လိမ္မော်သီးသည် အေးမြသောရာသီဥတုတွင် အောင်မြင်ဖြစ်ထွန်းသည့်အတွက် ရှမ်းပြည်နယ် (မြောက်ပိုင်း)ရှိ နောင်မွန်ကျေးရွာ၊ သီပေါမြို့နယ် (ကုန်းသာကျေးရွာ)နှင့် နမ့်လန်မြို့များ၌ လိမ္မော်သီးများကို အများအပြား စိုက်ပျိုးထားလျက်ရှိကြောင်း သိရှိရပါသည်။ ဒေသသီး၊ ပျားလိမ္မော်သီးနှင့် ကဗ္ဗလာလိမ္မော်သီးမျိုးများကို စီးပွားဖြစ်စိုက်ပျိုးကြပြီး နှစ်စဉ်ဝင်ငွေရရှိလျက်ရှိကြောင်း သိရှိရပါသည်။ ၎င်းဒေသများမှ ထွက်ရှိသည့် လိမ္မော်သီးများကို လားရှိုးမြို့မဈေးကြီး၊ လားရှိုးကြီးဈေးနှင့် ဘူတာဈေးကြီးတို့တွင် အမြောက်အများရောင်းချလျက်ရှိပြီး အိမ်ပြန်လက်ဆောင်အဖြစ် ဝယ်ယူနိုင်ရန်အတွက်လည်း ကုန်းသာကျေးရွာလမ်းမကြီးဘေးတွင်လည်း ရောင်းချနေကြကြောင်း သိရှိရပါသည်။ ဈေးနှုန်းအနေဖြင့် အလုံးအကြီးအသေးပေါ်မူတည်၍ အလုံးကြီး ၁၀ လုံးလျှင် ၄၅၀၀ ကျပ် မှ ၅၀၀၀ ကျပ်အထိ ရောင်းချလျက်ရှိပြီး အလုံးသေး ၁၀ လုံးလျှင် ၃၅၀၀ ကျပ် မှ ၄၀၀၀ ကျပ်အထိ ရောင်းချလျက်ရှိကြောင်း သိရှိရပါသည်။ ယခုအချိန်တွင် တရုတ်နှစ်သစ်ကူးကာလ နီးကပ်လာသောကြောင့် လိမ္မော်သီးများ အရောင်းအဝယ်ကောင်းပြီး ဈေးကောင်းရရှိနေကြောင်း သိရှိရပါသည်။
DOCA(ရှမ်း)