မန္တလေးတိုင်းဒေသကြီး၊ ကျောက်ဆည်မြို့နယ်အတွင်းရှိ တောင်သူများသည် သီးနှံမျိုးစုံ စိုက်ပျိုးလျက်ရှိပြီး ခရမ်းသီး(အလုံးသေး)ကိုလည်း တစ်နိုင်တစ်ပိုင်စိုက်ပျိုးလာကြပါသည်။ ခရမ်းသီး(အလုံးသေး)ကို ရာသီမရွေးစိုက်ပျိုးနိုင်ပြီး ၄င်းမျိုးအား စိုက်ပျိုးမည်ဆိုလျှင် မျိုးစေ့ကို ပျိုးထောင်ပြီး တစ်လခွဲသားအရွယ်တွင် စိုက်ပျိုးရကြောင်း ၊ (၂)လခွဲ(၃)လ အချိန်တွင် အသီးများ စတင်ခူးဆွတ်နိုင်ပြီး (၄)ရက်ခြားတစ်ကြိမ် ခူးဆွတ်ရကြောင်း ၊ စတင်ခူးဆွတ်သည်မှ တစ်ပတ်ထက် တစ်ပတ်အထွက်နှုန်းပိုလာကြောင်း ၊ အထွက်နှုန်းအနေဖြင့် တစ်ဧကလျှင် စတင်ခူးဆွတ်ချိန်တွင် ပိဿာ(၄၀-၅၀)ခန့်ထွက်ရှိပြီး အထွက်နှုန်းအများဆုံးအချိန်တွင် ပိဿာ (၃၀၀-၄၀၀)အထိ ထွက်ရှိကြောင်း သိရှိရပါသည်။ တစ်ဧက ကုန်ကျစရိတ်အနေဖြင့် ပျိုးထောင်ခြင်း၊ မြေပြင်ခြင်း ၊သွင်းအားစု၊ စိုက်ပျိုးစရိတ်၊ လုပ်သားခ၊ စုစုပေါင်း(၇၅၀၀၀၀-၈၀၀၀၀၀)ကျပ်ဝန်းကျင်ခန့် ကုန်ကျကြောင်း ၊ ခရမ်းသီး(အလုံးသေး)ကို အနည်းဆုံး(၅)လကျော်အထိ ခူးဆွတ်နိုင်ကြောင်း ၊ ယခုအခါ ခရမ်းသီး (အလုံးသေး) စျေးနှုန်းအနေဖြင့် တစ်ပိဿာလျှင်(၅၀၀-၆၀၀)ကျပ် စျေးနှုန်းများဖြင့် ရောင်းချရကြောင်း၊ ကုန်စိမ်းသီးနှံဖြစ်သည့်အတွက် တစ်ပတ်နှင့် တစ်ပတ်စျေးနှုန်းမတူညီကြောင်း၊ ကုန်စိမ်းပွဲစားများမှ စိုက်ခင်းအထိ လာရောက်ဝယ်ယူသည့်အတွက် သယ်ယူစရိတ်သက်သာကြောင်း၊ တစ်ဧကအကျိုးအမြတ်အနေဖြင့် (၇၀၀၀၀၀)ကျပ်ဝန်းကျင်ခန့် ရရှိသောကြောင့် မိသားစုဝင်ငွေတိုးသည့်အတွက် တွက်ချေကိုက်သော သီးနှံဖြစ်ပါကြောင်း ခရမ်းသီး(အလုံးသေး) စိုက်ပျိုးသူ တောင်သူတစ်ဦး၏ ပြောကြားချက်အရ သိရှိရပါသည်။
DOCA(မန္တလေး)