၁၅-၃-၂၀၂၀ ရက်နေ့တွင်ကျရောက်သော ကမ္ဘာ့စားသုံးသူအခွင့်အရေးများနေ့တွင် “ကုန်စည်လုံခြုံစိတ်ရမှုအစ ကုန်အညွှန်းအမှတ်အသားက" ခေါင်းစဉ်ဖြင့် အသိပညာပေးမီဒီယာကမ်ပိန်းကို စားသုံးသူရေးရာဦးစီးဌာန ပြည်နယ်ဦးစီးမှူး ဦးဆောင်၍ ကချင်ပြည်နယ် မြစ်ကြီးနားမြို့၏ အဓိကနေရာများတွင် ကျင်းပဆောင်ရွက်ခဲ့ပါသည်။
စားသုံးသူကာကွယ်ရေး ဉပဒေအခန်း(၁၈)အရ စီးပွားရေးလုပ်ငန်းရှင်များအားလုံး လိုက်နာ ဆောင်ရွက်ရမည့် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်များတွင် မြန်မာဘာသာ ဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ဖော်ပြရာ၌ သတ်မှတ်ချက်များနှင့်အညီ သိရှိလိုက်နာဆောင်ရွက်နိုင်ရန် ကမ်ပိန်းကျင်းပခြင်းဖြစ်ပါသည်။ အဆိုပါ အသိပညာပေးဆောင်ရွက်ရာတွင် ကချင်ပြည်နယ်၊ မြစ်ကြီးနားမြို့ရှိ စည်ပင်သာယာစျေး(ရေစင်စျေး)၊ ပြည်သူ့ရင်ပြင်နှင့် ကချင်ပြည်နယ် ဒေသထွက်ကုန်အရောင်းစင်တာနေရာများ၌ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားနှင့်စပ်လျဉ်း၍ စီးပွားရေးလုပ်ငန်းရှင်များ လိုက်နာဆောင်ရွက်ရမည့် အသိပညာပေးဗီနိုင်းများစိုက်ထူခြင်း၊ စီးပွားရေးလုပ်ငန်းရှင်များအား ကုန်စည်၏ ကုန်အညွှန်းအမှတ်အသားများကို မြန်မာဘာသာဖြင့် ပြည့်စုံစွာဖော်ပြရန်၊ စားသုံးသူများအား ကုန်စည်များကို ဝယ်ယူသုံးစွဲသည့်အခါ အလေ့အကျင့်ကောင်းများ ရရှိစေရန်အတွက် ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းပုံအညွှန်း၊ သုံးစွဲပုံနည်းလမ်း၊ ကျန်းမာရေးဆိုင်ရာဘေးထွက်ဆိုးကျိုး၊ ဓာတ်မတည့်ကြောင်းဖော်ပြချက်၊ ကြိုတင် သတိပေးချက်များကို မြန်မာဘာသာဖြင့်ရေးသားထားပြီး ကုန်အညွှန်းအမှတ်အသား မှန်ကန်ပြည့်စုံစွာ ဖော်ပြထားသော မုန့်နှင့်ရေသန့်ဗူးများကို နမူနာများ ဝေငှ၍ ရွေးချယ်ဝယ်ယူ စားသုံးကြရန် အသိပညာပေး ဆွေးနွေးရှင်းလင်းပြီး လက်ကမ်းစာစောင်များ ဖြန့်ဝေခဲ့ပါသည်။
ကမ္ဘာ့စားသုံးသူအခွင့်အရေးများနေ့ အသိပညာပေး မီဒီယာကမ်ပိန်းကို ကချင်ပြည်နယ် စားသုံးသူ ရေးရာဦးစီးဌာနရှိ ပြည်နယ်ဦးစီးမှူးရုံးနှင့် မြစ်ကြီးနားခရိုင်ဦးစီးမှူးရုံးမှ ဝန်ထမ်းများအားလုံး အတူတကွ ပူးပေါင်းဆောင်ရွက်ခဲ့ကြပြီး သတင်းမီဒီယာများဖြစ်ကြသော MRTV-4 နှင့် မြစ်ကြီးနား သတင်းဂျာနယ်များကလည်း လိုက်ပါ၍ သတင်းရယူကြောင်း သိရှိရပါသည်။
ကချင်ပြည်နယ်
စားသုံးသူရေးရာဦးစီးဌာန