ပဲခူးတိုင်းဒေသကြီး၊ တောင်ငူခရိုင်၊ ဖြူးမြို့နယ်၌ ယခုနှစ်တွင် ဆောင်းမြေပဲ (၂၅၆၀) ဧက စိုက်ပျိုးရန်လျာထားခဲ့ပြီး ဗီယက်နမ်မျိုးအစေ့ချ စက်ဖြင့် စိုက်ပျိုးလျက်ရှိသည်။ လျာထားချက် ပြည့်မှီကျော်လွန်ရေးနှင့် ပန်းတိုင်အထွက်တိုးရေးအတွက် ဆောင်ရွက်လျက်ရှိရာ လူငယ့်အားမာန် စိုက်ပျိုးရေးနှင့် သမဝါယမအသင်းရှိ အသင်းသားတောင်သူတစ်ဦး၏ ဆောင်းမြေပဲ ဗီယက်နမ်မျိုး(၇)ဧက အစေ့ချစက်ဖြင့် စိုက်ပျိုးနေကြောင်းလည်း သိရှိရသည်။ ၂၀၂၅-၂၀၂၆ ခုနှစ်၊ ဘဏ္ဍာရေးနှစ်တွင် သမဝါယမ ကဏ္ဍမှဆောင်းသီးနှံများဖြစ်သော ဆောင်းမြေပဲ (၂၀)ဧက၊ မတ်ပဲ (၃၄၂) ဧက၊ ပဲတီစိမ်း (၂၀) ဧက၊ ပိုက်ဆံလျှော်မျိုးစေ့ထုတ် (၃၀)ဧက နှင့် နွေစပါး (၁၀၀)ဧကအား အသင်းအစီအစဉ်ဖြင့် စိုက်ပျိုးနေပြီဖြစ်ကြောင်းလည်း အသင်းဥက္ကဌထံမှ သိရသည်။ ဆောင်းမြေပဲတွင် ပင်ထောင်နှင့် ပင်ပြန့်မျိုးဟူ၍ နှစ်ပြီးရှိသည်။ ဆောင်းမြေပဲစိုက်ရာတွင် ကုန်ကျစရိတ်အနေဖြင့် တစ်ဧကလျှင်မျိုး၊ သွင်းအားစု၊ လုပ်သားခ အပါအဝင်စုစုပေါင်း (၅၀၀၀၀၀) ကျပ် ဝန်းကျင်ခန့် ကုန်ကျကြောင်းနှင့် အစေ့ချစနစ်ဖြင့်စိုက်ပျိုးပြီး အထွက်နှုန်းအနေဖြင့် ဆောင်းမြေပဲတစ်ဧကလျှင် (၆၀)တင်း ခန့်ထွက်ကြောင်းနှင့် မြေပဲတောင့် တစ်တင်းလျှင် (၁၄)ပိဿာခန့်ထွက်ရှိသည်ဟုသိရသည်။ မြေပဲတစ်ပိဿာ လျှင် (၉၅၀၀) ကျပ်၊ မြေပဲဆီ တစ်ပိဿာလျှင် (၁၇၅၀၀) ကျပ်ဈေးနှုန်းများဖြင့် အသီးသီးအရောင်းအဝယ်ဖြစ်လျက်ရှိကြောင်းလည်း သိရှိရပါသည်။
DOCA(ပဲခူး)