ငှက်သိုက်သည်တနင်္သာရီတိုင်းဒေသကြီးတွင်အများဆုံးထွက်ရှိကြပြီး စီးပွားဖြစ်လုပ်ကိုင်နေသည့်လုပ်ငန်း တစ်ခုလည်းဖြစ်သည်။ ငှက်သိုက်များသည် အာဟာရဖြစ်ပြီး ခွန်အားစွမ်းအင်တိုးစေသဖြင့် ကိုယ်ခံအားနည်းသူများ၊ သက်ကြီးရွယ်အိုများနှင့် အားဆေးထုတ်လုပ်သည့် ကုမ္ပဏီများကဝယ်ယူလေ့ရှိပြီး ရန်ကုန်နှင့် အခြားဒေသများသို့ ရောင်းချလျက်ရှိကြောင်း ငှက်သိုက်လုပ်ငန်းရှင်များထံမှ သိရှိရပါသည်။
ယခင်က မြိတ်မြို့တွင် သဘာဝအလျောက်လာရောက် အသိုက်ဆောက်နေသော ငှက်သိုက်အိမ် တအိမ် တည်းသာရှိခဲ့ရာ ဈေးကောင်းရရှိမှုကြောင့် ငှက်ခေါ်စက်များတပ်ဆင်၍ ငှက်သိုက်လုပ်ငန်း လုပ်ကိုင်သူအများအပြား ရှိလာကြပါသည်။ ဇီဝဇိုးငှက်များ၏ အံဖတ်ဖြင့် ဆောက်လုပ်ထားသော အသိုက်များကို ၃ လတကြိမ်၊ ၄ လတကြိမ် ခွာယူကြပြီး ရောင်းချကြရာ ငှက်သိုက်အိမ်များများ ဆောက်ထားသောသူများမှာ ပိသာချိန် ပိုမိုထွက်ကြကြောင်း၊ ငှက်သိုက် အသန့်ဖြစ်ပါက ဈေးပိုမိုရရှိပြီး၊ အမွှေးပါသော ငှက်သိုက်များမှာ ဈေးရနည်းကြောင်း သိရသည်။
လတ်တလောတွင် မြိတ်မြို့၊ သဘာဝငှက်သိုက်၏စျေးနှုန်းမှာ ငှက်သိုက်အကြမ်း ၁ကျပ်သားလျှင် ၃၆၀၀၀ ကျပ်၊ ငှက်သိုက်အချော ၁ကျပ်သားလျှင် ၅၃၀၀၀ကျပ်နှင့် တစ်ခါသောက်ပုလင်း(၄၅မီလီလီတာ)တစ်ဗူးလျှင် ၆၀၀၀ကျပ်ခန့်ရှိကြောင်း သိရှိရပါသည်။
DOCA(တနင်္သာရီ)