မကွေးတိုင်းဒေသကြီး၊စားသုံးသူရေးရာဦးစီးဌာန၊ မင်းဘူးခရိုင်ဦးစီးမှူးရုံးမှ ဒု-ခရိုင်ဦးစီးမှူး (မင်းဘူးမြို့ နယ်တာဝန်ခံ) ဦးမြင့်ကြည်သည် (၇.၁၀.၂၀၂၂)ရက်နေ့ နံနက်(၁၀:၃၀)အချိန်တွင် ကုန်သွယ်မှုလုပ်ငန်း ဖွံ့ဖြိုးတိုးတက်စေရေးအတွက် မင်းဘူးမြို့နယ်၊ ထောက်ရှာပင်ကျေးရွာရှိ ဒေသတွင်းထုတ်လုပ်သော တနိုင်တပိုင် မန်ကျည်းယိုလုပ်ငန်းထုတ်လုပ်မှုနှင့် အကျိုးအမြတ်ရရှိမှု အခြေအနေအား ကွင်းဆင်းလေ့လာခဲ့ပါသည်။
“အောင်”မန်ကျည်းယိုလုပ်ငန်းသို့ သွားရောက်ကွင်းဆင်းပြီး ထုတ်လုပ်ပုံအဆင့်ဆင့်များကို မေးမြန်းခဲ့ရာ ပထမဦးစွာ ကုန်ကြမ်းဖြစ်သော မန်ကျည်းသီးအားပြန်လည်သန့်စင်ပြီး အသားကြိတ်စက် ဖြင့်ကြိတ်ရပါကြောင်း၊ ထန်းလျက်အမဲအားလည်း ကြိုရပါကြောင်း၊ ကြိုပြီးသားထန်းလျက်ထဲသို့ ကြိတ်ပြီးသားမန်ကျည်းသီးထည့်၍ ထပ်ပြီးရောကြိုရပါကြောင်း၊ ဆားအနည်းငယ်ထည့်ရကြောင်း၊ ရောကြိုထားသောအရည်များ ပြစ်ခဲလာပါက လင်ဗန်းထဲသို့ထည့်ရကြောင်း၊ အပူချိန်အနေတော်ရှိသည့် အချိန်တွင် သကြားဖြူး၍ အလုံးသေးသေးများ လုံးရပါကြောင်း၊ အနံ့၊ ဆေးသကြား လုံးဝ မထည့် ပါကြောင်း၊ လုံးပြီးသားမန်ကျည်းလုံးများအား နေ(၂)ရက်ခန့်လှန်းရကြောင်း၊ နေလှန်းပြီးသော မန်ကျည်းယိုများအား အထုတ်ထုတ်ရပါကြောင်း၊ မန်ကျည်းသီး(၂)ပိဿာလျှင် ထန်းလျက်(၂)ပိဿာ၊ သကြား(၂)ပိဿာနှင့် ဆားအနည်းငယ်ထည့်ရပြီး အထုတ်(၆၀၀)ထွက်ရှိပါကြောင်း၊ မန်ကျည်ယိုထုတ် (၆)ထုတ်တစ်တွဲ တွဲ၍ တစ်တွဲလျှင်(၅၀၀)ကျပ်ဖြင့်ရောင်းချပါကြောင်း၊ မန်ကျည်းသီး(၁)ပိဿာ (၄၀၀၀)ကျပ်၊ ထန်းလျက်(၁)ပိဿာ (၄၀၀၀)ကျပ်နှင့် သကြား(၁)ပိဿာလျှင်(၃၀၀၀)ကျပ်ဖြင့် ဝယ်ယူရပြီး ထုတ်ပိုး သည့်အိတ်နှင့် တံဆိပ်ကုန်ကျစရိတ်မှာ (၈၀၀၀)ကျပ် ရှိပါကြောင်း၊ လုပ်သားတစ်ဦးလျှင် (၃၅၀၀) ကျပ်ဖြင့် တစ်ဦးသာငှားရမ်းပြီး မိသားစု လုပ်အားဖြင့် လုပ်ကိုင်ပါကြောင်း၊ ထုတ်ပိုးပြီးသား မန်ကျည်း ယိုများအား မကွေးနှင့် မင်းဘူး မြို့မဈေးများသို့ လက်ကားရောင်းချပါကြောင်း၊ ကုန်ကျစရိတ်အနေဖြင့် (၃၃၅၀၀)ကျပ် ကုန်ကျပြီး မန်ကျည်းတွဲ(၁၀၀)ရောင်းရငွေ (၅၀၀၀၀)ကျပ်ရရှိပါသဖြင့် မိသားစု လုပ်အားခပါ အကျိုးအမြတ် အနေဖြင့် (၁၆၅၀၀)ကျပ် အသားတင်အကျိုးအမြတ်ရရှိပါကြောင်း လေ့လာသိရှိရပါသည်။
DOCA(မကွေး)