နေပြည်တော်ကောင်စီ ဆီကုန်သည်နှင့်ဆီလုပ်ငန်းရှင်များအသင်းက နေပြည်တော်ကောင်စီ နယ်မြေအတွင်းရှိ စားသုံးသူပြည်သူများ စားသုံးဆီကိုသက်သာသည့် ဈေးနှုန်းဖြင့် ဝယ်ယူနိုင်ရန် ရည်ရွယ်၍ စားသုံးဆီတစ်ပိဿာလျှင် ငွေကျပ် ၃၉၀၀ နှုန်းဖြင့် ဆက်လက်ဖြန့်ဖြူးရောင်းချလျက်ရှိရာ ၂၃-၇-၂၀၂၂ ရက်နေ့၌ ပျဥ်းမနားမြို့နယ်၊ သူဌေးကုန်းကျေးရွာ အနောက်ပိုင်းနှင့် သစ်လေးလုံးကျေးရွာ အရှေ့ပိုင်းတို့တွင် အဖွဲ့ဝင် ဦးပြည့်ဖြိုးအောင်မှ ပိဿာချိန် ၄၄၀ ကိုလည်းကောင်း၊ ၂၄-၇-၂၀၂၂ ရက်နေ့၌ တပ်ကုန်းမြို့နယ်၊ ရွှေမြို့ကျေးရွာတွင် အဖွဲ့ဝင် ဒေါ်နုနုအေး(NNN)မှ ပိဿာချိန် ၄၄၀ ရောင်းချပေးခဲ့ကြောင်း သိရှိရသည်။
ဆက်လက်၍ ယနေ့မှာတော့“ မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းရဲ့ လမ်းညွှန်ချက်အရ ဆီကုန်သည်နှင့်ဆီလုပ်ငန်းရှင်များအသင်းနှင့် စားသုံးသူရေးရာဦးစီးဌာနမှ ဝန်ထမ်းများပူးပေါင်း၍ နေပြည်တော်ကောင်စီနယ်မြေ၊ ပျဉ်းမနားမြို့နယ်၊ သကြားစက်ကျေးရွာ၊ သနပ်ပင်ဆိပ်ရွာတို့တွင် စားသုံးသူပြည်သူများလက်ဝယ်အရောက် စားသုံးဆီတစ်ပိဿာကို ငွေကျပ် ၃၉၀၀နှုန်းနဲ့ ဈေးကားတစ်စီးဖြင့် ဆီပိဿာချိန် (၃၃၀) လှည့်လည် ရောင်းချပေးခဲ့ကြောင်း” အဖွဲ့ဝင် ဦးခင်မောင်ဝင်းမှပြောသည်။
“ ယခုလို စားသုံးသူပြည်သူများလက်ဝယ်အရောက်တစ်ပိဿာလျှင် ငွေကျပ် ၃၉၀၀ နှုန်းဖြင့် လာရောက်ရောင်းချသည့်အတွက် ပြည်သူများအနေဖြင့် အဆင်ပြေမှုများစွာရှိကြောင်း၊ သက်သာ သောဈေးနှုန်းနှင့် မိသားစုတစ်ခုတွင် တစ်ပိဿာနှုန်းဝယ်ယူသုံးစွဲနိုင်သည့်အတွက် အလွန်ပင် ဝမ်းသာကြောင်း၊ မကြာခဏရောင်းချပေးမည်ဆိုပါက စားသုံးသူပြည်သူများအတွက် အဆင်ပြေမှု များစွာရှိနိုင်ကြောင်း၊ အသင်းဥက္ကဌနှင့် ရောင်းချပေးသည့် အဖွဲ့ဝင်များကိုလည်းကောင်း၊ ကူညီ ဆောင်ရွက်ပေးသည့် စားသုံးသူရေးရာဦးစီးဌာနမှ ဝန်ထမ်းများကိုလည်းအမှန်တကယ် ကျေးဇူးတင် ရှိကြောင်း၊ ယခုလိုရောင်းချခြင်းသည် ကျေးရွာနေပြည်သူများအတွက် အဆင်ပြေမှု များစွာရှိပါတယ်” ဟု စားသုံးဆီလာရောက်ဝယ်ယူသူများထံမှ သိရှိရပါသည်။
နေပြည်တော်ကောင်စီ ဆီကုန်သည်နှင့်ဆီလုပ်ငန်းရှင်များအသင်းနှင့် စားသုံးသူရေးရာဦးစီးဌာန၊ နေပြည်တော်ဦးစီးမှူးရုံးမှဝန်ထမ်းများပူးပေါင်း၍ နေပြည်တော်ကောင်စီနယ်မြေအတွင်း လှည့်လည်ရောင်းချမှုများ ပိုမိုလုပ်ဆောင်နိုင်ရန် ဆက်လက်ကြိုးပမ်းဆောင်ရွက်လျက်ရှိပါကြောင်း သတင်းရရှိပါသည်။
DOCA(ပြည်ထောင်စုနယ်မြေ)