သတင်းနှင့် လှုပ်ရှားမှုများ

     ၁၆-၂-၂၀၂၃ ရက်နေ့တွင် စားသုံးသူရေးရာဦးစီးဌာန၊ ပေါင်မြို့နယ် တာဝန်ခံနှင့်ဝန်ထမ်းများသည် အ-ထ-က(ဆင်ဖြူရပ်)ကျောင်း၌ ကျောင်းမုန့်ဈေးတန်းအား ဈေးကွက်စောင့်ကြည့်စစ်ဆေးခြင်းကိုး ဆောင်ရွက်ခဲ့ပါသည်။

  စားသုံးသူရေးရာဦးစီးဌာနမှ ဝန်ထမ်းများသည် ကျောင်းကျန်းမာရေးကော်မတီနှင့်ပူးပေါင်း၍ ကျောင်းသူ/ကျောင်းသားများ ဘေးကင်းလုံခြုံမှုရှိစေရေးအတွက် ကျောင်းမုန့်ဈေးတန်းအား ဈေးကွက်စောင့်ကြည့်ရာတွင် ကုန်စည်များပေါ်တွင် ကုန်အညွှန်းအမှတ်အသားဖော်ပြမှုရှိ/မရှိ၊ ထုတ်လုပ်ရက်စွဲနှင့် သက်တမ်းကုန်ဆုံးသည့်ရက်စွဲ၊ ဖော်ပြသည့်အမှတ်အသားထင်ရှားမှုရှိ/မရှိတို့ကို စစ်ဆေးပြီးနောက် စားသုံးသူများအား လိမ်လည်လှည့်ဖျားမှုမရှိစေရန် ဈေးဆိုင်ပိုင်ရှင်များအား အသိပညာပေးခြင်း၊ ကုန်အညွှန်းအမှတ်အသားဖော်ပြချက်နှင့်ပတ်သက်၍ အသိပညာပေးခြင်းတို့ ဆောင်ရွက်ခဲ့ကြောင်း သိရှိရပါသည်။

DOCA(မွန်)

      ၂၁-၂-၂၀၂၃ ရက်နေ့တွင် စားသုံးသူရေးရာဦးစီးဌာန၊ မုဒုံမြို့နယ်တာဝန်ခံသည်  ဘဲရမ်း၊ ကွမ်တာ၊ မြို့မ (၁)၊ မြို့မ (၂)၊ မြို့မ (၃)၊ မြို့မ (၄)၊ ကော့ခပုံ၊ ကင်းချောင်းကျေးရွာများရှိ ဆန်၊ စပါးလုပ်ငန်းရှင်များအား တွေ့ဆုံဆွေးနွေးခဲ့ပါသည်။

   ထိုသို့တွေ့ဆုံဆွေးနွေးရာတွင် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ လိုက်နာရမည့်တာဝန်များဖြစ်သည့် စားသုံးသူနစ်နာဆုံးရှုံးမှုဖြစ်ပွားစေမည့် ကုန်စည် သို့မဟုတ် ဝန်ဆောင်မှုကို တိုက်ရိုက်ရောင်းချခြင်း သို့မဟုတ် သွယ်ဝိုက်ရောင်းချခြင်းမှ ရှောင်ကြဉ်ခြင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ ကတိပြုထားသောအာမခံချက်နှင့် ကိုက်ညီမှုမရှိပါက ကတိပြုထားသည့်အတိုင်း တာဝန်ယူဆောင်ရွက်ပေးခြင်း စသည့်အကြောင်းအရာများကို ရှင်းလင်းအသိပညာပေးဆွေးနွေးခဲ့ပြီးနောက် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ၏ တာဝန်များဖော်ပြပါရှိသော လက်ကမ်းစာစောင်များအား ဖြန့်ဝေပေးခဲ့ကြောင်း သိရှိရပါသည်။

DOCA(မွန်)

     ၂၀၂၃ ခုနှစ်  ဖေဖော်ဝါရီလ ၂၇ ရက်နေ့၊ နံနက် ၀၉:၃၀ နာရီအချိန်က မော်လမြိုင်ပညာရေးဒီဂရီကောလိပ်ကျောင်း၌  စားသုံးသူကာကွယ်ရေး အသိပညာပေးဟောပြောခဲ့ပါသည်။

    စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးနှင့်ဝန်ထမ်းများသည် မွန်ပြည်နယ် မော်လမြိုင်ပညာရေးဒီဂရီကောလိပ်ကျောင်းတွင်  စားသုံးသူကာကွယ်ရေး အသိပညာပေးဟောပြောခဲ့ပါကြောင်း၊ အဆိုပါဟောပြောပွဲ၌ ကျောင်းအုပ်ဆရာမကြီး ဒေါ်ဝင့်သီင်္ဂီကျော်က  အဖွင့်အမှာစကားပြောကြားခဲ့ပါကြောင်း၊ ထို့နောက် စားသုံးသူရေးရာဦးစီးဌာနမှ ပြည်နယ်ဦးစီးမှူး ဦးဝင်းထွန်းက စားသုံးသူကာကွယ်ရေး အသိပညာပေးဟောပြောဆွေးနွေးခဲ့ကြောင်း၊ စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်၊ စားသုံးသူများအခွင့်အရေးရရှိစေရေး အခွင့်အရေး(၈)ချက်နှင့်တာဝန်များ၊ ကုန်အညွှန်းအမှတ်အသားပြည်စုံမှသာလျှင် စားသုံးသူများစားသုံးကြရန် ကုန်အညွှန်းအမှတ်သားဖော်ပြချက်တို့အား ဟောပြောကြောင်း၊ စီးပွားရေးလုပ်ငန်းရှင်များနှင့်တာဝန်များအကြောင်းတို့အား ပြောကြားပြီးနောက် စားသုံးသူရေးရာဦးစီးဌာနမှ ဒုတိယဦးစီးမှူး ဒေါ်ခင်ကြည်က စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ(CICC)နှင့်ပတ်သက်သော အကြောင်းအရာများ၊ တိုင်ကြားနိုင်သူများ၊ တိုင်ကြားနိုင်မည့်နေရာများ၊ တိုင်ကြားဖြေရှင်းမှုများ၊ တိုင်ကြားစာနှင့်ပတ်သက်၍ ပညာပေးဥပမာများ၊    စားသုံးသူအခွင့်အရေးများရရှိစေရေး၊ နစ်နာမှုများနှင့်ပတ်သက်၍ ကုစားမှုတို့ကို ပြောကြားခဲ့ကြောင်း၊ တက်ရောက်သည့် ကျောင်းအုပ်ဆရာမကြီးနှင့် ဆရာ/ဆရာမ (၅၃၅) ဦးတို့အား စားသုံးသူကာကွယ်ရေး အသိပညာပေးလက်ကမ်းစာစောင်များ ပေးအပ်ခဲ့ကြကြောင်း  သတင်းရရှိပါသည်။

DOCA(မွန်)

   မြန်မာနိုင်ငံစားသုံးသူကာကွယ်ရေးကော်မရှင်၏ လုပ်ငန်းညှိနှိုင်းအစည်းအဝေး(၁/၂၀၂၃)ကို ၂၀၂၃ ခုနှစ်၊ မတ်လ ၁ ရက်၊ မွန်းလွဲ (၁၄:၀၀) နာရီအချိန်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ အစည်းအဝေးခန်းမ၌ ကျင်းပပြုလုပ်ရာ မြန်မာနိုင်ငံစားသုံးသူကာကွယ်ရေးကော်မရှင် ဥက္ကဋ္ဌ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဦးအောင်နိုင်ဦး တက်ရောက်အမှာစကားပြောကြားခဲ့သည်။ အစည်းအဝေးတွင် ကော်မရှင်ဥက္ကဋ္ဌ၊ ပြည်ထောင်စုဝန်ကြီးက စားသုံးသူကာကွယ်ရေး လုပ်ငန်းများ ဆောင်ရွက်ရာတွင် စားသုံးသူတိုင်ကြားမှုနှင့် အရေးယူမှုဆိုင်ရာ လုပ်ငန်းစဉ်၊ ဈေးကွက်စောင့်ကြည့်စစ်ဆေးရေးလုပ်ငန်းစဉ်နှင့် ဘေးအန္တရာယ်ရှိသော ကုန်စည် သို့မဟုတ် ဝန်ဆောင်မှုများကို ဈေးကွက်အတွင်းမှ ပြန်လည်သိမ်းဆည်းစေခြင်းနှင့် တားမြစ်ခြင်းဆိုင်ရာ လုပ်ငန်းစဉ်များကို ထုတ်ပြန်ထားရှိပြီဖြစ်ကြောင်း၊ သို့သော် စားသုံးသူများတွင် စားသုံးသူကာကွယ်ရေးဥပဒေနှင့် ဥပဒေပါ စားသုံးသူအခွင့်အရေးများကို ကောင်းစွာသိရှိသူ အလွန်နည်းပါးနေသေးသည်ကို တွေ့ရှိရပါကြောင်း၊ အထူးသဖြင့် စားသုံးသူများသည် မိမိ၏နစ်နာဆုံးရှုံးမှုအတွက် ရှင်းလင်းတင်ပြခွင့်၊ တိုင်ကြားခွင့်နှင့် ကုစားခွင့်များကို ဥပဒေက စားသုံးသူအခွင့်အရေးများအဖြစ် ပေးအပ်ထားမှုအပေါ် သိရှိသူအလွန်နည်းပါးပါကြောင်း၊ စားသုံးသူတွင် ဥပဒေအရ ပေးအပ်သော အခွင့်အရေးများရှိသကဲ့သို့ တစ်ဖက်တွင်လည်း ဥပဒေအရ လိုက်နာရမည့် တာဝန်များလည်း ရှိပါကြောင်း၊ ယင်းနှင့်စပ်လျဉ်း၍ အသိပညာပေးလုပ်ငန်းများကို မဖြစ် မနေဆောင်ရွက်သွားရန် လိုအပ်ပါကြောင်း၊ ပြည်ထောင်စုနယ်မြေ၊ တိုင်းဒေသကြီးနှင့် ပြည်နယ်များတွင် ဖွဲ့စည်းထားသော စားသုံးသူရေးရာကော်မတီများကိုလည်း ဥပဒေအရ လုပ်ပိုင်ခွင့်များ အပ်နှင်းထားပြီဖြစ်ရာ ကော်မတီများအနေဖြင့် စားသုံးသူအသိပညာပေး လုပ်ငန်းအပါအဝင် မိမိ၏လုပ်ပိုင်ခွင့်အရ ထိထိရောက်ရောက် ဆောင်ရွက်စေလိုကြောင်း၊ လိုအပ်သည်များကိုလည်း ကော်မရှင်နှင့် ဆက်သွယ်၍ ဆောင်ရွက်စေလိုပါကြောင်း၊ စားသုံးသူ အသိပညာပေးဆောင်ရွက်ရာတွင်လည်း လူလတ်ပိုင်းနှင့် လူငယ်ပိုင်းများကို အဓိကထား၍ ဆောင်ရွက်ရန် လိုအပ်လာသည်ကို တွေ့ရှိရကြောင်း ဆွေးနွေးပြောကြားပါသည်။ ဆက်လက်၍ ကော်မရှင်ဥက္ကဋ္ဌ ပြည်ထောင်စုဝန်ကြီးက ၂၀၂၃ ခုနှစ်၊ မတ်လ ၁၅ ရက် တွင် ကျရောက်မည့် ကမ္ဘာ့စားသုံးသူအခွင့်အရေးနေ့ကို “စားသုံးသူကဏ္ဍမြှင့်တင်ဖို့ သန့်ရှင်း စွမ်းအင်ကူးပြောင်းစို့”ဟူသည့် ဆောင်ပုဒ်နှင့်အညီ တိုင်းဒေသကြီးနှင့် ပြည်နယ်များ၌ စားသုံးသူပြည်သူများ စိတ်ပါဝင်စားနိုင်သော အစီအစဉ်များကို ဆန်းသစ်တီထွင်၍ ကျယ်ပြန့်စွာ ဆောင်ရွက်သွားနိုင်ရေးနှင့်စပ်လျဉ်း၍ ဆွေးနွေးပြောကြားပါသည်။

     ထို့နောက် ယခင် အစည်းအဝေးဆုံးဖြတ်ချက်များအပေါ် ဆောင်ရွက်ပြီးစီးမှုအခြေအနေများ၊ အဆုံးအဖြတ်ပေးရမည့် လုပ်ငန်းဆောင်ရွက်ချက်များနှင့်စပ်လျဉ်း၍ ကော်မရှင် အတွင်းရေးမှူး စားသုံးသူရေးရာဦးစီးဌာန ညွှန်ကြားရေးမှူးချုပ် ဦးမြင့်ချိုက ရှင်းလင်းတင်ပြပြီး တင်ပြချက်များအပေါ် ကော်မရှင်ဥက္ကဋ္ဌ၊ ကော်မရှင်အဖွဲ့ဝင်များနှင့် တက်ရောက်လာကြသူများက ပြန်လည်ဆွေးနွေးကာ အစည်းအဝေးကို ရုပ်သိမ်းခဲ့ပါသည်။ အဆိုပါအစည်းအဝေးသို့ မြန်မာနိုင်ငံစားသုံးသူကာကွယ်ရေးကော်မရှင်အဖွဲ့ဝင်များ၊ ပြည်ထောင်စုနယ်မြေ၊ တိုင်းဒေသကြီးနှင့် ပြည်နယ်စားသုံးသူရေးရာကော်မတီဥက္ကဌများ၊ တာဝန်ရှိသူများ တက်ရောက်ခဲ့ကြကြောင်း သတင်းရရှိပါသည်။

DOCA (Policy)

   စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးတွင် ၂၇-၂-၂၀၂၃ရက်နေ့ (၁၃:၀၀) နာရီအချိန်တွင် ကရင်ပြည်နယ်ဦးစီးမှူး ဦးသန်းဦး ဦးဆောင်၍ ပြည်နယ်၊ ခရိုင်ရှိဝန်ထမ်းများ၊ ဌာနခွဲတာဝန်ခံများနှင့် ဝန်ထမ်းများနှင့်အတူ တွေ့ဆုံ၍ ၂၀၂၃ ခုနှစ်၊ ဖေဖော်ဝါရီလ အတွက်  ရုံးလုပ်ငန်းညှိနှိုင်းအစည်းအဝေးနှင့် ဝန်ထမ်းထု ဆန္ဒဖော်ထုတ်ပွဲ ကျင်းပခဲ့ကြောင်း သိရှိရပါသည်။

    အခမ်းအနားတွင် ပြည်နယ်ဦးစီးမှူး ဦးသန်းဦးက အဖွင့်အမှာစကားပြောကြားပြီး ဝန်ထမ်းများ အလေးထား လိုက်နာဆောင်ရွက်ရမည့် အထက်ဌာနများ၏ လမ်းညွှန်ချက်များကို ထပ်ဆင့် ချပြရှင်းလင်းဆွေးနွေးခဲ့ကြောင်းနှင့် အစီအစဉ်အရ ဌာနခွဲများမှ   ဌာန၏ ၂၀၂၂-၂၀၂၃  ဘဏ္ဍာနှစ်အတွင်း လုပ်ငန်းဆောင်ရွက်ချက်များမှ ဌာနခွဲအလိုက် ဆောင်ရွက်မှု အခြေအနေများကို တင်ပြဆွေးနွေးခဲ့ပြီး တင်ပြချက်များမှ အားသာချက် အားနည်းချက်များကို သုံးသပ်၍ ရှေ့ဆက်ဆောင်ရွက်ရမည်များကို လမ်းညွှန်မှာကြားခဲ့ပြီး လိုအပ်သည်များကို ပေါင်းစပ်ဆောင်ရွက်ခဲ့ကြောင်းနှင့် ဆက်လက်ပြီး ဝန်ထမ်းထု ဆန္ဒဖော်ထုတ်ပွဲ   ကျင်းပခဲ့ကြောင်း သိရှိရပါသည်။

   စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးသည် ရုံးလုပ်ငန်းများ ဆောင် ရွက်ရာတွင် အဆင်ပြေချောမွေ့စေရေးနှင့် ဝန်ထမ်းထုကြား အခက်အခဲရှိပါက ဖော်ထုတ်၍ အချိန်မီ ပေါင်းစပ်ဖြေရှင်းဆောင်ရွက်နိုင်ရေးအတွက်  လုပ်ငန်းညှိနှိုင်းအစည်းအဝေးနှင့် ဝန်ထမ်းထု ဆန္ဒဖော်ထုတ်ပွဲကို အခါအားလျော်စွာနှင့် အနည်းဆုံး တစ်လတစ်ကြိမ် ကျင်းပဆောင်ရွက်လျက်ရှိကြောင်းနှင့်  ယခုအခမ်းအနားတွင် ပြည်နယ်ဦးစီးမှူးပါ ဝန်ထမ်းစုစုပေါင်း (၁၄) ဦး တက်ရောက်ခဲ့ကြောင်းနှင့် အစည်းအဝေးဆုံးဖြတ်ချက် (၁၀) ချက် ချမှတ်နိုင်ခဲ့ကြောင်း အခမ်းအနားကို (၁၅:၀၀) နာရီအချိန်တွင် ရုပ်သိမ်းလိုက်ကြောင်း သတင်းရရှိသည်။

DOCA(ကရင်)