စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်း ဒေသကြီး၊ တိုင်းဒေသကြီးဦးစီးမှူးနှင့် ပခုက္ကူခရိုင်ဦးစီးမှူး၏ လမ်းညွှန်မှုဖြင့် ၂၀၂၂ ခုနှစ်၊ ဩဂုတ်လ၊ (၁၀)ရက်နေ့၊နေ့လယ် (၁၃:၃၀)နာရီအချိန်တွင် ပခုက္ကူမြို့၊အမှတ် (၈)ရပ်ကွက်၊မူလတန်းကြိုကျောင်းတွင် စားသုံးသူကာကွယ်ရေး အသိပညာပေးဟောပြောပွဲ ပြုလုပ်ခဲ့ရာ ကျောင်းသားမိဘ (၁၂၆) ဦးနှင့် ဆရာ/ ဆရာမ (၁၁) ဦးတို့တက်ရောက်ခဲ့ကြပါသည်။
ဟောပြောပွဲတွင် လူမှုဝန်ထမ်းဦးစီးဌာနမှ ခရိုင်ဦးစီးမှူး ဒေါ်ကြွယ်ကြွယ်ဝင်းက ကြိုဆိုနှုတ် ခွန်းဆက်စကား ပြောကြားခဲ့ပြီး ဦးစီးမှူး ဒေါ်ကြည်ကြည်စိုးက ဌာန၏သမိုင်းကြောင်း၊ ဌာန၏ မျှော်မှန်းချက်၊ရည်မှန်းချက်များနှင့် ယခုဌာနမှ ဆောင်ရွက်နေသည့် လုပ်ငန်းများအကြောင်းကို ရှင်းလင်း ပြောကြားပြီး ဌာန၏ မျှော်မှန်းချက်ဖြစ်သော “စားသုံးသူများလုံခြုံ စိတ်ချရမှုရှိစေရန်” ဟုသော ရည်ရွယ်ချက်များပြည့်စေရန် စားသုံးသူ မိဘပြည်သူများ ပူးပေါင်းလိုက်နာဆောင်ရွက်မှသာလျှင် အောင်မြင်မည်ဖြစ်ကြောင်း ဒါကြောင့် ယခုလို အသိပညာပေးပွဲများ ပြုလုပ်ကျင်းပခြင်းဖြစ်ကြောင်းများကို ရှင်းလင်းဆွေးနွေးခဲ့ပါသည်။
ဆက်လက်၍ ဌာနခွဲစာရေး ဒေါ်ဝါဝါကြည်က စားသုံးသူကာကွယ်ရေး၊ စားသုံးသူ၊ ကုန်စည်၊ ဝန်ဆောင်မှုများ၏ အဓိပ္ပယ်များအား ရှင်းလင်းခြင်း၊ စားသုံးသူများ ရရှိသည့် အခွင့်အရေးများနှင့် လိုက်နာရမည့် တာဝန်များကို ဆွေးနွေးပြောကြားခဲ့ပြီး အခုလိုသိရှိမှသာ အခွင့်အရေးများကို တောင်း ခံနိုင်မည်ဖြစ်ကြောင်း၊ စားသုံးသူများ လိုက်နာရမည့် တာဝန်များကိုလည်း တိတိကျကျ လိုက်နာရန် လိုအပ်ကြောင်းများကိုလည်း ရှင်းလင်းဆွေးနွေးခဲ့ပါသည်။
ဆက်လက်ပြီး ဒု-ဦးစီးမှူး ဦးကျော်စိုးက အခန်း (၁၈) ပါ ကုန်စည်များတွင် ဖော်ပြရမည့် ကုန်အညွှန်းအမှတ်အသားများကို နမူနာပစ္စည်းများပြသ၍ ကျယ်ကျယ်ပြန့်ပြန့် ရှင်းလင်းပြီး ယခုကဲ့သို့ ကုန်အညွှန်းအမှတ်အသားများ မပါလျှင် ဝယ်ယူ၊ စားသောက်၊ ရောင်းချခြင်း မပြုစေချင်ကြောင်း၊ ကုန်အညွှန်းအမှတ်အသားများ ပြည့်စုံမှသာလျှင် သုံးစွဲစေချင်ကြောင်း ရှင်းလင်းဆွေးနွေးခဲ့ပါသည်။
နိဂုံးချုပ်အနေဖြင့် ဦးစီးမှူး ဒေါ်ကြည်ကြည်စိုးက မိဘပြည်သူများ အခွင့်အရေးများကိုသိရှိပြီး နစ်နာဆုံးရှုံးမှုရှိခဲ့လျှင် တိုင်ကြားနိုင်ရန် စားသုံးသူသတင်းပြန်ကြားရေးနှင့် လက်ခံဆောင်ရွက်ရေးစင်တာ “CICC” ရုံးများဖွင့်လှစ်ထားရှိပြီးဖြစ်ကြောင်း၊ တိုင်ကြားနိုင်ကြောင်း၊ ဒါအပြင် Facebook စာ မျက်နှာတွင်လည်းကောင်း၊ DOCA Myanmar Application တွင်လည်းကောင်း၊ Consumer Call Center ဖွင့်လှစ်ထားသည့် (1535) တွင်လည်းကောင်း တိုင်ကြားနိုင်ကြောင်းများနှင့် တိုင်ကြားလျှင် ဖြေရှင်းဆောင်ရွက်ပေးလို့မရသည့်ကိစ္စများကိုလည်း ရှင်းလင်းပြောကြားခဲ့ပြီး တိုင်ကြားနိုင်သူများအကြောင်းကိုလည်း ကျယ်ကျယ်ပြန့်ပြန့် ရှင်းလင်းဆွေးနွေးခဲ့ပါသည်။ တက်ရောက်လာသည့် မိဘပြည်သူများနှင့် ဆရာ၊ ဆရာမများက သိလိုသည်များကို မေးမြန်းခဲ့ရာ ပြန်လည်ဖြေကြားခဲ့ပြီး လက်ကမ်းစာစောင်များလည်း ဖြန့်ဝေခဲ့ပါသည်။
DOCA(မကွေး)