ပြည်ပကုန်သွယ်မှုသတင်းများ

               ဖိလစ်ပိုင်စီးပွားရေးဇုန်အာဏာပိုင်အဖွဲ့ (PEZA) ကပြန်လည်ပြည့်ဖြိုးမြဲစွမ်းအင်၊ ကုန်ထုတ်လုပ်ခြင်းနှင့် သတင်းအချက်အလက်နည်းပညာတို့တွင် စုစုပေါင်းရင်းနှီးမြှုပ်နှံမှုတန်ဖိုး ပီဆို (ဖိလစ်ပိုင်သုံးငွေကြေး) ၉၈.၄ သန်းရှိသည့် စီမံကိန်း ၃ ခုကိုခွင့်ပြုခဲ့ကြောင်းသိရပါသည်။ PEZA ၏ညွှန်ကြားရေးမှူးဖြစ်သူ Tereso Panga က စီးပွားရေးလုပ်ငန်းသစ်သုံးခုနှင့် နိုဝင်ဘာလ ၁၄ ရက်နေ့ကလက်မှတ်ရေးထိုးခဲ့ကြောင်း ဖိလစ်ပိုင်နိုင်ငံရင်းနှီးမြှုပ်နှံမှုမြှင့်တင်ရေးအေဂျင်စီက ပြောကြားခဲ့ပါသည်။ ထိုခွင့်ပြုခဲ့သည့်စီမံကိန်းထဲမှ ပီဆို ၆၁.၀၆ သန်းတန်ဖိုးရှိသည့် Tsuneishi Green Energy စီမံကိန်းသည် နိုင်ငံ၏ပြန်လည်ပြည့်ဖြိုးမြဲစွမ်းအင် ဖွံ့ဖြိုးတိုးတက်ရေးတွင် ပံ့ပိုးပေးနိုင်ရန်မျှော်လင့်ရကြောင်းသိရပါသည်။ ထိုကုမ္ပဏီသည် Balamban ရှိ West Cebu စက်မှုဇုန်တွင် ဆိုလာစွမ်းအင်ပံ့ပိုးမှုပေးမည်ဟုသိရပြီး ဇုန်အတွက် သန့်စင်ပြီးတည်ငြိမ်မှုရှိသော စွမ်းအင်ဖန်တီးပေးနိုင်မည်ဟုသိရပါသည်။ Tsuneishi ၏ဆိုလာစွမ်းအင်ပံ့ပိုးမှုသည် PEZA ၏စီးပွားရေးဇုန်များတွင် အစိမ်းရောင်စွမ်းအင်သုံးစွဲမှုအလေ့အထသို့ တွန်းအားပေးဆောင်ရွက် နေမှုကိုကူညီပံ့ပိုးနိုင်မည်ဟုသိရပါသည်။ ဒုတိယခွင့်ပြုခဲ့သည့်စီမံကိန်းမှာ Santo Tomas မြို့ရှိ Light Industry and Science ဇုန်တွင် Wenshan Electronic Philippines Corp ၏ ပီဆို၁၃ သန်းတန်ကြေးရှိသည့် နည်းပညာမြင့်ချပ်စ်ထုတ်လုပ်မည့်စီမံကိန်းဖြစ်ကြောင်းသိရပါသည်။ Wenshan ၏ရင်းနှီးမြှုပ်နှံမှုသည် အီလတ်ထရောနစ်ထုတ်လုပ်ခြင်းတွင် ဖိလစ်ပိုင်၏ယှဉ်ပြိုင်နိုင်စွမ်းကို အားကောင်းစေရန်ကူညီပေးနိုင်မည်ဖြစ်သကဲ့သို့ ကမ္ဘာ့လုံးဆိုင်ရာစျေးကွက်အတွက် တန်ဖိုးမြင့်ထုတ်လုပ်ခြင်းတွင်ပံ့ပိုးရန် ၎င်းတို့၏စွမ်းရည်ကိုမြှင့်တင်နိုင်မည်ဟုသိရပါသည်။ PEZA ကခွင့်ပြုခဲ့သည့်တတိယစီမံကိန်းသည် Makita မြို့ရှိ ကွန်ပြူတာအထောက်အကူပြု ဝန်ဆောင်မှုနှင့် ပို့ကုန်ဗဟုသုတများဖြန့်ဝေပေးနိုင်မည့် Tractebal Red Inc ၏ ပီဆို ၂၄.၃၇ သန်းတန် စီမံကိန်းဖြစ်ကြောင်းသိရပါသည်။ ထိုရင်းနှီးမြှုပ်နှံမှုသည်နည်းပညာကဏ္ဍတွင် ဆန်းသစ် တီထွင်မှု မြှင့်တင်ရန်နှင့် အလုပ်အကိုင်များဖန်တီးပေးနိုင်ရန် မျှော်လင့်ရကြောင်းသိရပါသည်။ Tractebal Red ၏ မှတ်ပုံတင်မှုသည် ဗြိတိန်လုပ်ငန်းများက ဖိလစ်ပိုင်တွင်ရင်းနှီးမြှုပ်နှံရန် စိတ်ဝင်စားမှုကြီးထွားလာမှုကို ရောင်ပြန်ဟပ်ကြောင်း PEZA ကပြောကြားခဲ့ပါသည်။ Panga က PEZA သည် စီးပွားရေးကြီးထွားမှုကိုမောင်းနှင်ပေးမည့်  ရင်းနှီးမြှုပ်နှံမှုဝန်းကျင်သစ် ဖန်တီးပေးရန်၊တည်ငြိမ်မှုနှင့်ဆန်းသစ်တီထွင်မှုကိုမြှင့်တင်ရန်အာမခံခဲ့ကြောင်းသိရှိရပါသည်။

The Philippine Star

DOCA(ရန်ကုန်)        

              ထိုင်းနိုင်ငံ၏ စားနပ်ရိက္ခာကုန်သွယ်မှုတန်ဖိုးသည် ၂၀၂၅ ခုနှစ်တွင် ဘတ်ငွေ ၇၀၀ ဘီလီယံကျော်အထိ ရောက်ရှိရန်မျှော်မှန်းထားပြီး ၂၀၂၆ ခုနှစ်တွင် ကမ္ဘာ့စားနပ်ရိက္ခာ ဗဟိုချက်ဖြစ်လာရန် ထိုင်းနိုင်ငံအား ပုဂ္ဂလိကကဏ္ဍများမှ တွန်းအားပေးရန်စီစဉ်ထားကြောင်းသိရသည်။ ထိုင်းစားသောက်ဆိုင်များအသင်းဥက္ကဋ္ဌ Taniwan Konnmongkon ၏ ပြောကြားချက်အရ ထိုင်းနိုင်ငံ၏စားသောက်ကုန် ကုန်သွယ်မှုတန်ဖိုးသည် ၂၀၂၄ ခုနှစ်တွင် ထိုင်းဘတ်ငွေ ၆၉၀ ဘီလီယံအထိ ရှိလာမည်ဟုခန့်မှန်းထားပြီး တိုးတက်မှုနှုန်း ၅% ဖြင့် လာမည့်နှစ်တွင် ဘတ်ငွေ ၇၀၀ ဘီလီယံ ကျော်လွန်နိုင်သည်ဟုဆိုသည်။ နိုင်ငံတော်ဝင်ငွေ၏ အရေးပါသောကဏ္ဍတစ်ခုအဖြစ် စားသောက်ဆိုင်ခရီးသွားလုပ်ငန်းကို မြှင့်တင်ရန်ရည်ရွယ်၍ မစ္စတာ Taniwan မှ သူမ၏ အဖွဲ့အစည်းသည် ထိုင်းနိုင်ငံခရီးသွားလုပ်ငန်း အာဏာပိုင်(TAT)၊ Phoenix Food Wholesale Hub၊ ထိုင်းကုန်သည်ကြီးများအသင်း၊ ထိုင်းစက်မှုလုပ်ငန်းအဖွဲ့ချုပ်၊ ထိုင်းကျန်းမာရေးမြှင့်တင်ရေးဖောင်ဒေးရှင်းတို့နှင့် ပူးပေါင်းဆောင်ရွက်ခဲ့ကြောင်း ဖြေကြားခဲ့သည်။ ၂၀၂၅ ခုနှစ်တွင် ထိုင်းနိုင်ငံသည် ခရီးသွား ၃၉ သန်းအား ကြိုဆိုနိုင်ရန်ရည်မှန်းထားပြီး ခရီးသွားလုပ်ငန်းမှ ဝင်ငွေ ဘတ် ၃.၄ ထရီလီယံအထိတိုးမြင့်လာစေရန် ထိုင်းအစားအသောက်များက အရေးပါသောအခန်းကဏ္ဍတွင်ပါဝင်လျက်ရှိကြောင်း သူမကဆက်လက်ပြောကြားခဲ့သည်။ သီးခြားဖွံ့ဖြိုးတိုးတက်မှုတစ်ခုအဖြစ် ထိုင်းစားသောက်ဆိုင်လုပ်ငန်းရှင်များအသင်းနှင့် ထိုင်းကုန်သည်ကြီးများအသင်းတို့သည် ၂၀၁၉ ခုနှစ်မှစ၍ ဆက်တိုက်ဈေးနှုန်းနိမ့်ကျခဲ့သော ကကတစ်ငါးများအား နာမည်ပြန်လည်ရရှိနိုင်ရေးအတွက် ဆောင်ရွက်လျက်ရှိကြသည်။ ထိုင်းကုန်သည်ကြီးများအသင်း၏ ကူညီပံ့ပိုးမှုဖြင့် ထိုပဏာမခြေလှမ်းသည် နိုင်ငံ၏ပင်လယ်စာဈေးကွက်အား ယှဉ်ပြိုင်နိုင်စွမ်း မြင့်မားလာစေမည်ဖြစ်သည်။ မလေးရှားနိုင်ငံသည် ပုဇွန်မွေးမြူခြင်းမှ ကကတစ်ငါးမွေးမြူခြင်းဘက်သို့ အာရုံပြောင်းလာခဲ့ပြီးနိုင်ငံ၏ ပင်လယ်စာလုပ်ငန်းသည် စိန်ခေါ်မှုများနှင့် ရင်ဆိုင်ခဲ့ရသည်။ ထို့ကြောင့် မလေးရှားနိုင်ငံသည် အာဆီယံလွတ်လပ်သော ကုန်သွယ်မှုသဘောတူညီချက်အရ ထိုင်းသို့ အကောက်ခွန် ၀% ဖြင့် ကကတစ်ငါးများကို စတင်၍တင်ပို့ခဲ့သည်။ ထိုင်းကုန်သည်ကြီးများအသင်း၊ ထိုင်းစားသောက်ဆိုင်အသင်းနှင့် Thai Marine Finfish Farmer Association တို့သည် ယခုအခါ ထိုင်းနိုင်ငံတွင် ဘေးကင်း၍သန့်ရှင်းလတ်ဆတ်ပြီး အနံ့အသက်ကင်းသော ပင်လယ်ကကတစ်များကို စားသုံးမှုမြှင့်တင်ရန် လုပ်ဆောင်လျက်ရှိသည်။ TFTM ၂၀၂၄ နောက်ပိုင်းတွင် အမှာစာများ သိသိသာသာတိုးလာမည်ဟု မျှော်လင့်ရပြီး ငါးမွေးမြူသူများအတွက် ဝင်ငွေများလည်းတိုးလာရန် မျှော်လင့်ထားကြောင်း Mrs Taniwan မှ ပြောကြားခဲ့သည်။

Source : bangkokpost

DOCA(ရန်ကုန်)                 

                တိုင်ဖွန်းမုန်တိုင်း ဆက်တိုက်တိုက်ခတ်မှုကြောင့် ငါးဖမ်းလုပ်ငန်းကဏ္ဍတွင် ပီဆို ၁ ဘီလီယံနီးပါး ထိခိုက်ပျက်စီးမှုနှင့်အတူ ငါးဖမ်းရာသီပိတ်သိမ်းရာသီသို့ ရောက်ရှိလာပြီဖြစ်သောကြောင့် ဖိလစ်ပိုင်နိုင်ငံ၏ အစိုးရမှ ငါးမတ်ထရစ်တန်ချိန် ၈၀၀၀ အား ထပ်မံတင်သွင်းမည်ဖြစ်ကြောင်း စိုက်ပျိုးရေးဦးစီးဌာနမှ အရာရှိတစ်ဦးက (၁၉.၁၁.၂၀၂၄) ရက်နေ့၊ အင်္ဂါနေ့က ပြောကြားခဲ့သည်။ စိုက်ပျိုးရေးလက်ထောက်အတွင်းတန်ဖြစ်သော An Arnel de Mesa က ၁၈.၁၁.၂၀၂၄ ရက်နေ့၊ တနင်္လာနေ့တွင် စိုက်ပျိုးမွေးမြူရေးဌာနအရာရှိများ အစည်းအဝေးတွင် နောက်ထပ်ငါးမတ်ထရစ်တန်ချိန် ၈၀၀၀ ကို တင်သွင်းရန်ဆွေးနွေးခဲ့ကြောင်း သတင်းစာရှင်းလင်းပွဲတွင် ပြောကြားခဲ့သည်။ စိုက်ပျိုးရေးဝန်ကြီး Francisco Tiu Laurel Jr သည် နိုဝင်ဘာ ၁ ရက် ငါးဖမ်းရာသီပိတ်သိမ်းချိန်အတွင်း ငါးတင်သွင်းမှု မတ်ထရစ်တန်ချိန် ၃၀၀၀၀ ကို ခွင့်ပြုခဲ့ပြီးနောက် ယခုနှစ်အတွက် ငါးတင်သွင်းမှုစုစုပေါင်းမှာ မတ်ထရစ်တန်ချိန် ၃၈၀၀၀ သို့ ရောက်ရှိမည်ဖြစ်ကြောင်း De Mesa က ပြောကြားခဲ့သည်။ ဈေးကွက်များတွင် လက်လီဈေးနှုန်းများမြင့်တက်နေသော်လည်း ငါးပြတ်လပ်မှုမရှိနိုင်သေးကြောင်း ပြည်ပမှတင်သွင်းသည့်ငါးပမာဏသည် ဒီဇင်ဘာလ ပထမနှစ်ပတ်အတွင်း နောက်ထပ် မတ်ထရစ်တန်ချိန် ၈၀၀၀ ရောက်ရှိလာဦးမည်ဖြစ်ကြောင်း De Mesa မှ ဆက်လက်ပြောကြားခဲ့ကြောင်းသိရှိရပါသည်။

Source : Philstar

DOCA(ရန်ကုန်)

         အကယ်၍ အမေရိကန်သမ္မတအဖြစ် ရွေးချယ်ခံထားရသည့်‌ ဒေါ်နယ်ထရမ့်က အကောက်ခွန်နှုန်းထားများကိုတိုးမြှင့်ပါက ထိုင်းနိုင်ငံ၏ စီးပွားရေးကိုထိခိုက်စေမည်ဖြစ်ပြီး ဘတ်ငွေကိုအားပျော့စေနိုင်သောကြောင့် နိုင်ငံ၏ ၂၀၂၅ခုနှစ်အတွက်ရည်မှန်းထားသည့် စီးပွားရေးကြီးထွားနှုန်းနှင့် လွဲချော်နိုင်ကြောင်း လေ့လာမှုအရသိရပါသည်။ ထိုင်းနိုင်ငံကုန်သည်များအသင်းတက္ကသိုလ်၏ ဥက္ကဋ္ဌဖြစ်သူ Thanavath Phonvichai က ထိုင်းနိုင်ငံ၏စီးပွားရေးသည် အမေရိကန်‌ဒေါ်လာ ၄.၆ ဘီလီယံခန့်ဆုံးရှုံးရန်အလားအလာရှိနေပြီး လာမည့်နှစ်အတွက်ရည်မှန်းထားသည့် GDP တိုးတက်နှုန်း ၃ရာခိုင်နှုန်းထဲမှ ၀.၉ ရာခိုင်နှုန်းခန့်လျော့ကျသွားနိုင်ကြောင်း ဘန်ကောက်မြို့တွင် နိုဝင်ဘာလ ၂၀ရက်နေ့ကပြောကြားခဲ့ပါသည်။ ထိုအချက်ကိုတက္ကသိုလ်က ထရမ့်၏ ယခင်ကကြေညာထားသည့် အကောက်ခွန်အစီအစဥ်များကိုအခြေခံ၍ တွက်ချက်ထားခြင်းဖြစ်ကြောင်းသိရပါသည်။ ထိုင်းအာဏာပိုင်များသည် ထရမ့်၏အုပ်ချုပ်မှုအောက်တွင် ဖြစ်လာနိုင်သောကုန်သွယ်ရေးတင်းမာမှုမှကာကွယ်ရန် အကြွေးဖြေလျှော့ပေးသည့်စီမံချက်များနှင့် ငွေကြေးထုတ်ပေးခြင်းအားဖြင့် ကြီးထွားမှုတွင် နာလံထူလာစေရန် ပြင်ဆင်လျက်ရှိကြောင်းသိရပါသည်။ ထရမ့်၏ ပထမအကြိမ် သမ္မတသက်တမ်းတွင် ထိုင်းနိုင်ငံသည် အမေရိကန်-တရုတ်ကုန်သွယ်ရေးစစ်ပွဲမှတစ်ဆင့် အကျိုးအမြတ်ရရှိသည့်နိုင်ငံများထဲမှ တစ်နိုင်ငံဖြစ်ခဲ့ပြီး အဘယ်ကြောင့်ဆိုသော် ကုမ္ပဏီများက ထရမ့်၏တရုတ်နိုင်ငံအပေါ် ကုန်သွယ်ရေးထိန်းချုပ်မှုနှင့် အကောက်ခွန်ချမှတ်မှုများကိုကျော်လွှားရန် တရုတ်နိုင်ငံမှ အခြားနိုင်ငံများထံသို့ နေရာပြောင်းရွှေ့ကြသောကြောင့်ဖြစ်ကြောင်းသိရပါသည်။ Mr.Thanavath က ထရမ့်၏မူဝါဒများသည် ပြည်တွင်းငွေကြေးကို အားနည်းစေနိုင်ကာ ထိုင်းနိုင်ငံတွင် အမေရိကန်၏ရင်းနှီးမြှုပ်နှံမှုများကို နည်းပါးစေနိုင်ကြောင်းပြောကြားခဲ့ပါသည်။ ထိုထိခိုက်မှုသည် ထိုင်းနိုင်ငံ၏စီးပွားရေးကို ၎င်းတို့၏အကြီးမားဆုံးတင်ပို့ရာ ဈေးကွက်ဖြစ်သည့် အမေရိကန်သို့ တင်ပို့မှုကျဆင်းခြင်းဖြင့် တိုက်ရိုက်ထိခိုက်နိုင်ပြီး ထောက်ပံ့မှုကွင်းဆက်တွင် အနှောင့်အယှက်ဖြစ်စေခြင်းအားဖြင့် သွယ်ဝိုက်ထိခိုက်စေနိုင်ကြောင်းလေ့လာမှုအရသိရပါသည်။ အမေရိကန်ဈေးကွက်သို့ စုစုပေါင်းတင်ပို့မှု၏ ငါးပုံပုံတစ်ပုံနီးပါးရှိသည့် ထိုင်းနိုင်ငံ၏ လျှပ်စစ်ပစ္စည်းနှင့်အီလတ်ထရောနစ်ပစ္စည်းတင်ပို့မှုသည် ထိခိုက်မှု အရှိနိုင်ဆုံးဖြစ်ကြောင်း တက္ကသိုလ်၏ထုတ်ပြန်ချက်အရသိရပါသည်။ အခြားအဓိကလုပ်ငန်းများဖြစ်သည့် စက်ပစ္စည်းများ၊ ပြုပြင်ထားသောအစားအစာများ၊ မော်တော်ယာဉ်နှင့် အစိတ်အပိုင်းများ၊ စတီးလ်နှင့်ရာဘာတို့မှာလည်း ကျဆင်းနိုင်ကြောင်းသိရပါသည်။ အမေရိကန်-တရုတ် ကုန်သွယ်ရေးတင်းမာမှုတွင် အကျိုးအမြတ်ရရှိနိုင်မှုမှာ စက်ပစ္စည်းများ၊ လျှပ်စစ်ပစ္စည်းများနှင့် ရော်ဘာ အစရှိသည့် တချို့ကဏ္ဍများတွင် တရုတ်ထုတ်ကုန်များကို ထိုင်းနိုင်ငံက အစားထိုးနိုင်စွမ်းရှိနေခြင်းဖြစ်ကြောင်းသိရပါသည်။

Bangkok Post

DOCA(ရန်ကုန်)

        ဗီယက်နမ်ကွန်မြူနစ်ပါတီအထွေထွေအတွင်းရေးမှူး  To Lam ၏ နိုဝင်ဘာလ ၂၁-၂၃ ၌ မလေးရှားနိုင်ငံသို့သွားရောက်မည့် တရားဝင်ခရီးစဥ်အတွင်း နှစ်နိုင်ငံကြားစီးပွားရေးနှင့် ကုန်သွယ်‌ရေးပူးပေါင်းဆောင်ရွက်မှုမှတ်တိုင်သစ်နှင့် အခွင့်အလမ်းသစ်များဖွင့်လှစ်နိုင်ရန် မျှော်လင့်ရကြောင်းသိရပါသည်။ ဗီယက်နမ်နှင့်မလေးရှားတို့သည် အဓိကစီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှုမိတ်ဖက်များဖြစ်ကြပြီး နှစ်နိုင်ငံသံတမန်ဆက်ဆံရေးထူထောင်ခဲ့သည့် ၁၉၇၃ခုနှစ်မှစ၍ ၎င်းတို့၏စီးပွားရေးနှင့်ကုန်သွယ်ရေးချိတ်ဆက်မှုမှာ ပုံမှန်ကြီးထွားမှုရှိခဲ့ကြောင်းသိရပါသည်။ ဗီယက်နမ်အကောက်ခွန်အထွေထွေဦးစီးဌာန၏ အချက်အလက်များအရ ၂၀၂၄ခုနှစ်၏ ပထမဆယ်လတာကာလတွင် နှစ်နိုင်ငံအပြန်အလှန်ကုန်သွယ်မှုမှာ အမေရိကန်ဒေါ်လာ ၁၀.၆၃ ဘီလီယံရှိခဲ့ပြီး ၂၀၂၃ခုနှစ်၏ တူညီသည့်ကာလထက် ၁၄.၁ ရာခိုင်နှုန်းမြင့်တက်ခဲ့ကြောင်းသိရပါသည်။ ဗီယက်နမ်မှမလေးရှားသို့ အမေရိကန်ဒေါ်လာ ၃.၈၁ ဘီလီယံတန်ဖိုးတင်ပို့ခဲ့ပြီး (၃.၅%မြင့်တက်) အမေရိကန်ဒေါ်လာ ၆.၈၂ ဘီလီယံတန်ဖိုးပြန်လည်တင်သွင်း (၂၁.၁% မြင့်တက်)ခဲ့ကြောင်းသိရပါသည်။ ဆန်တင်ပို့မှုသည် ၁၃၁.၂ ရာခိုင်နှုန်းမြင့်တက်ခဲ့ပြီး ဗီယက်နမ်မှ မလေးရှားသို့ တတိယအကြီးမားဆုံးတင်ပို့သည့် ကုန်ပစ္စည်းဖြစ်ခဲ့ကာ စုစုပေါင်းတင်ပို့မှု၏ ၉.၈ ရာခိုင်နှုန်းရှိကြောင်းသိရပါသည်။ ဆန်နှင့်အတူ ကော်ဖီတင်ပို့မှုသည်လည်း ၁၁၇.၅ ရာခိုင်နှုန်းမြင့်တက်ခဲ့ကြောင်းသိရပါသည်။ သို့သော် ထိုမြင့်တက်မှုသည် မလေးရှားကော်ဖီလုပ်ငန်းအတွက် ကုန်ကြမ်းအနေဖြင့်အသုံးပြုရန် ကော်ဖီစေ့များတင်သွင်းမှုကြောင့် မြင့်တက်ခြင်းဖြစ်ကြောင်းသိရပါသည်။ ဓာတုပစ္စည်းနှင့်ရော်ဘာတင်ပို့မှုမှာ ၁၂၄.၁ ရာခိုင်နှုန်းနှင့် ၂၈၇.၆ ရာခိုင်နှုန်းအသီးသီးဖြင့် သိသာစွာမြင့်တက်ခဲ့သော်လည်း စုစုပေါင်းတန်ဖိုးရရှိမှုမှာ ၃.၁ ရာခိုင်နှုန်းနှင့် ၀.၆ ရာခိုင်နှုန်း အသီးသီးဆက်လက်နိမ့်ကျခဲ့ကြောင်းသိရပါသည်။ ယခုနှစ် ပထမဆယ်လတာကာလအတွင်း ဗီယက်နမ်က မလေးရှားထံမှပြန်လည်တင်သွင်းမှုတွင် ကွန်ပျူတာ၊ အီလတ်ထရောနစ်နှင့် အစိတ်အပိုင်းများတင်သွင်းမှုမှာ ထိပ်ဆုံးတွင်ရပ်တည်နေပြီး ၂၀၂၃ တူညီသည့်ကာလထက် ၂၅.၈ ရာခိုင်နှုန်းမြင့်တက်ခဲ့ကြောင်းသိရပါသည်။ ရေနံထုတ်ကုန်တင်သွင်းမှုမှာ ဒုတိယနေရာတွင်ရပ်တည်နေပြီး ၂၀၂၃ တူညီသည့်ကာလထက် ၂၅.၆ ရာခိုင်နှုန်းမြင့်တက်ခဲ့ကြောင်းသိရပါသည်။ ကျွမ်းကျင်သူများ၏အဆိုအရ မလေးရှားနိုင်ငံဈေးကွက်သည် အားကောင်းပြီး ကွဲပြားသောဝယ်လိုအားရှိနေပြီး ဗီယက်နမ်နှင့်တူညီသော စားသုံးသူထုံးတမ်းဓလေ့ရှိနေကြောင်းသိရပါသည်။ နှစ်နိုင်ငံစလုံးသည် များစွာသောဒေသဆိုင်ရာ ကုန်သွယ်ရေးသဘောတူညီချက်များတွင် အဖွဲ့ဝင်များဖြစ်နေသောကြောင့် ဗီယက်နမ်၏ပို့ကုန်များအတွက် ကုန်သွယ်ရေးအတားအဆီးများ အတော်နည်းပါးကြောင်းသိရပါသည်။ သို့သော် အစားအစာထုတ်ကုန်များသည် ဗီယက်နမ်နိုင်ငံတော်အေဂျင်စီများက အသိအမှတ်မပြုသော်လည်း မူစလင်နိုင်ငံများတွင် သေချာပေါက် လိုအပ်သည့် ဟာလာအသိအမှတ်ပြုလက်မှတ်လိုအပ်ကြောင်းသိရပါသည်။ လတ်တလောတွင် ဗီယက်နမ်ရှိ အစိုးရမဟုတ်သည့်အဖွဲ့အစည်းတစ်ခုသည် မလေးရှား အစ္စလာမ္မစ်ဖွံ့ဖြိုးတိုးတက်ရေးဦးစီးဌာနက အသိအမှတ်ပြုသည့်  ဟာလာအသိအမှတ်ပြုလက်မှတ်ကိုထုတ်ပြန်ရန် အာဏာပိုင်ဆိုင်ထားကြောင်းသိရပါသည်။

Source : VietnamPlus

DOCA(ရန်ကုန်)