ဆောင်းရာသီရောက်ပြီဆိုလျှင် တစ်နှစ်မှတစ်ခါသာပေါ်လေ့ရှိသည့် ရာသီစာများတွင် စိမ်းစားဥလည်းပါဝင်ပါသည်။ စိမ်းစားဥပင်သည် ဟင်းသီးဟင်းရွက်အနွယ်ပင် တစ်မျိုးဖြစ်ပါသည်။ ဒေသအခေါ်အရ စိမ်းစားဥ၊ ပဲစိမ်းစားဥခေါ်ဝေါ်ကြပါသည်။ မြန်မာနိုင်ငံအနှံ့အပြားတွင် စိမ်းစားဥကို စိုက်ပျိုးကြပါသည်။
စိမ်းစားဥပင်ကို ဒီဇင်ဘာ၊ ဇန်နဝါရီ၊ ဖေဖေါ်ဝါရီလများတွင် စိုက်ပျိုးကြပါသည်။ စိုက်ပျိုးမြေ များမှာ နှုန်းမြေ၊ ကိုင်းမြေ၊ ရေစပ်စပ်နဲ့ မြေဆီလွှာကောင်းတဲ့နေရာမျိုးတွင် စိုက်ပျိုးပြီး စိုက်ပျိုး ရာတွင် မျိုးစေ့များကို မြေကြီးထဲတွင် ညီညာစွာထည့်သွင်းစိုက်ပျိုးနည်းဖြင့် စိုက်ပျိုးရပါသည်။ စိုက်ပျိုးပြီးရေသွင်းရာတွင် မြေသားစိုစွတ်နေအောင်ရေသွင်းရပါသည်။ စိုက်ပျိုးရန်အထူး သင့်တော် သော မြေအမျိုးအစားထဲမှာ သဲမြေ၊ နှုန်းမြေများတွင် စိုက်ပျိုးလျှင် အလုံးများကြီးထွား ကောင်းမွန်ပြီး အထွက်နှုန်းတိုးစေပါသည်။ စိမ်းစားဥပင်စိုက်ပျိုးရာတွင် အစေ့ကိုတိုက်ရိုက်ချပြီး စိုက်ပျိုးကြ ပါသည်။ အပင်များစိုက်ပျိုးပြီး အပင်ပေါက်များထွက်လာလျှင် အစုလိုက်အပင်များ ထွက်လာတတ်ပါ သည်။တစ်ပင်နှင့်တစ်ပင် (၆)လက်မခြားစေရန်ကြားထဲရှိ အပင်များကိုနှုတ်ပေးရ ပါသည်။ သို့မှသာ စိမ်းစားဥများမှာ အလုံးချောများရရှိလာမည်ဖြစ်ပါသည်။
အပင်များစိုက်ပျိုးပြီး (၅)လမှ (၈)လအချိန်ကြာပြီးလျှင် ဥများကောင်းစွာကြီးထွားလာပြီး မြေပေါ်ရှိ အပင်အရွက်များညှိုးလာလျှင် ဥများကိုတူးယူလျှင်သင့်တော်သည့် အချိန်ဖြစ်ပါသည်။ စိမ်းစားဥရင့်မှည့်သည့်ဥများကိုတူးပြီး (၂)လအချိန်အထိ ထားနိုင်ပါသည်။စိမ်းစားဥသည် အစိမ်း စားလျှင်ရသည့်အစားအစာတစ်မျိုးဖြစ်ပြီး ဥ၏ အပြင်အခွံကိုနွှာပြီးမှ အတွင်းသားကိုစားရပြီး အရသာမှာ ချိုချိုကြွပ်ကြွပ်လေးနှင့် နို့နှစ်ရောင်အသားဖြစ်ပြီး စားလို့အလွန်ကောင်းပါသည်။ ရေငတ်လည်းပြေစေပါသည်။ စိမ်းစားဥသည် အစာအဟာရအဖြစ်စားသုံးရသလို ကျန်းမာရေး အတွက်ဆိုလျှင် သင့်တင့်မျှတသောပမာဏဖြင့် စားသုံးပေးလျှင် ဆီးချို၊ သွေးချိုသမားများအတွက် သင့်တော်သော အစားအစာတစ်မျိုးဖြစ်ပါသည်။ဒါ့အပြင် ကလေးငယ်များအတွက် သင့်တော်သော အစားအစာတစ်မျိုးဖြစ်ပါသည်။ပန်းနာ၊ ရင်ကြပ်ရောဂါခံစားနေရပါက စိမ်းစားဥကိုစားသုံးပေးသင့် ပါသည်။
ရွှေတောင်မြို့နယ်အတွင်းရှိ စစ်ကိုင်းကျွန်း၊ မင်းထဲကျွန်း ဒေသများတွင် အများအပြား စိုက်ပျိုးကြပါသည်။ ဈေးကွက်အတွင်း ရောင်းချရာတွင်ယခုလို ဒီဇင်ဘာလများတွင် စိမ်းစားဥ (၁၀)လုံးပါ တစ်စည်းလျှင် (၃၀၀၀)ကျပ်နှုန်းဖြင့် ရွှေတောင်မြို့မဈေးနှင့် ပြည်မြို့နယ်ရှိ မြို့မဈေးများတွင် အရောင်းအဝယ်ဖြစ်ထွန်းနေကြောင်း သိရှိရပါသည်။
DOCA(ပဲခူး)