HighLight News

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ်တာဝန်ခံ ဒု-ဦးစီးမှူး ဒေါ်ဌေးဌေးဝင်းသည် ပြည်တွင်းကုန်သွယ်မှုကဏ္ဍဖွံ့ဖြိုးတိုးတက်စေရန်အတွက် (၂၁-၃-၂၀၂၃)ရက်နေ့၊ နံနက်(၀၉:၀၀)နာရီအချိန်တွင် ပွင့်ဖြူမြို့၊ လယ်ကိုင်းကျေးရွာ၌ “တိုင်းတောင်သူဖွံ့ဖြိုးရေး”အဖွဲ့က ဦးဆောင်ကျင်းပသည့် သီးနှံစုပေါင်းရောင်းချပွဲသို့ သွားရောက်ကွင်းဆင်း၍ လေ့လာဆွေးနွေးခဲ့ပါသည်။

   အဆိုပါစုပေါင်းရောင်းချပွဲတွင် တိုင်းတောင်သူဖွံ့ဖြိုးရေးအဖွဲ့နှင့် Good Brother ကုမ္ပဏီတို့ပူးပေါင်း၍ သီးနှံများကိုဝယ်ယူပါကြောင်း၊ ထိုသို့ဝယ်ယူရာတွင် အဖျင်းအမှော်၊ ဖုံသဲခဲ၊ လုံးပိန်၊ လုံးညှပ်ပါဝင်မှုပေါ်မူတည်၍ ကုလားပဲ (929) (၁၉)ပိဿာတစ်တင်းလျှင် ဈေးနှုန်းအနေဖြင့် (A)အဆင့်ထိပ်စကို ကျပ် (၇၀၀၀၀)ဖြင့်လည်းကောင်း (B) အဆင့်ကို ကျပ်(၆၉၅၀၀)ဖြင့်လည်းကောင်း ဝယ်ယူပါကြောင်း၊ ကတ္တားအချိန်အတွယ်အနေဖြင့်လည်း တောင်သူများစိတ်ကြိုက် ကတ္တားဖြင့်ဝယ်ယူပါကြောင်း၊ မိမိတို့ဝယ်ယူနေသော ယခုလက်ရှိကတ္တားများအားလည်း အချိန်မရွေးအစစ်ဆေးခံနိုင်ပါကြောင်း၊ ကတ္တားတစ်ဆွဲလျှင် (၃၀.၅)ပိဿာချိန်တွယ်ပါကြောင်း၊ တစ်ဆွဲချင်းချိန်တွယ်၍  စုစုပေါင်းရရှိလာသောပိဿာများအား တင်း၊ ပြည်၊ ပုံး မည်မျှရသည်အထိ ပြောင်းလဲပေး၍ဝယ်ယူပါကြောင်း၊ တစ်ဆွဲလျှင် ပီနံအိတ်ခွံတစ်တင်းခွဲအိတ်အတွက်အား (၁၂)ကျပ်ခွဲသားတောင်းပါကြောင်း၊ ထိုသို့အချိန်အတွယ်များအား ကျေနပ်ပါက ငွေစာရင်းတွင် ငွေလက်ခံရရှိမှာဖြစ်ပါကြောင်း၊ ငွေစာရင်းတွင်လည်း အမှားအယွင်းမရှိအောင်ဆောင်ရွက်နေပါကြောင်း၊ တစ်ခါတစ်ရံ မိမိတို့ဘက်မှသော်လည်းကောင်း၊ တောင်သူများဘက်မှသော်လည်းကောင်း၊ ငွေပိုရခြင်း၊ ငွေလိုရခြင်းများရှိခဲ့ပါကလည်း ကွန်ပျူတာထဲတွင် ထည့်သွင်းထားခြင်းဖြစ်ပါသောကြောင့်  မည်သည့်နေ့ရက်၌ဖြစ်စေကာမူ ဘောင်ချာစာရွက်နှင့် တောင်းသူဘက်က ပြသနိုင် လျှင် ဖြေရှင်းပေးပါကြောင်း၊ ဈေးနှုန်းဈေးကွက်အနေဖြင့်လည်း ကုမ္ပဏီနှင့်စတင်စာချုပ်စဉ်ကတည်းကပင် အဝယ်စင်တာများ၏ ဒေသပေါက်ဈေးထက် (A) အဆင့်ထိပ်စ (၁၉)ပိဿာတစ်တင်းလျှင် ဒေသပေါက်ဈေးထက် ကျပ်(၈၀၀)ပိုပေးရန်နှင့် (B)အဆင့်ဆိုလျှင် ဒေသပေါက်ဈေးထက် ကျပ်(၃၀၀)ပိုပေး၍ (C) အဆင့်ဆိုလျှင် ဒေသပေါက်ဈေးအတိုင်း ဝယ်ယူပေးပါမည်ဟု စာချုပ်ထားပါကြောင်း၊ စာချုပ်ထားသည့်အတိုင်းလည်း ဝယ်ယူနေပါကြောင်း၊ ဈေးနှုန်းများကိုလည်း နံနက်(၀၈:၀၀)နာရီအချိန်တွင် မင်းဘူး၊ ပွင့်ဖြူ၊ စလင်း အဝယ်စင်တာများက နေ့စဉ်တင်ပေးရပါကြောင်း၊ (၄-၃-၂၀၂၃)ရက်နေ့မှစတင်၍ ဝယ်ယူရာတွင် (၂၁-၃-၂၀၂၃) ရက်နေ့အထိ စုစုပေါင်းတင်းပေါင်း(၈၅၀၀)ခန့်ဝယ်ယူရရှိပြီးဖြစ်ပါကြောင်း၊ (၄-၄-၂၀၂၃)ရက်နေ့အထိ (၁)လတိတိ ဖွင့်လှစ်ဝယ်ယူမည်ဖြစ်ပါကြောင်း၊ မိမိတို့စင်တာတွင် လာရောက်ရောင်းချပါက တောင်သူများသည် ပွဲရုံ၊ ပွဲခ၊ အလုပ်သမားခများသက်သာမည်ဖြစ်ပါကြောင်း၊ တိုင်းတောင်သူ အဖွဲ့ကဦးဆောင်၍ အပူပိုင်းဒေသနှင့် မြစ်ဝကျွန်းပေါ်ဒေသ စိုက်ပျိုးရေးနှင့်အသက်မွေးဝမ်းကျောင်းစီမံကိန်း၊ (ALLADZ) ကလည်း ကျေးရွာအတွင်းရှိ (၅)ဧကအောက်တောင်သူငယ်များကိုလည်း အလုပ်သမားခများပံ့ပိုးပေးထားပါကြောင်း၊ ၎င်းတောင်သူများကလည်း မိမိတို့စင်တာတွင် လာရောက်ရောင်းချရမည်ဖြစ်ပါကြောင်း၊ တစ်နေ့ချင်းတစ်နေ့ဝယ်ယူရရှိသော ကုလားပဲများကို မကွေးမြို့ရှိ Good Brother ကုမ္ပဏီမှ ဂိုဒေါင်များသို့ နေ့စဉ်တင်ပို့ပါကြောင်း၊ မိမိတို့သည် တောင်သူများဘဝပိုမိုမြင့်မားလာပြီး မိမိစိုက်ပျိုးထွက်ရှိသည့်အတိုင်း အပြည့်အဝခံစားရရှိစေမည့် တောင်သူအကျိုးပြုအဖွဲ့ဖြစ်ပါကြောင်းကို တိုင်းဒေသကြီးတောင်သူဖွံ့ဖြိုးရေးအဖွဲ့တွင် တွဲဖက်အတွင်းရေးမှူးနှင့် ပွင့်ဖြူမြို့နယ်တွင် တောင်သူဖွံ့ဖြိုးရေးအဖွဲ့၏ဥက္ကဋ္ဌဖြစ်သူ ဦးအောင်မြင့်ထံမှ သိရှိခဲ့ရပါသည်။

DOCA(မကွေး)

     စားသုံးသူရေးရာဦးစီးဌာန၊ ချင်းပြည်နယ်ဦးစီးမှူးရုံးမှ ဒေါ်သူဇာမြင့်(ဦးစီးမှူး)၊ ဦးကီးအောင်လိန်း(ဒု-ဦးစီးမှူး)၊ ဦးသိန်းအောင်(ကြီး/ရေး)၊ ဒေါ်ထားမဲင်းဇိန် (ရုံးအကူ)နှင့် မြို့နယ်စည်ပင်သာယာအဖွဲ့မှ ဦးဟုန်းကီးထွန်း(အငယ်တန်းအင်ဂျင်နီယာ)တို့သည် ၂၀၂၃ခုနှစ်၊ မတ်လ ၂၃ရက်နေ့၊ နံနက် (၁၀:၃၀) နာရီအချိန်တွင် ဟားခါးမြို့၊ ဈေးသစ်ရပ်ကွက်ရှိ ကုန်စုံဆိုင်များအား ကွင်းဆင်းစစ်ဆေးခဲ့ပါ သည်။

    ကွင်းဆင်းစစ်ဆေးရေးအဖွဲ့သည် အာဆီယံဒေသအတွင်းတွေ့ရှိသော တားမြစ်ဓာတုပစ္စည်းများပါဝင်သည့် အလှကုန်ပစ္စည်း(၃၅)မျိုးသည် ကျန်းမားရေးဝန်ကြီးဌာနက သုံးစွဲရန်မသင့်သောအလှကုန်ပစ္စည်းများအဖြစ် ကြေညာထားသည့်အတွက်   ဈေးကွက်အတွင်း ရှိ/မရှိ၊ အစားအသောက်နှင့်ဆေးဝါးကွပ်ကဲရေးဦးစီးဌာန၏ အသိအမှတ်ပြု DRC No. မပါရှိသည့် ဂျာမနီနိုင်ငံထုတ် (Parbisure) အမည်ဖြင့် ဆေးဝါးရောင်းချနေမှုများ ဈေးကွက်အတွင်း ရှိ/မရှိတို့ကို စစ်ဆေးခြင်းနှင့် သက်တမ်းလွန်စားသုံးကုန်ပစ္စည်းများကို သိမ်းဆည်းခြင်း စသည်တို့ကို ဆောင်ရွက်ခဲ့ပါသည်။ ထို့နောက် ကုန်စုံဆိုင်ရောင်းချသူများအနေဖြင့် သက်ဆိုင်ရာဝန်ကြီးဌာနက အများပြည်သူအပေါ် ဘေးအန္တရာယ်ရှိသည်ဟု သတ်မှတ်ထားသည့်ကုန်ပစ္စည်းများကို မှာယူတင်သွင်းရောင်းချခြင်းမပြုရန် ရှင်းလင်းမှာကြားခဲ့ပါသည်။

DOCA(ချင်း)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနက ပြုစုရေးဆွဲထားသည့် ဆန်စပါးဥပဒေ(မူကြမ်း)နှင့်စပ်လျဉ်း၍ အလုပ်ရုံဆွေးနွေးပွဲကို ၂၀၂၃ခုနှစ်၊ မတ်လ (၂၁) ရက်နေ့၊ နံနက် (၉:၀၀) နာရီအချိန်တွင် ဇမ္ဗူသီရိမြို့နယ်၊ သပြေကုန်းရပ်ကွက်၊ ရွှေနန်းတော်ခန်းမ၌ ကျင်းပပြုလုပ်ခဲ့ရာ နေပြည်တော်ကောင်စီအဖွဲ့ဝင် ဦးဇေယျာလင်း၊ စားသုံးသူရေးရာဦးစီးဌာန၊ ညွှန်ကြားရေးမှူးချုပ် ဦးမြင့်ချို၊ ပြည်ထောင်စုနယ်မြေ၊ နေပြည်တော်အတွင်းရှိ ဌာနဆိုင်ရာအသီးသီးမှ တာဝန်ရှိသူများ၊ မြန်မာနိုင်ငံဆန်စပါးအသင်းချုပ်မှ တာဝန်ရှိသူများ၊ ဆန်စက်လုပ်ငန်းရှင်များအသင်းနှင့် ဆန်ကုန်သည်များအသင်းတို့မှ တာဝန်ရှိသူများနှင့် စိုက်ပျိုးထုတ်လုပ်သောတောင်သူလယ်သမားများ တက်ရောက်ခဲ့ကြပါသည်။

    အဆိုပါအလုပ်ရုံဆွေးနွေးပွဲတွင် နေပြည်တော်ကောင်စီအဖွဲ့ဝင် ဦးဇေယျာလင်းက အဖွင့်အမှာစကားပြောကြားရာတွင် ဆန်စပါးနယ်ပယ်တွင် စိုက်ပျိုးထုတ်လုပ်သောတောင်သူများသာမက စပါးဝယ်ယူသူပွဲစားများ၊ စက်ပိုင်များ၊ ကုန်သည်များနှင့် ပြည်ပတင်ပို့သည့်လုပ်ငန်းရှင်များအထိ အလွှာမျိုးစုံပါဝင်နေသဖြင့် ထုတ်လုပ်မှုကွင်းဆက်တစ်လျှောက်လုံးဖွံ့ဖြိုးတိုးတက်မှသာ ဆန်စပါးကဏ္ဍတိုးတက်ပြီး နိုင်ငံ့စီးပွားမြှင့်တင်မှုကို အထောက်အကူပြုနိုင်မည်ဖြစ်ကြောင်း၊ ဆန်စပါးဥပဒေ(မူကြမ်း)ရှင်းလင်းဆွေးနွေးပွဲကို တက်ရောက်လာကြသည့်အသင်းအဖွဲ့များနှင့် ဌာနဆိုင်ရာတာဝန်ရှိသူများအနေဖြင့် လက်တွေ့တွင် အမှန်တကယ်အသုံးပြုနိုင်သည့် ဥပဒေ ကောင်းတစ်ရပ်ဖြစ်ရန်အတွက် အားလုံးက ကျယ်ကျယ်ပြန့်ပြန့်ဝိုင်းဝန်းဆွေးနွေးအကြံပြုစေလိုါကြောင်း ပြောကြားခဲ့ပါသည်။

     ဆက်လက်၍ စားသုံးသူရေးရာဦးစီးဌာန၊ ညွှန်ကြားရေးမှူးချုပ် ဦးမြင့်ချိုက ဆန်စပါးဥပဒေ(မူကြမ်း)ရှင်းလင်းဆွေးနွေးပွဲပြုရခြင်းနှင့်စပ်လျဉ်း၍ တက်ရောက်လာကြသူများနှင့် အပြန်အလှန်ဆွေးနွေးခဲ့ပြီး အလုပ်ရုံဆွေးနွေးပွဲသည် နေ့လယ်(၁၂:၃၀)နာရီအချိန်တွင် ပြီးမြောက်ကြောင်း သတင်းရရှိပါသည်။

DOCA(နေပြည်တော်)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ မုံရွာခရိုင်ဦးစီးမှူးရုံးအနေဖြင့် စားသုံးသူကာကွယ်ရေးအသိပညာပေးဟောပြောပွဲများကို လစဉ် စီမံချက်များပြည့်မီအောင်ဆောင်ရွက်လျက်ရှိရာ (၁၆-၃-၂၀၂၃) ရက်နေ့၊ နေ့လယ်(၁၄:၀၀) နာရီအချိန်တွင် မုံရွာမြို့၊  ဒေါနခြံရပ်ကွက်ရှိ ရက်ကန်းနှင့် သက်မွေးသင်တန်းကျောင်း၌ ကျင်းပပြုလုပ်သည့် “လူသုံးကုန်ထုတ်လုပ်မှုနည်းပညာသင်တန်း”တွင်  စားသုံးသူကာကွယ်ရေး အသိပညာပေးဟောပြောပွဲအား ဆောင်ရွက်ခဲ့ပါသည်။

     အဆိုပါဟောပြောပွဲတွင် မုံရွာခရိုင်စားသုံးသူရေးရာဦးစီးဌာနမှ မုံရွာမြို့နယ်တာဝန်ခံ ဦးစီးမှူး ဒေါ်စန်းစန်းဝေက စားသုံးသူရေးရာဦးစီးဌာနပေါ်ပေါက်လာပုံ၊ စားသုံးသူရေးရာဦးစီးဌာန၏ မျှော်မှန်းချက်နှင့် ရည်မှန်းချက်များကိုရှင်းလင်းကာ စားသုံးသူများ၏ အခွင့်အရေးများကို အပြည့်အဝကာကွယ်နိုင်ရန်အတွက် စားသုံးသူကာကွယ်ရေးဥပဒေကို ၂၀၁၉ခုနှစ်၊ မတ်လ (၁၅) ရက်နေ့တွင် ပြည်ထောင်စုလွှတ်တော်ဥပဒေအမှတ် ၉ ဖြင့် အတည်ပြုပြဋ္ဌာန်းခဲ့ရာ အခန်းပေါင်း (၂၅) ခန်းနှင့် ပုဒ်မပေါင်း (၈၄) ခုပါဝင်ကြောင်း၊ ဥပဒေပါ စားသုံးသူ၏အဓိပ္ပါယ်ဖွင့်ဆိုချက်များနှင့် စားသုံးသူအခွင့်အရေး (၈) ချက်အကြောင်းများကို ရှင်းလင်းဆွေးနွေးခဲ့ပါသည်။ ဆက်လက်၍ ခရိုင်ဦးစီးမှူး ဒေါ်ဇင်မာဦးက စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးနှင့်ပတ်သက်သည့် အသိပညာဗဟုသုတများရရှိစေရန် ကျောင်း၊ ဈေး၊ ဌာနဆိုင်ရာရုံးများ၊ ရပ်ကွက်၊ ကျေးရွာများ၊  တက္ကသိုလ်/ကောလိပ်များ၊ တပ်ရင်းတပ်ဖွဲ့များတွင် စားသုံးသူကာကွယ်ရေး အသိပညာပေးဟောပြောပွဲများအား ဆောင်ရွက်လျက်ရှိပါကြောင်း၊ စားသုံးသူပြည်သူများအနေဖြင့် ကုန်စည် (သို့မဟုတ်) ဝန်ဆောင်မှုများကို အသုံးပြုရာတွင် ဘေးအန္တရာယ်ကင်းရှင်းစေရန်နှင့် ထုတ်ကုန်များလုံခြုံစိတ်ချရမှုရှိစေရန် မိတ်ဖက်ဌာနဆိုင်ရာအဖွဲ့အစည်းများနှင့်ပူးပေါင်း၍ ဈေးကွက်မရောက်မီနှင့် ဈေးကွက်ရောက်ပြီးသောကုန်စည်များကို ဈေးကွက်စောင့်ကြည့်စစ်ဆေးမှုဆောင်ရွက်ရသည့်အကြောင်းများ၊  စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ စားသုံးသူများသည် ကုန်စည်နှင့်ဝန်ဆောင်မှုများသုံးစွဲရာတွင် စားသုံးသူအခွင့်အရေးနှင့် နစ်နာဆုံးရှုံးမှုများရှိပါက တိုင်ကြားနိုင်ပါကြောင်းနှင့် တိုင်ကြားနိုင်သည့်နေရာများ၊ ဌာနနှင့်သက်ဆိုင်သောအကြောင်းများကို မေးမြန်းစုံစမ်းနိုင်သည့် Consumer Call Center (၁၅၃၅) ကို ဖွင်းလှစ်ထားရှိပါသည်။ ထို့နောက် တိုင်ကြားစာများကို စိစစ်ညှိနှိုင်းဖြေရှင်းပေးသည့်အကြောင်းအရာများ ရှင်းလင်းဆွေးနွေးခဲ့ရာ ဆရာ/ဆရာမ (၅) ဦး၊ သင်တန်းသား/သူ (၂၅) ဦး၊ စုစုပေါင်း (၃၀) ဦးတက်ရောက်ခဲ့ပြီးနောက် သင်တန်းသား/သင်တန်းသူများက သိရှိလိုသည်များကို မေးမြန်ခြင်း၊ ဖြေကြားခြင်း၊  စားသုံးသူကာကွယ်ရေး အသိပညာပေးလက်ကမ်းစာစောင်များဖြန့်ဝေခြင်းလုပ်ငန်းများဆောင်ရွက်ခဲ့ပါကြောင်း သတင်းရရှိပါသည်။

DOCA(စစ်ကိုင်း)

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင် ဒေသကြီး၊ တိုင်းဒေသကြီးဦးစီးမှူးနှင့် ပခုက္ကူခရိုင်ဦးစီးမှူး၏လမ်းညွှန်မှုဖြင့် (၁၆-၃-၂၀၂၃) ရက်နေ့၊ နံနက် (၀၉:၃၀) နာရီအချိန်တွင် ကမ္ဘာ့စားသုံးသူအခွင့်အရေးများနေ့ကို ဂုဏ်ပြုသောအားဖြင့် ပခုက္ကူမြို့၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနတွင်ဖွင့်လှစ်သည့် အခြေခံပန်းချီသင်တန်း၌ အသိပညာပေးဟောပြောပွဲပြုလုပ်ခဲ့ရာ သင်တန်းသား/သင်တန်းသူ (၁၇) ဦး၊ မိဘပြည်သူ (၅) ဦး၊ ဆရာ (၄) ဦးနှင့် ဝန်ထမ်း (၄) ဦး၊ စုစုပေါင်း (၃၀) ဦးတို့ တက်ရောက်ခဲ့ကြပါသည်။

    ဟောပြောပွဲတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ခရိုင်ဦးစီးမှူး ဦးဇော်ဌေးအောင်က ကြိုဆိုနှုတ်ခွန်းဆက်စကားပြောကြားခဲ့ပြီးနောက် ဦးစီးမှူး ဒေါ်ကြည်ကြည်စိုးက ဌာန၏သမိုင်းကြောင်းနှင့် ယခုအခါ ဌာနကဆောင်ရွက်နေသည့်လုပ်ငန်းများအကြောင်းကို ရှင်းလင်းပြောကြား၍ စားသုံးသူကာကွယ်ရေးဥပဒေ ၂၀၁၉ အခန်း (၁၈) ပါ ကုန်အညွှန်းအမှတ်အသားများတွင် ထည့်သွင်းဖော်ပြရမည့် အချက်(၈)ချက်အား တက်ရောက်လာသည့် သင်တန်းသား/သင်တန်းသူများ၊ ဆရာများ၊ မိဘပြည်သူများနှင့် ဝန်ထမ်းများအား ရှင်းလင်းလွယ်ကူသိသာစေရန် နမူနာပစ္စည်းများပြသ၍ ကျယ်ကျယ်ပြန့်ပြန့်ရှင်းလင်းကာ ယခုကဲ့သို့ ကုန်အညွှန်းအမှတ်အသားများမပါလျှင် ဝယ်ယူစားသောက်မှုမပြုသင့်ကြောင်း၊ ကုန်အညွှန်းအမှတ်အသားများပြည့်စုံမှသာလျှင် သုံးစွဲသင့်ကြောင်း၊ စားသုံးသူမိဘပြည်သူများက တိကျစွာလိုက်နာဆောင်ရွက်ရန်လိုအပ်ကြောင်းတို့ကို အသိပညာပေးဟောပြောကာ ယခုကဲ့သို့ စားသုံးသူမိဘပြည်သူများကို အသိပညာပေးခြင်းသာမက လုပ်ငန်းရှင်များထံသို့ပါသွားရောက်၍ ကုန်အညွှန်းအမှတ်အသားများတွင် ထည့်သွင်းရမည့်အချက်များပါဝင်နိုင်ရေး ဌာနက သွားရောက်ဆွေးနွေး၍ အသိပညာပေးကြောင်း၊ သို့မှသာ ကုန်ပစ္စည်းများတွင် ထည့်သွင်းရမည့်အချက်များပါဝင်လာပြီး စားသုံးသူများအတွက် လုံခြုံစိတ်ချရသည့်ကုန်ပစ္စည်းများထုတ်လုပ်နိုင်မည်ဖြစ်ကြောင်းနှင့် စားသုံးသူမိဘပြည်သူများလည်း ဘေးအန္တရာယ်ကင်းရှင်းစွာ စားသုံးနိုင်မည်ဖြစ်ကြောင်းတို့ကို ရှင်းလင်းဆွေးနွေးခဲ့ပါသည်။

 ဆက်လက်၍ စားသုံးသူကာကွယ်ရေးဥပဒေ ၂၀၁၉ အခန်း (၉) ပါ စားသုံးသူများရရှိသည့်အခွင့်အရေး (၈) ချက်ကိုလည်း သင်တန်းသားများသိရှိနားလည်စေရန် ဥပမာများဖြင့် ရှင်းလင်းခြင်းနှင့် လိုက်နာရမည့်တာဝန်များကိုလည်း ဆွေးနွေးခြင်းတို့ပြုလုပ်ကာ ယခုလိုသိရှိမှသာ မိမိတို့ရရှိမည့်အခွင့်အရေးများကို တောင်းခံနိုင်မည်ဖြစ်ကြောင်း၊ စားသုံးသူများလိုက်နာရမည့်တာဝန်များကိုလည်း တိတိကျကျလိုက်နာရန်လိုအပ်ကြောင်းနှင့် တက်ရောက်လာသည့် မိဘပြည်သူများ၊ ဝန်ထမ်းများ၊ဆရာ/ဆရာမများနှင့် သင်တန်းသား/သင်တန်းသူများက သိရှိလိုသည်များကိုမေးမြန်းရာ ပြန်လည်ဖြေကြားခဲ့ပြီးနောက် လက်ကမ်းစာစောင်များလည်း ဖြန့်ဝေခဲ့ပါသည်။

DOCA(မကွေး)