မကွေးတိုင်းဒေသကြီး၊ မင်းဘူးမြို့နယ်၌ ဆောင်းကြက်သွန်နီများစိုက်ပျိုးပြီး ဈေးကောင်းရရှိရန် မျှော်လင့်လျက်ရှိကြောင်း၊ မိုးကြက်သွန်နီထွက်ရှိချိန်၌ (၁)ပိဿာလျှင် ကျပ်(၃၅၀၀)ဖြစ်ပြီး၊ ဇန်နဝါရီလ(စတုတ္ထ)ပတ်တွင် (၁)ပိဿာလျှင် ကျပ်(၂၀၀၀ မှ ၂၂၀၀)အထိရောင်းချရပါကြောင်း ရွှေတပင်ကျေးရွာရှိ ကြက်သွန်နီစိုက်တောင်သူများထံမှသိရှိရပါသည်။ ယခုအချိန်တွင် ဈေးကွက်အတွင်းသို့ ကြက်သွန်နီဝင်ရောက်မှုမှာလည်း နည်းလာပါကြောင်း မင်းဘူးမြို့ရှိ ကြက်သွန်နီပွဲရုံပိုင်ရှင်များထံမှသိရှိရပါသည်။
ကြက်သွန်နီစိုက်ပျိုးရာတွင် ယခင်က မိုးတွင်းကာလများတွင်သာ စိုက်ပျိုးကြသော်လည်း ယခုအခါတွင် ချောင်းရေနှင့် စက်ရေတွင်းများတူးဖော်၍ စိုက်ပျိုးလာကြသည်ကိုတွေ့ရှိရပါကြောင်း၊ ကြက်သွန်နီစိုက်ပျိုးရာတွင် သွင်းအားစုဈေးကြီးခြင်း၊ ရေတင်၍လည်း စိုက်ပျိုးရသည့်အတွက် စက်သုံးဆီဈေးမြင့်တက်နေမှုကြောင့် ဈေးမကောင်းပါက စိုက်ပျိုးစရိတ်ကြေရုံသာရရှိနိုင်မည်ဖြစ်၍ ဆောင်းကြက်သွန်နီများပေါ်ချိန်တွင် ဈေးကောင်းရရန် မျှော်လင့်လျက်ရှိကြောင်း၊ လက်ရှိတွင် လက်လီဈေး (၁)ပိဿာလျှင် ကျပ်(၂၀၀၀ မှ ၂၂၀၀)အထိရောင်းရ၍ ကြက်သွန်နီစိုက်ပျိုးသူများမှာ အဆင်ပြေလျက်ရှိကြကြောင်း မင်းဘူးမြို့ရွှေတပင်ကျေးရွာရှိ ကြက်သွန်နီစိုက်တောင်သူ ဦးမြတ်စိုးထံမှသိရှိရပါသည်။
DOCA(မကွေး)