သရက်မြို့နယ်ပတ်ဝန်းကျင်ကျေးရွာများဖြစ်သော လုံးတော်၊ ကံလှ၊ ရင်ကြီး၊ ဆတ်လှ၊ မင်းတည်း၊ ပျဉ်ထောင်၊ မြွေပွေး၊ ရွာသစ်၊ ကျောက်အိုင်၊ ကျောက်အိုး၊ ငလှိုင်ခြုံ၊ ရှမ်းရွာကျော၊ ပေကတင်၊ ဘန့်ပြင်၊ အုန်းမွန်တောစသည့် ကျေးရွာများမှထွက်ရှိသည့် ဆီးသီးအစို၊ အခြောက်များ ဈေးကွက်အတွင်းသို့ ဝင်ရောက်လျက်ရှိပါသည်။ ဇန်နဝါရီလ(ဒုတိယ)ပတ်တွင် ဆီးသီးအစို၊ အခြောက် (၁)တင်းလျှင် ကျပ်(၆၅၀၀)ဖြစ်ပြီး၊ (တတိယ)ပတ်တွင် ကျပ်(၇၅၀၀)ဖြစ်၍ ယခင်အပတ်ထက် ကျပ် (၁၀၀၀)ဈေးမြင့်ခဲ့ပါကြောင်း၊ တစ်နေ့လျှင် တင်းရေ (၁၅၀ မှ ၁၈၀) ဝန်းကျင်အထိ နေ့စဉ် ဝင်ရောက်၍ အရောင်းအဝယ်ဖြစ်လျက်ရှိကြောင်း၊ ဝယ်ယူရရှိပြီးသော ဆီးသီးများကို ဆီးသီးအခွံ ချွတ်စက်ဖြင့် ဆီးစေ့ရအောင် ကြိတ်ခွဲပြီး ရရှိလာသောဆီးစေ့များအား (၁)တင်းလျှင် ကျပ်(၃၈၀၀၀ မှ ၄၀၀၀၀ ) ဈေးဖြင့် အောင်လံမြို့သို့ ရောင်းချရပါကြောင်း ဆီးသီးဝယ်ယူသူတစ်ဦးထံမှ သိရှိရပါသည်။
ထို့အပြင် ဆီးသီးကောက်သူများမှ နေ့စဉ်ဆီးသီးကောက်ယူ၍ ဈေးကွက်အတွင်းသို့ ရောင်းချရာတွင် ယခင်နှစ်က ဆီးသီး(၁)တင်းလျှင် ကျပ်(၃၅၀၀ မှ ၄၀၀၀)ခန့် သာရရှိပြီး၊ ယခုနှစ် ဆီးသီး (၁)တင်းဈေးမှာ ကျပ်(၆၀၀၀ မှ ၇၅၀၀)ဖြင့် ရောင်းချရ၍ အပိုဝင်ငွေတိုးလျက်ရှိပါကြောင်း အုန်းမွန်တောကျေးရွာရှိ ဆီးသီးကောက်သူဦးခင်ထွန်းထံမှ သိရှိရပါသည်။
DOCA(မကွေး)