သတင်းနှင့် လှုပ်ရှားမှုများ

     ဧရာဝတီတိုင်းဒေသကြီး ဖျာပုံခရိုင် ၊ ဒေးဒရဲမြို့နယ် စားသုံးသူရေးရာဦးစီးဌာန ၊မြို့နယ်စစ်ဆေးရေးမှူး ဦးသိန်းမောင်သည် ၂၀၂၃ခုနှစ်၊  ဇွန်လ(၁၄)ရက်နေ့၊  နံနက်(၁၀:၀၀)နာရီအချိန်တွင်    ဒေးဒရဲမြို့၊အမှတ်(၁)ရပ်ကွက်၊ပြည်တော်သာလမ်းရှိ ဒေါ်လှလှဝင်း၏ အေးချမ်းဖြိုး အလှကုန်ဆိုင်ကို  ဈေးကွက်စောင့်ကြည့်စစ်ဆေးခဲ့ပါသည်။

   ဈေးကွက်စောင့်ကြည့်စစ်ဆေးခဲ့ရာတွင်   ရောင်းချလျက်ရှိသော  အလှကုန်များတွင် ကုန်အညွှန်းအမှတ်အသားများ ပြည့်စုံစွာ ဖော်ပြထားရှိကြောင်း စိစစ်တွေ့ရှိရပါသည်။ ဆိုင်ပိုင်ရှင် ဒေါ်လှလှဝင်းအား ဝယ်ယူရောင်းချသော ကုန်စည်များတွင် သတ်မှတ်ထားသော ကုန်အညွှန်း    အမှတ်အသားများ ပြည့်စုံစွာဖော်ပြရန် လိုအပ်ကြောင်းနှင့် ကုန်အညွှန်းအမှတ်အသားများတွင်    မြန်မာဘာသာဖြင့်ဖော်ပြမှုမရှိသည့် ကုန်စည်များရောင်းချပါက စားသုံးသူကာကွယ်ရေးဥပဒေအရ   အရေးယူဆောင်ရွက်သွားမည်ဖြစ်ကြောင်း အသိပေးပြောကြားခဲ့သည်ဟု သတင်းရရှိပါသည်။

DOCA(ဧရာဝတီ)

       ဧရာဝတီတိုင်းဒေသကြီး၊       စားသုံးသူရေးရာဦးစီးဌာန၊ မြောင်းမြခရိုင်၊ ဝါးခယ်မမြို့နယ်တာဝန်ခံ ဦးအောင်မိုးသည် (၁၉.၆.၂၀၂၃)ရက်နေ့၊ နေ့လယ်(၁၃:၀၀)နာရီတွင်  ဝါးခယ်မမြို့နယ် မြို့နယ်တာဝန်ခံရုံး၌ မုန့်မျိုးစုံဆိုင်ရှင်များကို စားသုံးသူကာကွယ်ရေး အသိပညာပေးဟောပြော ဆောင်ရွက်ခဲ့ပါသည်။

        ထိုသို့ဟောပြောဆွေးနွေးရာတွင် စားသုံးသူရေးရာဦးစီးဌာန၊ မြို့နယ်တာဝန်ခံက စားသုံးသူရေးရာဦးစီးဌာန၏ လက်ရှိဆောင်ရွက်နေသော လုပ်ငန်းတာဝန်များ၊ ရှေ့ဆက်လက်ဆောင်ရွက်ရမည့် လုပ်ငန်းတာဝန်များကို ဦးစွာရှင်းလင်းပြောကြားပြီးနောက် စီးပွားရေးနှင့်ကူးသန်းရောင်းဝယ်ရေး ဝန်ကြီးဌာနက ထုတ်ပြန်ထားသော စားသုံးသူကာကွယ်ရေးဥပဒေ ၂၀၁၉ ပါ ပြဌာန်းချက်များအနက် စားသုံးသူ၏အခွင့်အရေးနှင့် တာဝန်များ၊ စီးပွားရေးလုပ်ငန်းရှင်များ၏ တာဝန်များ၊တားမြစ်ချက်များ၊ ပြစ်မှုပြစ်ဒါဏ်များကို သိရှိစေရန်နှင့် ဌာနက ထုတ်ပြန်ထားသော ဥပဒေညွှန်ကြားချက်များကို သိရှိလိုက်နာဆောင်ရွက်ကြရန် ဟောပြောဆွေးနွေးခဲ့ရာ ဟောပြောပွဲသို့ လုပ်ငန်းရှင်(၆)ဦး တက်ရောက်ခဲ့ကြောင်း သိရှိရပါသည်။

DOCA(ဧရာဝတီ)

    ၂၀၂၃ခုနှစ်၊ဇွန် ၁၅ ရက်နေ့၊ နံနက်(၁၁:၀၀) နာရီအချိန်တွင် စားသုံးသူရေးရာဦးစီးဌာန၊ မြန်အောင်ခရိုင်၊ ကြံခင်းမြို့၊ မြို့နယ်တာဝန်ခံသည် ဌာနဆိုင်ရာအဖွဲ့များနှင့်ပူးပေါင်း၍ ဗိုလ်ချုပ်လမ်း၊ ရွာသစ်ရပ်ကွက်ရှိ ကုန်မျိုးစုံဆိုင်နှင့် မုန့်မျိုးစုံအရောင်းဆိုင်များအား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

       ထိုသို့ကွင်းဆင်းခဲ့ရာတွင် စားသုံးသူမိဘပြည်သူများကို ဘေးအန္တရာယ် ကင်းရှင်းစေရန်အတွက် ဈေးကွက်အတွင်းရောင်းချနေသော ကုန်စည်များပေါ်တွင် ကုန်စည်အမျိုးအစားအလိုက် ကုန်အညွှန်း အမှတ်အသားများ ပြည့်စုံမှန်ကန်စွာ ဖော်ပြခြင်းရှိ/မရှိတို့ကိုစစ်ဆေးခဲ့ပြီး၊ မြန်မာနိုင်ငံ စားသုံးသူကာကွယ်ရေးကော်မရှင်က ထုတ်ပြန်ကြေညာထားသော ညွှန်ကြားချက်အမှတ် (၂/၂၀၁၉) နှင့် အညီ မြန်မာဘာသာဖြင့် ပြည်စုံစွာဖော်ပြထားသော ကုန်စည်များကိုသာ ရောင်းချကြရန်ဖြစ်ကြောင်းနှင့် စီးပွားရေးလုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာဆောင်ရွက်ရန်၊  ကုန်စည်နှင့် စပ်လျဉ်း၍ အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရေးဆောင်ရွက်ရန်နှင့် သတ်မှတ်အရည်အသွေး ပြည့်မီသောကုန်စည်များကိုသာ ရောင်းချရန်၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များအကြောင်း၊ တားမြစ်ချက်များအကြောင်းနှင့် ပြစ်မှုပြစ်ဒဏ်များအကြောင်း စသည်တို့ကို အသိပညာပေးဆွေးနွေး ခဲ့ပြီး၊ ကုန်မျိုးစုံအရောင်းဆိုင်(၇)ဆိုင်အား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြကြောင်း သိရှိရပါသည်။

DOCA(ဧရာဝတီ)

          စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ ဦးတင်မောင်ထွန်း(ရုံးအုပ်) သည် ၁၆.၆.၂၀၂၃ ရက်နေ့၊ ၁၀း၃၀ နာရီအချိန်တွင် အောင်နန်းရပ်ကွက်ရှိ လက်လီ/လက်ကား ကုန်စုံဆိုင် လုပ်ငန်းရှင်  (၂)ဦးနှင့် တွေ့ဆုံ၍  စားသုံးသူကာကွယ်ရေးဥပဒေပြဌာန်းချက်ပါ စီးပွားရေး လုပ်ငန်းရှင်များ လိုက်နာရန် အချက်အလက်များနှင့်ပတ်သက်၍ ရှင်းလင်းဆွေးနွေးခြင်း ဆောင်ရွက်ခဲ့ပါသည်။

          ထိုသို့ဆွေးနွေးရာတွင် ဦးတင်မောင်ထွန်း(ရုံးအုပ်)က စီးပွားရေးလုပ်ငန်းရှင်ဆိုသည်မှာ ကုန်စည်ကို ထုတ်လုပ်ခြင်း၊ ဖြန့်ဖြူးခြင်း၊သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင် ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့တင်သွင်းခြင်း၊ ပြန်လည်ရောင်းချခြင်းကိုဖြစ်စေ၊ ထောက်ပံ့ခြင်းကို ဖြစ်စေ၊ ဝန်ဆောင်မှုပေးခြင်းကိုဖြစ်စေ၊ ကြော်ငြာလုပ်ငန်းလုပ်ကိုင်ခြင်းကိုဖြစ်စေ၊ တစ်ဦးချင်းသော်လည်းကောင်း၊ အဖွဲ့အစည်းနှင့်သော်လည်းကောင်း ဆောင်ရွက်သူကိုဆိုလိုကြောင်း၊ ဝန်ဆောင်မှုပေးခြင်းနှင့်စပ်လျဉ်းသည့် ဖော်ပြရမည့်အာမခံချက်များဖြစ်သော မိမိဝန်ဆောင်မှုနှင့် စပ်လျဉ်း၍ အချက်အလက်များကို စားသုံးသူသိရှိစေရန် ကြိုတင်အသိပေးခြင်း၊ မှန်ကန်သော သတင်းအချက်အလက်နှင့် ပြည့်စုံသော ဝန်ဆောင်မှု အဆင့်အတန်းနှင့်အညီ ပြည့်ဝစွာပေးခြင်း၊  စားသုံးသူ၏ လိုအပ်ချက်နှင့်ကိုက်ညီမှုရှိခြင်း၊  အာမခံထားသောအချိန်ကာလအတွင်း   ပြီးမြောက်‌အောင်ဆောင်ရွက်ပေးခြင်း၊  စားသုံးသူနှင့် သဘောတူညီထားသည့် ဝန်ဆောင်မှုတန်ဖိုးအတိုင်း ပေးအပ်စေခြင်း စသည့်အချက်များကို ရှင်းလင်းဆွေးနွေးခဲ့ပြီး စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များ ဖြန့်ဝေခဲ့ကြောင်း သတင်းရရှိပါသည်။

DOCA(ကချင်)

     ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်၊ ကဉ္ဇနကျွန်းသာ ကုမ္ပဏီလီမီတက်မှ ၂၀၂၃-၂၀၂၄ မိုးစပါး (ကန်ထရိုက်လယ်ယာ) စိုက်ပျိုးစရိတ်ပေးအပ်ပွဲ အခမ်းအနားကို ၂၀၂၃ခုနှစ်၊ ဇွန်လ (၁၅)ရက်နေ့၊ နံနက် (၀၉:၀၀)နာရီအချိန်တွင် စတင်ကျင်းပခဲ့ပါသည်။

    အဆိုပါအခမ်းအနားတွင် တောင်သူနှင့် ကုမ္ပဏီ နှစ်ဦးစလုံး အကျိုးရှိစေရန် တောင်သူများမှ စိုက်စနစ်မှန်ကန်ရေး၊ မျိုးကောင်းမျိုးသန့် ရရှိရေးနှင့် စိုက်ပျိုးရေးဦးစီးဌာန၏ စိုက်ပျိုးရေး နည်းပညာ များဖြင့် စပါးပိုထွက်ရေး၊ အရည်အသွေးမြှင့်စပါးများ ထွက်ရှိပြီး ဈေးကောင်းရရှိနိုင်ရေးစသည့် အခြေအနေနှင့် ကုမ္ပဏီ၏ ရည်ရွယ်ချက်နှင့် ဆက်လက်ဆောင်ရွက်မည့် အခြေအနေများကို တင်ပြဆွေးနွေးခဲ့ကြပါသည်။

   စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၏ တိုင်းဒေသကြီးဦးစီးမှူး ဦးစိုးအောင်က စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ဆောင်ပုဒ်ဖြစ်သော “ဖွံ့ဖြိုးကုန်သွယ် နိုင်ငံကြွယ်” ဆိုသည့် ဆောင်ပုဒ်အတိုင်း တောင်သူများ၏ လယ်ယာကဏ္ဍ ဖွံ့ဖြိုးတိုးတက်ရေး၊ စတင်စိုက်ပျိုးသည်မှ ရိတ်သိမ်းချိန်လွန်ပြီး ကြိတ်ခွဲသယ်ယူဖြန့်ဖြူးရောင်းချသည်အထိ စိုက်ပျိုးရေးကဏ္ဍ၊ ရိတ်သိမ်းမှုကဏ္ဍ၊ ကြိတ်ခွဲမှုကဏ္ဍ၊ ဖြန့်ဖြူးရောင်းချမှုကဏ္ဍ စသည့်ကဏ္ဍအသီးအသီးတွင် အရည်အသွေးမြှင့်စပါး၊ ဆန်များထုတ်လုပ်ပြီး ဆန်စပါး၏ Supply Change တစ်ခုလုံး ဖွံ့ဖြိုးတိုးတက်ရေးနှင့် ဆန်စပါးဈေးကွက် တည်ငြိမ်ရေးအပါအဝင် ဆန်စပါးမူဝါဒသစ် အကြောင်းများကို အကျယ်တဝင့် ပြောကြားခဲ့ပါသည်။

  ဧရာဝတီတိုင်းဒေသကြီး၊ စိုက်ပျိုးရေးဦးစီးဌာန တိုင်းဒေသကြီးဦးစီးမှူး ဦးစိန်မောင်မြင့်မှ စိုက်ပျိုးရေးဦးစီးဌာန၏ မျှော်မှန်းချက်နှင့် ရည်မှန်းချက်များ၊ စပါးမျိုးကောင်းမျိုးသန့်များ အသုံးပြုနိုင်ရေးနှင့် ဓါတ်မြေဩဇာ အချိုးကျသုံးစွဲနိုင်မှုကို အကျယ်တဝင့် ဆွေးနွေးခဲ့ပါသည်။ ဆက်လက်၍ ကဉ္ဇနကျွန်းသာကုမ္ပဏီမှ တောင်သူများ သိရှိလိုသည်များကို အပြန်အလှန် ဆွေးနွေးပြောကြားခြင်းနှင့် စားသုံးသူရေးရာဦးစီးဌာနမှ တိုင်းဒေသကြီးဦးစီးမှူး ဦးစိုးအောင်နှင့် ကုမ္ပဏီမှ တာဝန်ရှိသူများက တောင်သူများ၏ သိရှိလိုသည်များကို ပြန်လည်ဖြေကြားခဲ့ပါသည်။

  အဆိုပါအခမ်းအနားသို့ တောင်သူ (၂၈၀)ဦး တက်ရောက်ခဲ့ပြီး နံနက် (၁၁:၃၀)နာရီအချိန်တွင် ဓနုဖြူမြို့နယ် ကဉ္ဇနကျွန်းသာ ကုမ္ပဏီလီမီတက်မှ ၂၀၂၃-၂၀၂၄ မိုးစပါး (ကန်ထရိုက် လယ်ယာ) စိုက်ပျိုးစရိတ်ပေးအပ်ပွဲ အခမ်းအနားကို အောင်မြင်စွာကျင်းပ ပြီးစီးခဲ့ကြောင်း သတင်းရရှိပါသည်။

DOCA(ဧရာဝတီ)