ကလေးဝမြို့နယ်သည် စိုက်ပျိုးရေးနှင့် ကုန်သွယ်ရေးကို အဓိကဆောင်ရွက်နေသည့်မြို့ဖြစ်ပြီး စိုက်ပျိုးသီးနှံများအဖြစ် စပါး၊ ပဲ၊ ဆီထွက်သီးနှံများကိုသာ အဓိကထား စိုက်ပျိုးလျက်ရှိပါသည်။ ရံဖန်ရံခါများတွင် မြစ်ရေကြီးမြှင့်မှုများကြောင့် သီးနှံများ စိုက်ပျိုးရာတွင် အချိန်ကာလ နောက်ကျမှ စိုက်ပျိုးရခြင်းများလည်း ရှိပါသည်။ ကလေးဝမြို့သည် ဆိပ်ကမ်းမြို့တစ်မြို့ ဖြစ်သည့်အတွက် အခြားမြို့များထက် ကုန်းလမ်း၊ ရေလမ်း လမ်းနှစ်သွယ်ရှိသည့်အတွက် အချက်အခြာကျသော မြို့တစ်မြို့ ဖြစ်ပါသည်။
ယခုနှစ်တွင် ဆီထွက်သီးနှံများအနေဖြင့် အမြင့်ဈေးနှုန်းသို့ ရောက်ရှိကာ အရောင်းအဝယ် ဖြစ်လျက်ရှိပါသည်။ ဆီထွက်သီးနှံဖြစ်သည့် မြေပဲဆံပေါ်စတွင် မြေပဲဆံ ( ၁၆ ) ပြည်တစ်တင်းလျှင် ( ၄၂၀၀၀ ) ကျပ်မှ ( ၄၇၀၀၀ ) ကျပ်၊ နေကြာစေ့ ( ၁၆ ) ပြည်တစ်တင်းလျှင် ( ၂၀၀၀၀ ) ကျပ်မှ ( ၂၂၀၀၀ ) ကျပ် ပေါက်ဈေးနှုန်းဖြင့် ဝယ်ယူကြိတ်ခွဲရပြီး မြေပဲဆီ ( ၁၀ ) ပိဿာ တစ်ပုံးလျှင် ( ၇၀၀၀၀ ) ကျပ်၊ နေကြာဆီ ( ၁၀ ) ပိဿာ တစ်ပုံးလျှင် ( ၅၈၀၀၀ ) ကျပ် ဈေးနှုန်းဖြင့် ရောင်းချခဲ့ပါကြောင်း၊ ယခုလတွင် မြေပဲဆံ ( ၁၆ ) ပြည်တစ်တင်းလျှင် ( ၆၄၀၀၀ ) ကျပ်၊ နေကြာဆံ ( ၁၆ ) ပြည်တစ်တင်းလျှင် ( ၂၈၀၀၀ ) ကျပ် ပေါက်ဈေးနှုန်းရှိပြီး မြေပဲဆီ ( ၁၀ ) ပိဿာလျှင် ( ၉၅၀၀၀ ) ကျပ်၊ နေကြာဆီ ( ၁၀ ) ပိဿာလျှင် ( ၈၃၀၀၀ ) ကျပ် ဈေးနှုန်းသို့ ရောက်ရှိခဲ့ပါသည်။ ကလေးဝမြို့နယ်မှ ဆီထွက်သီးနှံများ ထွက်ရှိမှုများအရ နှစ်စဉ် ဧပြီ၊ မေ၊ ဇွန်လများတွင်သာ အများဆုံး ကြိတ်ခွဲရပြီး ဇူလိုင်လ နောက်ပိုင်းတွင် ဆီထွက်သီးနှံများမရှိတော့သည့်အတွက် ဆီသားအဖြစ်သာ အနည်းငယ် ရောင်းချလျက်ရှိကြောင်း သတင်းရရှိပါသည်။
DOCA(စစ်ကိုင်း)