ဝါးရုံ၊ ဝါးတောပေါသည့် ဒေသဖြစ်ရာ မျှစ်ဟုခေါ်သည့် ဝါးပင်ပေါက် ကလေးများစွာ ရှိပါသည်။
ပဲခူးတိုင်းဒေသကြီး၊ ရွှေတောင်မြို့နယ်တွင် ဝါးရုံ၊ ဝါးတောပေါများသည့် ဒေသဖြစ်ရာ မျှစ်ဟု ခေါ်သည့် ဝါးပင်ပေါက်ကလေးများပေါများစွာထွက်ရှိသည့် ဒေသဖြစ်ပါသည်။
တောထဲတွင် ပေါက်ရောက်သော ဝါးပိုးဝါး၊ ကြက်သောင်းဝါး၊ ဝါးဟောင်းဝါး၊ ထီးတန်းဝါး စသည်တို့မှ မျှစ်များစုံလင်စွာ ရရှိပါသည်။
ဝါးပိုးဝါးမှရသော မျှစ်များကို မျှစ်အစိမ်းအဖြစ်သုံး၍ ရနိုင်သလို မျှစ်ချဉ်အဖြစ်လည်း ပြုလုပ်ပြီး ရာသီမရွေးစားသုံး၍ရပါသည်။
ဝါးပိုးပင်မှရရှိသည့် ဝါးပိုးမျှစ်များကို လတ်လတ်ဆတ်ဆတ်စားသောက်ရန်အတွက် အခွံနွှာ၍ ပါးပါးလှီးပြီး ရေသန့်တွင် သေချာစွာဆေးပြီးလျှင် မျှစ်အစိမ်းအဖြစ်စားသောက်၍ ရနိုင်ပါသည်။
ထို့အပြင် ဝါးပိုးမျှစ်ချဉ်ပြုလုပ်ရာတွင် ရေသန့်သန့်တွင် စိမ်ထားသော မျှစ်များကို နှစ်ရက်လျှင် တစ်ကြိမ် ရေအသစ်လဲလှယ်ပေးရပါသည်။ရေသုံးလေးကြိမ်လဲပြီးလျှင် ဆန်ကွဲ၊ ဆား တို့ဖြင့် မျှစ်ဖတ်များကို ရောနှောထားပြီး လေလုံသော အိုးများတွင် အပြည့်သိပ်ထားပြီး အပေါ်ဖတ်မှ ဆားရည်လောင်းထည့်ပေး၍ထားရပါသည်။ နှစ်ပတ်လည်ကြာအောင်ထားပြီးလျှင် အသင့်စားနိုင် သည့် မျှစ်ချဉ်များရရှိလာပါသည်။
မျှစ်ချဉ်များကို (၂၅)ကျပ်သားလျှင် (၂၀၀၀)ကျပ်၊ (၅၀)ကျပ်သားလျှင် (၄၀၀၀)ကျပ်ဖြစ်ပြီး ဈေးကွက်အတွင်း ရောင်းချပြီး ထွက်ရှိလာသော မျှစ်ချည်များကို ရန်ကုန် - မန္တလေး၊ နေပြည်တော် စသည်ဒေသများသို့ ပို့ဆောင်ရောင်းချကြောင်း သိရှိရပါသည်။
DOCA(ပဲခူး)