လွိုင်ကော်မြို့၊ သီရိမင်္ဂလာဈေးအတွင်းတွင် ဟင်းသီးဟင်းရွက်များ၊ အသား၊ငါး၊ လူသုံးကုန်ပစ္စည်းများနှင့် မုန့်မျိုးစုံရောင်းချလျက်ရှိပါသည်။ ၂၀၂၆ ခုနှစ်၊ ဖေဖော်ဝါရီလအတွင်း ဟင်းသီးဟင်းရွက်များဖြစ်သည့် ဘိုစားပဲ၊ ဖရုံသီး၊ သခွားသီး၊ ကန်စွန်းရွက်၊ မုန်ညှင်းရွက်၊ ခရမ်းသီးစသည့် ဟင်းသီးဟင်းရွက်များကို လွိုင်ကော်မြို့၊ မိုင်းလုံးရပ်ကွက်၊ မှုံပြာကျေးရွာ၊ လင်ဖုံလေးကျေးရွာ၊ ရေနီကန်ကျေးရွာတို့တွင် အများဆုံးစိုက်ပျိုးထွက်ရှိလျက်ရှိပါသည်။ ဒေသထွက်သီးနှံများဖြစ်သည့် ဘိုစားပဲ(၁)ပိဿာလျှင် (၄၀၀၀ - ၅၀၀၀)ကျပ်၊ ဖရုံသီး(၁)လုံးလျှင် (၁၀၀၀-၂၀၀၀)ကျပ်၊ သခွားသီး (၁)လုံးလျှင် (၄၀၀-၁၀၀၀)ကျပ်၊ ကန်စွန်းရွက်တစ်စည်းလျှင်(၃၅၀-၅၀၀)ကျပ်၊ မုန်ညှင်းရွက်(၁) စည်းလျှင် (၂၀၀-၃၀၀)ကျပ်ဖြင့် ရောင်းချလျက်ရှိပါသည်။ ယခင်လနှင့် နှိုင်းယှဉ်ကြည့်လျှင် ဘိုစားပဲ၊ ဖရုံသီးနှင့် သခွားသီးမှာ (၅၀၀-၁၀၀၀)ကျပ်ခန့် ဈေးနှုန်းကျဆင်းလျက်ရှိပြီး ကန်စွန်းရွက်နှင့် မုန်ညှင်းရွက်မှာ(၁၀၀-၃၀၀)ကျပ်ခန့် ကျဆင်းလျက်ရှိကြောင်း၊ ဈေးနှုန်းများကျဆင်းရခြင်းမှာ ဒေသတွင်း စိုက်ပျိုးထွက်ရှိမှုများပြားလာခြင်းကြောင့်ဖြစ်ကြောင်း ကုန်စိမ်းရောင်းချနေသူများထံမှ သိရှိရပါသည်။
DOCA(ကယား)