သတင်းနှင့် လှုပ်ရှားမှုများ

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကသာခရိုင် ဦးစီးမှူးရုံးမှ စစ်ဆေးရေးမှူး ဦးကြည်နိုင်ဦး (ဦးစီးမှူး)နှင့် ဝန်ထမ်းများသည် ဈေးကွက်အတွင်း ဘိလပ်မြေအိတ်များ ပစ္စည်းပြတ်လပ်လျက်ရှိ/မရှိနှင့် ဈေးနှုန်းဈေးကွက်အခြေအနေများနှင့် ပတ်သက်၍  သိရှိနိုင်ရန် ဘိလပ်မြေရောင်းချသည့် ဆိုင်ကြီးများသို့ ၂၀၂၄-ခုနှစ် မတ်လ(၁၉)ရက်နေ့ နံနက်ပိုင်းတွင် မြေပြင်ကွင်းဆင်းစစ်ဆေးခြင်း ဆောင်ရွက်ခဲ့ပါသည်။

    မြေပြင်ကွင်းဆင်းစစ်ဆေးခြင်း ဆောင်ရွက်ရာတွင် ကသာမြို့ပေါ်ရှိ ဘိလပ်မြေအရောင်းဆိုင်(၅) ဆိုင်ရှိသည့်အနက် ဆိုင်ကြီးများဖြစ်သည့် ဆင်ရတနာ အိမ်ဆောက်ပစ္စည်းအရောင်းဆိုင်နှင့် ကြယ်စင်ဟိန်း အိမ်ဆောက်ပစ္စည်းအရောင်းဆိုင်(၂)ဆိုင်သို့ ကွင်းဆင်းခဲ့ရာ ကသာမြို့သို့ ဘိလပ်မြေ ဝင်ရောက်မှုမှာ ဧရာဝတီမြစ်လမ်းကြောင်းနှင့် မန္တလေး၊ အင်းတော်၊ ကသာစသည့် ကုန်းလမ်းကြောင်း များမှ ဝင်ရောက်ကြောင်း၊ ယခုအခါတွင် ဧရာဝတီမြစ် ရေလမ်းကြောင်းမှာ သဲသောင်ထွန်းပြီး လမ်းကြပ်ခြင်း၊ ကုန်းလမ်းကြောင်းမှာလည်း နယ်မြေအခြေအနေအရ လမ်းကြောပိတ်ဆို့မှုများရှိသည့် အတွက် ကြန့်ကြာခြင်း၊ ဘိလပ်မြေကုမ္ပဏီများမှ ဖြန့်ဖြူးမှုနည်းပါးခြင်းများကြောင့် ကသာဈေးကွက် တွင် ဘိလပ်မြေများ ခေတ္တပြတ်လပ်မှုရှိနေကြောင်းနှင့် မကြာခင်ကာလတွင် ရေလမ်းကြောင်းမှ ဘိလပ်မြေများဝင်ရောက်မှာဖြစ်ကြောင်း ဆွေးနွေးသိရှိရပါသည်။ ကသာမြို့တွင် သုံးစွဲသူအကြိုက်ဖြစ်သည့် Crown အမှတ်တံဆိပ် ဘိလပ်မြေသည် အရောင်းအဝယ်ရှိပြီး လက်ရှိ ဘိလပ်မြေ(၁)အိတ်လျှင် (၁၇၀၀၀)ကျပ်ရှိကြောင်း ဘိလပ်မြေအရောင်းဆိုင်များမှ သိရှိရပါသည်။

DOCA(စစ်ကိုင်း)

    ကချင်ပြည်နယ်၊ စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးမှ ခရိုင်ဦးစီးမှူး ဦးအောင်ကျော်ဦးသည် (၁၉-၃-၂၀၂၄) ရက်နေ့တွင် ဗန်းမော်မြို့၊ သာစည်ရပ်ကွက်ရှိ JMS(စတိုး)ဆိုင်သို့လည်းကောင်း၊ (၂၀-၃-၂၀၂၄) ရက်နေ့တွင် ဗန်းမော်မြို့၊ ပေါက်ကုန်းရပ်ကွက်ရှိ ရွှေပင်လယ်(ကုန်စုံဆိုင်)သို့လည်းကောင်း သွားရောက်ကာ ကုန်အညွှန်းအမှတ်အသားဖော်ပြခြင်းနှင့် ပတ်သက်၍ စားသုံးသူကာကွယ်ရေးဥပဒေပါ ပြဋ္ဌာန်းချက်များနှင့်ကိုက်ညီမှုရှိ/မရှိ ဈေးကွက်စောင့်ကြည့်စစ်ဆေးခဲ့ပါသည်။

   ထိုသို့ဈေးကွက်စောင့်ကြည့်စစ်ဆေးရာတွင် OK အမှတ်တံဆိပ်ပါ အမဲသားဆီသွပ်ဘူးပေါ်တွင် ကုန်စည်အမျိုးအစားအလိုက် သတ်မှတ်ချက်နှင့်အညီ သိသာထင်ရှားစွာဖော်ပြရမည့် ကုန်စည်၏အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းမှုအညွှန်းနှင့် ဓာတ်မတည့်ကြောင်းဖော်ပြချက် စသည့်ကုန်အညွှန်းအမှတ်အသားတို့ကို ဖော်ပြထားခြင်းရှိ/မရှိ ဈေးကွက်စောင့်ကြည့်စစ်ဆေးခဲ့ရာ ကုန်အညွှန်းအမှတ်အသားပြည့်စုံစွာဖော်ပြထားရှိကြောင်း စစ်ဆေးတွေ့ရှိရပြီး ကုန်စုံဆိုင်ပိုင်ရှင်များအား ကုန်အညွှန်းအမှတ်အသား ဖော်ပြချက်များနှင့်ကိုက်ညီမှုရှိသော ကုန်စည်များကိုသာ ဈေးကွက်အတွင်းရောင်းချကြရန်နှင့် စီးပွားရေးလုပ်ငန်းရှင်များလိုက်နာရမည့် တာဝန်များအကြောင်းတို့ကိုပါ ရှင်းလင်းပြောကြားပြီး ကုန်အညွှန်းအမှတ်အသားဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(ကချင်)

   စားသုံးသူရေးရာဦးစီးဌာန၊ မုဒုံမြို့နယ်တာဝန်ခံသည် မိတ်ဖက်ဌာနများဖြစ်သော မြို့နယ်စည်ပင်သာယာရေးအဖွဲ့၊ မြို့နယ်အထွေထွေအုပ်ချုပ်ရေးဦးစီးဌာနတို့နှင့်ပူးပေါင်း၍ (၂၀-၃-၂၀၂၄) ရက်နေ့တွင် မုဒုံမြို့ပေါ်ရှိ ကုန်စုံဆိုင်များ၌ရောင်းချနေသော အသင့်သောက်အချိုရည်များအား ဈေးကွက်စောင့်ကြည့်စစ်ဆေးခဲ့ကြောင်းသိရှိရပါသည်။

        ထိုသို့ဈေးကွက်စောင့်ကြည့်စစ်ဆေးရာတွင် ကုန်စုံဆိုင် (၁၀) ဆိုင်၌ Shark, Sponser, Asia (မန်ကျည်း၊ လိုင်ချီး), Max Plus, Cocacola စသည့် အချိုရည် (၇) မျိုးအားစစ်ဆေးခဲ့ပြီး အဆိုပါအချိုရည်များတွင် စားသုံးသူကာကွယ်ရေးဥပဒေ၊ အခန်း (၁၈) တွင်ပြဋ္ဌာန်းထားသည့် ကုန်အညွှန်းအမှတ်အသားဖော်ပြမှုဆိုင်ရာ အချက်များနှင့်ကိုက်ညီမှုရှိ/မရှိစစ်ဆေးခဲ့ရာ ကိုက်ညီမှုရှိကြောင်းတွေ့ရှိရသည်။

       စားသုံးသူရေးရာဦးစီးဌာနအနေဖြင့် စားသုံးသူပြည်သူများဘေးအန္တရာယ်ကင်းရှင်းစေရေး၊ ထုတ်ကုန်လုံခြုံစိတ်ချရမှုရှိစေရေး၊ ကုန်စည်များပေါ်တွင် ကုန်အညွှန်းအမှတ်အသားပြည့်စုံစွာ ဖော်ပြပါရှိစေနိုင်ရေးတို့အတွက် ဈေးကွက်စောင့်ကြည့်စစ်ဆေးခြင်းလုပ်ငန်းများကို ဦးစားပေးကုန်စည်များ သတ်မှတ်ဆောင်ရွက်လျက်ရှိကြောင်းသိရှိရပါသည်။

DOCA(မွန်)

    စားသုံးသူရေးရာဦးစီးဌာန၊ မုဒုံမြို့နယ်တာဝန်ခံသည်    (၂၁-၃-၂၀၂၄) ရက်နေ့တွင် မုဒုံမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံးရှိ လူထုအခြေပြုဗဟိုဌာန Community Centre ခန်းမတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် စားသုံးသူရေးရာဦးစီးဌာနတို့ပူးပေါင်း၍ ကမ္ဘာ့စားသုံးသူအခွင့်အရေးများနေ့အကြောင်း သိကောင်းစရာ Talk Show ကျင်းပပြုလုပ်ခဲ့သည်။

      ပထမဦးစွာ မုဒုံမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးအရာရှိ ဒေါ်မိုးမိုးစန္ဒာထွန်းက Talk Show ကျင်းပရခြင်း၏ရည်ရွယ်ချက်ကို ရှင်းလင်းဆွေးနွေးခဲ့ပြီး စားသုံးသူရေးရာဦးစီးဌာန၊ မုဒုံမြို့နယ်တာဝန်ခံ ဦးညီလွင်အေးက ကမ္ဘာ့စားသုံးသူအခွင့်အရေးများနေ့ပေါ်ပေါက်လာပုံအကြောင်း၊ ကမ္ဘာ့စားသုံးသူအခွင့်အရေးများနေ့အခမ်းအနားကို ကျင်းပပြုလုပ်ရခြင်း၏ ရည်ရွယ်ချက်၊ မြန်မာနိုင်ငံတွင် “ကမ္ဘာ့စားသုံးသူအခွင့်အရေးများနေ့” အထိမ်းအမှတ်အခမ်းအနားများကျင်းပနေမှုအခြေအနေများအကြောင်း၊ အာဆီယံနိုင်ငံများနှင့် ပူးပေါင်းဆောင်ရွက်မှုအခြေအနေများနှင့် စားသုံးသူကာကွယ်ရေးဥပဒေပြဋ္ဌာန်းမှုအခြေအနေများအကြောင်းကို ရှင်းလင်းဆွေးနွေးခဲ့ကြောင်း သတင်းရရှိပါသည်။

DOCA(မွန်)

      စားသုံးသူရေးရာဦးစီးဌာန၊ ကျိုက်ထိုမြို့နယ်တာဝန်ခံနှင့် ဝန်ထမ်းများသည်   (၂၀-၃-၂၀၂၄) ရက်နေ့တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ ကျိုက်ထိုမြို့၊ စည်ပင်သာယာမြို့မဈေး၌ ဈေးကွက်စောင့်ကြည့်စစ်ဆေးခြင်းဆောင်ရွက်ခဲ့ကြပါသည်။         

      ထိုသို့ဈေးကွက်စောင့်ကြည့်စစ်ဆေးရာတွင် စည်ပင်သာယာမြို့မဈေးအတွင်း ရောင်းချနေသောကုန်စည်များမှာ စားသုံးသူများအတွက် ဘေးအန္တရာယ်ကင်းရှင်းမှုရှိ/မရှိစစ်ဆေးခဲ့ပြီး စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ပြီး ဌာနအနေဖြင့် ပြည်သူများ နေ့စဉ်စားသောက်အသုံးပြုနေသော ကုန်စည်များ၊ စားသောက်ကုန်များကို ဘေးအန္တရာယ်ကင်းရှင်းစွာအသုံးပြုနိုင်ရေး၊ စားသုံးသူအခွင့်အရေးအပြည့်အဝရရှိစေရေးတို့အတွက် ဈေးကွက်စောင့်ကြည့်စစ်ဆေးခြင်းများကို မြို့နယ်အလိုက် ဆောင်ရွက်လျက်ရှိကြောင်းသိရှိရပါသည်။

DOCA(မွန်)