင်၊ သဲကုန်းမြို့နယ်တွင် မတ်ပဲစိုက်ဧက (၄)သောင်းကျော် စိုက်ပျိုးရိတ်သိမ်းပြီး တစ်ဧကလျှင် (၁၅)တင်းထွက်ရှိပါသည်။ မတ်ပဲပေါ်ခါစအချိန်တွင် မတ်ပဲ တစ်တင်းလျှင် ၄၂၀၀၀ကျပ်မှ ၄၅၀၀၀ကျပ်ထိ ဈေးရှိခဲ့ပြီး ဇွန်လနောက်ဆုံးပတ်တွင် ၅၆၀၀၀ ကျပ်အထိ မြင့်တက် လာခဲ့ပါသည်။ ယခုဇူလိုင်လ ဒုတိယပတ်တွင် မတ်ပဲဈေးတစ်တင်းလျှင် ၅၄၀၀၀ကျပ်ထိ ကျဆင်းလာခဲ့ပါသည်။ ထိုသို့မတ်ပဲဈေးများကျဆင်းလာရခြင်းမှာ မတ်ပဲစိုက် တောင်သူလက်ဝယ်တွင် ပဲလက်ကျန် နည်းသွားပြီး၊ ပွဲရုံများတွင် ဝယ်လိုအားနည်းသွားသဖြင့် ဈေးအနည်းငယ်ကျဆင်း သွားသည်ဟု သိရှိရပါသည်။
DOCA(ပဲခူး)