စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင်၊ ဒု-ခရိုင်ဦးစီးမှူး ဒေါ်မွန်မွန်စိုးနှင့် ဝန်ထမ်းများအဖွဲ့သည် စားသုံးသူပြည်သူများ ဆီစားသုံးမှုလျော့ချရေးနှင့် ပြည်တွင်း၌စားသုံးဆီဖူလုံရေးအတွက် ရည်ရွယ်၍ ဩဂုတ်လ(၁၀)ရက်၊ နံနက်(၁၁:၀၀)နာရီ အချိန်တွင် ပခုက္ကူမြို့ပေါ်ရှိ "ရွှေပြည်လမ်း" အဆင့်မြင့်နည်းပညာသုံး ကြက်သွန်ကြော်လုပ်ငန်းနှင့် ပဲကြော်ဖိုလုပ်ငန်းများသို့ စားအုန်းဆီ သုံးစွဲမှုလိုအပ်ချက်များအားကွင်းဆင်း မေးမြန်းခဲ့ပါသည်။
"ရွှေပြည်လမ်း"ကြက်သွန်ကြော်လုပ်ငန်းတာဝန်ခံအနေဖြင့် ကြက်သွန်ကြော်လုပ်ငန်း ကို အကြော်စက်ကြီးများဖြင့် ကြက်သွန်ကြော်ရန် ရည်ရွယ်ထားသော်လည်း လက်ရှိအချိန် စားအုန်းဆီမြင့်တက်နေမှုကြောင့် မည်သို့မျှ အဆင်မပြေနိုင်ကြောင်း၊ စက်ကြီး(၃)လုံး၊ စက်လေး(၃)လုံး ဝယ်ယူထားသော်လည်း ယခုအချိန်တွင် လက်ဖြင့်ကြော်သည့် ဖိုနှင့်သာ လုပ်ငန်းလည်ပတ်နိုင်ကြောင်း၊ စက်ကြီးများမှာ ပေပါ(၅)လုံးခန့် အခံဆီအနေဖြင့် ထည့်ရ သည့်အတွက်ယခုဆီဈေးနှုန်းဖြင့် မည်သို့မျှ အဆင်မပြေနိုင်ကြောင်း၊ ထို့ကြောင့် အော်ဒါအမှာ ရှိမှသာ ကြက်သွန်ကြော်ကို ကြော်ပါကြောင်း၊ ယခင်ဆီဈေးဖြင့် ကြော်ထားသည့်အတွက် ယခင်ဈေးဖြင့်သာ ရောင်းချပါကြောင်း၊ အမြတ်နည်းနည်းဖြင့် ဖောက်သည်မပျက်စေရန် ၊ လုပ်သားများ အခက်အခဲမဖြစ်စေရန် လက်ဖြင့် ကြော်သည့် မီးဖိုဆောက်လုပ်၍ လုပ်ငန်းဆောင်ရွက်နေပါကြောင်းရှင်းလင်းဖြေကြားပါသည်။
ပဲကြော်လုပ်ငန်းရှင်များအနေဖြင့် စားအုန်းဆီ ဈေးနှုန်းမြင့်တက်နေမှုကြောင့် လုပ်ငန်းများခေတ္တရပ်နားထားကြောင်း၊ အော်ဒါအမှာရှိမှသာ လက်ရှိပေါက်ဈေးနှုန်းဖြင့် လုပ်ငန်း လည်ပတ်ကြောင်း၊(၁)လလျှင် လဝက်ခန့်သာလည်ပတ်နိုင်ကြောင်း၊ စားအုန်းဆီကို ရည်ညွှန်း ဈေးဖြင့် ခွဲတမ်းရမည်ဆိုလျှင် အဆင်ပြေပါကြောင်း၊ ယခုအချိန်တွင် တစ်ပိဿာကို (၈၀၀၀/ ၈၇၀၀)ကျပ်ဖြင့်ဝယ်၍ သုံးစွဲနေရကြောင်း၊ ပဲဈေးနှုန်းမှာ (၁)တင်းလျှင်(၆၀၀၀၀) ကျပ်ဝန်း ကျင်ခန့်ဝယ်ရကြောင်း၊ ပဲဝယ်ယူရာတွင် အခက်အခဲမရှိဘဲ စားအုန်းဆီဈေးနှုန်း ကြီးမြင့်မှုကြောင့် တစ်ပတ်လျှင်(၂/၃)ရက်ခန့်သာ လည်ပတ်နိုင်ကြောင်း၊ ပခုက္ကူမြို့ပေါ်တွင် စက်ဖြင့် ပဲကြော်သည့်လုပ်ငန်းရှင်မှာ (၂)ဦးသာရှိကြောင်း၊ ကျန်သည့်ပဲ ကြော်လုပ်ငန်း ရှင်များမှာ လက်ဖြင့်သာကြော်ပါကြောင်း၊ ပဲကြော်များကို ရန်ကုန်၊ မန္တလေး နှင့် မုံရွာမြို့များသို့ အဓိက ထားတင်ပို့ကြောင်း၊ အချို့ပဲကြော်လုပ်ငန်းရှင်များမှာ မိမိတို့ တံဆိပ်ကို အသုံးမပြုရဘဲ ကုန်ကြမ်းအနေဖြင့်သာ တင်ပို့ကြောင်း၊ ဝါစေ့ဆီသုံးစွဲသော ပဲကြော်လုပ်ငန်းရှင်များမှာ တစ်ပိဿာလျှင်(၆၇၀၀)ကျပ်ဖြင့် တောင်သာ၊ မြင်းခြံမြို့များမှ ဝယ်ယူရကြောင်း၊ စားအုန်းဆီ ဝယ်ယူရန်ခက်ခဲလျှင် ဝါစေ့ဆီကို အသုံးပြုရန်ဝယ်ယူထားကြောင်း၊ စားအုန်းဆီ ဈေးနှုန်း သင့်တင့်မည်ဆိုလျှင် လုပ်ငန်းကိုအမြဲတမ်းလည်ပတ်နိုင်မည်ဟုသုံးသပ်မိပါကြောင်း၊ လုပ်ငန်း လည်ပတ်နိုင်လျှင် ဒေသခံများအတွက် အလုပ်အကိုင်အခွင့်အလမ်းများ ဖန်တီးပေးနိုင်၍ စားဝတ်နေရေး အဆင်ပြေနိုင်မည်ဖြစ်ပါကြောင်း လုပ်ငန်းရှင်၏ပြောကြားချက်အရ သိရှိရပါသည်။
DOCA(မကွေး)