ကျွဲကောပင်သည် ရှောက်၊ သံပုရာ၊ လိမ္မော်ပင် စသည်တို့နှင့်အတူ ရှောက်ပင်မျိုးတွင် ပါဝင်သည်။ ကျွဲကောပင်ကို အစေ့မှလည်းကောင်း၊ မြေထုပ်စည်းစနစ်ဖြင့်လည်းကောင်း မျိုးပွား ယူကြသည်။ အကိုင်း ကူးနည်း၊ မျက်စိဆက်နည်းတို့ဖြင့် စိုက်ပျိုးပါက အပင်လည်းကြီးထွား၍ အသီးလည်း ပိုမိုဖြစ်ထွန်းသည်။ ကျွဲကောသီးကို အသားအရောင်ကိုလိုက်၍ အဖြူမျိုး၊ အနီမျိုးဟူ၍လည်းကောင်း အရသာကိုလိုက်၍ အချဉ်မျိုး၊ အချိုမျိုးဟူ၍လည်းကောင်း ခွဲခြား ခေါ်ကြသည်။ ရာသီပေါ် မော်လမြိုင်ကျွဲကောသီးမှာ စားသုံးသူများပြားလာသည့်အတွက် ကျွဲကောသီး ရောင်းအားမှာ ကောင်းမွန်ကြောင်း သိရှိရပါသည်။ ကျွဲကောသီးများသည် ပြည်မြို့အနီးတဝှိက်ရှိ ကျေးရွာများနှင့် တစ်ပိုင်တစ်နိုင်စိုက်ပျိုးသူများအပြင် နယ်ဘက်မှ ဝင်ရောက်လာမှုကြောင့် စားသုံးသူများအတွက် ဈေးနှုန်းအသင့်အတင့်ဖြင့် ဝယ်ယူစားသုံး နိုင်ကြပါသည်။ ဩဂုတ်လပထမပတ်နှင့် ဒုတိယပတ်တို့တွင် အနယ်နယ်အရပ်ရပ်မှ ကျွဲကောသီးများ ဝင်ရောက်မှု များပြားလာသောကြောင့် ရောင်းအားကောင်းသလို စားသုံးသူ၏များလည်း ဒေသထွက် ကျွဲကောသီးနှင့် အခြားနယ်များမှထွက်ရှိသော ကျွဲကောသီးများကို ဈေးနှုန်းချိုသာစွာ စိတ်ကြိုက် ရွေးချယ်ဝယ်ယူစားသုံးနိုင်ကြပါသည်။ ပြည်ဒေသထွက်ကျွဲကောသီးသည် ကျွဲကောသီးအလုံးပေါ် မူတည် ၍ ဈေးနှုန်းကွာခြားမှုရှိပါသည်။ ကျွဲကောသီးအချောတစ်လုံးလျှင် ကျပ် ၃၀၀၀၊ အလတ်တစ်လုံးလျှင် ၂၀၀၀၊ အသေးတစ်လုံးလျှင် ကျပ် ၁၀၀၀ မှ ကျပ် ၈၀၀ အထိဈေးကောင်းရပြီး ရာသီပေါ်ဖြစ်သည့် အတွက် အရောင်းအဝယ်ဖြစ်ကြောင်း သိရှိရပါသည်။
DOCA(ပဲခူး)