HighLight News

          စစ်ကိုင်းတိုင်းဒေသကြီး၊ ကသာခရိုင်အတွင်းရှိ ကသာမြို့နယ်နှင့် ထီးချိုင့်မြို့နယ်များမှ ကြံတောင်သူများသည် ဧရာဝတီမြစ်အရှေ့ဘက်ခြမ်းတွင် ကြံများကို စီးပွားဖြစ် စိုက်ပျိုးထုတ်လုပ်လျက်ရှိပြီး သက်ဆိုင်ရာဌာန၏ စာရင်းအရ ခရိုင်အတွင်း ကြံစိုက်ဧက (၁၂၀၀၀၀)ဧကခန့် ရှိကြောင်း သိရှိရသည်။

          ၂၀၁၆ခုနှစ်ကစပြီး သကြားဈေးမကောင်းသောကြောင့် ကြံတောင်သူများအရှုံးပေါ်ခဲ့သည့် အတွက် ယခုနှစ်တွင် ကြံစိုက်ဧက လျှော့ချခဲ့ပြီး အစားထိုးသီးနှံအဖြစ် နှမ်းသီးနှံကို စိုက်ပျိုးခဲ့ ကြောင်း၊ ယခုနှစ်တွင် သကြားစက်များမှ ကြံတစ်တန် စက်ရုံအရောက် ၆၀၀၀၀ ကျပ်ဈေးနှင့် ဝယ် ယူမည်ဟု သိရှိရပြီး တစ်ချို့တောင်သူများကို ကြိုတင်စာချုပ်၍ ဝယ်ယူနေသည်ဟုလည်း သိရှိ ရကြောင်း၊ ကြံကို ကြိတ်ချက်ပြီး သကာပိုင်းနှင့် မန္တလေးသို့တင်ပို့ရောင်းချမှုရှိသလို ကြံပင်အတိုင်း သကြားစက်များသို့ ရောင်းချသည်များလည်းရှိကြောင်း၊ ကြံဈေးကောင်းလာပါက တိုးချဲ့စိုက်ပျိုးသွားရန် အစီအစဉ်ရှိကြောင်း ကသာမြို့နယ်မှ ကြံစိုက်တောင်သူ ဦးမြင့်သိန်းထံက သိရှိရပါသည်။

ကသာခရိုင်အတွင်း သကြားစက်(၃)စက်ရှိပြီး ဒေသတွင်း ကြံစိုက်တောင်သူများအတွက် ရင်းနှီးမတည်ငွေအပါအဝင် စက်ပစ္စည်း၊ နည်းပညာများ ပံ့ပိုးပေးလျက်ရှိပါသည်။ ကြံဈေးမြှင့်တက် လာရသည့် အကြောင်းအရင်းနှင့် ပတ်သက်၍ ကမ္ဘာ့သကြားဈေးမြှင့်တက်မှု၊ ပြည်တွင်းအချိုရည် လုပ်ငန်းနှင့် သကြားအသုံးပြုသော စက်ရုံများမှ ဝယ်လိုအားမြှင့်မားမှုနှင့် သကြား re-export တင်သွင်းမှုကန့်သတ်ချက်များကြောင့် ဖြစ်သည်ဟု သကြားစက်လုပ်ငန်းရှင်များမှ သုံးသပ်လျက်ရှိပြီး ယခုနှစ်တွင် ဂရိတ်‌ဝေါသကြားစက်မှ ကြံတန်ချိန် ခုနှစ်သိန်းကျော်၊ မြတောင်သားသကြားစက် မှ ကြံတန်ချိန် သုံးသောင်းကျော်နှင့် UTP သကြားစက်မှ ကြံတန်ချိန်သုံးသောင်းကျော် ဝယ်ယူရန် လျာထားကြောင်းနှင့် ခရိုင်အတွင်းရှိ ဒေသထွက်ကြံများကို ၂၀၂၁-ခုနှစ် ဒီဇင်ဘာလ ၂၀ ရက် နောက်ပိုင်းမှ စတင်ဝယ်ယူသွားမည်ဟုလည်း အဆိုပါ သကြားစက်လုပ်ငန်းရှင်များထံမှ သိရှိရပါသည်။

စားသုံးသူရေးရာဦးစီးဌာန(စစ်ကိုင်းတိုင်းဒေသကြီး)

       ၂၀၂၁ခုနှစ်၊ ဒီဇင်ဘာလ(၁၆)ရက်နေ့၊ နံနက်(၁၀း၀၀)အချိန်တွင် မြိတ်ခရိုင်၊ စားသုံးသူရေးရာ ဦးစီးဌာနမှ ခရိုင်ဦးစီးမှူးနှင့် ဝန်ထမ်းများသည် လျှပ်စစ်ပစ္စည်းဝယ်ယူ သုံးစွဲသူများ ဘေးအန္တရာယ်ကင်းရှင်းစေရန် ရည်ရွယ်၍ မြိတ်မြို့ပေါ်ရှိ‌ အိမ်သုံးလျှပ်စစ်ပစ္စည်းအရောင်းဆိုင်များသို့ သွားရောက်ပြီး မြန်မာဘာသာဖြင့် ကုန်အညွှန်းအမှတ်အသားများဖော်ပြပါရှိသော ကုန်ပစ္စည်းများကိုသာ ရောင်းချစေရေးနှင့် ယုံကြည် စိတ်ချရသောကုန်ပစ္စည်းများ၊ အရည်အသွေးပြည့်ဝသောကုန်ပစ္စည်းများ ပိုမိုသုံးစွဲစေရေး စျေးကွက် စောင့်ကြည့်စစ်ဆေးခြင်းဆောင်ရွက်ခဲ့ကြပါသည်။

        ထိုသို့ စျေးကွက်စောင့်ကြည့်စစ်ဆေးရာတွင် တနင်္သာရီတိုင်းဒေသကြီး၊ မြိတ်ခရိုင်စားသုံးသူ ရေးရာဦးစီးဌာနအနေဖြင့် စျေးကွက်အတွင်း သုံးစွဲသူများအသုံးပြုရန်(သို့)သုံးစွဲရန် အာမခံချက်မရှိ သောကုန်စည်များ ရောင်းချခြင်း မပြုလုပ်ရန် အသိပညာပေးပြောကြားပြီး လက်ကမ်းစာစောင်များ  ဖြန့်ဝေပေးခဲ့ကြောင်း သတင်းရရှိခဲ့ပါသည်။

          စားသုံးသူရေးရာဦးစီးဌာန(တနင်္သာရီတိုင်းဒေသကြီး)

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန ၊ ပခုက္ကူခရိုင် ခရိုင်ဦးစီးမှူး ဦးဝေဠုအောင်နှင့်ဝန်ထမ်းများသည် (၁၅.၁၂.၂၀၂၁)ရက်နေ့၊ နံနက်(၁၁:၃၀)အချိန်တွင် ပခုက္ကူမြို့နယ် ညောင်ပင်လှအုပ်စု၊ ညောင်ပင်လှရွာ ရွာသစ်ရှိ တောင်သူဦးဝင်းဆန်းနှင့် ဦးဝင်းဗိုလ် တို့၏ အာလူးစိုက်ခင်းများသို့ သွားရောက် ကွင်းဆင်းလေ့လာခဲ့ရာ ရွာသစ်ကျေးရွာရှိ အာလူးစိုက် တောင်သူများသည် ဒေသမျိုးနှင့် တရုတ်ဖြူမျိုးများကို ဝယ်ယူစိုက်ပျိုးလျက်ရှိကြောင်း၊  မျိုး တန်ဖိုး မှာ တစ်ပိဿာ (၂၀၅၀)ကျပ်ဖြစ်ပြီး တစ်ဧက ပိဿာ(၇၅၀)ခန့် သုံးစွဲရသည့်အတွက် မျိုးဖိုးအနေဖြင့် တစ်ဧက (၁၅)သိန်းကျော်ခန့် ကုန်ကျကြောင်း သိရှိရပါသည်။

          အာလူးစိုက်ပျိုးသည့်အချိန်မှာ အောက်တိုဘာလကုန် နိုဝင်ဘာလဆန်းတွင် စတင်စိုက်ပျိုးပြီး အာလူးတစ်လုံးတွင် အပင်ပေါက်မည့် မျက်ကွက်များ ပါရှိမှုပေါ်မူတည်၍ တစ်လုံးလျှင် လေးစိပ် (သို့မဟုတ်)နှစ်စိပ်ရရှိကြောင်း၊ စတင်စိုက်ပျိုးပြီး (၇)ရက်မြောက်နေ့မှစ၍ အာလူးဖော်ချိန်ထိ (၂) လခွဲ ခန့်ကြာမြင့်ကြောင်း၊ မြေဆီသွင်းအားစုအနေဖြင့်(အာမိုနှင့်ယာရာလီဗာ) (၅)အိတ် မှ (၇)အိတ် ထိ အကြိမ်ကြိမ်ခွဲ၍ ကျွေးရကြောင်း၊ အာလူးဖော်ချိန်တွင် တစ်ပင်လျှင် ပျမ်းမျှလေးလုံးမှငါးလုံး ထွက်ရှိကြောင်း၊ အာလူးဖော်ချိန်တွင် တစ်ဧက လုပ်သားဦးရေ (၁၈)ဦး မှ (၂၀)ဦးထိ အသုံးပြု ရပါကြောင်း၊ လုပ်သားခအနေဖြင့် တစ်ဦးလျှင် တစ်နေ့ပျမ်းမျှ(၆၀၀၀)ကျပ် ပေးရပါကြောင်း၊ အာလူးအထွက်နှုန်းမှာ တစ်ဧကလျှင် ပိဿာချိန် (၃၀၀၀ မှ ၄၀၀၀ ကြား)ထွက်ရှိပါကြောင်း၊ အာလူးစိုက် တောင်သူများအနေဖြင့် အာလူးပေါ်ချိန်တွင် တစ်ပိဿာ အနည်းဆုံး(၆၀၀/၇၀၀)ကျပ်မှ အများဆုံး (၁၀၀၀)ကျပ် ဈေးရရှိရန်မျှော်မှန်းကြောင်း၊ ညောင်ပင်လှရွာသစ်မှ ထွက်ရှိသော အာလူးများကို မန္တလေး၊ မုံရွာနှင့် မြင်းခြံမြို့များသို့ တင်ပို့ရောင်းချလျက်ရှိကြောင်း သိရှိရပါသည်။

          ပခုက္ကူမြို့နယ်၊ ညောင်ပင်လှအုပ်စု၊ ညောင်ပင်လှရွာသစ်ရှိ ကုန်မြေများတွင် (၁၅ တောင်မှ ၂၀ တောင်ရှိ) ရေတွင်းများတူး၍ ရေစုပ်စက်ဖြင့် ရေတင်ပြီး ရေဖြန်းစိုက်ပျိုးသည့်အတွက် စတင်စိုက်ပျိုးသည့် နှစ်တွင် ပိုက်ဖိုး (၁၀)သိန်းကျော်ခန့် ကုန်ကျပြီး (၅)နှစ်ခန့်အသုံးပြုရပါကြောင်း၊ အာလူးတစ်ဧက စိုက်ပျိုးစရိတ်မှာ (၂၃) သိန်းကျော်ကုန်ကျပြီး တစ်ပိဿာလျှင် (၈၀၀)ကျပ်ဖြင့် ရောင်းချပါက အကျိုးအမြတ် အသင့်အတင့်ရရှိမည်ဖြစ်ကြောင်း၊ ယခင်နှစ်က ဧက(၁၀၀၀)ခန့် စိုက်ပျိုးခဲ့သော်လည်း ယခုနှစ်တွင် မျိုးဈေးနှုန်းနှင့် သွင်းအားစုဈေးနှုန်းမှာ ယခင်နှစ်ကထက် (၂)ဆခန့်မြင့်တက်ခြင်း၊ စက်သုံးဆီဈေးနှုန်း ကြီးမြင့်ခြင်းတို့ကြောင့် ဧက(၂၅၀)ခန့်သာ စိုက်ပျိုးနိုင်ပြီး အာလူးစိုက်ဧက လေးပုံတစ်ပုံခန့် လျော့နည်းသွားကြောင်း၊ ယခင်က ပခုက္ကူမြို့နယ်၊ ညောင်ပင်လ ှအုပ်စု၊ နက်အင်းချောင်း တလျောက်တွင် ဝါ၊ ကြက်သွန်၊ အာလူး၊ မေမြို့ပန်း၊ ပန်းဂေါ်ဖီစသည့် သီးနှံများကို ချောင်းထဲတွင် အပြည့်စိုက်ပျိုးခဲ့ကြကြောင်း၊ ယခုနှစ်တွင် မြို့ပေါ်ရှိ ငွေကြေးတတ်နိုင် သူများမှ မျိုး၊ မြေဩဇာ၊ သွင်းအားစုနှင့် စက်သုံးဆီဖိုးများ ကျခံ၍ တောင်သူများမှ မြေနှင့်လုပ်သားခ စိုက်ထုတ်ပြီး အကျိုးတူစိုက်ပျိုး ကြသော်လည်း ယခင်နှစ်ထက် စိုက်ဧကလျော့နည်းကြောင်း အာလူးစိုက်တောင်သူများထံမှသိရှိခဲ့ရပါသည်။

စားသုံးသူရေးရာဦးစီးဌာန(မကွေးတိုင်းဒေသကြီး)

      မန္တလေးတိုင်းဒေသကြီး ၊မြင်းခြံခရိုင်၊ငါန်းဇွန်မြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီး ဌာန(community center)ခန်းမ၌ (၁၃.၁၂.၂၀၂၁)ရက်နေ့၊ နံနက်(၁၀:၀၀)အချိန်တွင် စားသုံးသူရေးရာဦးစီးဌာနနှင့် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ပူးပေါင်း၍ အများပြည်သူသိရှိနိုင်ရန်အတွက် talk show အစီအစဉ်အား ကျင်းပပြုလုပ်ခဲ့ပါသည်။

       အဆိုပါ talk showအစီအစဉ်တွင်စားသုံးသူရေးရာဦးစီးဌာန ငါန်းဇွန်မြို့နယ်တာဝန်ခံမှ စားသုံးသူကာကွယ်ရေးဉပဒေပါ စားသုံးသူကာကွယ်ရေး၏ အဓိပ္ပာယ်၊ စားသုံးသူအခွင့်အရေးနှင့်တာဝန်များ၊ စားသုံးသူများ ကုန်စည်(သို့)ဝန်ဆောင်မှုကို ဝယ်ယူအသုံးပြုခြင်းကြောင့် နစ်နာဆုံးရှုံးမှုဖြစ်ပေါ်ပါက တိုင်းဒေသကြီး၊ ပြည်နယ်များနှင့် ခရိုင်များအလိုက် တိုင်ကြားနိုင်သည့် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC)များသို့ တိုင်ကြားနိုင်ပါကြောင်း၊ နစ်နာဆုံးရှုံးမှုများအတွက် နစ်နာသည့်စားသုံးသူမှဖြစ်စေ၊ နစ်နာသည့်စားသုံးသူ၏မိသားစုဝင်များ၊ နစ်နာသည့်စားသုံးသူနှင့်ဆက်နွယ်သော ပုဂ္ဂိုလ်များ၊ အစိုးရဌာနအဖွဲ့အစည်းများ၊ တရားဝင်မှတ်ပုံတင်ထားသည့် စားသုံးသူကာကွယ်ရေးဆိုင်ရာ အသင်းအဖွဲ့များမှဖြစ်စေ နစ်နာဆုံးရှုံးမှုအတွက် တိုင်ကြားနိုင်ပါကြောင်း၊ စားသုံးသူများအနေဖြင့် စားသုံးသူရေးရာဦးစီးဌာနနှင့်ပတ်သက်သော သတင်းအချက်အလက်များကို အလွယ်တကူ မေးမြန်းစုံးစမ်းနိုင်ရန်၊ ကုန်စည်နှင့်ဝန်ဆောင်မှုများ ဝယ်ယူသုံးစွဲရာ တွင်နစ်နာဆုံးရှုံးမှုဖြစ်ပေါ်ပါက ဌာနသို့အလွယ်တကူဆက်သွယ်တိုင်ကြားနိုင်ရန်၊ စီးပွားရေးလုပ်ငန်းရှင်များအနေဖြင့် ကုန်စည်(သို့)ဝန်ဆောင်မှုများ ထုတ်လုပ်ဖြန့်ဖြူးရောင်းချရာတွင် လိုက်နာရမည့်အချက်များကို အလွယ်တကူ စုံစမ်းနိုင်ရန် ရည်ရွယ်၍ (consumer call center)ကို ၂၀၂၁ ခုနှစ် ဇွန်လ ဒုတိယပတ်မှစ၍ စမ်းသပ်ကာလအဖြစ် ဖွင့်လှစ်ထားရှိရာ Telenor ၊ooredoo ၊ mytel sin card အသုံးပြုသူများအနေဖြင့် short code 1535 ဖြင့်လည်းကောင်း၊  mpt sin cardအသုံးပြုသူများအနေဖြင့် long code 09765481535 ကိုလည်းကောင်း ဆက်သွယ်စုံစမ်း မေးမြန်းနိုင်ကြောင်း၊ မကြာမီတရားဝင်ဖွင့်လှစ်၍ ဝန်ဆောင်မှုပေးသွားမည် ဖြစ်ကြောင်း ရှင်းလင်းဆွေးနွေးခဲ့ပြီး (၁၁:၁၅)နာရီအချိန်တွင် Talk Show အစီအစဉ်ပြီးဆုံးခဲ့ပါသည်။

        စားသုံးသူရေးရာဦးစီးဌာနအနေဖြင့် ယခုကဲ့သို့ Online အစီအစဉ်ဖြင့် စားသုံးသူကာကွယ်ရေး အသိပညာပေးလုပ်ငန်းများကို စဉ်ဆက်မပြတ် ဆက်လက်ဆောင်ရွက်သွားမည်ဖြစ်ပြီး၊ စားသုံးသူများ အတွက် ကုန်စည်နှင့်ဝန်ဆောင်မှုကြောင့် ထိခိုက်နစ်နာဆုံးရှုံးစေမှု ကာကွယ်နိုင်ရေး အသိပညာပေး ဆောင်ရွက်သွားမည်ဖြစ်သလို ထုတ်လုပ်သူစီးပွားရေးလုပ်ငန်းရှင်များ မိမိတို့၏ ကုန်စည်ထုတ်လုပ်ရာ တွင်လည်းကောင်း၊ ဖြန့်ဖြူးရောင်းချရာတွင်လည်းကောင်း စားသုံးသူများအတွက် လုံခြုံစိတ်ချရမှု ရရှိ စေနိုင်သည့် ကုန်စည်များထုတ်လုပ်ခြင်းအားဖြင့် စီးပွားရေးလုပ်ငန်းရှင်များ၏ ထုတ်ကုန်များ ဘေးအန္တရာယ်ကင်းရှင်းပြီး အရည်အသွေးမြင့်မားလာစေရန် ရည်ရွယ်၍ စားသုံးသူကာကွယ်ရေးလုပ် ငန်းများကို ဆထပ်ထမ်းပိုး ဆက်လက်ဆောင်ရွက်သွားမည်ဖြစ်ကြောင်း အများပြည်သူ သိရှိစေရန်အတွက် ရေးသားဖော်ပြလိုက်ရပါသည်။

စားသုံးသူရေးရာဦးစီးဌာန(မန္တလေးတိုင်းဒေသကြီး)

စားသုံးသူရေးရာဉီးစီးဌာန၊ ရုံးအမှတ်(၅၂) (၂၀.၁၂.၂၀၂၁)

        ဝန်ထမ်းစွမ်းဆောင်ရည်မြှင့်တင်ရေး(အမှုထမ်း)သင်တန်းအမှတ်စဉ် (၁/၂၀၂၁) သင်တန်းဖွင့်ပွဲ အခမ်းအနားကို  စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဉီးစီးဌာန၊ ရုံးအမှတ်(၅၂)စုပေါင်းအစည်းအဝေးခန်းမ၌ ကျင်းပပြုလုပ်ခဲ့ပါသည်။ အဆိုပါ အခမ်းအနားသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်၊ ညွှန်ကြားရေးမှူးများနှင့် သင်တန်းသား၊ သင်တန်းသူ (၅၅) ဉီး တက်ရောက်ခဲ့ပါသည်။

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ညွှန်ကြားရေးမှူးချုပ်က အဖွင့်အမှာစကား ပြောကြားရာတွင် ယခုသင်တန်းမှာ  ပြည်ထောင်စုတိုင်းရင်းသား လူငယ်စွမ်းရည်ဖွံ့ဖြိုးရေးဒီဂရီကောလိပ် (ရန်ကုန်၊ စစ်ကိုင်း) ကျောင်းဆင်းဘွဲ့ရ သင်တန်းသား (၁၅) ဉီးနှင့် ဦးစီးဌာနက အသစ်ခန့်ထားတဲ့ အမှုထမ်း (၃၅) ဉီး၊ မြန်မာကုန်သွယ်မှုမြှင့်တင်ရေးအဖွဲ့မှ အမှုထမ်း(၅)ဉီး စုစုပေါင်း သင်တန်းသား (၅၅) ဉီးကို (၂၀-၁၂-၂၀၂၂) မှ (၁၀-၁-၂၀၂၂) နေထိ ဖွင့်လှစ်ပို့ချပေးသွားမှာဖြစ်ကြောင်း၊ ယခုသင်တန်းသားများဟာ ဝန်ကြီးဌာန၏   မျှော်မှန်းချက်ဖြစ်တဲ့ “ကုန်သွယ်မှုလုပ်ငန်းများဖြင့် အမျိုးသားစီးပွားရေး ဖွံ့ဖြိုးတိုးတက်အောင် ဆောင်ရွက်ရန်”၊ စားသုံးသူရေးရာဉီးစီးဌာနရဲ့ မျှော်မှန်းချက်ဖြစ်တဲ့ “စားသုံးသူများလုံခြုံစိတ်ချရမှုရှိစေရန်”၊ မြန်မာကုန်သွယ်မှုမြှင့်တင်ရေးအဖွဲ့၏ ရည်မှန်းချက်ဖြစ်တဲ့ “ပို့ကုန်ဦးဆောင်သော ဖွံ့ဖြိုးတိုးတက်ရေး မဟာဗျူဟာကို ကျင့်သုံး၍ မြန်မာ့စီးပွားရေးလုပ်ငန်းများကိုမြှင့်တင်ပေးခြင်းဖြင့် မြန်မာနိုင်ငံအား ဒေသတွင်းကုန်သွယ်မှု၌ ယှဉ်ပြိုင်နိုင်စွမ်းရှိသော နိုင်ငံတစ်နိုင်ငံဖြစ်လာစေရန်”၊ မူပိုင်ခွင့်ဉီးစီးဌာနရဲ့ ရည်မှန်းချက်ဖြစ်တဲ့ “နိုင်ငံတော်၏ စီးပွားရေး၊ လူမှုရေး၊ သိပ္ပံနှင့် ယဉ်ကျေးမှုဆိုင်ရာများကို ကမ္ဘာနှင့်ယှဉ်၍ ဖွံ့ဖြိုး တိုးတက်စေနိုင်သောတီထွင်ဆန်းသစ်မှုနှင့်ဖန်းတီးမှုများကိုမြင့်မားတိုးတက်လာစေမည့်မူပိုင်ခွင့် စနစ်တရပ်တည်ထောင်ရန်”စသည့် မိမိတို့ဝန်ကြီးဌာန အောက်ရှိ ဦးစီးဌာနများရဲ့ မျှော်မှန်းချက်များကို သိရှိနေရမှာဖြစ်သလို မိမိတို့ ဉီးစီးဌာနရဲ့ ရည်မှန်းချက် ဖြစ်တဲ့စားသုံးသူ အခွင့်အရေးနှင့် စားသုံးသူအကျိုးစီးပွားကာကွယ်ရေးဆောင်ရွက်ရန်၊ ထုတ်ကုန်များ လုံခြုံစိတ်ချရမှုရှိစေရေး ဆောင်ရွက်ရန်၊ ကုန်စည်နှင့် ဝန်ဆောင်မှုများ၏ အရည်အသွေး စီမံခန့်ခွဲမှု သုတေသနဖွံ့ဖြိုးရေး လုပ်ငန်းများ ဆောင်ရွက်ရန်၊ ပြည်တွင်းကုန်သွယ်ရေးဖွံ့ဖြိုးမှုနှင့် သုတေသနလုပ်ငန်းများဆောင်ရွက်ရန်စသည့် တာဝန်တွေသိရှိပြီး မိမိတို့လုပ်ငန်းတာဝန်များ ထမ်းဆောင်ရာတွင် ကျွမ်းကျင်စွာဆောင်ရွက် နိုင်စေရန်နှင့် လက်ရှိနိုင်ငံတော်စီမံအုပ်ချုပ်ရေးကောင်စီ၏ လမ်းညွှန်ချက်ဖြစ်သည့် နိုင်ငံ့ဝန်ထမ်းများ စွမ်းဆောင်ရည်မြင့်မားရေး၊ လူ့စွမ်းအားအရင်းအမြစ်များ လေ့ကျင့်ပျိုးထောင်ပေးရေးအတွက် လမ်းညွှန်ချက်နှင့်အညီ ယခုလိုသင်တန်းဖွင့်လှစ်ပို့ချပေးတာဖြစ်ကြောင်း၊ နောင်မိမိတို့ဌာနအနေဖြင့် ယခုလို လူ့စွမ်းအားအရင်းအမြစ်ဖွံ့ဖြိုးတိုးတက်ရေးအတွက် အလျဉ်းသင့်သလို သင်တန်းများ စီစဉ်ဆောင်ရွက်သွားမှာဖြစ်ကြောင်း၊သင်တန်းသားများအနေဖြင့်သင်တန်းမှာပို့ချပေးတဲ့သင်ခန်းစာ များဟာအခြေခံမျှသာဖြစ်ပြီး လက်တွေ့လုပ်ငန်းနယ်ပယ်မှာ စဉ်ဆက်မပြတ် ကြိုးစားလေ့လာ ဆည်းပူးနေဖို့ လိုအပ်ပါကြောင်း လမ်းညွှန်အမှာစကား ပြောကြားခဲ့ပါသည်။

စားသုံးသူရေးရာဦးစီးဌာန