သတင်းနှင့် လှုပ်ရှားမှုများ

         ကချင်ပြည်နယ် စားသုံးသူရေးရာဦးစီးဌာနမှ စစ်ဆေးရေးမှူးအဖွဲ့သည် ၂၁.၈.၂၀၂၀ ရက်နေ့တွင် ကချင်ပြည်နယ်၊ မြစ်ကြီးနားမြို့ပေါ်ရှိ အလှကုန်ပစ္စည်းအရောင်းဆိုင်များ၌ ပြည်တွင်းပြည်ပမှ ထုတ်လုပ်တင်သွင်းဖြန့်ဖြူးရောင်းချနေသော အလှကုန်များတွင် ကုန်အညွှန်း အမှတ်အသား ဖော်ပြခြင်းနှင့်စပ်လျဉ်း၍ မြန်မာဘာသာဖြင့်ဖြစ်စေ ၊ မြန်မာဘာသာနှင့် အခြား ဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ဖော်ပြခြင်းနှင့်ပတ်သက်၍ ဆောင်ရွက်ထားရှိမှု ရှိ/မရှိ ကွင်းဆင်းစစ်ဆေးခဲ့ရပါသည်။

    ထို့နောက် COVID-19 ကာကွယ်၊ ထိန်းချုပ်၊ ကုသရေးဆိုင်ရာ ကျန်းမာရေး အထောက်အကူပစ္စည်းများ၊ ဆေးဝါးများနှင့် စားသောက်ကုန်ပစ္စည်းများကို အရေးကြီးကုန်စည်(၃)မျိုးအဖြစ် သတ်မှတ်သည့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ အမိန့်ကြော်ငြာ စာအမှတ်၊ ၂၁/၂၀၂၀ အရ ကချင်ပြည်နယ် စားသုံးသူရေးရာဦးစီးဌာနမှ စစ်ဆေးရေးမှူးများသည် ၂၄.၈.၂၀၂၀ ရက်နေ့နှင့် ၂၅.၈.၂၀၂၀ ရက်နေ့တွင် မြစ်ကြီးနားမြို့နယ်၊ ဝိုင်းမော်မြို့နယ်၊ မိုးညှင်းမြို့နယ်နှင့် ဗန်းမော်မြို့နယ်တို့ရှိ အရောင်းဆိုင်များ၊ ဆေးနှင့် ဆေးပစ္စည်းဆိုင်များ၌ ဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်းနှင့် ဈေးကစား ရန် သိုလှောင်ခြင်း ရှိ/မရှိကို ကွင်းဆင်းဆောင်ရွက်ခဲ့ကြောင်း သတင်းရရှိပါသည်။

ကချင်ပြည်နယ်

စားသုံးသူရေးရာဦးစီးဌာန

      စစ်ကိုင်းတိုင်းဒေသကြီး စားသုံးသူရေးရာကော်မတီ၏ တတိယအကြိမ်မြောက် လုပ်ငန်းညှိနှိုင်းအစည်းအဝေးကို ဩဂုတ်လ ၁၉ ရက်နေ့ နေ့လယ် ၂ နာရီ အချိန်တွင် စစ်ကိုင်းတိုင်းဒေသကြီး၊ တိုင်းဒေသကြီးအစိုးရအဖွဲ့၊ စီမံကိန်းနှင့်ဘဏ္ဍာရေးဝန်ကြီးရုံး အစည်းအဝေးခန်းမ၌ ကျင်းပခဲ့ရာ  စားသုံးသူရေးရာကော်မတီဥက္ကဌနှင့်တကွ ကော်မတီဝင်များ၊ မိတ်ဖက်ဌာနဆိုင်ရာများ၊ တိုင်းဒေသကြီး စားသုံးသူရေးရာဦးစီးဌာနမှ တာဝန်ရှိသူများ တက်ရောက်ခဲ့ကြပါသည်။

        အဆိုပါအစည်းအဝေးတွင် တိုင်းဒေသကြီး စားသုံးသူရေးရာကော်မတီဥက္ကဌ၊ စီမံကိန်းနှင့် ဘဏ္ဍာရေးဝန်ကြီး ဦးစိုးဦးက အဖွင့်အမှာစကားပြောကြားပြီးနောက် ကော်မတီအတွင်းရေးမှူး ဦးခင်မောင်လှိုင် (ညွှန်ကြားရေးမှူး) က စစ်ကိုင်းတိုင်းဒေသကြီး စားသုံးသူရေးရာကော်မတီ ဖွဲ့စည်းထားရှိမှု အခြေအနေများ၊ မိတ်ဖက်ဌာနဆိုင်ရာများ နှင့်ပူးပေါင်းညှိနှိုင်းပြီး စားသုံးသူကာကွယ်ရေးလုပ်ငန်းများ ဆောင်ရွက်နိုင်ခဲ့မှု အခြေအနေများကို ရှင်းလင်းဆွေးနွေးတင်ပြခဲ့ပါသည်။ ဆက်လက်၍ အတွင်းရေးမှူးက ကုန်စည်များတွင် ကုန်အညွှန်းအမှတ်အသားများ ပြည့်စုံစွာပါရှိစေရေး၊ စစ်ကိုင်းတိုင်း‌ဒေသကြီး၏ တစ်နှစ်တာကာလအတွင်း ဦးစားပေးဆောင်ရွက်ရမည့် ကုန်စည်အမယ်(၁၀)မျိုးနှင့်ပတ်သက်၍ မိမိတိုင်းဒေသကြီးအတွင်းသို့ အခြားတိုင်းဒေသကြီး/ပြည်နယ်များမှ ကုန်အညွှန်းအမှတ်အသား မပြည့်စုံသည့် ကုန်စည်များ ဝင်ရောက်လာပါက အရေးယူဆောင်ရွက်နိုင်ရေးအတွက် တိုင်းဒေသကြီးကော်မတီ အချင်းချင်းချိတ်ဆက်ဆောင်ရွက်သွားမည့် အစီအမံများအား ရှင်းလင်းဆွေးနွေး တင်ပြခဲ့ပါသည်။  

    ထို့နောက် တိုင်းဒေသကြီးစားသောက်ကုန် ထုတ်လုပ်တင်ပို့ ရောင်းချသူများအသင်း ဖွဲ့စည်းနိုင်ရေးကိစ္စရပ်များ ၂၀၁၉-၂၀၂၀ ဘဏ္ဍာရေးနှစ် အောက်တိုဘာလမှ ဩဂုတ်လအတွင်း စားသုံးသူကာကွယ်ရေးလုပ်ငန်းများ ဆောင်ရွက်နိုင်မှုအခြေအနေများကို ရှင်းလင်းဆွေးနွေးကာ တိုင်ကြားမှုများနှင့်ပတ်သက်၍ ဥပဒေနှင့်အညီ ညှိနှိုင်းဖြေရှင်းဆောင်ရွက်ခဲ့မှုများအား ကော်မတီမှ အတည်ပြုမှတ်တမ်းတင်ရန်ဆုံးဖြတ်ခဲ့ကြပါသည်။

          ဆက်လက်၍ ကော်မတီဥက္ကဌ စီမံကိန်းနှင့်ဘဏ္ဍာရေးဝန်ကြီး ဦးစိုးဦးက ယနေ့အချိန် သည် နိုင်ငံနှင့်အဝှမ်း ခေတ်မီဖွံ့ဖြိုးတိုးတက်လာသည်နှင့်အမျှ ပြည်သူများ၏ နေထိုင် စားသောက်မှုပုံစံများကလည်း ခေတ်နဲ့အညီလျှင်မြန်စွာ ပြောင်းလဲလာပါကြောင်း၊ လုံခြုံစိတ်ချရမှုမရှိသော စားသောက်ကုန်၊ လူသုံးကုန်ပစ္စည်းများလည်း ပေါများလာသောကြောင့် ပြည်သူများအနေဖြင့် မိမိတို့အခွင့်အရေးများအား သိရှိကာ ဘေးဥပဒ်အန္တရာယ်ကင်းရှင်းသော ကုန်စည်များကို ရွေးချယ်ဝယ်ယူတတ်ရန်လိုအပ်ပါကြောင်း၊ စားသုံးသူပြည်သူများ၏ အခွင့်အရေးများ အပြည့်အဝရရှိစေရေး လုံခြုံစိတ်ချရမှုမရှိသော ကုန်စည်နှင့် တာဝန်ယူမှု မရှိသော ဝန်ဆောင်မှုများ လျော့နည်းပပျောက်သွားစေရေးအတွက် မိမိတို့ အစိုးရအဖွဲ့နှင့် တက်ရောက်လာကြသော ကော်မတီအဖွဲ့ဝင်များက အမျိုးသားရေးတာဝန်တစ်ရပ်အနေဖြင့် ဝိုင်းဝန်းပူးပေါင်း ဆောင်ရွက်သွားကြရမည်ဖြစ်ကြောင်း တိုက်တွန်းပြောကြားခဲ့ပါသည်။

 စစ်ကိုင်းတိုင်းဒေသကြီး

စားသုံးသူရေးရာဦးစီးဌာန

         ဧရာဝတီတိုင်းဒေသကြီး၊ အသေးစားစက်မှုလက်မှုလုပ်ငန်းဦးစီးဌာနနှင့် စားသုံးသူရေးရာဦးစီးဌာနတို့ပူးပေါင်း၍ စားသုံးသူရေးရာဦးစီးဌာန၊ တိုင်းဒေသကြီး ဦးစီးမှူးရုံးတွင် Covid-19 ကာလအလွန် စီးပွားရေးပြန်လည်ကုစားရေး အစီအစဉ်အရ အလုပ် အကိုင်အခွင့်အလမ်းဖော်ဆောင်ပေးခြင်းနှင့် အသက်မွေးဝမ်းကြောင်းဆိုင်ရာ လူသုံးကုန်လက် တွေ့လုပ်ငန်းခွင်သင်တန်း အမှတ်စဉ် (၇/၂၀၂၀) သင်တန်းကို (၁၈.၈.၂၀၂၀) ရက်နေ့တွင် ဖွင့်လှစ်ခဲ့ပါသည်။

         သင်တန်းတွင် စားသုံးသူရေးရာဦးစီးဌာန၊ တိုင်းဒေသကြီး ဦးစီးမှူး ဦးစိုးအောင် က သင်တန်းဖွင့် အမှာစကားပြောကြား၍ အသေးစားစက်မှုလက်မှုလုပ်ငန်းဦးစီးဌာနမှ တိုင်းဦး စီးမှူး ဦးစိုးနိုင်ထူးက သင်တန်းဖွင့်လှစ်ရခြင်း၏ ရည်ရွယ်ချက်နှင့် သင်ကြားပေးမည့် ဘာသာ ရပ်များဖြစ်သော လက်သန့်ဆေးရည်၊ ဆပ်ပြာရည်နှင့် Hand Gel ပြုလုပ်နည်းများကို ဈေးကွက် အတွင်း တင်ပို့ရောင်းချနိုင်သည်အထိ စာတွေ့၊ လက်တွေ့ သင်ကြားပေးသွားမည် ဖြစ်ကြောင်း ပြောကြားခဲ့ပါသည်။

          အဆိုပါသင်တန်းသို့ ဌာနဆိုင်ရာများ၊ သင်တန်းနည်းပြများ သင်တန်းသား၊ သင်တန်းသူများ တက်ရောက်ခဲ့ပြီး သင်တန်းကာလ ၆ ရက်ကြာမြင့်မည်ဖြစ်ကြောင်း သိရှိရပါသည်။

ဧရာဝတီတိုင်းဒေသကြီး
စားသုံးသူရေးရာဦးစီးဌာန

       ကချင်ပြည်နယ် စားသုံးသူရေးရာဦးစီးဌာနသည် စားသုံးသူများလုံခြုံစိတ်ချရမှုရှိစေရန်ဟူသော  မျှော်မှန်းချက်ကို အကောင်အထည်ဖော်ဆောင်ရွက်လျက်ရှိရာ စစ်ဆေးရေးမှူးများသည် တိုင်ကြားလာမှုအပေါ် စုံစမ်းစစ်ဆေးရန်၊ ဈေးကွက် စောင့်ကြည့်စုံစမ်းစစ်ဆေးရေးလုပ်ငန်းများကို ထိထိရောက်ရောက် အကောင်အထည်ဖော်နိုင်ရေးဆောင်ရွက်ရာတွင် ကျွမ်းကျင်ပိုင်နိုင်စွာ ဆောင်ရွက်တတ်စေရန်နှင့် စစ်ဆေးရေးမှူးလုပ်ငန်း တာဝန်များကို စားသုံးသူကာကွယ်ရေးဥပဒေနှင့်အညီ ဆောင်ရွက်နိုင်စေရန်ရည်ရွယ်၍ စစ်ဆေးရေးမှူးများ လုပ်ငန်းကျွမ်းကျင်မှုဆိုင်ရာသင်တန်းကို ပြည်နယ်ဦးစီးမှူးရုံး၌ ၂၀-၈-၂၀၂၀ ရက်နေ့တွင် ဖွင့်လှစ်ခဲ့ပါသည်။

           အဆိုပါသင်တန်း၌ ပြည်နယ်ဦးစီးမှူး ဦးကိုကိုဦး က အဖွင့်အမှာစကား ပြောကြားပြီး စစ်ဆေးရေးအရာရှိများ၏ လုပ်ငန်းတာဝန်များအကြောင်း၊ ကွင်းဆင်းဆောင်ရွက်ရာတွင် သတိရပြုရမည့်အချက်များအကြောင်း၊ လိုက်နာဆောင်ရွက်ရန်အချက်တို့ကို ရှင်းလင်းဆွေးနွေးပို့ချခဲ့ပါသည်။ ဆက်လက်၍ ဒုတိယပြည်နယ်ဦးစီးမှူးက စစ်ဆေးရေးမှူးများသည် ကွင်းဆင်းဆောင်ရွက်သည့်အခါ စားသုံးသူကာကွယ်ရေးဥပဒေပါအတိုင်း လိုက်နာဆောင်ရွက်ရမည့် ဈေးကွက်စောင့်ကြည့်စစ်ဆေးခြင်း၊ ထုတ်ကုန်လုံခြုံစိတ်ချရမှုဆောင်ရွက်ခြင်းများ၊ သိသင့်သိထိုက်သည့် ပြင်ပဗဟုသုတအကြောင်းတို့ကို ရှင်းလင်းပို့ချပြီး စစ်ဆေးရေးမှူးများနှင့် လက်တွေ့ကွင်းဆင်းဆောင်ရွက်ရသည့်အခါ ရင်ဆိုင်ကြုံတွေ့ရသည့် အခက်အခဲများ ၊ အတွေ့အကြုံများကို အပြန်အလှန် ဆွေးနွေးကြပါသည်။

       စစ်ဆေးရေးမှူးများ လုပ်ငန်းကျွမ်းကျင်မှုဆိုင်ရာသင်တန်းကို ၂၀-၈-၂၀၂၀ ရက် နေ့မှ ၂၁-၈-၂၀၂၀ ရက်နေ့ထိ သင်ခန်းစာခေါင်းစဉ်အလိုက် ဆွေးနွေးပို့ချခဲ့ပြီး အဆိုပါသင်တန်းကို မြစ်ကြီးနားခရိုင် ၊ ဗန်းမော်ခရိုင်နှင့် မိုးညှင်းခရိုင်တို့မှ စစ်ဆေးရေးမှူး စုစုပေါင်း(၁၀) ဦး တက်ရောက်ခဲ့ကြပါသည်။

ကချင်ပြည်နယ်

စားသုံးသူရေးရာဦးစီးဌာန