သတင်းနှင့် လှုပ်ရှားမှုများ

     မကွေးတိုင်းဒေသကြီး၊ ချောက်ခရိုင်၊ ချောက်မြို့မစျေး၌ စားသုံးသူများဘေးအန္တရာယ်ကင်းရှင်း‌စေရေးအတွက် (၇-၃-၂၀၂၃) ရက်နေ့၊ နံနက် (၀၉း၃၀) နာရီအချိန်တွင် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်ပြည်သူ့ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့၊ မြို့မစျေးကော်မတီဥက္ကဋ္ဌတို့ပါဝင်သောပူးပေါင်းအဖွဲ့ဖြင့် စျေးကွက်အတွင်း  အစားအသောက်နှင့်ဆေးဝါးကွပ်ကဲရေးဦးစီးဌာန (FDA) ၏ ‌ထောက်ခံချက်မပါရှိဘဲ Parbisure ဆေးရောင်းချနေမှုရှိ/မရှိနှင့် သက်တမ်းလွန်ပြီး စားသုံးရန်မသင့်သော အစားအသောက်နှင့်လူသုံးကုန်ပစ္စည်းများအား စျေးကွက်အတွင်းရောင်းချမှုရှိ/မရှိတို့ကို ဈေးကွက်စောင့်ကြည့်စစ်ဆေးဆောင်ရွက်ခဲ့ပါသည်။         

       ထိုသို့ ဈေးကွက်စောင့်ကြည့်စစ်ဆေးရာတွင် စားသုံးသူရေးရာဦးစီးဌာန၊ ချောက်ခရိုင်၊ ဒု-ခရိုင်ဦးစီးမှူး ဒေါ်မြတ်မြတ်မိုးက ၂၀၁၉ စားသုံးသူကာကွယ်ရေးဥပဒေပုဒ်မ(၄၁)ပါ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ အသိပညာပေးပြောကြားခြင်းများ ဆောင်ရွက်ခဲ့ပါသည်။ ဈေးကွက်စောင့်ကြည့်စစ်ဆေးဆောင်ရွက်စဉ် ဆေးဆိုင်များက သက်တမ်းလွန်ဆေးဝါးများကို ပူးပေါင်းစစ်ဆေးရေးအဖွဲ့ထံသို့ လာရောက်အပ်နှံခဲ့ပါသည်။ စျေးကွက်အတွင်းရောင်းချနေသော စားသောက်ကုန်ပစ္စည်းများ၊ လူသုံးကုန်ပစ္စည်းများအား ဝယ်ယူသုံးစွဲကြသောစားသုံးသူမိဘပြည်သူများအနေဖြင့် ဘေးဥပဒ်ကင်းရှင်းစွာသုံးစွဲနိုင်စေရေးအတွက် သတင်းအချက်အလက်များ ပြည့်စုံမှန်ကန်စွာဖော်ပြထားသော အရည်အသွေးပြည့်မီသောကုန်ပစ္စည်းများကိုသာ ဝယ်ယူသုံးစွဲနိုင်စေရေး၊ မြန်မာနိုင်ငံအစားအသောက်နှင့်ဆေးဝါးကွပ်ကဲရေးဥပဒေနှင့်ညီညွတ်သော ကုန်ပစ္စည်းများကိုသာ ရောင်းချနိုင်စေရေး၊  ရောင်းချသည့် စျေးဆိုင်လုပ်ငန်းရှင်များအနေဖြင့်လည်း ဌာနဆိုင်ရာများ၏ တည်ဆဲဥပဒေနှင့်ညီညွတ်သော ကုန်ပစ္စည်းများကိုသာ ရောင်းချစေရေးတို့အတွက်ရည်ရွယ်၍  ဈေးကွက်စောင့်ကြည့်စစ်ဆေးမှုများအား စဉ်ဆက်မပြတ်ဆောင်ရွက်ခဲ့ခြင်းဖြစ်ကြောင်း သိရှိရပါသည်။

DOCA(မကွေး)

      မကွေးတိုင်းဒေသကြီး၊ မကွေးခရိုင်၊ မြို့သစ်မြို့နယ်တွင် နတ်မောက်ဆည်၊ ပုလင်းဆည်၊ စွန်ဆည်နှင့် ဆဒ္ဒန်ဆည်တို့မှရရှိသော စိုက်ပျိုးရေဖြင့် ၂၀၂၃ခုနှစ် နွေစပါးကို စတင်စိုက်ပျိုးနေပြီဖြစ်ကြောင်း  မြို့နယ်စိုက်ပျိုးရေးဦးစီးဌာနမှ သိရှိရပါသည်။

      မြို့သစ်မြို့နယ်တွင် ကျေးရွာအုပ်စု( ၅၂ )အုပ်စုရှိကာ နွေစပါးစိုက်ပျိုးရန် ဆည်ရေရရှိသည့် ကျေးရွာ(၁၅)အုပ်စုမှ တောင်သူများအနေဖြင့် ဖေဖော်ဝါရီလကုန်ပိုင်းမှစ၍ လုပ်ငန်းခွင်သို့ စတင်ဝင်ရောက်နေပြီဖြစ်ပြီး နွေစပါးလျာထားချက်ဧကပြည့်မီနိုင်ရေးအတွက်  သက်ဆိုင်ရာတာဝန်ရှိသူများက ကြီးကြပ်ဆောင်ရွက်လျက်ရှိပါသည်။

        အဆိုပါ နွေစပါးစိုက်တောင်သူများသည် တစ်ဧကစပါးတင်း (၁၀၀)ကျော် အထွက်နှုန်းရရှိစေရန်အတွက် မြို့နယ်ဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာနက စိုက်ပျိုးရေ အဆက်မပြတ်ရရှိရေးကို ဆောင်ရွက်ပေးလျက်ရှိပြီး မြို့နယ်စိုက်ပျိုးရေးဦးစီးဌာနက  မျိုးစေ့ချကိရိယာများငှားရမ်းပေးခြင်း၊ စိုက်ပျိုးရေးနည်းပညာများဖြန့်ဝေပေးခြင်းနှင့် ရုံးဝန်ထမ်းများက ကွင်းထဲအရောက် ကူညီပံ့ပိုးခြင်းများ ဆောင်ရွက်ပေးလျက်ရှိကြောင်း  သိရှိရပါသည်။

DOCA(မကွေး)

       စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ စစ်ဆေးရေးမှူး ဦးကျော်မိုးလွင်သည် ၈.၃.၂၀၂၃ ရက်နေ့တွင် မိုးညှင်းမြို့၊ မြို့မရပ်ကွက်ရှိ ဦးနေလင်း လက်လီလက်ကားဖြန့်ဖြူးရောင်းချသောကုန်စုံဆိုင်သို့ သွားရောက်၍ စားသုံးသူများဘေးအန္တရာယ်ကင်းရှင်းပြီး ထုတ်ကုန်လုံခြုံစိတ်ချ ရမှုရှိစေရေး၊ ဘေးအန္တရာယ်ရှိသောကုန်စည်များ ဈေးကွက်အတွင်းမှ ပပျောက်စေရေးနှင့် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ကိုက်ညီမှု ရှိ/မရှိအား ဈေးကွက်စောင့်ကြည့်စစ်ဆေးခဲ့ပါသည်။

      ထိုသို့ ဈေးကွက်စောင့်ကြည့်စစ်ဆေးရာတွင် အသင့်သောက်အချိုရည်အမျိုးမျိုးတွင်ပါဝင်သည့် MIZ(မစ်(ဇ်) လိမ္မော်အရသာကာဗွန်နိတ်တက်အချိုရည်) အမှတ်တံဆိပ်ပါ အချိုရည်တွင် ကုန်စည် အမျိုးအစားအလိုက် သတ်မှတ်ချက်များနှင့်အညီ ကုန်စည်များပေါ်တွင် မြန်မာဘာသာဖြင့် သိသာ ထင်ရှားစွာဖော်ပြရမည့် ကုန်စည်၏ အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်းနှင့် ဓါတ်မတည့်ကြောင်းဖော်ပြချက်များမှာ ပြည့်စုံစွာဖော်ပြပါရှိကြောင်းကို  စစ်ဆေးတွေ့ရှိရပြီး ကုန်စုံဆိုင်ပိုင်ရှင်အား ကုန်အညွှန်းအမှတ်အသား ပြည့်စုံမှု မရှိသည့်ကုန်စည်များ ဈေးကွက်အတွင်း ရောင်းချမှုမပြုရန်ဆွေးနွေးခဲ့ပြီး ကုန်အညွှန်းအမှတ်အသားဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

  စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ရည်မှန်းချက်တစ်ရပ်ရပ်ဖြစ်သည့် ဈေးကွက်စီးပွားရေးစနစ်နှင့်အညီ ပုဂ္ဂလိကအခန်းကဏ္ဍဖွံ့ဖြိုးတိုးတက်စေရန် အားပေးမြှင့်တင်ဆောင်ရွက်ရေး၊ လူမှုစီးပွားဘဝဖွံ့ဖြိုးတိုးတက်မြင့်မားရေးအတွက် ရခိုင်ပြည်နယ်ရှိ  လက်ရှိဆီစက်လုပ်ငန်းရှင်များနှင့် ဆီစက်အသစ်တိုးချဲ့တည်ဆောက်တပ်ဆင်လိုသည့် လုပ်ငန်းရှင် (၃၅) ဦးအနက် စစ်တွေမြို့နယ်နှင့် ကျောက်တော်မြို့နယ်များရှိ ဆီစက်စီးပွားရေးလုပ်ငန်းရှင် (၁၉) ဦး၏ နိုင်ငံတော်မှ ဆီစက်ချေးငွေအဆိုပြုလွှာတင်ပြထားခြင်းအပေါ် ပြည်ထောင်စုနယ်မြေ၊ တိုင်းဒေသကြီး/ပြည်နယ်ဆီစက်လုပ်ငန်းချေးငွေအဆိုပြုလွှာ ကွင်းဆင်းစစ်ဆေးရေးအဖွဲ့၊ အဖွဲ့ခွဲဖြစ်သော စစ်တွေခရိုင်၊ ဆီစက်အဆိုပြုလွှာကွင်းဆင်းစစ်ဆေးရေးအဖွဲ့ဝင် ဦးဇေယျာလင်း(လက်ထောက်ညွှန်ကြားရေးမှူး၊ စက်မှုကြီးကြပ်ရေးနှင့်စစ်ဆေးရေးဦးစီးဌာန)အဖွဲ့ခေါင်းဆောင်၊ ဦးအောင်တင်ထွန်း(လက်ထောက်ညွှန်ကြားရေးမှူး ၊စိုက်ပျိုးရေးဦးစီးဌာန)အဖွဲ့ဝင်၊ ဦးမြင့်အောင်ကျော်(ဆီစက်လုပ်ငန်းရှင်များနှင့်ဆီကုန်သည်များအသင်း)အဖွဲ့ဝင်၊ ဦးမောင်လှဝင်း(ဦးစီးအရာရှိ၊ စားသုံးသူရေးရာဦးစီးဌာန)အတွင်းရေးမှူးပါဝင်သောအဖွဲ့သည် (၆-၃-၂၀၂၃) ရက်နေ့မှ (၇-၃-၂၀၂၃) ရက်နေ့အတွင်း ဆီစက်အသစ်တည်ဆောက်တပ်ဆင်လိုသည့် လုပ်ငန်းရှင်များနှင့် လက်ရှိဆီစက်အား အဆင့်မြှင့်တင်ဆောင်ရွက်သူနှင့် လုပ်ငန်းလည်ပတ်ရန်ပုံငွေရယူလိုသူလုပ်ငန်းရှင်များ၏ တင်ပြထားသောဆီစက်လုပ်ငန်းချေးငွေအဆိုပြုလွှာများကို သတ်မှတ်ထားသောအချက်များနှင့်အညီ ကွင်းဆင်းစိစစ်ဆောင်ရွက်ခဲ့ပါသည်။

   ထိုသို့ဆောင်ရွက်ရာတွင် ဆီစက်လုပ်ငန်းရှင်များ၏ ချေးငွေလိုအပ်ချက်၊ လိုအပ်သည့်ချေးငွေပမာဏ၊ ဆီစက်အရေအတွက်တို့ကို ကွင်းဆင်းစိစစ်ဆောင်ရွက်ခဲ့ပါသည်။ ဆီစက်များအနေဖြင့် ဆီစက်သီးနှံကုန်ကြမ်းများ ရယူဆောင်ရွက်မှုအခြေအနေ၊ ဖြန့်ဖြူးရောင်းချလျက်ရှိသည့် ဈေးကွက်အခြေအနေ၊ လက်ရှိကုန်ထုတ်လုပ်မှုစွမ်းအားပမာဏနှင့် တိုးချဲ့ထုတ်လုပ်နိုင်သည့်အစီအမံ၊ ထုတ်လုပ်မှုကုန်ကျစရိတ်နှင့် ရောင်းချရရှိမှုဝင်ငွေ၊ စက်ယူနစ်အစိတ်အပိုင်းများကို အစားထိုးမွမ်းမံပြင်ဆင်ကာ အဆင့်မြှင့်တင်ဆောင်ရွက်မည့်စီမံချက်၊ ဆီစက်ချေးငွေအဆိုပြုလွှာတွင် ဖော်ပြချက်များသည် မြေပြင်အခြေအနေနှင့် ပြည့်စုံမှန်ကန်မှုရှိ/မရှိနှင့် သင့်လျော်သည့်ချေးငွေပမာဏကို စိစစ်တင်ပြနိုင်ရေးအတွက် ရခိုင်ပြည်နယ်၊ စစ်တွေမြို့နယ်ရှိ လက်ရှိလုပ်ကိုင်နေသူ ဆီစက် (၃) စက်နှင့် အသစ်တည်ဆောက်လုပ်ကိုင်ရန် လျှောက်ထားသူ (၂) ဦးနှင့် ကျောက်တော်မြို့နယ်ရှိ ဆီစက်လက်ရှိ လုပ်ကိုင်နေသူ (၁၃) စက်နှင့် အသစ်တည်ဆောက်လုပ်ကိုင်ရန်လျှောက်ထားသူ (၁) ဦး၊ လက်ရှိဆီစက်အား အဆင့်မြှင့်တင်ဆောင်ရွက်လိုသည့် ဆီစက်လုပ်ငန်းရှင်(၁၆)ဦးနှင့် အသစ်တည်ဆောက်တပ်ဆင် လုပ်ကိုင်လိုသည့် လုပ်ငန်းရှင် (၃) ဦး စုစုပေါင်း ဆီစက်ချေးငွေအဆိုပြုတင်ပြထားသူ (၁၉) ဦးအား ကွင်းဆင်းစစ်ဆေးဆောင်ရွက်ခဲ့ပါသည်။

      ဆက်လက်၍ စားသုံးသူရေးရာဦးစီးဌာန၊ စစ်တွေခရိုင်ဦးစီးမှူး ဦးမောင်လှဝင်းက ဆီစက်လုပ်ငန်းရှင်များသို့ မြန်မာနိုင်ငံစားသုံးသူကာကွယ်ရေးကော်မရှင် ညွှန်ကြားချက်အမှတ် (၂/၂၀၁၉)နှင့် စားသုံးသူကာကွယ်ရေးဥပဒေ အခန်း(၁၈)၊ ပုဒ်မ(၄၁)ပါ ပြဋ္ဌာန်းချက်များအား ချပြဆွေးနွေးပြီး ကုန်အညွှန်းအမှတ်တံဆိပ်ဖြင့် ဖြန့်ချိတင်ပို့ရောင်းချနေသော ဆီစက်လုပ်ငန်းရှင်များအား ကုန်အညွှန်းအမှတ်အသားပြည့်စုံစွာဖော်ပြစေရေးနှင့် ကုန်အညွှန်းအမှတ်တံဆိပ်/အမှတ် အသားဖော်ပြမှုမရှိဘဲ ရန်ကုန်၊ စစ်တွေ၊ ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ ရသေ့တောင်၊ ဘူးသီးတောင်၊ မောင်တော၊ ပေါက်တော၊ မြေပုံမြို့နယ်များသို့ ဖြန့်ချိတင်ပို့ရောင်းချနေသော ဆီစက်လုပ်ငန်းရှင်များအား ကုန်အညွှန်းအမှတ်တံဆိပ်/အမှတ်အသားများကို ပြည့်စုံစွာဖော်ပြပြီး စသည့်မြို့နယ်များသို့ ဖြန့်ချိတင်ပို့နိုင်ရေးအတွက် စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးသို့  ကုန်အညွှန်းအမှတ်အသားဖော်ပြခြင်းနှင့်ပတ်သက်၍ စားသုံးသူကာကွယ်ရေးဥပဒေပြဋ္ဌာန်းချက်များနှင့်ကိုက်ညီမှုရှိစေရေး လာရောက်လျှောက်ထားကြရန် ဆွေးနွေးအသိပညာပေးဆောင်ရွက်ခဲ့ကြောင်း သတင်းရရှိပါ သည်။

DOCA(ရခိုင်)

         စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်ဦးစီးမှူးရုံးမှ မြို့နယ်ဦးစီးမှူး ဦးအောင်လွင်နှင့် ဝန်ထမ်းများသည် တိုင်းဒေသကြီး FDA၊ မြန်မာနိုင်ငံရဲတပ်ဖွဲ၊ မြို့နယ်အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့ တို့နှင့်အတူ (၆.၃.၂၀၂၃) ရက်နေ့တွင် နံနက် (၁၀:၀၀) မှ (၁၂:၁၅) နာရီအချိန်အထိ မြို့နယ်ကျန်းမာရေးဦးစီးဌာနရုံးခန်းမ၌ ညောင်တုန်းမြို့ပေါ် ဆေးဆိုင်ရောင်းချသူများအား စားသုံးသူကာကွယ်ရေး အသိပညာပေးဆွေးနွေးမှု ပြုလုပ်ခဲ့ကြပါသည်။

         အဆိုပါဆွေးနွေးပွဲတွင် အစားအသောက်နှင့် ဆေးဝါးကွပ်ကဲရေးဦးစီးဌာနက တာဝန်ရှိသူက အဖွင့်အမှာစကား ပြောကြားပြီးနောက် တားမြစ်ကုန်စည်ဆေးဝါးများကို ဈေးကွက်အတွင်းရောင်းချခြင်း၊ သိုလှောင်ဖြန့်ဖြူးခြင်းမပြုရန်နှင့် ဆေးဆိုင်ရောင်းချသောလုပ်ငန်းရှင်များအနေဖြင့် ဆေးဝါးအကြောင်းနားလည်အောင်လေ့လာထားရန်၊ မိမိလုပ်သော လုပ်ငန်းအကြောင်းကို လက်လှမ်းမှီသလောက် ဖတ်ရ၊မှတ်ရ၊ လေ့လာရ၊ သင်ယူရမည်ဖြစ်ကြောင်း ဈေးဝါးကျွမ်းကျင်အကူသင်တန်းများလည်း တက်ရောက်ရန် လိုအပ်ပါကြောင်း၊ ဌာနတို့မှ ထုတ်ပြန်လျက်ရှိသော လမ်းညွှန်ချက်များကိုလည်း အမြဲမပြတ် လေ့လာထားရမည်ဖြစ်ပါကြောင်းနှင့်  ကျန်းမာရေးဦးစီးဌာနကလည်း စံမမီဆေးဝါးများရောင်းချခြင်း၊ ဖြန့်ဖြူးခြင်းကိစ္စနှင့်ပတ်သက်၍ ဟောပြောဆွေးနွေးခဲ့ကြပါကြောင်း သိရှိရပါသည်။

         စားသုံးသူရေးရာဦးစီးဌာနက ဆွေးနွေးဟောပြောရာတွင် မိမိတို့ဖြန့်ဖြူးရောင်းချနေသော ဆေးဝါးများတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)နှင့် ပတ်သက်၍ စီးပွားရေး လုပ်ငန်းရှင်များအနေဖြင့် မိမိတို့ ထုတ်လုပ်၊ တင်သွင်း၊ ဖြန့်ဖြူးရောင်းချသောကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခုထက်ပို၍တွဲလျက်ဖြစ်စေ ဖော်ပြရမည့်အချက်များအကြောင်း ရှင်းလင်းပြီးနောက် စားသုံးသူပြည်သူများ သောက်သုံးရန်မသင့်သော တားမြစ်ဆေးများ၊ သက်တမ်းလွန်ဆေးများ၊ စပ်ဆေးများ ရောင်းချခြင်းမပြုရန်နှင့် စီးပွားရေးလုပ်ငန်းရှင်လိုက်နာရမည့်တာဝန်များ၊ ကုန်စည်နှင့်စပ်လျဉ်း၍ အာမခံပေးနိုင်မှု၊ စားသုံးသူကာကွယ်ရေးဥပဒေ၏ ပြစ်မှု၊ ပြစ်ဒဏ်များအကြောင်းကို သိရှိနားလည်ရန် အကျယ်တဝင့်ရှင်းလင်း ဆွေးနွေးခဲ့မှုအား ဆေးဆိုင်လုပ်ငန်းရှင်များက သိရှိလိုသည်များမေးမြန်းမှုကို ပြန်လည်ဖြေကြားဆွေးနွေးခဲ့၍ လုပ်ငန်းရှင်(၂၁)ဦးတက်ရောက်ခဲ့ကြောင်း သိရှိရပါသည်။

DOCA(ဧရာဝတီ)