စားသုံးသူကာကွယ်ရေးဆိုသည်မှာ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ စားသုံးသူ၏အခွင့်အရေးနှင့် အကျိုးစီးပွားကို ကာကွယ်ပေးခြင်းနှင့် စားသုံးသူနှင့် စီးပွားရေးလုပ်ငန်း ရှင်တို့အကြား ကော်မရှင်နှင့် ကော်မတီအဆင့်ဆင့်တို့မှ သတ်မှတ်ဆောင်ရွက်ပေးသည့် မျှတသော လုပ်ငန်းစဉ်ကိုဆိုသည်ဟု စားသုံးသူကာကွယ်ရေးဥပဒေတွင် အဓိပ္ပာယ်ဖွင့်ဆိုထားပါသည်။ အများ နားလည်လွယ်မည့် အရပ်စကားဖြင့် တင်ပြရလျှင် ဥပဒေပါ စားသုံးသူ၏ အခွင့်အရေးရရှိစေရန်နှင့် စားသုံးသူနစ်နာဆုံးရှုံးမှု မရှိစေရန်ဆောင်ရွက်ပေးခြင်း၊ စားသုံးသူနှင့် စီးပွားရေးလုပ်ငန်းရှင်တို့ အကြား အငြင်းပွားမှုဖြစ်ပေါ်ပါက ကော်မရှင်နှင့် ကော်မရှင်အဆင့်ဆင့်က မျှတသည့် အဆုံးအဖြတ် ပေးခြင်းကို ဆိုလိုပါသည်။
စားသုံးသူဆိုသည်မှာ ကုန်စည် သို့မဟုတ် ဝန်ဆောင်မှုကို ကုန်သွယ်ရောင်းဝယ်မှုပြုရန် သို့မဟုတ် အသက်မွေးဝမ်းကြောင်းပြုရန် မဟုတ်ဘဲ ကိုယ်တိုင်သုံးစွဲမှုအတွက်သော်လည်းကောင်း၊ အခြားသူအတွက်သော်လည်းကောင်း ရည်ရွယ်၍ ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည် ချေးငှားခြင်းပြုလုပ်သူများ သို့မဟုတ် ပေးကမ်းထောက်ပံ့ခြင်းခံရသူများကို ဆိုသည်ဟု အဓိပ္ပာယ် ဖွင့်ဆိုထားပါသဖြင့် ကုန်စည် သို့မဟုတ် ဝန်ဆောင်မှုတစ်ခုခုကို ကိုယ်တိုင် ဝယ်ယူသုံးစွဲသူသည် လည်းကောင်း၊ အခြားသူတစ်ဦးက မေတ္တာလက်ဆောင်ပေးခြင်း၊ ချေးငှားခြင်း၊ ပေးကမ်းထောက်ပံ့ ခြင်းကြောင့် ရယူသုံးစွဲသူသည်လည်းကောင်း စားသုံးသူဖြစ်ပါသည်။
စီးပွားရေးလုပ်ငန်းရှင်ဆိုသည်မှာ ကုန်စည်ကို ထုတ်လုပ်ခြင်း၊ ဖြန့်ဖြူးခြင်း၊ သိုလှောင် ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့ တင်သွင်းခြင်း၊ ပြန်လည်ရောင်းချပေးခြင်းကိုဖြစ်စေ၊ ထောက်ပံ့ပေးခြင်းကိုဖြစ်စေ၊ ဝန်ဆောင်မှုပေး ခြင်းကိုဖြစ်စေ၊ ကြော်ငြာလုပ်ငန်းလုပ်ကိုင်ခြင်းကိုဖြစ်စေ တစ်ဦးချင်းသော်လည်းကောင်း၊ အဖွဲ့ အစည်းနှင့်သော်လည်းကောင်း ဆောင်ရွက်သူကိုဆိုသည်ဟု အဓိပ္ပာယ်ဖွင့်ဆိုထားပါသဖြင့် ကုန်စည် ထုတ်လုပ်သူများ၊ ဖြန့်ဖြူးရောင်းချသူများ၊ ဝန်ဆောင်မှုပေးသူများအားလုံးသည် စီးပွားရေးလုပ်ငန်း ရှင်တွင် အကျုံးဝင်ပါသည်။
စားသုံးသူကာကွယ်ရေးဥပဒေတွင် စီးပွားရေးလုပ်ငန်းရှင်များ၏ တာဝန်များ၊ ကုန်စည်နှင့် စပ်လျဉ်း၍အာမခံချက်ပေးခြင်း၊ ကုန်စည်နှင့်စပ်လျဉ်း၍ အာမခံပေးထားမှုအပေါ် စားသုံးသူက တောင်းဆိုနိုင်သည့်အခွင့်အရေး၊ ဝန်ဆောင်မှုနှင့်စပ်လျဉ်း၍ အာမခံချက်ပေးခြင်း၊ ဝန်ဆောင်မှုလုပ် ငန်းများ၏ အာမခံချက်နှင့်စပ်လျဉ်း၍ စားသုံးသူက တောင်းဆိုနိုင်သည့် အခွင့်အရေးများကို တိကျ စွာပြဌာန်းထားပါသည်။ ဥပဒေပါ အဆိုပါပြဌာန်းချက်များသည် ဖြောင့်မတ်မှန်ကန်သည့် စီးပွားရေး လုပ်ငန်းရှင်တစ်ဦးအဖို့ အထူးတလည် လိုက်နာဆောင်ရွက်ရန် လိုအပ်မည်မဟုတ်ပါ။
စီးပွားရေးလုပ်ငန်းရှင်သည် ကုန်စည် သို့မဟုတ် ဝန်ဆောင်မှု၏ အာမခံချက်၊ သတ်မှတ် ချက်များနှင့်စပ်လျဉ်း၍ စားသုံးသူများသိရှိနိုင်ရန် သတင်းအချက်အလက်များ ပေးရပါမည်။ စားသုံး သူကို ခွဲခြားမှုမရှိဘဲ ဖြောင့်မတ်မှန်ကန်စွာ ဆက်ဆံရပါမည်။ စီးပွားရေးလုပ်ငန်း လုပ်ကိုင်ရာတွင် စီးပွားရေးကျင့်ဝတ်၊ စည်းကမ်းနှင့်အညီ ဖြောင့်မတ်မှန်ကန်စွာ ဆောင်ရွက်ရပါမည်။ ကုန်သွယ်မှု ပြုရန်နှင့် ထုတ်လုပ်မှုပြုရန် အလို့ငှာ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ သက်ဆိုင်ရာ အစိုးရဌာန၊ အစိုးရအဖွဲ့အစည်းများက သတ်မှတ်ထားသည့် အရည်အသွေး စံသတ်မှတ်ချက်များ အပေါ် အခြေခံ၍ အာမခံချက်ပေးရပါမည်။ အရည်အသွေးစမ်းသပ်ရန်လိုအပ်သော ကုန်စည်နှင့် စပ်လျဉ်း၍ ဝယ်ယူခြင်းမပြုမီ စားသုံးသူများကို စမ်းသပ်နိုင်သည့် အခွင့်အရေးပေးရပါမည်။
ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ ထပ်မံပေးချေရမည့်တန်ဖိုးကို စားသုံးသူ က ဝယ်ယူအသုံးမပြုမီ သိရှိစေရန် အတိအလင်း ဖော်ပြပေးရပါမည်။ စားသုံးသူနစ်နာဆုံးရှုံးမှု ဖြစ် ပွားစေသည့် ကုန်စည် သို့မဟုတ် ဝန်ဆောင်မှုကို တိုက်ရိုက်ရောင်းချခြင်း သို့မဟုတ် သွယ်ဝိုက် ရောင်းချခြင်းကို ရှောင်ကြည်ရပါမည်။ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ ကတိပြုထား သော အာမခံချက်နှင့် ကိုက်ညီမှုမရှိပါက ကတိပြုထားသည့်အတိုင်း တာဝန်ယူဆောင်ရွက်ပေးရပါ မည်။ အငြင်းပွားမှုကို ညှိနှိုင်းဖြေရှင်းနေစဉ် လူထုဆက်သွယ်ရေး နည်းလမ်းများဖြင့်ဖြစ်စေ၊ အခြား နည်းလမ်းများဖြင့်ဖြစ်စေ စားသုံးသူအပေါ် ထိခိုက်နစ်နာစေရန် ခြိမ်းခြောက်ခြင်း၊ မဟုတ်မမှန် ပြော ဆိုခြင်း၊ ရေးသားခြင်းနှင့် ပြုမူခြင်းတို့ကို ရှောင်ကြဉ်ရပါမည်။
ထုတ်လုပ်သည့်ကုန်စည် သို့မဟုတ် ဝန်ဆောင်မှုတွင် ဘေးအန္တရာယ်ရှိကြောင်းကို မိမိ ကိုယ်တိုင်သော်လည်းကောင်း၊ အခြားနည်းလမ်း တစ်ခုခုအရသော်လည်းကောင်း သိရှိလျှင် အဆိုပါ အကြောင်းအရာအား ဦးစီးဌာနနှင့် စားသုံးသူများထံ အချိန်မီသိရှိနိုင်စေရန် လူထုဆက်သွယ်ရေး နည်းလမ်းဖြင့်ဖြစ်စေ၊ အခြားနည်းလမ်းများဖြင့်ဖြစ်စေ အသိပေးရပါမည်။ ကုန်စည် သို့မဟုတ် ဝန် ဆောင်မှုနှင့်စပ်လျဉ်း၍ အငြင်းပွားမှုကိစ္စများ ဖြစ်ပေါ်ခဲ့ပါက သက်ဆိုင်ရာကော်မတီ၏ ဖြေရှင်း ဆောင်ရွက်ပေးမှုနှင့် ဆုံးဖြတ်ချက်တို့ကို အလေးထား လိုက်နာဆောင်ရွက်ရပါမည်။
စီးပွားရေးလုပ်ငန်းရှင်သည် ရောင်းချသည့်ကုန်စည်တွင် သာမန်အားဖြင့် မမြင်နိုင်သော သဘာဝပြောင်းလဲနိုင်မှုနှင့် စပ်လျဉ်းသည့် အချက်အလက်များကို စားသုံးသူအား ထင်ရှားစွာဖော်ပြ၍ အသိပေးရပါမည်။ ကုန်စည်နှင့်စပ်လျဉ်း၍ ဖော်ပြရမည့် အာမခံချက်များတွင် စားသုံးသူက လက်ခံ သုံးစွဲနိုင်သော အရည်အသွေးရှိရပါမည်။ ကုန်စည်၏ အရည်အသွေး၊ အချိန်အတွယ်ပမာဏနှင့် အလေးချိန်မှန်ကန်မှု ရှိရပါမည်။ ဘေးအန္တရာယ်ကင်းရှင်းစေရပါမည်။ သုံးစွဲသူ၏ လိုအပ်ချက်အတွက် သင့်လျော်မှုရှိရပါမည်။ နမူနာပစ္စည်းတွင် ဖော်ပြထားသည့်အတိုင်း တူညီစွာပါရှိရပါမည်။ အာမခံ ချက် ပေးထားသည့်ကာလ သို့မဟုတ် အသုံးပြုနိုင်မည့် ကာလအတွင်း အပိုပစ္စည်းရရှိနိုင်ခြင်း၊ ပြန် လည်ပြုပြင်နိုင်ခြင်း သို့မဟုတ် လဲလှယ်နိုင်ခြင်းတို့ ရှိစေရပါမည်။ ကုန်အညွှန်းအမှတ်အသားပါ အချက်အလက်၊ ကြော်ငြာ၊ ကမ်းလှမ်းချက် သို့မဟုတ် အရောင်းမြှင့်တင်ခြင်းတွင် ပါဝင်သော ဖော်ပြ ချက်နှင့် ကိုက်ညီမှုရှိရပါမည်။
စီးပွားရေးလုပ်ငန်းရှင်သည် စားသုံးသူအပေါ် အာမခံချက်ပေးထားသည့်ကာလ သို့မဟုတ် အသုံးပြုနိုင်မည့်ကာလအတွင်း အသုံးပြုနိုင်ရန် ကုန်စည်ကို အရည်အသွေးပြည့်မီအောင် ထုတ်လုပ် ခြင်းမပြုလျှင်ဖြစ်စေ၊ သတင်းအချက်အလက်ဖော်ပြခြင်း မရှိလျှင်ဖြစ်စေ စားသုံးသူသည် အာမခံချက် ပေးထားသည့်အတိုင်း ပြန်လည်ပြင်ဆင်လဲလှယ်ပေးရန် တောင်းဆိုပိုင်ခွင့်ရှိရပါသည်။ အပိုပစ္စည်း မရရှိနိုင်လျှင် ထုတ်လုပ်သူထံမှ ကုန်စည်တန်ဖိုး သို့မဟုတ် ဝယ်ယူသုံးစွဲသည့် ကုန်စည် သို့မဟုတ် မူလအရည်အသွေးအောက် မနိမ့်သော ကုန်စည်ကို ပြန်လည်ရရှိစေရန် တောင်းဆိုပိုင်ခွင့် ရှိပါသည်။ စီးပွားရေးလုပ်ငန်းရှင်ဘက်မှ ချို့ယွင်းချက်ကြောင့် ပျက်စီးဆုံးရှုံးမှုများအတွက် ယင်းကုန်စည် တန်ဖိုးနှင့်ညီမျှသော ကုန်စည်ကို အစားထိုးလဲလှယ်ပေးရန် တောင်းဆိုခွင့်ရှိပါသည်။ ကုန်စည်နှင့် စပ်လျဉ်း၍ သတင်းအချက်အလက်ကို ဖော်ပြရန် ပျက်ကွက်မှုကြောင့် ထိခိုက်နစ်နာမှု ရှိခဲ့လျှင် ယင်း အတွက် စားသုံးသူက လျော်ကြေးတောင်းခံခွင့် ရှိပါသည်။
စီးပွားရေးလုပ်ငန်းရှင်သည် စားသုံးသူအပေါ် အာမခံချက်ပေးထားပြီး ရောင်းချသည့် ကုန် စည်နှင့်စပ်လျဉ်း၍ စားသုံးသူသည် အာမခံချက်နှင့်ညီသော အရည်အသွေးတူကုန်စည် ရရှိစေရန် တောင်းဆိုခွင့် ရှိပါသည်။ ရောင်းချသူမှ ငွေပြန်အမ်းပေးရန်၊ ပြင်ဆင်ပေးရန် သို့မဟုတ် ပြန်လည် လဲလှယ်ပေးရန် တောင်းဆိုပိုင်ခွင့်ရှိပါသည်။ အာမခံချက်ပေးထားသည့်အတိုင်း အမှတ်တကယ်မရရှိ ပါက လျော်ကြေးရရှိရန် တောင်းဆိုခွင့်ရှိပါသသည်။
ဝန်ဆောင်မှုလုပ်ငန်းရှင်သည် မိမိ၏ ဝန်ဆောင်မှုနှင့်စပ်လျဉ်း၍ အချက်အလက်များကို စားသုံးသူသိရှိစေရန် ကြိုတင်အသိပေးရပါမည်။ မှန်ကန်သောသတင်းအချက်အလက်နှင့် ပြည့်စုံသော ဝန်ဆောင်မှုအဆင့်အတန်းနှင့်အညီ ဝန်ဆောင်မှုပေးရပါမည်။ မိမိပေးသည့်ဝန်ဆောင်မှုသည် စားသုံး သူ၏လိုအပ်ချက်နှင့် ကိုက်ညီရပါမည်။ အမခံထားသည့်ကာလအတွင်း ပြီးမြောက်အောင် ဆောင်ရွက် ပေးရပါမည်။ စားသုံးသူနှင့်သဘောတူညီထားသည့် ဝန်ဆောင်မှုတန်ဖိုးအတိုင်း ပေးအပ်စေရပါမည်။
ဝန်ဆောင်မှုလုပ်ငန်းရှင်သည် အာမခံထားသည့် ကာလအတိုင်း ဝန်ဆောင်မှုမပေးနိုင်လျှင် သို့မဟုတ် ဝန်ဆောင်မှုပေးရန် ပျက်ကွက်လျှင် စားသုံးသူသည် ယင်းအတွက် လျော်ကြေးပေးရန် တောင်းဆိုပိုင်ခွင့်ရှိပါသည်။ အာမခံထားသည့် အချိန်ကာလအတွင်း သဘောတူညီထားသော ဝန် ဆောင်မှုကို စားသုံးသူက မရရှိခဲ့လျှင် နစ်နာမှုအတွက် ကုစားခွင့်ပေးရန် တောင်းဆိုခွင့်ရှိပါသည်။
စားသုံးသူသည် ကုန်စည် သို့မဟုတ် ဝန်ဆောင်မှုကို အသုံးပြုခြင်းကြောင့် နစ်နာဆုံးရှုံးမှု များ ဖြစ်ပေါ်လာလျှင်သော်လည်းကောင်း၊ ကုန်စည် သို့မဟုတ် ဝန်ဆောင်မှုကို ဝယ်ယူအသုံးပြုခြင်း ကြောင့် အာမခံပေးထားသည့်ကာလအတွင်း စားသုံးသူနစ်နာဆုံးရှုံးမှုများ ဖြစ်ပေါ်လာလျှင်သော် လည်းကောင်း ကုန်စည်ရောင်းချသူ သို့မဟုတ် ဝန်ဆောင်မှုပေးသည့် စီးပွားရေးလုပ်ငန်းရှင်၊ ကုန်စည်ထုတ်လုပ်သူ၊ ကုန်စည်ပေါ်တွင် လူပုဂ္ဂိုလ်အမည်၊ ကုန်အမှတ်တံဆိပ် သို့မဟုတ် အခြား ထင်ရှားသော အမှတ်အသားများကို အသုံးပြုခွင့်ရသူ၊ ပြည်ပမှကုန်စည်များ တင်သွင်းလာပြီး ပြည်တွင်းရှိ စားသုံးသူများအား ပြန်လည်ရောင်းချဖြန့်ဖြူးသူ၊ တစ်ဆင့်ပြန်လည် ရောင်းချဖြန့်ဖြူးသူ၊ ပြည်တွင်း၌ဖြစ်စေ၊ ပြည်ပနိုင်ငံတစ်ခုခု၌ဖြစ်စေ ဝန်ဆောင်မှုကို ပြည်တွင်း စားသုံးသူများအတွက် ကြားခံဝန်ဆောင်မှုပေးသည့် လုပ်ငန်းလုပ်ကိုင်သူများတွင် တာဝန်ရှိပါသည်။
ကုန်စည်တစ်ခုကို လွှဲပြောင်းဝယ်ယူပြီး ပြန်လည်ရောင်းချသူသည် မိမိရောင်းချရန် ဝယ် ယူထားသောကုန်စည်ကို ပြုပြင်မွမ်းမံခြင်းမပြုဘဲ မူလအတိုင်းရောင်းချပါက စားသုံးသူနစ်နာဆုံးရှုံးမှု ဖြစ်ပေါ်လာလျှင် မူလလွှဲပြောင်းရောင်းချသူတွင် တာဝန်ရှိပါသည်။ ပြန်လည်ပြုပြင်မွမ်းမံပြီး ရောင်းချ ပါက လွှဲပြောင်းဝယ်ယူပြီး ပြန်လည်ရောင်းချသူတွင် တာဝန်ရှိမည် ဖြစ်ပါသည်။ လွှဲပြောင်းဝယ်ယူပြီး တစ်ဆင့်ပြန်လည်ရောင်းချမည့်သူသည် ရောင်းဝယ်မှုပြုလုပ်သည့် ကုန်စည်များကို ပြုပြင်မွမ်းမံ ခြင်းကို သိရှိခြင်းမရှိဘဲ ရောင်းဝယ်မှုပြုလျှင်သော်လည်းကောင်း၊ ရောင်းဝယ်မှုပြုလုပ်သည့် ကုန်စည် သည် နမူနာပုံစံ၊ အရည်အသွေး၊ ဖွဲ့စည်းပုံတို့နှင့် ကိုက်ညီမှု မရှိသည်များကို သိရှိခြင်းမရှိဘဲ ရောင်း ဝယ်မှု ပြုလုပ်လျှင်သော်လည်းကောင်း စားသုံးသူနစ်နာဆုံးရှုံးမှုပေါ်ပေါက်ပါက မူလလွှဲပြောင်းရောင်း ချသူတွင် တာဝန်ရှိပါသည်။ ပြုပြင်မွမ်းမံထားခြင်းကိုလည်းကောင်း၊ နမူနာပုံစံ၊ အရည်အသွေး၊ ဖွဲ့စည်းပုံတို့နှင့် ကိုက်ညီမှု မရှိသည်များကိုလည်းကောင်း သိရှိပါလျှက် ရောင်းဝယ်မှုပြုလုပ်ပါက လွှဲပြောင်းဝယ်ယူပြီး ပြန်လည်ရောင်းချသူတွင် တာဝန်ရှိမည် ဖြစ်ပါသည်။
တင်ပြပါ အချက်အလက်များသည် ဖြောင့်မတ်မှန်ကန်သည့် စီးပွားရေးလုပ်ငန်းရှင်တစ်ဦး အတွက် ခက်ခဲသည့်ကိစ္စမဟုတ်ဘဲ စီးပွားရေးလုပ်ကိုင်ဆောင်ရွက်ရင်း အလိုအလျောက် လိုက်နာ ဆောင်ရွက်ပြီးသကဲ့သို့ ဖြစ်မည် ဖြစ်ပါသည်။ လုပ်ငန်းရှင်တစ်ဦးအတွက် အဓိကဆောင်ရွက်ရမည်မှာ ကုန်စည်များတွင် ကုန်အညွှန်းအမှတ် အသားများကို ဥပဒေနှင့်အညီ ဖော်ပြေပေးရန်ဖြစ်ပါသည်။
စားသုံးသူကာကွယ်ရေးဥပဒေ ပုဒ်မ ၄၁ အရ ကုန်စည်အမျိုးအစားအလိုက် သတ်မှတ်ချက် များနှင့်အညီ ကုန်စည်၏ အမှတ်တံဆိပ်၊ အမျိုးအမည်၊ အရွယ်အစား၊ အရေအတွက်နှင့် အသားတင် ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ်သည့်ရက်စွဲ၊ သက်တမ်းကုန်ဆုံး သည့်ရက်စွဲ၊ ထုတ်လုပ်မှုအမှတ်စဉ်၊ ထုတ်လုပ်သည့်လိပ်စာ၊ ပြည်တွင်းသို့ တင်သွင်းလာသော ကုန်စည်ဖြစ်ပါက တင်သွင်းသူ အမည်နှင့်လိပ်စာ၊ ထုတ်လုပ်သည့်လုပ်ငန်းအမည်နှင့်လိပ်စာ၊ ကုန် စည်တွင်ပါဝင်သော ကုန်ကြမ်းပစ္စည်းအမျိုးအမည်နှင့် ပစ္စည်းများ၏ပမာဏ၊ ပါဝင်မှုအချိုးအစား၊ ကျန်းမာရေးဆိုင်ရာ ဘေးထွက်ဆိုးကျိုး သို့မဟုတ် ဓါတ်မတည့်ကြောင်းဖော်ပြချက်နှင့် ကြိုတင် သတိပေးချက်၊ သက်ဆိုင်ရာ အစိုးရဌာနများက ဖော်ပြရန် သတ်မှတ်ထားသော အချက်အလက် များကို ဖော်ပြရမည်ဟု ပြဌာန်းထားပါသည်။ ပုဒ်မ ၄၂ အရ ကုန်စည်တွင် သက်ဆိုင်ရာ အဖွဲ့အစည်း များ၏ သုတေသနပြုချက်နှင့် ကျန်းမာရေးဆိုင်ရာ အာမခံချက်များကိုလည်း ဖော်ပြနိုင်ပါသည်။
စားသုံးသူကာကွယ်ရေးဥပဒေ ပုဒ်မ ၄၃ အရ ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင် ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာရေးဆိုင်ရာ ဘေးထွက်ဆိုးကျိုး သို့မဟုတ် ဓါတ်မတည့်ကြောင်းဖော်ပြချက်နှင့် ကြိုတင် သတိပေးချက် တို့ကို ဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျှက်ဖြစ်စေ ရေးသားဖော်ပြရမည်ဟု ပြဌာန်းထားပါသည်။ ဆိုလိုသည်မှာ ပုဒ်မ ၄၃ ပါအချက်များကို ကုန်အညွှန်းအမှတ်အသား ဖော်ပြရာတွင် မည်သည့်ဘာသာဖြင့် ဖော်ပြထား စေကာမူ မြန်မာဘာသာဖြင့်လည်း မဖြစ်မနေ ဖော်ပြပေးရန် ပြဌာန်းထားခြင်း ဖြစ်ပါသည်။
မြန်မာဘာသာဖြင့် ဖော်ပြရမည့် ကုန်အညွှန်းအမှတ်အသားများနှင့် ပတ်သက်၍ လုပ်ငန်း ရှင်များ ဆောင်ရွက်ရာတွင် အခက်အခဲမဖြစ်စေရန်အတွက် မြန်မာနိုင်ငံစားသုံးသူကာကွယ်ရေး ကော်မရှင်က ညွှန်ကြားချက်အမှတ် ၂/၂၀၁၉ ကို ထုတ်ပြန်ပေးခဲ့ပါသည်။ စီးပွားရေးလုပ်ငန်းရှင်များ သည် ကုန်စည်များတွင် ကုန်အညွှန်းအမှတ်အသားဖော်ပြခြင်းနှင့် ပတ်သက်၍ အခက်အခဲဖြစ်ပါက စားသုံးသူရေးရာဦးစီးဌာန တိုင်းဒေသကြီးနှင့်ပြည်နယ်ဦးစီးမှူးရုံးများ၊ ခရိုင်ဦးစီးမှူးရုံးများသို့ ဆက်သွယ်အကူအညီတောင်းခံနိုင်ပါသည်။ သက်ဆိုင်ရာဦးစီးမှူးရုံးများက လုပ်ငန်းရှင်များအား ဥပဒေနှင့် အညီဖော်ပြပေးနိုင်ရန်အတွက် ကူညီဆောင်ရွက်ပေးမည်ဖြစ်ပါသည်။
ကုန်စည်ထုတ်လုပ်သူသည် ကုန်အညွှန်းအမှတ်အသားကို တိကျမှန်ကန်စွာ ဖော်ပြခြင်း၊ ဖော်ပြထားသည့်အတိုင်း ကုန်စည်များကို ထုတ်လုပ်ခြင်း၊ ရောင်းဝယ်ခြင်းများ ပြုလုပ်လျှင်သော်လည်းကောင်း၊ ဝန်ဆောင်မှုလုပ်ငန်းဆောင်ရွက်သူသည် ကြော်ငြာထားသည့်အတိုင်း ဝန်ဆောင်မှုလုပ်ငန်းများပြုလုပ်လျှင်သော်လည်းကောင်း စီးပွားရေးလုပ်ငန်းရှင်များ လိုက်နာဆောင်ရွက်ရမည့်အချက်များကို ဆောင်ရွက်ပြီးသကဲ့သို့ ဖြစ်မည်ဖြစ်ပါသည်။
သို့ဖြစ်ပါ၍ စီးပွားရေးလုပ်ငန်းရှင်များသည် ကုန်စည်များထုတ်လုပ်ရာတွင် ကုန်အညွှန်း အမှတ်အသားကို တိကျစွာဖော်ပြပေးခြင်း၊ ဖော်ပြထားသည့် ကုန်အညွှန်းအမှတ်အသားများနှင့်အညီ ထုတ်လုပ်ခြင်း၊ ရောင်းဝယ်ခြင်းဖြင့် သော်လည်းကောင်း၊ ဝန်ဆောင်မှုလုပ်ငန်းရှင်များက ကြော်ငြာ ထားသည့်အတိုင်း ဝန်ဆောင်မှုပေးခြင်းဖြင့်သော်လည်းကောင်း ဖြောင့်မတ်မှန်ကန်သည့် စီးပွားရေး လုပ်ငန်းရှင်တစ်ဦးအနေဖြင့် စားသုံးသူကာကွယ်ရေးလုပ်ငန်းများတွင် ပူးပေါင်းပါဝင်ဆောင်ရွက်ပေးကြပါရန် တိုက်တွန်းလိုက်ပါသည်။
DOCA(ပဲခူး)