ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်အတွင်းရှိ တောင်လုံးညို၊ မှော်ဇာ၊ ကုန်းရိုး၊ မထော၊ ရွာမ၊ တွင်းဗြည်း၊ ခွေးရဲ အစရှိသည့် ကျေးရွာများတွင် ကြက်သွန်နီအား ဆောင်သီးနှံအဖြစ် စိုက်ပျိုးလျက်ရှိကြပြီး စိုက်ဧကအားဖြင့် စုစုပေါင်း ၁၇၅ ဧကခန့်ရှိပါသည်။ တစ်ဧကကုန်ကျစရိတ်မှာ ၁၆ သိန်းခန့်ကုန်ကျပြီး သွင်းအားစုအနေဖြင့် ရေလောင်းခြင်း၊ ဓာတ်မြေဩဇာ၊ ပိုးသတ်ဆေးအသုံးပြုမှုအပေါ်မူတည်၍ ကုန်ကျစရိတ်မှာ တစ်ဦးနှင့်တစ်ဦးကွဲပြားမှုရှိခဲ့ပါသည်။ မတ်လကုန်နှင့် ဧပြီလများတွင် တူးဖော်ရောင်းချလေ့ရှိပြီး စိုက်ခင်းအထိ ပွဲစားကုန်သည်များမှ လာရောက်ဝယ်ယူကြကြောင်း သိရှိရပါသည်။
ယခုလက်ရှိတွင် ပြည်ဈေးကွက်၏ ကြက်သွန်နီများသည် မကွေးတိုင်းရှိ ရေနံချောင်း၊ တောင်တွင်း၊ အောင်လံ၊ ဆိပ်ဖြူ၊ ပခုက္ကူစသော နယ်များမှ ဝင်ရောက်လာသော ကြက်သွန်နီများဖြင့် ရောင်းဝယ်မှုရှိနေကြပါသည်။ နေ့စဉ် အိတ် ၃၅၀ ခန့်ဝင်ရောက်မှုရှိနေပြီး ပွဲရုံဈေးကွက်အတွင်း အိတ်ဆွဲဝယ်ရောင်းသမားများ ဒေသတွင်းဝယ်လက်သမားများဖြင့် ပုံမှန်အရောင်းအဝယ်ဖြစ်နေနေ ပန်းတောင်း(ဥသျှစ်ပင်)နှင့် သာယာဝတီခရိုင်၊ ဧရာဝတီ(ကြံခင်း၊ မြန်အောင်)နှင့် ရခိုင်ပြည်နယ် (တောင်ကုတ်) တို့သို့ နယ်ကျော်စီးထွက်မှုများလည်းရှိနေပါသည်။ ဈေးနှုန်းများအနေဖြင့် ပွဲရုံလက်ကားဈေးတစ်ပိဿာ (ကြီး/လတ်/သေး)လျှင် ကျပ် ၂၇၀၀/၂၅၀၀/၂၃၀၀ တို့ဖြစ်ပြီး လက်လီဈေးအသေးများတွင် ကျပ် ၂၄၀၀/၂၆၀၀-၂၈၀၀/၃၀၀၀ နှုန်းတို့ဖြင့် အသီးသီးရောင်းဝယ်မှုရှိနေပါကြောင်း သိရှိရပါသည်။
DOCA(ပဲခူး)