ပြည်ပကုန်သွယ်မှုသတင်းများ

               ကမ္ဘောဒီးယား-ဗြိတိန် စီးပွားရေးဆိုင်ရာအစည်းအဝေးတွင် ပုဂ္ဂလိကရင်းနှီးမြှုပ်နှံမှုဆိုင်ရာ အမြင်များဆွေးနွေးဖလှယ်ခြင်း၊ ကမ္ဘောဒီးယားတွင်ရင်းနှီးမြှုပ်နှံမှုအခြေအနေများမြှင့်တင်ရန်နှင့် ဗြိတိန်ရင်းနှီးမြှုပ်နှံသူးများအတွက် အခွင့်အလမ်းများကိုလေ့လာရန်ဆွေးနွေးခဲ့သည်။ ကမ္ဘောဒီးယားနိုင်ငံဖွံ့ဖြိုးတိုးတက်ရေးကောင်စီ (CDC) ၏ ဒုတိယဝန်ကြီးချုပ် Sun Chanthol အား ၂၀၂၄ ခုနှစ်၊ နိုင်ဝင်ဘာလ ၁၁ ရက်နေ့တွင်ကျင်းပပြုလုပ်သည့် အဆိုပါ အစည်းအဝေးအား ဗြိတိန်အစိုးရကိုယ်စားလှယ်များကဖိတ်ကြားခဲ့ပြီး နွေးထွေးစွာကြိုဆိုခဲ့ကြသည်။ အဆိုပါဆွေးနွေးပွဲတွင် နှစ်ဖက်စလုံးမှပုဂ္ဂလိကရင်းနှီးမြှုပ်နှံမှုဆိုင်ရာ အမြင်များဖလှယ်ခဲ့ကြပြီး ကမ္ဘောဒီးယားတွင် ရင်းနှီးမြှပ်နှံမှုအခြေအနေများမြှင့်တင်ရန်နှင့် အကျိုးအမြတ်များရရှိမည့်ကဏ္ဍများတွင် ရင်းနှီးမြှုပ်နှံနိုင်ခြေများကို လေ့လာနိုင်ရန်အတွက် ဖြစ်နိုင်ခြေရှိသောအလားလားများအတွက် ဗြိတိန်ကုမ္ပဏီများကို ကမ္ဘောဒီးယားသို့ မိတ်ဆက်ပေးရန်အတွက် စီစဉ်ပေးခဲ့ခြင်းဖြစ်သည်။ ထိုအစည်းအဝေးနှင့်ဆက်စပ်၍ ဗြိတိန်နိုင်ငံသည် ကမ္ဘောဒီးယားနိုင်ငံ၏အလားအလာများကိုမြှင့်တင်ရန်နှင့် ရင်းနှီးမြှုပ်နှံမှုကဏ္ဍတွင် နိုင်ငံသားများအတွက် အလုပ်အကိုင်အခွင့်အလမ်းများရှာဖွေပေးနိုင်မည်ဟုပြောကြားခဲ့ကြောင်းသိရှိရပါသည်။

Source: Khmer Times

DOCA(ရန်ကုန်)

                Loberty Times ၏အဆိုအရ အမေရိကန်သည် တရုတ်နိုင်ငံ၏ဆီမီးကွန်ဒတ်တာလုပ်ငန်းအား ၂၀၁၉ ခုနှစ်ကတည်းက ဒဏ်ခတ်ပိတ်ဆို့မှုများချမှတ်ထားသောကြောင့် တရုတ်ချစ်ပ်ကုမ္ပဏီပေါင်း ၂၂၀၀၀ ကျော်ကို ၂၀၂၃ ခုနှစ်အကုန်တွင် ပိတ်သိမ်းလိုက်ပြီဖြစ်ကြောင်း သိရသည်။ အဓိကအားဖြင့် အသေးစားနှင့်အလတ်စားကုမ္ပဏီများသည် လိုအပ်သောပင်မနည်းပညာများနည်းပါးပြီး နည်းပညာဆိုင်ရာအတားအဆီးများကို ကျော်လွှားရန်အခက်အခဲများနှင့်ရင်ဆိုင်ရခြင်းကြောင့် တရုတ်ချစ်ပ်ကုမ္ပဏီများအများအပြား လုပ်ငန်းမှထွက်ခွာသွားကြကြောင်း အစီရင်ခံစာကထောက်ပြထားသည်။ နောက်ထပ်ပြဿနာတစ်ခုမှာ အစီရင်ခံစာတွင်ဖော်ပြထားသည့်အတိုင်း အသေးစားချစ်ပ်ကုမ္ပဏီများအတွက် ရင်းနှီးမြှုပ်နှံမှုနည်းပါးသွားခြင်းပင်ဖြစ်သည်။ အမေရိကန်သည် တရုတ်နိုင်ငံ၏ ဆီမီးကွန်ဒတ်တာလုပ်ငန်းတွင်ရင်းနှီးမြှုပ်နှံမှုကိုကန့်သတ်ထားပြီး အမေရိကန်ပိတ်ဆို့အရေးယူမှုအောက်တွင် ဥရောပရင်းနှီးမြှုပ်နှံသူများသည် တရုတ်ချစ်ပ်ကုမ္ပဏီများ၌ ရင်းနှီးမြှုပ်နှံရန်တုံ့ဆိုင်းလာကြသည်။ တရုတ်နိုင်ငံ၏ အထွေထွေအကောက်ခွန်စီမံကွပ်ကဲမှု၏ အချက်အလက်များကိုကိုးကား၍ ယခုနှစ်ပထမခုနှစ်လအတွင်း တရုတ်နိုင်ငံသည် စုစုပေါင်းတန်ဖိုး အမေရိကန်ဒေါ်လာ ၂၁၂ ဘီလီယံခန့်ဖြင့် ချစ်ပ်ပေါင်း ၃၀၈.၁ ဘီလီယံတင်သွင်းခဲ့ပြီး ပမာဏမှာတစ်နှစ်ထက်တစ်နှစ် ၁၄.၅ ရာခိုင်နှုန်းတိုးမြင့်လာခဲ့သည်။ ၂၀၂၃ ခုနှစ်အလားတူနှင့်နှိုင်းယှဉ်ပါကတန်ဖိုး ၁၁.၅ ရာခိုင်နှုန်းတိုးလာပြီး တရုတ်ကုမ္ပဏီများသည် စွမ်းဆောင်ရည်မြင့်ချစ်ပ်များကို တက်ကြွစွာစုဆောင်းနေကြောင်းညွှန်ပြလျက်ရှိသည်။ ယခုနှစ်ပထမခုနှစ်လအတွင်း တရုတ်နိုင်ငံသည် မော်တော်ကားများ၊ အိမ်သုံးပစ္စည်းများနှင့် အမျိုးမျိုးသောအီလက်ထရောနစ်ပစ္စည်းများတွင် အဓိကအသုံးပြု့သည့်ချစ်ပ် ၁၆၆.၆ ဘီလီယံဖိုးတင်ပို့ခဲ့ပြီး စုစုပေါင်းပမာဏမှာ တစ်နှစ်ထက်တစ်နှစ် ၁၀.၃ ရာခိုင်နှုန်းတိုးမြင့်လာခဲ့ကြောင်းသိရှိရပါသည်။

Source: trend force

DOCA(ရန်ကုန်)

       ယခုနှစ်တွင် ဆန်တင်ပို့မှုသည် တန်ချိန် ၉သန်းအထိတိုးမြင့်လာမည်ဖြစ်ပြီး နိုင်ငံအတွက် ဝင်ငွေ အမေရိကန်ဒေါ်လာ ၆ဒသမ ၄ဘီလီယံ သို့မဟုတ် ဘတ် ၂၃၀ဘီလီယံရရှိမည်ဟု စီးပွားရေးနှင့် ကူးသန်းရောင်းဝယ်ရေးဝန်ကြီး Pichai Naripthaphan က တနင်္ဂနွေနေ့တွင် ပြောကြားခဲ့သည်။ ယခုနှစ် ပထမကိုးလတာကာလအတွင်း ထိုင်းနိုင်ငံသည် ဆန်တန်ချိန် ၇ဒသမ ၄၅သန်းတင်ပို့ခဲ့ပြီး ယခင်နှစ် အလားတူကာလနှင့်နှိုင်းယှဉ်ပါက ၂၂ဒသမ ၁၃ရာခိုင်နှုန်းတိုးမြင့်လာကြောင်း Pichai က ပြောကြားခဲ့သည်။ ယခုနှစ် ဇန်နဝါရီလမှ စက်တင်ဘာလအထိ ဆန်တင်ပို့မှုမှ ဘတ်ငွေ ၁၇၂.၀၁၉ ဘီလီယံ သို့မဟုတ် အမေရိကန်ဒေါ်လာ ၄.၈၄၃ ဘီလီယံရရှိခဲ့သည်။ ပထမကိုးလတာကာလအတွင်း ဆန်တင်ပို့မှုတန်ဖိုးသည် ယခင်နှစ် အလားတူကာလနှင့်နှိုင်းယှဉ်ပါက ၄၅ဒသမ ၈၅ရာခိုင်နှုန်း မြင့်တက်ခဲ့ကြောင်း ၎င်းက ဆက်လက်ပြောကြားခဲ့သည်။ အင်ဒိုနီးရှား၊ အီရတ်နှင့် အမေရိကန်တို့ကဲ့သို့ အဓိကစျေးကွက်များမှ အမှာစာများဆက်လက်ရှိနေခဲ့ကြောင်း Pichai က ပြောကြားခဲ့သည်။ ရလဒ်အနေဖြင့် နိုင်ငံခြားကုန်သွယ်မှုဌာနနှင့် ထိုင်းဆန်တင်ပို့သူများအသင်းတို့သည် ယခုနှစ်တွင် ဆန်တင်ပို့မှု တန်ချိန် ၉သန်းအထိရှိလာမည်ဟုယုံကြည်ကြသည်။

Sources-The Thailand Nations

DOCA(မန္တလေး)

               ကမ္ဘောဒီးယားနိုင်ငံသည် ၂၀၂၄ ခုနှစ် ပထမ (၁၀) လတွင် ကုန်ပစ္စည်းများတင်ပို့မှုတန်ဖိုး အမေရိကန်ဒေါ်လာ ၂၁.၅၇ ဘီလီယံရှိခဲ့ပြီး ၂၀၂၃ ခုနှစ် အလားတူကာလက ၁၈.၅၉ ဘီလီယံ ရှိခဲ့ပြီး  ၁၆ ရာခိုင်နှုန်းတိုးလာကြောင်း ၁၁-၁၁-၂၀၂၄ ရက်နေ့က တရားဝင်ထုတ်ပြန်သည့် အစီရင်ခံစာတွင်ဖော်ပြထားသည်။ ကမ္ဘောဒီးယား၏ ပို့ကုန်များတွင်အထည်ချုပ်၊ ဖိနပ်၊ ခရီးသွားကုန်ပစ္စည်းများ၊ စက်ဘီး၊ ကားတာယာ၊ ဆန်၊ ရာဘာ၊ ပီလောပီနံ၊ ငှက်ပျောသီး၊ သရက်သီးနှင့်ပဲများစသည်တို့ပါဝင်ကြောင်း အကောက်ခွန်ဦးစီးဌာန၏ အထွေထွေအစီရင်ခံစာတွင် ဖော်ပြထားသည်။ နိုင်ငံတော်သည် ယခုနှစ်ဇန်နဝါရီလမှ အောက်တိုဘာလအတွင်း စုစုပေါင်းသွင်းကုန် အမေရိကန်ဒေါ်လာ ၂၃.၄၉ ဘီလီယံရှိခဲ့ပြီး ၂၀၂၃ ခုနှစ်အလားတူကာလထက် ၁၇ ရာခိုင်နှုန်းတိုးလာကြောင်းအစီရင်ခံစာတွင် ထပ်မံဖော်ပြထားသည်။ အဓိကတင်သွင်းသည့်ကုန်စည်များမှာ ရေနံ၊ အထည်ချုပ်၊ ဖိနပ်နှင့် အီလက်ထရောနစ်ပစ္စည်း တို့ပါဝင်သည်။ ကမ္ဘောဒီးယားစီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ပြောရေးဆိုခွင့်ရှိသူ Penn Sovicheat က ဒေသတွင်းဘက်စုံစီးပွားရေးပူးပေါင်းဆောင်ရွက်မှု (RCEP) နှင့် ကမ္ဘောဒီးယား-တရုတ်လွတ်လပ်သောကုန်သွယ်မှု သဘောတူညီချက် (CCFTA) တို့သည် နိုင်ငံ၏ကုန်သွယ်မှုတိုးတက်မှုကို အရှိန်အဟုန်မြှင့်ပေးကြောင်းပြောကြားခဲ့သည်။

Source: Khmer Times

DOCA(ရန်ကုန်)

                တရုတ်နိုင်ငံ Chongqing မြို့တော်တွင် လတ်တလောကျင်းပခဲ့သည့် ဆွေးနွေးပွဲတွင် ဗီယက်နမ် နှင့်တရုတ်လုပ်ငန်းများသည် ကုန်သွယ်ရေး-စီးပွားရေး၊ ထောက်ပံ့ပို့ဆောင်ရေး၊ စွမ်းအင်၊ စိုက်ပျိုးမွေးမြူရေးနှင့် မီဒီယာတို့တွင် လွှမ်းခြုံထားသည့်နားလည်မှုသဝဏ်လွှာ (MOU) ၇ ခုကို သဘောတူလက်မှတ်ရေးထိုးခဲ့ကြကြောင်းသိရပါသည်။ ထိုပွဲကို ဗီယက်နမ်ဝန်ကြီးချုပ်  Pham Minh Chinh တက်ရောက်ခဲ့ကြောင်းသိရပါသည်။ ဗီယက်နမ်သည် Chongqing ၏ အာဆီယံတွင်အကြီးမားဆုံး ကုန်သွယ်ရေးမိတ်ဖက်အဖြစ်ရပ်တည်လျှက်ရှိပြီး နှစ်ဖက်ကုန်သွယ်မှုမှာ ၂၀၁၅ ခုနှစ်မှစ၍ ကြီးထွားလာကြောင်းသိရပါသည်။ ယခုနှစ်သည် ဗီယက်နမ်နိုင်ငံစက်မှုနှင့်ကုန်သွယ်ရေးဝန်ကြီး ဌာနအောက်ရှိ ဗီယက်နမ်ကုန်သွယ်မှုမြှင့်တင်ရေးအေဂျင်စီက Chongqing မြို့တွင်ပထမဆုံး ဗီယက်နမ်ကုန်သွယ်ရေးရုံး ဖွင့်လှစ်သည့်နှစ်ဖြစ်ကြောင်းသိရပါသည်။ ၂၀၁၉ ခုနှစ်တွင် ဗီယက်နမ်နှင့် Chongqing ကြားကုန်သွယ်မှုတန်ဖိုးသည် အမေရိကန်ဒေါ်လာ ၃၂.၈၄ ဘီလီယံရှိခဲ့ကြောင်း သိရပါသည်။ ယခုအချိန်တွင် Chongqing ရှိစျေးများတွင် ဗီယက်နမ်၏ကော်ဖီ၊ သစ်သီးမှစ၍ ပင်လယ်စာများထိလွှမ်းခြုံနေပြီဖြစ်ပြီး အပြန်အလှန်အားဖြင့် Chongqing  မြို့မှမော်တော်ကားအစိတ်အပိုင်းများ၊ မော်တော်ဆိုင်ကယ်များနှင့် အီလတ်ထရောနစ်ထုတ်ကုန်များသည် ဗီယက်နမ်နိုင်ငံတွင် ဝယ်လိုအားမြင့်တက်လျှက်ရှိပြီး နှစ်နိုင်ငံလုံးအတွက်အပြန်အလှန် အကျိုးဖြစ်ထွန်းနေကြကြောင်းသိရပါသည်။ Chongqing အကောက်ခွန်၏ အချက်အလက်များအရ ယခုနှစ်ဇန်နဝါရီလမှစက်တင်ဘာလ ကာလအတွင်း မြို့တော်နှင့် နိုင်ငံ၏အပြန်အလှန်ကုန်သွယ်မှုတန်ဖိုးမှာ အမေရိကန်ဒေါ်လာ ၁၁.၂ ဘီလီယံရှိခဲ့ကြောင်းသိရပါသည်။ Chongqing မှကုမ္ပဏီ ၃၀ ကျော်သည် ဗီယက်နမ်၏လျှပ်စစ်ပစ္စည်းများ၊ စိုက်ပျိုးရေးလုပ်ငန်းသုံးစက်ကိရိယာများနှင့် မော်တော်ဆိုင်ကယ်အစိတ်အပိုင်းများထုတ်လုပ်ခြင်းတို့တွင် ရင်းနှီးမြှုပ်နှံလျှက်ရှိကြောင်း သိရပါသည်။ ဗီယက်နမ်သည် Chongqing တွင်ထုတ်လုပ်သည့် မော်တော်ယာဥ်များနှင့် မော်တော်ဆိုင်ကယ်များတင်ပို့ရာ အရေးပါသောနေရာအဖြစ် ဖြစ်ပေါ်လာကြောင်းသိရပါသည်။ ထို့ပြင်ဗီယက်နမ်သည် Chongqing ကိုချိတ်ဆက်ထားသည့် ကုန်းမြေ-ပင်လယ်စင်္ကြန်လမ်းကြောင်းမှတစ်ဆင့် ကုန်ပစ္စည်းပမာဏ အမြင့်မားဆုံးသယ်ယူပို့ဆောင်သည့် အရှေ့တော်အာရှနိုင်ငံအဖြစ် ဆက်လက်ရပ်တည်လျှက်ရှိကြောင်း သိရှိရပါသည်။

Vietnamplus 

DOCA(ရန်ကုန်)