သတင်းနှင့် လှုပ်ရှားမှုများ

          ရှမ်းပြည်နယ်(အရှေ့ပိုင်း)၊ ကျိုင်းတုံမြို့၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီး မှူးရုံးအနေဖြင့် ဒေသတွင်းရှိ တစ်ပိုင်တစ်နိုင် ထုတ်လုပ်၊ ရောင်းချသည့်လုပ်ငန်းရှင်များအား အသေးစားစက်မှုလက်မှုလုပ်ငန်းဦးစီးဌာန ထောက်ခံချက်ရရှိရေး ကြားခံဝန်ဆောင်မှုဖြင့် ကူညီ ဆောင်ရွက်ပေးလျက်ရှိရာ  (၁၈.၁.၂၀၂၂)ရက်နေ့(၁၄:၀၀)နာရီအချိန်တွင် “Honey” တံဆိပ်အမည် ဖြင့် ကိတ်နှင့် မုန့်မျိုးစုံ ထုတ်လုပ်ရောင်းချသည့်လုပ်ငန်းရှင်က စားသုံးသူရေးရာဦးစီးဌာန၊ ဒုတိယ ပြည်နယ်ဦးစီးမှူးရုံးသို့ သက်ဆိုင်ရာဌာန၏အသိအမှတ်ပြုထောက်ခံချက်ရရှိရေး ချိတ်ဆက်ဆောင် ရွက်ပေးပါရန် လာရောက်အကူအညီတောင်းခံလာသဖြင့်  ဒုတိယပြည်နယ်ဦးစီးမှူးနှင့် တာဝန်ရှိသူ များသည် လုပ်ငန်းရှင်နှင့်တွေ့ဆုံပြီး လိုအပ်သောစာရွက်စာတမ်း၊ အထောက်အထားများပြည့်စုံမှန် ကန်စေရေး ထုတ်လုပ်ရောင်းချမှုအခြေအနေနှင့် လုပ်ငန်းဆောင်ရွက်ချက်များအား ဦးစွာမေးမြန်း ကြပါသည်။

          ဒုတိယပြည်နယ်ဦးစီးမှူးနှင့်တာဝန်ရှိသူများသည် စားသုံးသူရေးရာဦးစီးဌာနမှ ချမှတ်ထား သော စားသုံးသူကာကွယ်ရေးဥပဒေ ၂၀၁၉၊ အခန်း(၁၈) ကုန်အညွှန်းအမှတ်အသားဖော်ပြခြင်းနှင့် စပ်လျဉ်းသည့် အချက်အလက်များ ပြည့်စုံစွာဖော်ပြနိုင်ရေး၊ ထုတ်ကုန်လုံခြုံစိတ်ချရမှုရှိစေရေး အတွက် ထုတ်လုပ်မှုအဆင့်ဆင့်တွင် သန့်ရှင်းမှုရှိစေရေး၊ သတ်မှတ်ထားသည့် လုပ်ထုံးလုပ်နည်း နှင့်အညီ လိုက်နာဆောင်ရွက်နိုင်ရေးတို့ကို လုပ်ငန်းရှင်အနေဖြင့် သိရှိလိုက်နာဆောင်ရွက်နိုင်ရန် ရှင်းလင်းပြောကြားခဲ့ပါသည်။ ထို့နောက် ကုန်အညွှန်းအမှတ်အသားဖော်ပြခြင်းနှင့်စပ်လျဉ်းသည့် လက်ကမ်း စာစောင်များပေးဝေ၍ ဝန်ဆောင်မှုအနေဖြင့် သက်ဆိုင်ရာဌာန၏အသိအမှတ်ပြုထောက်ခံချက်ရရှိ ရေးအတွက် ဆက်လက်ကူညီဆောင်ရွက်ပေးနိုင်ခဲ့ပါသည်။

           ဒေသတွင်း ထုတ်လုပ်ရောင်းချသည့် SMEs လုပ်ငန်းရှင်များအား အသိပညာပေးဆွေးနွေး ခြင်းဖြင့် စားသုံးသူများအနေဖြင့် ဘေးကင်းလုံခြုံသော ကုန်ပစ္စည်းများကို ဝယ်ယူစားသုံးနိုင်မည် ဖြစ်ပါသည်။ လုပ်ငန်းရှင်များအနေဖြင့်လည်း ဖြန့်ဖြူးရောင်းချမှုအပိုင်းတွင် ကုန်အညွှန်းအမှတ် အသားသတ်မှတ်ချက်များကို ပြည့်စုံစွာထည့်သွင်းဖော်ပြလာမှုရှိလာမည်ဖြစ်ပြီး ထုတ်လုပ်မှုအပိုင်း တွင် အရည်အသွေးပြည့်မီ၍ ဘေးအန္တရာယ်ကင်းရှင်းသော ကုန်စည်များကို ထုတ်လုပ်လာနိုင် မည်ဖြစ်သည့်အပြင် မိမိတို့ဒေသတွင်းစားသုံးမှုသာမက အခြားဒေသများသို့လည်း အဆင့်ဆင့်ပိုမို တင်ပို့ရောင်းချနိုင်မည်ဖြစ်ပါ၍ SMEs လုပ်ငန်းရှင်များအား တစ်ဖက်တစ်လမ်းမှ ကူညီဆောင်ရွက် ပေးခြင်းဖြင့် နိုင်ငံတော်ဖွံ့ဖြိုးတိုးတက်ရေးအတွက် အထောက်အကူပြုနိုင်မည်ဖြစ်ပါကြောင်း ရေးသားတင်ပြလိုက်ပါသည်။

စားသုံးသူရေးရာဦးစီးဌာန(ရှမ်းပြည်နယ်)

            ၁၄.၁.၂၀၂၂ ရက်နေ့၊နေ့လည်(၁:၀၀)နာရီတွင် စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူးဦးဆောင်ပြီး ဝန်ထမ်းသုံးဦးပါဝင်သောအဖွဲ့နှင့် စစ်ကိုင်းတိုင်းဒေသကြီး အသေးစားစက်မှုလက်မှုလုပ်ငန်းဦးစီးဌာနတွင် ဖွင့်လှစ်ပို့ချပေးသော တန်ဖိုးမြှင့်စားသောက်ကုန်ထုတ်လုပ်မှုနည်းပညာသင်တန်း၊ အမှတ်စဉ် (၅/၂၀၂၂) သို့ စားသုံးသူကာကွယ်ရေးဆိုင်ရာ အသိပညာပေးဟောပြောပွဲ ကျင်းပပြုလုပ်ခဲ့ပါသည်။

            ဟောပြောဆွေးနွေးပွဲတွင် ခရိုင်ဦးစီးမှူးက တက်ရောက်နေသော သင်တန်းသူ/သားများအား ဦးစွာမိတ်ဆက်ပြီး စားသုံးသူရေးရာဦးစီးဌာနအမည်ကို အစားအသောက်နှင့် ဆေးဝါးကွပ်ကဲရေးဦးစီးဌာန (FDA) နှင့် မှားယွင်းသိနေကြ၍ ၎င်းဦးစီးဌာနနှစ်ခုအကြောင်းကို ကွဲပြားအောင်ရှင်းလင်း ဆွေးနွေးလိုသဖြင့် စားသုံးသူကာကွယ်ရေးဆိုင်ရာ ဗဟုသုတများမပြောကြားခင် DOCA နှင့် FDAတို့၏ ဝန်ကြီးဌာန တိုင်းအဆင့်/ခရိုင်-မြို့နယ်အဆင့် ရည်မှန်းချက်များ၊ ဌာနနှစ်ခုတွင် အသုံးပြုကျင့်သုံးနေသည့် ဥပဒေအမည်များနှင့် ပြည်သူကို ဝန်ဆောင်မှုပေးနေသည့် လုပ်ငန်းများအကြောင်း သင်တန်းသူ/ သားများအား ယှဉ်တွဲပြောပြပြီး ရှင်းလင်းဆွေးနွေးပြောကြားခဲ့ပါသည်။

         ဆက်လက်၍ မိမိတို့ဦးစီးဌာနတွင် ကျင့်သုံးနေသော စားသုံးသူကာကွယ်ရေးဥပဒေကို ၂၀၁၉ ခုနှစ် မတ်လ ၁၅ ရက်နေ့တွင် ပြည်ထောင်စုလွှတ်တော်ဥပဒေအမှတ် ၉။ ဖြင့် အတည်ပြုထုတ်ပြန်ခဲ့ကြောင်း ယခုသင်တန်းသား/သူများတွင် အချို့က သင်တန်းပြီးလျှင် ကိုယ်ပိုင်လုပ်ငန်းများ လုပ်ကိုင် ကြမည့်သူများ ပါဝင်သဖြင့် စားသုံးသူကာကွယ်ရေးဥပဒေအခန်း (၁၀)တွင် ပါဝင်သော စီးပွားရေး လုပ်ငန်းရှင်၏တာဝန်များ၊ အခန်း(၁၈) ကုန်အညွှန်းအမှတ်အသားဖော်ပြခြင်းများနှင့် စပ်လျဉ်း၍ လိုက်နာရမည့်အချက်များကို မြန်မာနိုင်ငံစားသုံးသူကာကွယ်ရေးကော်မရှင်၏ ၂၀၁၉ ခုနှစ်၊ ဒီဇင်ဘာလ ၃ ရက်တွင် ထုတ်ပြန်ထားသော ညွှန်ကြားချက်အမှတ် (၂/၂၀၁၉)ဖြင့် အသေးစိတ်ရှင်းလင်းပြောကြား ပြီး ဥပဒေပါတားမြစ်ချက်နှင့် ပြစ်မှုပြစ်ဒဏ်များအကြောင်း ဆွေးနွေးပြောကြားခဲ့ပါသည်။ ထို့နောက် သင်တန်းသူ/သားများအား လက်ရှိသင်တန်းဆင်းပြီးသွားလျှင် စီးပွားရေးလုပ်ငန်းလုပ်ကိုင်ကြမည်ဖြစ်၍ လုပ်ငန်းရှင်ဟု မြင်သာအောင်ဆွေးနွေးပြောကြားခဲ့သော်လည်း တစ်ဖက်ကကြည့်လျှင် စားသုံးသူများဖြစ်ကြောင်း၊ ပြည်သူများသည် စားသုံးသူများဖြစ်သည့်အတွက် စားသုံးသူတိုင်းတွင် စားသုံးသူအခွင့်အရေးများရှိကြောင်းနှင့် စားသုံးသူအခွင့်အရေး(၈)ရပ်ကို မြင်သာအောင် ရှင်းလင်းဆွေးနွေးခဲ့ပြီး ယင်းအခွင့်အ‌ရေးများ နစ်နာဆုံးရှုံးခဲ့ပါက စားသုံးသူရေးရာဦးစီးဌာန တိုင်းနှင့်ပြည်နယ်များရှိ စားသုံးသူသတင်းပြန်ကြားရေးနှင့် တိုင်ကြားမှုလက်ခံရေးစင်တာ (CICC) များတွင် တိုင်ကြားနိုင်ကြောင်းနှင့် တိုင်ကြားနိုင်သည့် နည်းလမ်းများကို အသေးစိတ်ဆွေးနွေးပြောကြားခဲ့ပြီး သင်တန်းသူ/ သားများကလည်း သိလိုသည်များ အပြန်အလှန်ဆွေးနွေး ပြောကြားခဲ့ပါသည်။

စားသုံးသူရေးရာဦးစီးဌာန

စစ်ကိုင်းတိုင်းဒေသကြီး

            ကရင်ပြည်နယ် ဘားအံမြို့၊ ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနတွင် ကုန်အညွှန်းအမှတ်အသားဆိုင်ရာ အသိပညာပေးဆွေးနွေးပွဲ Talk Show ကို ၂၀၂၂ခုနှစ်၊ ဇန်နဝါရီ ၁၉ ရက်နေ့ နံနက် (၁၀:၂၀) နာရီအချိန်တွင် ကျင်းပပြုလုပ်ခဲ့ကြောင်း သိရပါသည်။

            ရှေးဦးစွာ ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ခရိုင်ဦးစီးမှူး ဒေါ်စိုးစိုးအေးက Talk Show ကျင်းပပြုလုပ်ရခြင်း၏ရည်ရွယ်ချက်အား ရှင်းလင်းပြောကြားခဲ့ပါသည်။

          ဆွေးနွေးပွဲတွင် စားသုံးသူရေးရာဦးစီးဌာနမှ  ပြည်နယ်ဦးစီးမှူး ဦးသန်းဦးက ဌာန၏ မျှော်မှန်းချက်ဖြစ်သော “စားသုံးသူများလုံခြုံစိတ်ချရမှုရှိစေရန်”နှင့် ရည်မှန်းချက်ဖြစ်သော  (၁) စားသုံးသူအခွင့်အရေးနှင့် စားသုံးသူအကျိုးစီးပွားကာကွယ်ရေးဆောင်ရွက်ရန်၊ (၂)ထုတ်ကုန်များ လုံခြုံစိတ်ချရမှုရှိစေရေးဆောင်ရွက်ရန်၊ (၃) ကုန်စည်နှင့်ဝန်ဆောင်မှုများ၏ အရည်အသွေးစီမံခန့်ခွဲမှုနှင့် သုတေသနဖွံ့ဖြိုးရေးလုပ်ငန်းများဆောင်ရွက်ရန်၊ (၄) ပြည်တွင်းကုန်သွယ်ရေးဖွံ့ဖြိုးမှုနှင့် သုတေသနလုပ်ငန်းများဆောင်ရွက်ရန် ရှင်းလင်း‌ဆွေးနွေးခဲ့ပြီး စားသုံးသူကာကွယ်ရေး ဉပဒေကို မြန်မာနိုင်ငံ၌ ၂၀၁၄ ခုနှစ်၊ မတ်လ ၁၄ ရက်နေ့တွင် ပထမဦးဆုံးအကြိမ် စတင်ပြဌာန်းခဲ့ပြီး စတင်ပြဌာန်းခဲ့သည့် အချိန်မှစ၍ လိုအပ်ချက်များတွေ့ရှိရပြီး ထုတ်ကုန်လုံခြုံ စိတ်ချရမှုဆိုင်ရာ အားနည်းနေသည်ကို ပြင်ဆင်ပြီး ၂၀၂၀ ပြည့်နှစ် မတ်လ ၁၅ ရက်နေ့တွင် စားသုံးသူကာကွယ်ရေးဉပဒေအသစ်ကို ပြန်လည်ပြင်ဆင် ပြဌာန်းခဲ့ပါကြောင်း ဆွေးနွေးခဲ့ပါသည်။  

          ဆက်လက်၍ စားသုံးသူများထိခိုက်နစ်နာမှုမရှိစေရန်အတွက် စားသုံးသူများ၏ အခွင့်အရေးအပြည့်အဝရရှိစေရန် စီးပွားရေးလုပ်ငန်းရှင်များ လိုက်နာဆောင်ရွက်ရမည့် အချက်များဖြစ်သော စားသုံးသူကာကွယ်ရေးဥပဒေ အခန်း(၁၈)၊ ပုဒ်မ(၄၃)အရ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်များပေါ်တွင် မြန်မာဘာသာဖြင့် ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ဖော်ပြရမည်ဖြစ်ကြောင်းနှင့် ကုန်စည်များပေါ်တွင် အဓိကပါဝင်ရမည်အချက်များမှာ ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာရေးဆိုင်ရာ ဘေးထွက်ဆိုးကျိုး၊ ဓာတ်မတည့်ကြောင်းဖော်ပြချက်၊ ကြိုတင်သတိပေးချက်များ ပါဝင်ရမည်ဖြစ်ကြောင်း အကျယ်တဝင့် ဟောပြောဆွေးနွေးခဲ့ကြောင်း သိရှိရပါသည်။

        ထို့နောက် ထားသိုသိမ်းဆည်းမှုအညွှန်းနှင့် ပတ်သက်၍ မလိုက်နာသည့်အတွက် ဖြစ်ပေါ်လာမည့် မှိုဆိပ် ( Aflatoxins) အကြောင်းနှင့် ပြည်တွင်းကုန်သွယ်မှု ဖွံ့ဖြိုးတိုးတက်စေရန်အတွက် သိရှိစေရန် အသိပညာပေးများကို နောက်လများတွင် ဆွေးနွေးဆောင်ရွက်သွားမည်ဖြစ်ပါကြောင်း ပြောကြားခဲ့ပြီး ထုတ်လုပ်မှုအစီအစဉ်အား (၁၀:၅၀)အချိန်တွင် ပြီးမြောက်ခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန

ကရင်ပြည်နယ်

      ပြောင်းလဲလာတဲ့ခေတ်စနစ်အရ  နေ့စဉ်နေထိုင်စားသောက်ဖို့ ချက်ပြုတ်မှုတွေ အတွက် အချိန်မပေးနိုင်သူတွေ၊ အလုပ်ပင်ပန်းနွမ်းနယ်မှုတွေအပြင် အိမ်အလုပ်ကြောင့် ဝန်ပိနေတဲ့ အိမ်ရှင်မတွေအတွက်တော့ အသင့်စားစားသောက်ကုန် (Ready To Eat)  တွေဟာ အဆင်ပြေ လွယ်ကူစေတဲ့ လက်စွဲကုန်စည်တွေဖြစ်လာပါတယ်၊ ယခင်ကတော့ (Ready To Eat) ကုန်စည် ဆိုရင် စည်သွပ်ဗူး၊ ဘာလချောင်ကြော်နဲ့ ငါးရံ့ခြောက်မီးကင် အစရှိတာတွေလောက်သာရှိခဲ့ပေမဲ့  ယခုဆိုရင်တော့  ချဉ်ပေါင်ကြော်၊ ငါးပိရည်၊ တို့စရာ မှအစ အသီးအနှံမျိုးစုံအထိကို  (Ready To Eat) အသင့်စား စားသောက်ကုန်အဖြစ် တွေ့ရှိလာ ရပြီး အမှတ်တံဆိပ်မျိုးစုံနဲ့ ဈေးကွက်မှာ နေရာယူလာပြီ ဖြစ်ပါတယ်၊ (Ready To Eat) ကုန်စည်တွေဟာ အချိန်နဲ့ လူပင်ပန်းမှုသက်သာစေတဲ့ ကုန်စည် တွေဖြစ်လို့ အလုပ်ချိန် များပြားလွန်းတဲ့သူတွေ အထူးသဖြင့် အလုပ်တဖက်နဲ့ အိမ်ရှင်မတွေအတွက် အားထားစရာဖြစ်လာပါတော့တယ်၊ ဈေးကွက်ဝယ်လိုအားများပြားလာတာနဲ့အညီ ထုတ်လုပ်သူ တွေကလဲ (Ready To Eat) ကုန်စည်အမျိုးမျိုးကို အမှတ်တံဆိပ်အမျိုးမျိုးနဲ့ ထုတ်လုပ်လာကြပါတယ်၊ ဒီလိုထုတ်လုပ်မှုများပြားလာတဲ့ ကုန်စည်အမှတ်တံဆိပ်တွေ ထဲကမှ ဘေးကင်းပြီးစိတ်ချရတဲ့ကုန်စည်တွေကို ရွေးချယ်ဝယ်ယူစားသုံး တတ်ဖို့ကလည်း လွန်စွာ အရေးကြီးတဲ့အခန်းကဏ္ဍဖြစ်လာပါတယ်။ ဒီတော့ဘယ်လိုအချက်အလက်တွေ ပါတဲ့ (Ready To Eat) ကုန်စည်ကို ဝယ်ယူအသုံးပြုရမလဲဆိုတာကို စားသုံးသူတွေ သိထားဖို့ရာ လိုအပ်ပါတယ်၊ (Ready To Eat) ကုန်စည်တွေမှာ သက်တမ်း ကြာကြာ ထားလို့ရတဲ့ကုန်စည်တွေရှိသလို သက်တမ်းကြာကြာထားမရတဲ့ကုန်စည်တွေလဲ ရှိတဲ့ အတွက် သက်တမ်းဖော်ပြမှုပါဝင်ဖို့အလွန်အရေးကြီးပါတယ်၊ ဘယ်နေ့ဘယ်ရက်က စတင်ထုတ်လုပ်ထားတယ် ဘယ်နေ့ဘယ်ရက်မှာကုန်ဆုံးမယ် ဆိုတာမျိုးကိုသိမှ လတ်ဆတ်မှုကို ခန့်မှန်းနိုင်မှာဖြစ်ပါတယ်။ နောက်ထပ်အရေးကြီးတဲ့အချက်တစ်ချက် ကတော့ ပါဝင်ပစ္စည်းဖော်ပြမှုဖြစ်ပါတယ်၊ ဘယ်လိုပါဝင်ပစ္စည်းတွေပါဝင်တယ်ဆိုတာကို သိရှိထားမှသာ ကိုယ်နဲ့ဓါတ်တည့်မှုရှိခြင်း/မရှိခြင်း နှင့်  ဘေးထွက်ဆိုးကျိုးရှိနိုင်/မရှိနိုင်ကို သတိထားဆင်ခြင်နိုင်မှာဖြစ်ပါတယ်၊  (Ready To Eat) ကုန်စည်မှ မဟုတ်ပါဘူး ဘယ်ကုန်စည်ကိုဘဲဖြစ်ဖြစ် ဝယ်ယူ စားသုံးတဲ့အခါမှာ အမှတ်တံဆိပ်၊ အမျိုးအမည် ၊ သက်တမ်း ၊  ပါဝင်ပစ္စည်းနဲ့ ဘယ်လို ထားသိုသိမ်းဆည်းစားသုံးရမယ်ကအစ ဘေးထွက် ဆိုးကျိုးနဲ့ တားမြစ်ထားတဲ့တာရှည်ခံဆေးများ ပါဝင်မှု ရှိ/ မရှိ ကိုအဆုံး သေချာလေ့လာ စိစစ်ပြီးမှ ဝယ်ယူ သုံးစွဲသင့်တာဖြစ်ပါတယ်၊ (Ready To Eat) ကုန်စည်တွေကြောင့် တစ်ဖက်မှာ အချိန်ကုန် သက်သာခြင်း၊ လူပင်ပန်းမှု သက်သာခြင်း ဆိုတဲ့အကျိုးကျေးဇူး တွေရှိနိုင်သလို တစ်ဖက် မှာလည်း အချို့သော (Ready To Eat) ကုန်စည်များတွင် တာရှည်ခံဆေးများ ပါဝင်မှုရှိနိုင်ခြင်း၊ လတ်ဆတ်သန့်ရှင်းမှုလျော့နည်းနိုင်ခြင်းများ ကြောင့် ရေရှည်တွင် ကျန်းမာရေး ထိခိုက်မှုရှိနိုင်ခြင်းကဲ့သို့သော ဆိုးကျိုးများလည်း ရှိလာနိုင်ပါတယ်  ဒါကြောင့် စားသုံးသူ ပြည်သူတွေအနေနဲ့  အသင့်စား စားသောက်ကုန် (Ready To Eat) တွေကို ဝယ်ယူတဲ့အခါမှာ ဘေးအန္တရာယ်ကင်းရှင်းပြီး အရည်အသွေးပြည့်မှီတယ်လို့ စိတ်ချရတဲ့ ကုန်စည် အမှတ်တံဆိပ်တွေကိုသာ အသိဉာဏ် ပညာဖြင့် ချင့်ချိန်ရွေးချယ် စားသုံးသင့်ပါကြောင်း အသိ သတိပေး တင်ပြလိုက်ရပါတယ်။

စားသုံးသူရေးရာဦးစီးဌာန

ရှမ်းပြည်နယ်

Photo - Credit (Google)

စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင် ဦးဆောင်၍ ရေစကြိုမြို့နယ်တာဝန်ခံ ဦးမြတ်မင်းနှင့်အဖွဲ့သည် (၁၃.၁.၂၀၂၂) ရက်နေ့၊ နေ့လည်(၃:၀၀)နာရီအချိန်တွင် ကျေးရွာတစ်ရွာ၊ ထုတ်ကုန်တစ်မျိုး ထုတ်လုပ်မှုနှင့် ပြည်တွင်းကဏ္ဍ မြှင့်တင်နိုင်ရေးအတွက် ရေစကြိုမြို့၊ အမှတ် (၅) ရပ်ကွက်ရှိ “မနု ထန်းသီးမုန့်” ထုတ်လုပ်နေသည့် လုပ်ငန်းရှင်နှင့်တွေ့ဆုံပြီး ထန်းသီးမုန့်ထုတ်လုပ်ရောင်းဝယ်မှုအခြေအနေနှင့် အကျိုးအမြတ်ရရှိနိုင် မည့်အခြေအနေများကို မေးမြန်းဆွေးနွေးခဲ့ပါသည်။

          ကျေးရွာတစ်ရွာထုတ်ကုန်တစ်မျိုးနှင့်အညီ မကွေးဆိုလျှင် ပဲယို၊နှမ်းယို၊ ကျောက်ပန်းတောင်း ဆိုလျှင် အာလူးကြော်၊ ညောင်ဦးဆိုလျှင် ပုန်းရည်ကြီးဟူ၍ မြို့နှင့်ထွက်ကုန်များ ယှဉ်တွဲ၍ လူသိ များသလို ရေစကြိုဟုဆိုလျှင် ထန်းသီးမုန့်ကို ပြေးမြင်ရမည်ဖြစ်ပြီး ယခင်ကရန်ကုန်မြို့၊ အင်းလျားလိပ် ဟော်တယ်၌ ရေစကြိုထန်းသီးမုန့်ကို ရောင်းချခဲ့ရာ နိုင်ငံခြားသားများလွန်စွာကြိုက်နှစ်သက်ကြောင်း လုပ်ငန်းရှင်ကပြောကြားခဲ့ပါသည်။ ထန်းသီးမုန့်ပြုလုပ်မည်ဆိုလျှင် အဓိကအနေဖြင့် ဆန်၊ ထန်းလျှက် (သကာရည်)၊ ဆား၊ ကြက်ဥနှင့် အချဉ်ဖောက်စေရန် အုန်းမှုတ်ခွက်နှင့်အဓိကထန်းသီးမှည့်အနှစ် တို့လိုအပ်ကြောင်း သိရှိရပါသည်။

          ထန်းသီးမုန့် ပြုလုပ်ရာတွင် ဆန်အနေဖြင့် ပေါ်ဆန်းဆလတ်နှင့် မနောသုခကို သုံးချိုး တစ်ချိုးရော၍ ရေစင်အောင်ဆေးပြီး (၁)နာရီခန့်ရေစိမ်ရကြောင်း၊ ထိုသို့ရေစိမ်ပြီးနောက် ဆန်ကို ကြိတ်စက်ဖြင့် ကြိတ်၍ထွက်ရှိလာသည့် မုန့်နစ်ရည်အား ထန်းလျှက်(သကာရည်) အေးခဲထားသော ထန်းသီးမှည့်အနှစ်တို့နှင့်ရောမွှေရကြောင်း၊ သန့်ရှင်းစေရန်အတွက် ဇကာစစ်ခါ စဉ့်အင်တုံအတွင်းသို့ ထည့်၍ အုန်းမှုတ်ခွက်ဖြင့် နာနာမွှေခါ(၇)နာရီခန့်  အုန်းမှုတ်ခွက်ထည့်စိမ်၍ နှပ်ထားရပြီး ရေနွေး ပွက်ပွက်ဆူနေသော ပေါင်းဖို ပေါ်တင်၍ (၂၅) မိနစ်ခန့်ပေါင်းလျှင် ထန်းသီးမုန့်ရပြီ ဖြစ်ကြောင်း မုန့်ပေါ်မှကြက်ဥဖြန်းပေးရကြောင်း၊ ထန်းသီးမှည့်လှိုင်လှိုင်ပေါ်သည့် ဝါဆိုလမှသီတင်းကျွတ်၊ တန်ဆောင်မုန်းထိ လက်ဆတ်သည့်ထန်းသီးမှည့်အနှစ် များများထည့်နိုင်သော်လည်း ထန်းသီးမှည့် ရှားပါးသည့်ကာလများအတွက် အေးခဲထားသည့် ထန်းသီးမှည့်အနှစ် အနည်းငယ်သာထည့်နိုင် ကြောင်း၊ ထန်းသီးမှည့်ထည့်၍ပြုလုပ်သည့် မုန့်မှာပို၍အရသာကောင်းမွန်ပြီး ပို၍နူးညံ့ကြောင်း၊ အချို့လုပ်ငန်းရှင်များအနေဖြင့် နည်းပညာအခက်အခဲကြောင့် ထန်းသီးမှည့်အနှစ်အစား ပွဆေးများ သုံး၍ ထုတ်လုပ်လာကြသဖြင့် ထန်းသီးမုန့် အရည်အသွေးလည်းကျဆင်းလာသည့် အတွက် Qualityပိုင်းကို အထူးထိန်းသိမ်းရန်လိုအပ်ကြောင်း လုပ်ငန်းရှင်ဒေါ်နုမှ ရှင်းလင်းပြောကြားခဲ့ပါသည်။

          ထန်းသီးမုန့်(၁)ပေါင်းပြုလုပ်ရန် ဆန် (၅) ဗူး၊ ထန်းလျှက် (သကာရည်) (၅၀) ကျပ်သား၊ ဆား (၁) ကျပ်ခွဲသား၊ ကြက်ဥ (၁)လုံးနှင့် နို့ကျဲ (၁၀)ကျပ်သား ထည့်၍ (၂၅) မိနစ် ပေါင်းရကြောင်း၊ ကျက်လျှင် ကြက်ဥ (၁) လုံးအပေါ်မှဖြန်းပေးရကြောင်း၊ အုန်းသီးကို ခြစ်၍ ဆုံဆီသန့်နှင့်ကြော်ခါ မုန့်ပေါ်မှ အုန်းဆံကြော်၊ ဆီ၊ သကြားနှင့် ဖရုံယို ဖြူးပေးကြောင်း၊ တန်ဖိုးအားဖြင့် (၉၀၀၀/-) ကျပ် ခန့်ကုန်ကျကြောင်း၊ မုန့်(၁)ပေါင်းလျှင် (၂)ပိဿာခွဲခန့်ထွက်ရှိကြောင်း၊ ထန်းသီးမုန့်(၁) ပိဿာကို (၅၀၀၀/-)ကျပ်ရောင်းရပါကြောင်း၊ (၁) ပေါင်းလျှင် (၁၂၅၀၀/-) ကျပ် ရရှိပြီး ဖောက်သည်အနေဖြင့် (၁)ပေါင်းလျှင် (၁၀၀၀၀/-)ပေးရကြောင်း၊  အကျိုးအမြတ် အနေဖြင့် ကိုယ်တိုင်ရောင်းလျှင် (၃၅၀၀/-)ကျပ်ရရှိပြီး ဖောက်သည်ယူရောင်းသူများအနေဖြင့် (၂၅၀၀/-) ကျပ်မြတ်ကြောင်း၊ နေ့စဉ် မုန့်(၁၅ မှ ၂၀)ပေါင်းခန့် ပြုလုပ်ရောင်းချလျက်ရှိကြောင်းနှင့် မွေးနေ့ကိတ်ကဲ့သို့ မွေးနေ့ထန်းသီး မုန့်များလည်း ပုံစံအမျိုးမျိုးဖြင့် အော်ဒါပြုလုပ်ပေးနေရကြောင်း  လုပ်ငန်းရှင်၏ပြောကြားမှုအား သိရှိခဲ့ရပါသည်။

စားသုံးသူရေးရာဦးစီးဌာန(မကွေးတိုင်းဒေသကြီး)