ပြည်ပကုန်သွယ်မှုသတင်းများ

     ပြည်တွင်းတောင်သူများကို ကာကွယ်ပေးရန်အတွက် စက်တင်ဘာလ ၁ ရက်နေ့မှစတင်၍ ပြည်ပမှ ဆန်တင်သွင်းမှုကို နှစ်လခန့်ဆိုင်းငံ့မည်ဖြစ်ကြောင်း ဖိလစ်ပိုင်အစိုးရက ကြေညာခဲ့ပြီး နောက် ဗီယက်နမ် စက်မှုနှင့် ကုန်သွယ်ရေးဝန်ကြီးဌာနအနေဖြင့် ကူညီထောက်ပံ့မှုများ ပြုလုပ် ပေးရန် ဗီယက်နမ်ကုန်သည်များက တောင်းဆိုခဲ့ကြကြောင်း သိရှိရပါသည်။

    ဗီယက်နမ်၏ နှစ်စဉ် ဆန်တင်ပို့မှုတွင် ဖိလစ်ပိုင်သို့ တင်ပို့မှုသည် ၄၀-၄၅ ရာခိုင်နှုန်းရှိခြင်း ကြောင့် ယခုကဲ့သို့ ဆိုင်းငံ့မည့်ကြေညာချက်ထွက်ပေါ်လာခြင်းသည် ဗီယက်နမ်လယ်သမားများ၏ ဝင်ငွေကို တိုက်ရိုက်ထိခိုက်စေရုံသာမက ချုပ်ဆိုထားသည့်အရောင်းအဝယ် စာချုပ်များပျက်ပျယ် နိုင်ခြင်း၊ ကုန်လက်ကျန်ပမာဏများ မြင့်တက်လာနိုင်ခြင်း၊ တင်ပို့သူများအတွက် ငွေဖြစ်လွယ်မှု ဆိုင်ရာ ဖိအားဖြစ်စေနိုင်ခြင်း စသည်တို့ဖြစ်ပေါ်လာနိုင်ကြောင်း ဗီယက်နမ်စားသောက်ကုန် အသင်း ဥက္ကဋ္ဌ Đỗ Hà Nam က ပြောကြားခဲ့ပါသည်။

    ဩဂုတ်လတွင် ချုပ်ဆိုခဲ့သည့် အရောင်းအဝယ်စာချုပ်များသည် နှစ်လခန့် နှောင့်နှေး ကြန့်ကြာသွားနိုင်ကြောင်း၊ ထို့အပြင် ဇူလိုင်လ ၁ ရက်နေ့မှ စတင်၍ ပြည်ပပို့ကုန်များအပေါ် အခွန် ၅ ရာခိုင်နှုန်း တိုးမြှင့်ကောက်ခံခြင်းသည်လည်း တင်ပို့သူများ၏ လုပ်ငန်းလည်ပတ်မှု အရင်းအနှီး အပေါ် ထပ်မံဝန်ပိစေကြောင်း ၎င်းက ပြောဆိုခဲ့သည်။

  ဖိလစ်ပိုင်နိုင်ငံက ဆန်တင်သွင်းမှု ဆိုင်းငံ့ခြင်းကို ဖယ်ရှားပေးသည့် အချိန်အထိ ပို့ကုန် လုပ်ငန်းရှင်များ၏ ဆန်သိုလှောင်ထားရှိမှုကို ကူညီနိုင်ရန်အတွက် ဗီယက်နမ်အစိုးရအနေဖြင့် အတိုးနှုန်းသက်သာသည့် ချေးငွေ အစီအစဉ်နှင့် ချေးငွေသက်တမ်း တိုးမြှင့်ပေးသည့် အစီအမံများ ကို ဆောင်ရွက်ပေးရန် ဗီယက်နမ်စားသောက်ကုန်အသင်းက အဆိုပြုထားပါသည်။

 ထို့အပြင် ၂၀၂၄ ခုနှစ် ဇန်နဝါရီလတွင် ချုပ်ဆိုခဲ့ပြီး ၂၀၂၈ ခုနှစ် ကုန်ပိုင်းအထိ သက်ရောက် မှုရှိသည့် နှစ်နိုင်ငံ ဆန်ကုန်သွယ်မှုစာချုပ်အရ ဆန်တင်သွင်းမှု ရပ်ဆိုင်းထားချိန်အတွင်း တစ်စိတ် တစ်ပိုင်းတင်ပို့မှုများကို ထိန်းသိမ်းထားနိုင်ရန်အတွက် မည်သည့် ဆန်အမျိုးအစားများကို ယာယီ ကန့်သတ်သွားမည်ဆိုသည့် လမ်းညွှန်ချက်ရရှိရေး ဗီယက်နမ် အစိုးရအနေဖြင့် ဖိလစ်ပိုင် အာဏာပိုင်များနှင့် ပူးတွဲလုပ်ဆောင်ရန်လည်း အဆိုပြုထားသည်။

    ဖိလစ်ပိုင်မှ ဆန်တင်သွင်းမှုဆိုင်းငံ့ခြင်း အစီအစဉ်ကို ကြေညာပြီးနောက် ဩဂုတ်လအတွင်း ဖိလစ်ပိုင်ကုန်သည်များက ဆန်ဝယ်ယူမှု တိုးမြှင့်ခဲ့ရာ ဗီယက်နမ်၏ ဆန်ပို့ကုန်ဈေးနှုန်းများသည်လည်း မြင့်တက်လာခဲ့ကြောင်း၊ ဗီယက်နမ်တွင် ဆန်ကွဲ ၅ ရာခိုင်နှုန်းပါဝင်သည့် ဆန်ဈေးနှုန်းသည် တစ်တန်လျှင် ဒေါ်လာ ၃၉၁ ဖြင့်အာရှတွင် အမြင့်ဆုံးဖြစ်ခဲ့ပြီး၊ ထိုင်းနှင့် ပါကစ္စတန်တို့ထက် ဈေးနှုန်းမြင့်မားလျက် အိန္ဒိယဆန်ထက် ၁၁ ဒေါ်လာ ပိုမိုခဲ့ကြောင်း၊ ရနံ့မွှေး ဆန်တစ်တန်လျှင် ဒေါ်လာ ၅၀၀ မှ ၅၁၀ အကြား ပေါက်ဈေးရှိပြီး၊ ပုံမှန်ထက် ၁၀-၁၂ ဒေါ်လာမြင့်တက်ခဲ့ခြင်း ဖြစ်ကြောင်း သိရှိရပါသည်။

  ဗီယက်နမ်နိုင်ငံ၌ နွေရာသီမှ ဆောင်းဦးရာသီကာလအတွင်း ရိတ်သိမ်းထွက်ရှိခဲ့သည့် ဆန်စပါး အများစုကို ရောင်းချခဲ့ပြီးဖြစ်ခြင်း၊ ရှေ့လာမည့်သီးနှံမှာလည်း ပြည်တွင်းစားသုံးရန် အတွက် အဓိကအထူးပြု စိုက်ပျိုးထုတ်လုပ်မှုသာဖြစ်ခြင်းတို့ကြောင့်  ဖိလစ်ပိုင်၏ ဆန်တင်သွင်းမှု ဆိုင်းငံ့ခြင်းသည် ဗီယက်နမ်ဆန်ဈေးကွက်အပေါ် သိသာသည့် သက်ရောက်မှုမဖြစ်ပေါ်နိုင်ဟု ကုန်သည်များက ပြောကြားထားပါသည်။

   ဖိလစ်ပိုင်နိုင်ငံ အနေဖြင့် စားနပ်ရိက္ခာဖူလုံမှုရှိစေရေးအတွက် ပြည်ပမှတင်သွင်းမှုအပေါ် ကာလကြာ မှီခိုနေရဦးမည်ဖြစ်ကြောင်း၊ ဗီယက်နမ်နိုင်ငံသည် ယခုနှစ် ပထမနှစ်ဝက်၌ ဒေါ်လာ ၂.၄၄ ဘီလီယံ တန်ဖိုးရှိသော ဆန်တန်ချိန် ၄.၇ သန်း တင်ပို့ခဲ့ရာ ပမာဏအားဖြင့် ၃.၈ ရာခိုင်နှုန်း တိုးတက်ခဲ့သော်လည်း တန်ဖိုးအားဖြင့် ၁၅.၄ ရာခိုင်နှုန်းကျဆင်းခဲ့ကြောင်း၊ အဆိုပါကာလအတွင်း ဖိလစ်ပိုင်ဈေးကွက်သို့ တင်ပို့မှုသည် ပမာဏအားဖြင့် ၄၄.၆ ရာခိုင်နှုန်းနှင့် တန်ဖိုးအားဖြင့် ၄၂.၆ ရာခိုင်နှုန်းပါဝင်လျက် ဖိလစ်ပိုင်သည် ဗီယက်နမ်ဆန်ကို အများဆုံးဝယ်ယူသူအဖြစ် ရပ်တည်နေကြောင်း သိရှိရပါသည်။

Source : Vietnam News, Aug 18, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့

  အမေရိကန်နိုင်ငံထံမှ မျိုးဗီဇပြုပြင်ထားသော ပြောင်းများကို တင်သွင်းခွင့်ပြုရန် ဆုံးဖြတ် ခဲ့ခြင်းသည် ပြည်တွင်းဈေးနှုန်းများ တစ်ဟုန်ထိုးကျဆင်းမှုကို ဖြစ်စေနိုင်သဖြင့် အစိုးရအနေဖြင့် နစ်နာကြေးများ ထောက်ပံ့ပေးအပ်ရန် ထိုင်းနိုင်ငံ Phetchabun ပြည်နယ်ရှိ ရာနှင့်ချီသော ပြောင်းစိုက် တောင်သူများက ဩဂုတ် ၁၅ ရက်နေ့၌ ဆန္ဒပြတောင်းဆိုခဲ့ကြကြောင်း သိရသည်။

     အမေရိကန်မှ မျိုးဗီဇပြုပြင်ထားသော ပြောင်းတန်ချိန် ၃ သန်းကို တင်သွင်းခွင့်ပြုရန် အစိုးရက သဘောတူညီခဲ့ပြီးနောက် ပြည်တွင်းရှိ တိရစ္ဆာန်မွေးမြူရေး အစာစပ်စက်ရုံများသည် ထိုင်းပြောင်းများကို ဝယ်ယူရန်ငြင်းဆိုခြင်း သို့မဟုတ် ဈေးနှုန်းနှိမ့်ချ၍ ဝယ်ယူခြင်းတို့ကို လုပ်ဆောင် လာကြသဖြင့် တောင်သူလယ်သမားများ၏ လူနေမှုဘဝအပေါ် ဆိုးကျိုးကြီးမားစွာ သက်ရောက်လျက်ရှိကြောင်း၊ စိုက်ပျိုးထုတ်လုပ်သူများနှင့် ဆွေးနွေးတိုင်ပင်မှုမရှိပဲ ချမှတ်ခဲ့သော အဆိုပါမူဝါဒသည် လယ်သမားမိသားစုပေါင်း ၄၅၀၀၀၀ ကျော်အပေါ် ထိခိုက်မှုရှိကြောင်း၊ ထိုင်း မွေးမြူရေးအစာစပ်စက်ရုံအသင်းသည် အစိုဓာတ် ၁၄.၅ ရာခိုင်နှုန်းရှိသော အစေ့ထုတ်ပြောင်း ၁ ကီလိုဂရမ်လျှင် ဘတ်ငွေ ၉.၈၀ နှုန်းဖြင့် ဝယ်ယူမည်ဟု ယခင်က ကတိပြုထားခဲ့ကြောင်း၊ သို့သော် ယခုအခါ စက်ရုံများသည် ၁ ကီလိုဂရမ်လျှင် ၉ ဘတ်အောက် နိမ့်ကျသောနှုန်းဖြင့်သာ ပေးချေ လျက်ရှိပြီး ‌ဒေသထွက်ပြောင်းများ နေ့စဉ်ဝယ်ယူမည့် ပမာဏကို ခွဲတမ်းသတ်မှတ်ချက်များ ချမှတ် လုပ်ဆောင်လာကြကြောင်း စသည်ဖြင့် အဆိုပါပြောင်းစိုက်တောင်သူများက ပြောဆိုခဲ့ကြသည်။

   အမေရိကန်‌ပြောင်းများ တင်သွင်းမှုကို ချိန်ညှိဆောင်ရွက်နိုင်ရန် လုံလောက်သော အချိန် ကာလအဖြစ် ၃ နှစ်တာကာလအထိ အစိုဓာတ် ၃၀ ရာခိုင်နှုန်းရှိသော ပြောင်း ၁ ကီလိုဂရမ်လျှင် ၇.၅၀ ဘတ်နှုန်းဖြင့် ပြောင်းစိုက်ပျိုးမှု မှတ်ပုံတင်ထားသည့် ဧရိယာအပေါ် အခြေခံလျက် အစိုးရမှ နစ်နာကြေး ထောက်ပံ့ပေးအပ်သွားရန် ပြောင်းစိုက်တောင်သူများက တောင်းဆိုထားသည်ဟု The Nation သတင်းဌာနက ဖော်ပြပါသည်။ 

Source: The Nation Thailand, August 18, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      ရှေ့လာမည့် အနီးကပ်ကာလတွင် ဆီအုန်းစိုက်ပျိုးထုတ်လုပ်မှု နှေးကွေးကျဆင်းလာမှုနှင့် အတူ ဇီဝဒီဇယ်ဆီထုတ်လုပ်နိုင်ရန် ဝယ်လိုအားကြောင့် ပဲပုပ်ဆီများ ဈေးကွက်အတွင်း ရရှိလွယ်မှု  နည်းပါးခြင်းတို့အရ စားအုန်းဆီဈေးနှုန်းများသည် တစ်တန်လျှင် ရင်းဂစ် ၄၃၀၀ (အမေရိကန် ဒေါ်လာ ၁၀၁၈) အထက်၌ တည်ရှိနိုင်ဖွယ်ရှိကြောင်း မလေးရှားစားအုန်းဆီကောင်စီ (MPOC) က ၂၀၂၅ ခုနှစ်၊ ဩဂုတ်လ ၁၉ ရက် (အင်္ဂါနေ့) တွင် ပြောကြားခဲ့ပါသည်။

   စားအုန်းဆီကြမ်းဈေးနှုန်းများသည် ၂၀၂၅ ခုနှစ်၊ ဩဂုတ်လ ၁၉ ရက် (အင်္ဂါနေ့) ဂရင်းနစ် စံတော်ချိန် ၆ နာရီအထိ တစ်တန်လျှင် ရင်းဂစ် ၄၆၀၇ နှုန်း ရှိနေခဲ့သည်။ စားအုန်းဆီဈေးနှုန်း တည်တံ့ခိုင်မာမှုသည် ပြည်ပပို့ကုန်ဈေးကွက်တွင် ပဲပုပ်ဆီနှင့် ယှဉ်ပြိုင်နိုင်စွမ်းရှိမှုအပေါ် မူတည် မည်ဖြစ်ကြောင်း MPOC က ပြောကြားခဲ့သည်။ စားအုန်းဆီသည် ကမ္ဘာ့ ဟင်းသီးဟင်းရွက်ဆီ ဈေးကွက်ဝေစုအတွက် ပြိုင်ဆိုင်မှုရှိနေသောကြောင့် ပြိုင်ဖက်စားသုံးဆီများ၏ ဈေးနှုန်း အတက် အကျအပေါ် မူတည်လျက်ရှိသည်။

    အမေရိကန်နိုင်ငံ၊ စိုက်ပျိုးရေးဌာနသည် ပဲပုပ်ဆီထုတ်လုပ်မှု၏ ထက်ဝက်ကျော်ကို ၂၀၂၆ ခုနှစ်တွင် ဇီဝဒီဇယ် ထုတ်လုပ်ခြင်းအတွက် ပြည်တွင်း၌ အသုံးပြုမည်ဟု ခန့်မှန်းထားကြောင်း၊ အမေရိကန်၏ ပဲပုပ်ဆီ တင်ပို့မှုသည် ၂၀၂၅ ခုနှစ်တွင် တန်ချိန် ၁.၁၅ သန်းရှိခဲ့ရာ ၂၀၂၆ ခုနှစ်တွင် တန်ချိန် ၃၁၀,၀၀၀ သာရှိနိုင်ပြီး တင်ပို့မှုကျဆင်းနိုင်မည်ဟု ခန့်မှန်းရကြောင်း၊ ဘရာဇီးနိုင်ငံသည် ဇီဝဒီဇယ်ထုတ်လုပ်ရာတွင် ပဲပုပ်ဆီကို ၁၄ ရာခိုင်နှုန်းမှ ၁၅ ရာခိုင်နှုန်းအထိ ရောစပ်အသုံးပြုမှု တိုးလာသောကြောင့် ပဲပုပ်ဆီတင်ပို့မှု တိုးမြှင့်ရန် ရုန်းကန်ရနိုင်ကြောင်း၊ ရလဒ်အားဖြင့် ကမ္ဘာ့ ဈေးကွက်သည် ပဲပုပ်ဆီရှားပါးမှုကို ကာမိစေရေး အာဂျင်တီးနား၏ ပဲပုပ်ဆီ ရောင်းလိုအားအပေါ် ပိုမို မှီခိုလာရနိုင်ဖွယ်ရှိကြောင်းနှင့် ပို့ကုန်ရရှိနိုင်မှု တင်းကျပ်လာခြင်းက ဟင်းသီးဟင်းရွက်ဆီ ဈေးနှုန်းများကို အထောက်အကူဖြစ်စေကြောင်း MPOC ကပြောကြားခဲ့သည်။

    အင်ဒိုနီးရှားနိုင်ငံသည် ၂၀၂၆ ခုနှစ်တွင် ဇီဝဒီဇယ်၌ စားအုန်းဆီ ရောစပ်ပါဝင်မှုကို ၅၀ ရာခိုင်နှုန်းအထိ မြှင့်တင်ရန် စီစဉ်ထားသည့်အတွက် လက်ရှိ ၂၀၂၅ ခုနှစ်၌ ဇီဝဒီဇယ်အတွက်  ဆီအုန်းလိုအပ်ချက်သည် တန်ချိန် ၁၃ သန်းရှိရာမှ ၂၀၂၆ ခုနှစ်တွင် တန်ချိန် ၁၆ သန်းအထိ မြင့် တက်လာမည်ဖြစ်သဖြင့် စားအုန်းဆီရောင်းလိုအားကို ပိုမိုတင်းကျပ်စေမည်ဖြစ်ကြောင်း MPOC က ထပ်လောင်းပြောကြားခဲ့သည်။

   မလေးရှားကျွန်းဆွယ်၌ ထုတ်လုပ်မှုကျဆင်းခြင်းသည် ယခုနှစ် လက်ကျန်ကာလအတွင်း တစ်နိုင်ငံလုံး ထုတ်လုပ်မှု တိုးတက်ခြင်းကို အကန့်အသတ်ဖြစ်စေနိုင်သဖြင့် စက်တင်ဘာလနှင့် အောက်တိုဘာလများတွင် စားအုန်းဆီသိုလှောင်မှု ကြီးမားစွာတိုးတက်လာဖွယ်မရှိဟု MPOC က ခန့်မှန်းလျက်ရှိသည်။

    အိန္ဒိယနိုင်ငံရှိ စားသုံးဆီတင်သွင်းသူများသည် ဒီပါဝလီပွဲတော်မတိုင်မီ သိုလှောင်မှုကို မြှင့်တင်လျက်ရှိသဖြင့် ၀ယ်လိုအားခိုင်မာနေမည်ဟု မျှော်လင့်ရပြီး အာဖရိကဒေသမှ ဝယ်လိုအား သည်လည်း တည်ငြိမ်နေမည်ဟု မလေးရှားစားအုန်းဆီကောင်စီ (MPOC) က ခန့်မှန်းထားကြောင်း သတင်းရရှိပါသည်။

Source: The Edge Malaysia, 19 Aug 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

  ကမ္ဘောဒီးယားနှင့် လာအိုနိုင်ငံတို့သည် စီးပွားရေးဖွံ့ဖြိုးတိုးတက်ရန်၊ အသက် မွေးဝမ်းကျောင်းလုပ်ငန်းများမြှင့်တင်ရန်၊ နှစ်နိုင်ငံအကြား စည်းလုံးညီညွတ်မှုနှင့် ချစ်ကြည် ရင်းနှီးမှုများခိုင်မာစေရန်အတွက် နိုင်ငံတွင်းနှင့် နိုင်ငံတကာခရီးသွားလုပ်ငန်းကို မြှင့်တင်ရန် ကတိပြုခဲ့ကြသည်။ ကမ္ဘောဒီးယားနို်ငငံ၊ ခရီးသွားလုပ်ငန်းဝန်ကြီး Huot Hak နှင့် ကမ္ဘောဒီးယားနိုင်ငံဆိုင်ရာ လာအိုသံအမတ်ကြီး Buakeo Phumvongsay တို့ တွေ့ဆုံစဉ် ၂၀၂၂ ခုနှစ်တွင်ချုပ်ဆိုခဲ့သော ခရီးသွားလုပ်ငန်းပူးပေါင်းဆောင်ရွက်မှုဆိုင်ရာ နားလည်မှုစာချွန်လွှာ (MoU) အရ ခရီးသွားလုပ်ငန်းပူးပေါင်းဆောင်ရွက်မှု ပိုမိုအားကောင်းရန်နှင့် တိုးချဲ့ရန် နည်းလမ်းများကို ဆွေးနွေးတိုင်ပင်ခဲ့ကြသည်။ အဆိုပါဆွေးနွေးပွဲတွင် နှစ်နိုင်ငံအကြား ခရီးသွား နေရာများ ပိုမိုအဆင်ပြေချောမွေ့စေရန်နှင့် တိုက်ရိုက်လေကြောင်းခရီးစဉ်များ တိုးမြှင့်ကာ နှစ်နိုင်ငံနယ်စပ်ရှိ ခရီးသွားများလာရောက်လည်ပတ်ရန် အထူးသဖြင့် နယ်စပ်ဒေသရှိ ခရီးသွားများ လာရောက်လည်ပတ်ကြသည့် ခရီးသွားပြည်သူများ ပိုမိုအဆင်ပြေ ချောမွေ့စေရန် အတွက် အဓိကထားဆွေးနွေးခဲ့ကြသည်။

DOCA(ရန်ကုန်)

   ဇမ်ဘီယာနိုင်ငံသည် အပြည်ပြည်ဆိုင်ရာငွေကြေး ရန်ပုံငွေအဖွဲ့ (IMF) ထံမှ အမေရိကန် ဒေါ်လာ ၁၈၄ သန်းခန့်အား ကမ္ဘာလုံးဆိုင်ရာ ငွေချေးသူမှ ပံ့ပိုးပေးသည့် Extended Credit Facility (ECF) အောက်တွင် အ‌ထောက်အပံ့ရရှိမည်ဖြစ်ကြောင်းသိရသည်။ ဇမ်ဘီယာအစိုးရသည် စီးပွားရေးစီမံကိန်းခန့်ခွဲမှုနှင့်ပက်သက်၍ တက်ကြွလျှက်ရှိကြောင်း IMF က ဇူလိုင်လ ၂၅ ရက်နေ့တွင် ထုတ်ပြန် ခဲ့သည်။ ဇမ်ဘီယာနိုင်ငံသည် ၎င်း၏စီးပွားရေးပစ်မှတ်အများစုကို ပြည့်မှီအောင် ကောင်းမွန်စွာ လုပ်ဆောင်နေကြောင်း၊ အဓိကကဏ္ဍများတွင် ကောင်းမွန်သော ဘဏ္ဍာရေးနှင့် အသုံးစရိတ်များကို ကောင်းစွာ ပြသနိုင်ရန်လုပ်ဆောင်နေကြောင်း ကြေညာချက် တွင်ဖော်ပြထားသည်။ ကြေညာချက် အရ IMF အစီအစဉ်ဖြင့် ဇမ်ဘီယာနိုင်ငံသို့ ‌‌ထောက်ပံ့ထား သည့် စုစုပေါင်းငွေကြေးပမာဏသည် ၂၀၂၂ သြဂုတ်လ ၃၁ ရက်နေ့မှစ၍ အမေရိကန်ဒေါ်လာ ၁.၅၅ ဘီလီယံသို့ ရောက်ရှိခဲ့ကြောင်းသိရသည်။

DOCA(ရန်ကုန်)