မြန်မာနိုင်ငံသည် စိုက်ပျိုးရေးအခြေခံ နိုင်ငံတစ်နိုင်ငံဖြစ်သည့် အားလျော်စွာ စပါး၊ ပဲမျိုးစုံနှင့် ဆီထွက်သီးနှံများအား အဓိကထား စိုက်ပျိုးလျက်ရှိသည်။ ဆီထွက်သီးနှံများအနက် နေကြာသည် မြန်မာ့ဆီ ဖူလုံရေးအတွက် တစ်ဖက်တစ်လမ်းက ပံ့ပိုးပေးသည့် သီးနှံလည်းဖြစ်သည်။ နေကြာသီးနှံသည် စားသုံးဆီအဖြစ်သော်လည်းကောင်း၊ မုန့်ပဲသရေစာအဖြစ်သော်လည်းကောင်း၊ ဆေးဝါးနှင့်ဆေးဝါးအထောက်ကူပြု ပစ္စည်းများအဖြစ်လည်းကောင်း၊ နိုင်ငံခြားတင်ပို့မှုတွင်လည်းကောင်း အရေးကြီးကဏ္ဍတွင် ပါဝင်လျက်ရှိသည်။ နေကြာသီးနှံသည် ကမ္ဘာ့စားသုံးဆီ အများဆုံးထုတ်လုပ်နိုင်သော သီးနှံများတွင်တစ်ခု အပါအဝင်ဖြစ်ပါသည်။
နေကြာသီးနှံတွင် အဓိကအားဖြင့် အစေ့စားနေကြာနှင့် ဆီစားနေကြာဟူ၍ နှစ်မျိုးရှိပါသည်။ မြန်မာနိုင်ငံတွင် ဆီထွက်သီးနှံများအနက် နေကြာသီးနှံသည် စိုက်ပျိုးရသော မျိုးစေ့ပမာဏနှင့် ထွက်ရှိသော မျိုးစေ့ပမာဏ အချိုးအစား( Seed to Seed ) မြင့်မားခြင်း၊ စိုက်ပျိုးစရိတ်သက်သာခြင်း၊ တစ်ဧကအထွက်နှုန်းကောင်းခြင်း၊ ပိုးမွှားရောဂါနှင့် ရာသီဥတုဖောက်ပြန်သည့်အခါတွင်မူ ပျက်စီးမှုနည်းခြင်းတို့ကြောင့် တောင်သူများ ကြိုက်နှစ်သက်သည့် သီးနှံတစ်မျိုးဖြစ်ပါသည်။
စစ်ကိုင်းတိုင်းဒေသကြီးတွင် တိုင်းဒေသကြီးစိုက်ပျိုးရေးဦးစီးဌာန၏ စာရင်းအရ ၂၀၂၁-၂၀၂၂ ဘဏ္ဍာနှစ်တွင် မိုးစိုက်ဧက(၄၂၄၄၇)ဧကနှင့် ဆောင်းစိုက်ဧက(၃၁၄၄၆၈)ဧက၊ စုစုပေါင်း(၃၅၆၉၁၅)ဧက စိုက်ပျိုးခဲ့ပါကြောင်း၊ ၂၀၂၂-၂၀၂၃ ဘဏ္ဍာနှစ်တွင် အောက်တိုဘာလကုန်အထိ မိုးစိုက်ဧက (၄၃၇၉၃)ဧက စိုက်ပျိုးပါကြောင်း၊ စစ်ကိုင်းခရိုင်၊ ယင်းမာပင်ခရိုင်၊ မုံရွာခရိုင်နှင့် ရွှေဘိုခရိုင်တို့တွင် အများဆုံးစိုက်ပျိုးပြီး ယခုနှစ်တွင် မိုးစပါး မစိုက်ပျိုးနိုင်သည့်ဒေသများသည် နေကြာသီးနှံနှင့် နှမ်းသီးနှံများ ပိုမိုစိုက်ပျိုးလာကြ ကြောင်း၊ မိုးနှောင်းကောင်းမွန်သောကြောင့် မိုးရေရရှိသဖြင့် ကုန်ကျစရိတ်သက်သာသောကြောင့် တစ် ဧက စိုက်ပျိုးထုတ်လုပ်မှု ကုန်ကျစရိတ်မှာ ကျပ်(၃)သိန်းခန့်သာကုန်ကျပါကြောင်း၊ ပေါက်ဈေးအနေဖြင့် ယခင်နှစ် အောက်တိုဘာလက တစ်တင်းလျှင် (၁၈၅၀၀)ကျပ်၊ ယခုနှစ် တစ်တင်းလျှင် (၄၃၂၀၀)ကျပ် ရရှိပါသဖြင့် ယခင်နှစ်ကာလတူနှင့် နှိုင်းယှဉ်လျှင် (၂၄၇၀၀)ကျပ် ပိုမိုရရှိပါကြောင်း၊ တစ်ဧက ပျှမ်းမျှ အထွက်နှုန်းအနေဖြင့် (၁၈)တင်းထွက်ရှိပါသဖြင့် တစ်ဧကဝင်ငွေအနေဖြင့် ကျပ်(၈)သိန်းခန့် ရရှိပါသဖြင့် တစ်ဧကအကျိုးအမြတ်အနေဖြင့် ကျပ်(၅)သိန့်ခန့် ရရှိကြောင်း၊ တောင်သူများအတွက် တွက်ချေကိုက်သည့်သီးနှံဖြစ်ကြောင်း ဆူးလေကုန်း၊ ဘုမ္မနိုးနှင့် ကျွန်းသာယာကျေးရွာရှိ တောင်သူများထံမှ လေ့လာသိရှိရပါသည်။
DOCA(စစ်ကိုင်း)