အင်ဒိုနီးရှားနိုင်ငံသည် ကုန်သွယ်ရေး၊ စွမ်းအင်နှင့် နည်းပညာတို့တွင် မဲခေါင်ဒေသနိုင်ငံ များဖြစ်သည့် ကမ္ဘောဒီးယား၊ ထိုင်း၊ လာအို၊ မြန်မာနှင့် ဗီယက်နမ်တို့နှင့် စီးပွားရေးပူးပေါင်း ဆောင်ရွက်မှု အရှိန်မြှင့်တင်သွားမည်ဟု ကမ္ဘောဒီးယားဆိုင်ရာအင်ဒိုနီးရှားသံအမတ်ကြီးက အောက်တိုဘာလ ၁၆ ရက်နေ့ကပြောကြားခဲ့ပါသည်။ သံအမတ် Santo Darmosumarto က ဒေသတစ်လျှောက်စွမ်းအင်ဖူလုံရေးပူးပေါင်းဆောင်ရွက်ရန်ရည်ရွယ်၍ ဂျကာတာမြို့တော်တွင် ကျင်းပခဲ့သည့် ဒုတိယအကြိမ်မြောက် အင်ဒိုနီးရှား-မဲခေါင်ဒေသချိတ်ဆက်ရေးဖိုရမ်တွင် ပြောကြားခဲ့ခြင်းဖြစ်ကြောင်း သိရပါသည်။ သံအမတ်ကြီးက အင်ဒိုနီးရှားသည် ကျယ်ပြန့်သော ဒေသဆိုင်ရာမိတ်ဖက်များအနေဖြင့် မဲခေါင်ဒေသနိုင်ငံများ၏ ပုံရိပ်ကိုမြှင့်တင်သွားမည်ဖြစ် ကြောင်း၊ ကမ္ဘောဒီးယားသည်မဲခေါင်ဒေသတွင် ဗျူဟာမြောက်တည်ရှိနေပြီး အင်ဒိုနီးရှားအား ၎င်း၏အိမ်နီးချင်းနိုင်ငံများနှင့်နက်ရှိုင်းစွာပူးပေါင်းဆောင်ရွက်ရန်အတွက် စင်မြင့်တစ်ခုအနေဖြင့် ဆောင်ရွက်ပေးနိုင်ကြောင်းနှင့် အင်ဒိုနီးရှားသည် တရုတ်၊ ဂျပန်၊ တောင်ကိုရီးယားနှင့် စင်ကာပူ အစရှိသည့် အစဉ်အလာမိတ်ဖက်များကို ကျော်လွန်၍ စီးပွားရေးချိတ်ဆက်မှုူကျယ်ပြန့်သင့်ပြီး အရှေ့တောင်အာရှမဲခေါင်ဒေသနိုင်ငံများနှင့် ပူးပေါင်းဆောင်ရွက်မှုမြှင့်တင်မည်ဖြစ်ကြောင်း ပြောကြားခဲ့ပါသည်။ အင်ဒိုနီးရှားပူးပေါင်းဆောင်ရွက်မည့်နည်းပညာတစ်ခုသည် မိုက်ခရို-ဟိုက်ဒရိုပါဝါနည်းပညာဖြစ်ကြောင်း သိရပါသည်။ သံအမတ်က အင်ဒိုနီးရှားသည် သက်ဆိုင်သည့် နည်းပညာများတင်ပို့ပြီး မဲခေါင်ဒေသရှိအကြီးစားပူးတွဲစီမံကိန်းများတွင် ပူးပေါင်းပါဝင်နိုင်မည်ဟု ယုံကြည်ကြောင်းနှင့် အင်ဒိုနီးရှားသည်မဲခေါင်ဒေသနိုင်ငံအားလုံးနှင့် ဒေသတွင်းပူးပေါင်း ဆောင်ရွက်မှုယန္တယားတည်ထောင်နိုင်မည်ဟု ယုံကြည်ကြောင်း ပြောကြားခဲ့ပါသည်။ ဖိုရမ်မှ တာဝန်ရှိသူများသည် မဲခေါင်ဒေသရှိနိုင်ငံများအကြား တည်ငြိမ်ပြီး ဟန်ချက်ညီသောဖွံ့ဖြိုး တိုးတက်မှုရရှိရန်အတွက် စွမ်းအင်ဖူလုံရေး၊ ကုန်သွယ်ရေးရင်းနှီးမြှုပ်နှံမှုနှင့် အစိမ်းရောင်နည်း ပညာလွှဲပြောင်းမှုတို့ကို ဆွေးနွေးခဲ့ကြကြောင်း သိရပါသည်။ မဲခေါင်ပူးပေါင်းဆောင်ရွက်မှုကို အလေးပေးဆောင်ရွက်ခြင်းအားဖြင့် အင်ဒိုနီးရှားသည် ရေအရင်းအမြစ်ကြွယ်ဝမှုနှင့် အပြန်အလှန် စီးပွားရေးကြီးထွားမှုအရှိန်မြှင့်တင်မှုတို့ရရှိရန် ရည်ရွယ်ထားကြောင်း သိရပါသည်။
DOCA (ရန်ကုန်)