ပဲတောင့်ရှည်တွင် အပင်ပုမျိုး(နွယ်မဲ့မျိုး)နှင့် အပင်ရှည်မျိုး(နွယ်တက်မျိုး) ဟူ၍ နှစ်မျိုး ခွဲခြားထား ပါသည်။ အပင်ရှည်မျိုးကိုတိုင်ထောင်၍ စိုက်ပျိုးကြသည်။ အတောင့်အရောင်အားဖြင့် အစိမ်းနု၊ အစိမ်း ရင့်၊ အနီရောင် ဟူ၍ အမျိုးမျိုး ကွဲပြားစွာရှိပါသည်။
ရေမြေ ရာသီဥတု
ပဲတောင့်ရှည်ကို မြေအမျိုးမျိုးတွင်စိုက်ပျိုး၍ရသည်။ တိုတောင်းသောရာသီ၌ အချိန်တိုအတွင်း စိုက်ပျိုးလိုက သဲဆန်သောမြေတွင်စိုက်ပျိုးကြသည်။ မြေကောင်းလျှင် အထွက်ပိုကောင်းသည်။ အလွန် ချဉ်သောမြေတွင် ကောင်းစွာမဖြစ်ထွန်းပါ။ အလွန်ပူသောရာသီ (သို့မဟုတ်) မိုးအလွန်များပါကလည်း အပွင့်အသီးကိုကြွေစေသည်။
မျိုးစေ့
မြင်းခြံမြို့နယ်ရှိ ကျေးရွာများသည် မျိုးစေ့အသုံးပြုမှုမှာ တစ်ဧကလျှင်.....
- အပင်ပုမျိုး အတွက် (၈-၁၀) ကီလိုဂရမ်
- တိုင်ထောင်မျိုး အတွက် (၄-၅) ကီလိုဂရမ် ဖြစ်ပါသည်။
မြေဩဇာအသုံးပြုနည်း
မြင်းခြံမြို့နယ်၏ မြေဩဇာအသုံးပြုနည်းမှာ တစ်ဧကအတွက် နွားချေး(၅)စီး ၊ ယူရီးယား(၁)အိတ် ၊ တီစူပါ(၁)အိတ် နှင့် ပိုတက်ရှ်(၁)အိတတ် နှုန်းအသုံးပြုပေးရပါမည်။ နွားချေး၊ တီစူပါ၊ ပိုတက်ရှ် နှင့် ယူရီးယားကိုစိုက်ခင်းမြေပြင်ချိန်မှာထည့်သွင်း ပေးပြီး ကျန်ယူရီးယားကို ပေါင်းလိုက် မြေဆွချိန်တွင် ထည့်သွင်းပေးရပါသည်။
မြေပြုပြင်ခြင်း
ထွန်ရေး အလွန်ကောင်းအောင်မြေကို ပြုပြင်ရန်မလိုချေ။ ထွန်ရေးအသင့်အတင့်ရလျှင်စိုက်နိုင်သည်။ စိုက်ပျိုးရာတွင် ရေမဝပ်သောမြေကိုရွေးချယ်ရပါသည်။
စိုက်ပျိုးခြင်း
မြင်းခြံမြို့နယ်၏ စိုက်ပျိုးနည်းမှာ မျိုးစေ့ချရာတွင် အစိုဓာတ်များလွန်းကပုပ်သွားတတ်ပါသည်။ ထို့ကြောင့်မိုးရွာပြီးနောက် နေသာ သောနေ့တွင် နောက်မိုးဆက်မရွာနိုင်ဟု ယူဆနိုင်မှချစိုက်သင့်သည်။ တိုင်ထောင်ပဲကို တစ်တန်းနှင့် တစ်တန်း သုံးပေခြားပြီး တစ်ပင်နှင့် တစ်ပင်(၉-၁၂)လက်မ ခွာ၍စိုက်သည်။ စိုက်ပျိုးပြီးအပင်များ ရှည်လာသောအခါ အနည်းဆုံး ခုနစ်ပေခန့်ရှည်သော ဝါးတိုင်(သို့မဟုတ်) သစ်သားတိုင်များကို အပင် တိုင်း၏ အခြေတွင် ထောင်ပေးရသည်။ အချို့က တိုင်များမြဲစေရန်တစ်တန်းထဲရှိ နီးကပ်သော အပင်များ ၏တိုင်ကို ကြက်ခြေခေတ်ပေးပြီး တိုင်များဆုံရာ၌ စုချည်ပေးကြသည်။ ရေဝပ်ခြင်းကင်းစေရန်အတွက် စိုက်တန်း နှစ်တန်းကြားတွင် ရေနှုတ်မြောင်း တစ်မြောင်းပြုလုပ်ပေးရမည်။ အပင်ပုမျိုးကို တစ်တန်းနှင့် တစ်တန်း (၁.၅ - ၂)ပေခြား၍ တစ်ပင်နှင့်တစ်ပင် နှစ်ပေခွာစိုက်သည်။ ရာသီဥတုသင့်တင့်သော ဒေသ တွင် တစ်နှစ်ပတ်လုံးစိုက်ပျိုးနိုင်သည်။ ရေရရှိကအချိန်မရွေးစိုက်နိုင်သည်။
အပင်ပြုစုခြင်း
မြင်းခြံဒေသသည် ပူ၍ စွတ်စိုသောရာသီဥတုတွင် ပေါင်းမြက်များ အထမြန်သောကြောင့် စတင် ဖြစ်ပေါ် လာသည်နှင့် နှိမ်နင်းပေးရမည်။ အထူးသဖြင့် အပင်ရှည်မျိုးသည် သက်တမ်းပိုရှည်သောကြောင့် ပေါင်းကိုကြိုတင်၍ မနှိမ်ထားပါက တိုင်ထောင်ပြီးလျှင်ပေါင်းလိုက်ရခက်သည်။ ပေါင်းနှိမ်စဉ် ပဲပင်၏ အမြစ်များကို မထိခိုက် ရန်သတိပြုပါ။ ပဲပင်၏အမြစ်တွင် နိုက်ထရိုဂျင်ဖမ်းယူနိုင်သော ဘက်တီးရီးယား များ ခိုအောင်းနိုင်၍ အပင်အတွက် နိုက်ထရိုဂျင်ကိုရယူပေးခြင်းဖြင့်အကျိုးပြုနိုင်သည်။
ရေသွင်းရေလောင်းခြင်း
ပဲပင်တို့သည် ခြောက်သွေ့သောရာသီဥတုဒဏ်ကို ခံနိုင်ရည်ရှိသော်လည်း ရက်ရှည်ခြောက်သွေ့ နေပါက ရေပေးသွင်းရန် လိုအပ်သည်။ မိုးရာသီစိုက်ပျိုးပါက ရေဝပ်သောမြေ၊ မြေစေးတို့တွင် ရေနုတ် မြောင်း ပြုလုပ်ထားရပါသည်။
ပိုးမွှား ရောဂါ ကာကွယ်နှိမ်နင်းခြင်း
မြင်းခြံမြို့နယ်၏ ရောဂါကာကွယ်ခြင်းများမှာ အပင်ငယ်စဉ်တွင် စုပ်စားပိုးများကျရောက်မှုကို ကာကွယ်နှိမ်နင်းနိုင်ရန် “ဆိုင်လာ၊ ကေလာ၊ အေမီဒါ” ဆေးများမှတစ်မျိုးမျိုးကိုပက်ဖျန်းပေးရပါမည်။ သီးလုံးဖောက်ပိုးကျရောက်ပါက “အီမာလန်ဒါ၊ နိုက်ဝမ်း၊ လိုင်းအောက်” ဆေးများမှတစ်မျိုးမျိုးကို အသုံးပြုပေးရပါမည်။ ပဲတောင့်ရှည်တွင် ပဲသံချေးရောဂါ ကျရောက်တတ်ပြီး “ဟက်ဇာဂွန်၊ ကာဗာ၊ ဇိုလာ၊ ဒိုင်ဇီ” ဆေးများမှတစ်မျိုးမျိုးဖြင့် ပက်ဖျန်းကာကွယ် နိုင်ပါသည်။
ပဲဆွတ်ခူးခြင်း
မြင်းခြံမြို့နယ်သည် ပဲသီးခူးဆွတ်ခြင်းကို အရွယ်မရောက်မီ ပဲသီးများကိုအစေ့နုသေးသောအချိန်တွင် ဆွတ်ခူးရသည်။ ပဲသီးတောင့်များကို ပန်းပွင့်ပြီး (၇-၁၀)ရက်အကြာတွင် စတင်ဆွတ်ခူးနိုင်သည်။ ပဲသီး တောင့်များရင့်လာက အစေ့နေရာတွင် ဖောင်းကြွကာ အခွံသည်ပျော့သောကြောင့် စားသုံးသူများ မနှစ် သက်ကြပါ။ အပင်ပုမျိုး တစ်ဧကလျှင် (၈၀၀ - ၉၀၀)ပိဿာ၊ အပင်ရှည်မျိုးတစ်ဧက (၂,၀၀၀) ပိဿာ ကျော်ထိ ထွက်ရှိနိုင်ပါသည်။
မြင်းခြံမြို့နယ်အနေဖြင့် ကျေးရွာအချို့သည် ယခုဩဂုတ်လတွင် ပဲသီးတောင့်ရှည် တစ်ပိဿာ လျှင် (၄၀၀၀)ကျပ် ဈေးနှုန်းဖြင့် ရောင်းချလျက်ရှိကြောင်း သိရပါသည်။ တောင်သူများအနေဖြင့် ဈေးနှုန်းတည်ငြိမ်၍ ဈေးကောင်းရရှိသောကြောင့် အကျိုးအမြတ် ရရှိပါကြောင်း သိရပါသည်။
DOCA(မန္တလေး)