သတင်းနှင့် လှုပ်ရှားမှုများ

      စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည်  (၁၁-၄-၂၀၂၄) ရက်နေ့တွင် ပြည်နယ်ဦးစီးမှူးရုံးခန်း၌ “ရွှေငါး” အမှတ်တံဆိပ် သဘာဝမြေဩဇာလုပ်ငန်းရှင်နှင့်တွေ့ဆုံခဲ့သည်။

    ထိုသို့တွေ့ဆုံရာတွင် ပြည်နယ်ဦးစီးမှူးက မြေဩဇာလုပ်ငန်းရှင်အား အသုံးပြုသည့်ကုန်ကြမ်းအမျိုးအစား၊ ထုတ်လုပ်နိုင်သည့်အရေအတွက်၊ ဈေးနှုန်း၊ ဈေးကွက်၊ ဖြန့်ဖြူးမှုအခြေအနေများကိုမေးမြန်းခဲ့ရာ လုပ်ငန်းရှင်က ကုန်ကြမ်းအနေဖြင့် မြေဆွေး၊ ကယ်လစီယမ်ကာဗွန်နိတ်(ထုံးကျောက်)၊ ငါးခြောက်မှုန့်များကိုအသုံးပြုကြောင်း၊ ကုန်ကြမ်းများကို သံဖြူဇရပ်မှဝယ်ယူရရှိကြောင်း၊ ထုတ်လုပ်မှုအနေဖြင့် တစ်နှစ်လျှင် ၅၀ကီလိုဂရမ်ရှိသည့် အိတ်ရေ (၆၀၀၀) ထုတ်လုပ်ကြောင်း၊ ဈေးနှုန်းအနေဖြင့် တစ်အိတ်လျှင် (၁၈၀၀၀) ကျပ်ဖြင့် မွန်ပြည်နယ်အတွင်း ဖြန့်ဖြူးရောင်းချကြောင်းသိရှိရပါသည်။

DOCA(မွန်)

   ပဲခူးတိုင်းဒေသကြီး၊ သာယာဝတီခရိုင်၊ သာယာဝတီမြို့နယ်၊ ခရိုင်အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမ၌ (၅-၄-၂၀၂၄)ရက်နေ့၊ နံနက် (၁၀:၀၀)နာရီအချိန်တွင် ကျင်းပပြုလုပ်သော အသေးစား၊ အငယ်စားနှင့် အလတ်စား MSMEs စီးပွားရေးလုပ်ငန်းများဖွံ့ဖြိုးတိုးတက်ရေး လုပ်ငန်းညှိနှိုင်းအစည်းအဝေးကို ခရိုင်စီမံအုပ်ချုပ်ရေးဥက္ကဋ္ဌ ဦးစန်းဝင်း၊ ခရိုင်စီမံအုပ်ချုပ်ရေးဒု-ဥက္ကဋ္ဌ ဦးစောထွန်းဦး၊ စားသုံးသူရေးရာဦးစီးဌာန၊ ခရိုင်ဦးစီးမှူး ဦးသန်းစိုးနှင့်ဝန်ထမ်းများ၊ အသေးစားစက်မှုလက်မှုလုပ်ငန်းဦးစီးဌာန၊ ခရိုင်ဦးစီးမှူး ဒေါဖြိုးဖြိုးအောင်နှင့်ဝန်ထမ်းများအဖွဲ့၊ စီးပွားလုပ်ငန်းရှင်များတက်ရောက်ခဲ့ကြကာ ဆွေးနွေးပွဲကျင်းပပြုလုပ်ခဲ့ပါသည်။

      အခမ်းအနားတွင် ပဲခူးတိုင်းဒေသကြီး၊ သာယာဝတီခရိုင်၊ စီမံအုပ်ချုပ်ရေးအဖွဲ့ဥက္ကဋ္ဌ ဦးစန်းဝင်းက အဖွင့်အမှာစကားပြောကြားခဲ့ပြီးနောက် အသေးစား၊ အငယ်စား၊ အလတ်စား စီးပွားရေးလုပ်ငန်းရှင်များအား နိုင်ငံ့စီးပွားရေးဖွံ့ဖြိုးတိုးတက်ရေးအတွက် နိုင်ငံတော်မှ အလေးထားဆောင်ရွက်နေခြင်းဖြစ်ပြီး စီးပွားရေးလုပ်ငန်းရှင်များအနေဖြင့် မိမိတို့ထုတ်လုပ်သည့်ကုန်ပစ္စည်းများကို ထုတ်ကုန်တိုးမြှင့်ဆောင်ရွက်ရန်၊ လုပ်ငန်းနှင့်ပတ်သက်ပြီး မိရိုးဖလာလုပ်ကိုင်ခြင်းမှ ပြောင်းလဲပြီး စွန့်ဦးတီထွင်ထုတ်လုပ်ရန်လိုအပ်ကြောင်း၊ စားသောက်ကုန်များထုပ်ပိုးမှုများကို ပြုပြင်ပြောင်းလဲ၍ ထုပ်ပိုးမှုများပြုလုပ်သင့်ကြောင်း၊ စားသောက်ကုန်လုပ်ငန်းရှင်များအနေဖြင့် FDA ၏ထောက်ခံချက်များရရှိရန်လိုအပ်ကြောင်း၊ MSMEs အဖွဲ့ဝင်ကတ်များကိုလည်းပြုလုပ်ထားရမည်ဖြစ်ကြောင်းပြောကြားခဲ့ပါသည်။ ထုတ်လုပ်ထားသော ကုန်ပစ္စည်းများကို မြို့နယ်အတွင်း၊ ခရိုင်အတွင်းမှ တိုင်းအတွင်းသို့၊ တိုင်းအတွင်းမှသည် ပြည်ပနိုင်ငံများအထိ တင်ပို့နိုင်အောင်ကုန်ပစ္စည်းများကို တိုးတက်အောင်ထုတ်လုပ်ကြရန်၊ MSMEs လုပ်ငန်းများနှင့်ပတ်သက်ပြီး ချေးငွေရယူလိုပါက ကူညီပေးသွားမည်ဖြစ်ကြောင်း၊ စီးပွားရေးလုပ်ငန်းရှင်များအနေဖြင့် အခက်အခဲရှိပါက  တင်ပြဆွေးနွေးရန်ပြောကြားခဲ့ပါသည်။

       ဆက်လက်၍ စီးပွားရေးလုပ်ငန်းရှင်များဖြစ်သော စားသောက်ကုန်လုပ်ငန်းရှင်(၃၅)ဦး၊ ရေသန့်လုပ်ငန်းရှင်(၆)ဦး၊ စက်မှုလုပ်ငန်းရှင် (၂)ဦး၊ ဆီစက်လုပ်ငန်းရှင် (၁)ဦး၊ သစ်အချောထည်သစ်ခွဲ၊ လျှာထိုးနှင့် ပန်းပုလုပ်ငန်းရှင်(၆)ဦး၊ စုစုပေါင်း(၅၀)ဦးတို့က အသီးသီးဆွေးနွေးတင်ပြခဲ့ကြပါသည်။

        ၎င်းနောက် ခရိုင်စီမံအုပ်ချုပ်ရေးအဖွဲ့ဥက္ကဋ္ဌက နိဂုံးချုပ်စကားပြောကြားခဲ့ပြီး အခမ်းအနားကို နေ့လယ် (၁၂:၃၀) နာရီအချိန်တွင် ရုပ်သိမ်းခဲ့ကြောင်းသတင်းရရှိပါသည်။

DOCA(ပဲခူး)

      မကွေးတိုင်းဒေသကြီး၊ ချောက်ခရိုင်၊ ချောက်မြို့၌ နွေရာသီအခြေခံပန်းချီရေးဆွဲနည်းနှင့် အင်္ဂလိပ်စာသင်တန်းဆင်းပွဲအခမ်းအနားကို (၁၁.၄.၂၀၂၄)ရက်နေ့၊ နံနက် (၁၀:၀၀)နာရီအချိန်တွင် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန လူထုအခြေပြုဗဟိုဌာန (Community Centre) ခန်းမ၌ ကျင်းပရာ စားသုံးသူရေးရာဌာန၊ ချောက်မြို့နယ်တာဝန်ခံ ဒေါ်မြတ်မြတ်မိုးမှ ပူးပေါင်းပါဝင် ဆောင်ရွက်ခဲ့ပါသည်။

      ရှေးဦးစွာ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန ဦးစီးအရာရှိ ဒေါ်သိမ့်ဝါက သင်တန်းဆင်းအမှာစကားပြောကြားပြီး ကလေးငယ်များမှ အကများဖြင့် ကပြဖျော်ဖြေခဲ့ကြရာ အကအဖွဲ့ (၁) ကလေးများက “Tik Tok” သီချင်းဖြင့်လည်းကောင်း၊ အကအဖွဲ့(၂) ကလေးများက “စဉ်းစားဦးမယ်” သီချင်းဖြင့်လည်းကောင်း၊ အကအဖွဲ့(၃) ကလေးများက “ဖြေးဖြေးပက်” သီချင်းဖြင့်လည်းကောင်း၊ အကအဖွဲ့(၄)ကလေးများက “ဖြေးဖြေးပက်” သီချင်းဖြင့်လည်းကောင်း၊ အကအဖွဲ့ (၅) ကလေးများက “Tik Tok” သီချင်းဖြင့်လည်းကောင်း၊ အကအဖွဲ့(၆)တွင် အကနည်းပြနှင့်ကလေးငယ် များက “Tik Tok” သီချင်းဖြင့် လည်းကောင်း အသီးသီးကပြဖျော်ဖြေခဲ့ကြသည်။

     ထို့နောက် သင်တန်းနည်းပြ ဆရာ၊ ဆရာမများအား မြို့နယ်ပညာ‌ရေးမှူး ဒေါ်ခင်လေးဖြူ၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန ဦးစီးအရာရှိ ဒေါ်သိမ့်ဝါ၊ ခရိုင်မိခင်နှင့်ကလေး စောင့်ရှောက်ရေးအသင်း ကြီးကြပ်ရေးအဖွဲ့ဝင် ဦးစီးအရာရှိ ဒေါ်ဆွေဇင်ဦး၊ မြို့နယ် စားသုံးသူရေးရာဦးစီးဌာန မြို့နယ်တာဝန်ခံ ဒေါ်မြတ်မြတ်မိုးတို့က မေတ္တာလက်ဆောင်ပစ္စည်းများ ပေးအပ်ခဲ့ပြီး ကပြဖျော်ဖြေခဲ့သည့် ကလေးငယ်များအား မြို့နယ်ပညာရေးမှူး ဒေါ်ခင်လေးဖြူ၊ မြို့နယ် စားသုံးသူ ရေးရာဦးစီးဌာန၊ မြို့နယ်တာဝန်ခံ ဒေါ်မြတ်မြတ်မိုးတို့က ဆုငွေ (၁၀၀၀၀)စီ ပေးအပ်ချီးမြှင့်ခဲ့ကြောင်း သိရသည်။

    ဆက်လက်၍ ပန်းချီသင်တန်းနည်းပြ ဆရာဦးတင်အောင်မိုးက သင်တန်းသား၊ သင်တန်းသူများအား မဲဖောက်၍ ရေဆေးပန်းချီရုပ်ပုံများ မေတ္တာလက်ဆောင်ပေးအပ်ခဲ့ပြီး သင်တန်းသား၊ သင်တန်းသူ ကလေးငယ်များက အင်္ဂလိပ်စာသင်တန်းနည်းပြဆရာများဖြစ်သည့် အောင်ပြည့်သာ ပညာရေးစင်တာမှ ဆရာမဒေါ်မွန်မွန်ကို၊ ဆရာဝေလျှံဖုန်းကျော်၊ပန်းချီသင်တန်းနည်းပြများဖြစ်သည့် ဆရာဦးတင်အောင်မိုး (မြန်မာနိုင်ငံပန်းချီ၊ ပန်းပုအစည်းအရုံး)နှင့် ဆရာမ ဒေါ်ပြည့်ပြည့်အောင်၊ အကနည်းပြ မဆုလဲ့ရည် တို့အား ကန်တော့ကာ အမှတ်တရစုပေါင်းမှတ်တမ်းတင်ဓါတ်ပုံ ရိုက်ကူးခဲ့ကြောင်းသိရသည်။

      အဆိုပါ အသင်တန်းဆင်းပွဲသို့ ဌာနဆိုင်ရာတာဝန်ရှိသူများ၊ သင်တန်းနည်းပြဆရာ၊ ဆရာမများ၊ သင်တန်းသား၊ သင်တန်းသူများနှင့် မိဘများ တက်‌‌ရောက်ခဲ့ကြောင်း သိရှိရပါသည်။

DOCA(မကွေး)

     စားသုံးသူရေးရာဦးစီးဌာန၊ မြန်အောင်မြို့နယ်ဦးစီးမှူးနှင့်ဝန်ထမ်းများသည် (၉.၄.၂၀၂၄) ရက်နေ့ ၊နံနက်(၀၉:၃၀)နာရီအချိန်တွင် အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့၊ မြန်မာနိုင်ငံ ရဲတပ်ဖွဲ့၊ ပြည်သူ့ကျန်းမာရေးဦးစီးဌာနတို့နှင့် ပူးပေါင်း၍ မြန်အောင်မြို့နယ်၊ နေခြည်ဈေးအတွင်းရှိ ဆေးနှင့်ဆေးပစ္စည်းအရောင်းဆိုင်များအား ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ပါသည်။

    ထိုသို့ကွင်းဆင်းခဲ့ရာတွင် စားသုံးသူမိဘပြည်သူများ ဘေးအန္တရာယ်ကင်းရှင်းစေရန်အတွက် ဈေးကွက်အတွင်း ရောင်းချနေသော ကုန်စည်များပေါ်တွင် ကုန်စည်အမျိုးအစားကိုလိုက်၍ ကုန်အညွှန်း အမှတ်အသားများ ပြည့်စုံမှန်ကန်စွာဖော်ပြခြင်း ရှိ/မရှိတို့ကိုစစ်ဆေးခဲ့ပြီး၊ အစားအသောက်နှင့် ဆေးဝါးကွပ်ကဲရေးဦးစီးဌာန၏ ထောက်ခံချက်မရှိသော၊ အရည်အသွေးနှင့် စံချိန်စံညွှန်းစစ်ဆေးမှုခံယူ ထားခြင်းမရှိသည့် အာမခံချက်မရှိသော တရားမဝင်ဆေးဝါးများ ရောင်းချခြင်းမပြုရန်၊ စီးပွားရေး လုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာဆောင်ရွက်ရန်၊  ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရေးနှင့် သတ်မှတ်အရည်အသွေးပြည့်မီသောကုန်စည်များကိုသာ ရောင်းချရန်၊ စားသုံးသူဥပဒေပါ စီးပွားရေးလုပ်ငန်းရှင်၏ တာဝန်များအကြောင်း၊ တားမြစ်ချက်များအကြောင်းနှင့် ပြစ်မှုပြစ်ဒဏ်များအကြောင်း စသည်တို့ကို အသိပညာပေးဆွေးနွေးခဲ့ပြီး၊ ဆေးမျိုးစုံအရောင်းဆိုင်(၇)ဆိုင်အား ဈေးကွက်စောင့်ကြည့်စစ်ဆေးခြင်း များ ဆောင်ရွက်ခဲ့ကြကြောင်း သိရှိရပါသည်။

DOCA(ဧရာဝတီ)

  စားသုံးသူရေးရာဦးစီးဌာန ဟင်္သာတမြို့နယ်တာဝန်ခံသည် (၁၀.၄.၂၀၂၄)ရက်နေ့၊ နံနက် (၀၉:၃၀)အချိန်တွင် ဟင်္သာတမြို့၊ မြို့ပေါ်ရပ်ကွက်ရှိ အိမ်ဆောက်ပစ္စည်းအရောင်းဆိုင်များ၌ ဘိလပ်မြေများ ပစ္စည်းပြတ်လပ်မှု ရှိ/မရှိနှင့် ဈေးနှုန်း/ဈေးကွက်အခြေအနေများအား ကွင်းဆင်းစစ်ဆေးခြင်း ဆောင်ရွက်ခဲ့ပါသည်။

    ထိုသို့ ကွင်းဆင်းစစ်ဆေးခဲ့ရာတွင် ယခင်ကကဲ့သို့ပင်  ဘိလပ်မြေအိတ်များ လွယ်ကူစွာ မှာယူရရှိနိုင်ပြီး၊ ပစ္စည်းများ လုံးဝပြတ်လပ်နိုင်မှုမရှိကြောင်း၊ ဈေးနှုန်း/ဈေးကွက်အခြေအနေများလည်း ပြောင်းလဲမှုမရှိသည်ကို တွေ့ရှိရကြောင်း သိရပါသည်။

DOCA(ဧရာဝတီ)