ဆူးပုတ်ရွက်များသည် သဘာဝအလျောက်ပေါက်ရောက်လေ့ရှိပြီး မြန်မာနိုင်ငံရှိ ကျေးလက် ဒေသများတွင် အများဆုံးပေါက်ရောက်လေ့ရှိပါသည်။ ဆူးပုတ်ပင်သည် နွယ်ပင်မျိုးဖြစ်၍ နွယ်တက် နိုင်ပြီး ချုံကဲ့သို့လည်း ပေါက်ရောက်ပါသည်။ ဆူးပုတ်ရွက်သည် နှစ်ကြိမ်ငှက်မွှေးရွက်ပေါင်းပုံစံဖြစ်၍ ရွက်လွှဲထွက်ကာ အနံ့မှာ ပြင်းရှရှ ဖြစ်ပါသည်။ ဆူးပုတ်ရွက်ကို ဟင်းလျာအဖြစ်ချက်ပြုတ် စားသောက်ကြသလို ဆူးပုတ်ပင်၏အရွက်နှင့်အမြစ်တို့ ကိုလည်း အစာအိမ်ရောဂါ၊ အသားမာရောဂါများ အတွက်လည်း ဆေးဝါးအဖြစ်အသုံးပြုကြပါသည်။
ပဲခူးတိုင်းဒေသကြီး၊ တောင်ငူမြို့နယ်အနီးတစ်ဝိုက်တွင် တည်ရှိသော ကရင်ပြည်နယ်၊ သံတောင်ကြီးမြို့နယ်မှ တောတောင်များနှင့်အိမ်ခြံဝန်းများတွင် သဘာဝအလျောက် ပေါက်ရောက် လျက်ရှိသော ဆူးပုတ်ရွက်များကို ဒေသခံများက လတ်လတ်ဆတ်ဆတ်ခူးယူပြီး မိသားစုအတွက် အပိုဝင်ငွေရရှိအောင် တောင်ငူမြို့၊ ညောင်ပင်လေးဈေးနှင့် အခြားဈေးများတွင်လည်း လာရောက် ရောင်းချလျက်ရှိပါသည်။ ဈေးဝယ်သူအိမ်ရှင်မများက ညောင်ပင်လေးဈေးရှိ ဆူးပုတ်ရွက်ရောင်းသူ ဈေးသည်များမှတစ်ဆင့် ဆူးပုတ်ရွက်များကို တစ်စည်းလျှင် ၃၀၀ ကျပ်မှ ၄၀၀ ကျပ်အတွင်း ဝယ်ယူ လျက်ရှိကြောင်း သိရသည်။