ကလေးမြို့နယ်ရှိ သာစည်၊ ချင်းဆိုင်၊ ခင်သာနှင့် ချင်းကင်းစသည့် ကျေးရွာများတွင် ခရမ်းချဉ်သီးများ စိုက်ပျိုးလျက်ရှိရာ ယခုလအတွင်းတွင် ချင်းကင်းမှထွက်ရှိသည့် ခရမ်းချဉ်သီးများ မြို့ပေါ်ဈေးကွက်သို့ လှိုင်လှိုင်ဝင်ရောက်လာပြီဖြစ်သည့်အတွက် ဖောက်သည်ဈေး( ၈၀၀ကျပ်မှ ၁၀၀၀ကျပ် ) ခန့်သာ ဈေးနှုန်းသို့ရောက်ရှိလာပြီး လက်လီဈေးကွက်တွင် တစ်ပိဿာလျှင် ( ၁၃၀၀ ) ကျပ်ဈေးနှုန်းသို့ ကျဆင်းခဲ့ပါသည်။
ယခင်လများက ခရမ်းချဉ်သီး တစ်ပိဿာလျှင် ( ၃၀၀၀ )ကျပ်မှ ( ၄၀၀၀ ) ကျပ်ခန့် ပေး၍ဝယ်ယူရသော်လည်း ယခုအခါတွင် ဒေသတွင်းခရမ်းချဉ်သီးများ လှိုင်လှိုင် ထွက်ပေါ်လာသည့်အတွက် ခရမ်းချဉ်သီးဈေးနှုန်းမှာ ကျဆင်းခဲ့ရခြင်းဖြစ်ပါသည်။ ခရမ်းချဉ်သီး အခင်းများအားလုံး ထွက်ပေါ်လာပါက တစ်ပိဿာလျှင် ( ၅၀၀ ) ကျပ်ဝန်းကျင်ခန့်ထိ ကျဆင်းနိုင် ပြီး၊ ဈေးကွက်ဖြန့်ဖြူးနိုင်မှု နည်းပါးသည့်အတွက် ဈေးနှုန်းကျဆင်းမှုများ ဖြစ်ပါကြောင်း မြို့နယ်တွင်းမှ အနီးတစ်ဝိုက်ဒေသများဖြစ်သည့် တမူးမြို့နှင့် ကလေးဝမြို့သို့သာ တင်ပို့ရောင်းချ လျှက်ရှိပါကြောင်း၊ ခရမ်းချဉ်လက္ကားရောင်းချသည့် ဒေါ်မသီထံမှ သိရှိရပါသည်။
DOCA(စစ်ကိုင်း)