သတင်းနှင့် လှုပ်ရှားမှုများ

         ၂၀၂၃ခုနှစ်၊ ဖေဖော်ဝါရီလ၊ ၂၇ရက်နေ့ နေ့လည်(၁၃:၀၀)နာရီအချိန်၌ ဟိုတယ်နှင့်ခရီးသွားလုပ်ငန်းကဏ္ဍအတွင်းရှိ၊ အသေးစား၊ အငယ်စားနှင့်အလတ်စား (MSMEs)စီးပွားရေးလုပ်ငန်းများ ဖွံ့ဖြိုး တိုးတက်ရေးဆိုင်ရာ အသိပညာပေးဆွေးနွေးပွဲကို မကွေးမြို့၊ ကန်ပြားကျေးရွာရှိ Royal Palace Hotel ၌ကျင်းပပြုလုပ်ခဲ့ပါသည်။

          အသိပညာပေးဆွေးနွေးပွဲတွင် မကွေးတိုင်းဒေသကြီးအစိုးရအဖွဲ့၊ စီးပွားရေးရာဝန်ကြီး ဦးအောင်ချိန်က အဖွင့်အမှာစကားပြောကြားခဲ့ပြီး Health & Protocol National Level Plaque (HSP) နိုင်ငံအဆင့် ကျန်းမာရေးနှင့် ဘေးကင်းလုံခြုံရေးအသိအမှတ်ပြုတံဆိပ်ရရှိသော Shwe Mann Hotel၊ လေသာကုန်းတည်းခိုရိပ်သာ၊ သီရိရတနာဟိုတယ်၊ ရွှေပြည်ဟိန်းဟိုတယ်၊ Hotel Juno၊ တော်ဝင်နန်းဟိုတယ်တို့အား စီးပွားရေးရာဝန်ကြီးမှ အသိအမှတ်ပြုတံဆိပ်များချီးမြှင့်ခဲ့ပါသည်။

          ဆက်လက်၍ ဟိုတယ်နှင့်ခရီးသွားညွှန်ကြားမှူးဦးစီးဌာန၊ ညွှန်ကြားရေးမှူးကလည်းကောင်း၊ စက်မှုကြီးကြပ်စစ်ဆေးရေးဦးစီးဌာန၊ တိုင်းဒေသကြီးဦးစီးမှူး ဦးဇော်ထွန်းအောင်ကလည်းကောင်း၊ အသေးစား စက်မှုလက်မှုလုပ်ငန်းဦးစီးဌာန၊ တိုင်းဒေသကြီးဦးစီးမှူး ဦးစိုးနိုင်ထူးကလည်းကောင်း၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး ဦးမြင့်ဝင်းက စာသုံးသူကာကွယ်ရေးဥပဒေနှင့်စီးပွားရေးလုပ်ငန်းရှင်များ၏ အခန်းကဏ္ဍကိုလည်းကောင်း၊ မြန်မာနိုင်ငံဟိုတယ်ဆိုင်ရာ လုပ်ငန်းရှင်များ အသင်း(မကွေးဇုန်) တာဝန်ရှိသူ တစ်ဦးကလည်းကောင်း အသီးသီးဆွေးနွေးခဲ့ကြပါသည်။

       ထို့နောက် တက်ရောက်လာသည့်စီးပွားရေးလုပ်ငန်းရှင်များက သိရှိလိုသည်များကိုမေးမြန်းမှုအပေါ် ပြန်လည်ဆွေးနွေးခြင်းများ ဆောင်ရွက်ခဲ့ကြပါသည်။ ဟိုတယ်နှင့်ခရီးသွားညွှန်ကြားမှူးဦးစီးဌာန၊ ညွှန်ကြားရေးမှူးကကျေးဇူး တင်စကားပြောကြားကာ အခမ်းအနားကိုအောင်မြင်စွာရုပ်သိမ်းခဲ့ကြပါသည်။ အခမ်းအနားသို့ ဌာနဆိုင်ရာမှ တာဝန်ရှိသူများ၊ စီးပွားရေးလုပ်ငန်းရှင်များ၊ စုစုပေါင်း(၂၆)ဦးခန့် တက်ရောက်ခဲ့ကြပါကြောင်း သတင်းရရှိပါသည်။

DOCA(စစ်ကိုင်း)

  ၂၀၂၃ခုနှစ် ဖေဖော်ဝါရီလ (၂၄) ရက်နေ့ နေ့လယ် (၁၃:၃၀)နာရီအချိန်တွင် စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူးနှင့်တာဝန်ရှိသူများသည် အမှတ်(၃) ရပ်ကွက်အတွင်းရှိ Popular အမှတ်တံဆိပ် သောက်ရေသန့်ထုတ်လုပ်ရေး စက်ရုံအား ထုတ်ကုန် များလုံခြုံစိတ်ချရမှုရှိစေရေးနှင့် ကုန်အညွှန်းအမှတ်အသားပြည့်စုံစွာ ဖော်ပြပါရှိရေးတို့အား ဈေးကွက်စောင့်ကြည့်စစ်ဆေးခဲ့ပြီး သောက်ရေသန့်ထုတ်လုပ်ရေး စီးပွားရေးလုပ်ငန်းရှင်နှင့်တွေ့ဆုံဆွေးနွေးခြင်းလုပ်ငန်းများ ဆောင်ရွက်ခဲ့ပါသည်။

  ထိုသို့ဈေးကွက် ဈေးကွက်စောင့်ကြည့်စစ်ဆေးခြင်း ဆောင်ရွက်ရာတွင် Popular အမှတ်တံဆိပ် သောက်ရေသန့်ထုတ်လုပ်ရေး လုပ်ငန်းအနေဖြင့် သက်ဆိုင်ရာ အစားအသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက်အား ပြုလုပ်လျှောက်ထားဆဲဖြစ်ကြောင်း စစ်ဆေးတွေ့ရှိရပါသည်။

 ဆက်လက်၍ စစ်ဆေးရေးမှူးနှင့်တာဝန်ရှိသူများသည် စားသုံးသူကာကွယ်ရေးဥပဒေ အခန်း(၁၀)ပါ"စီးပွားရေးလုပ်ငန်းရှင်၏တာဝန်များ”ကို သိရှိလိုက်နာဆောင်ရွက်စေရန် အသိပညာပေးဆွေးနွေးခြင်း လုပ်ငန်းများ ဆောင်ရွက်ခဲ့ပါသည်။

DOCA(ရှမ်း)

    ( ၂၁-၂-၂၀၂၃ ) ရက်နေ့တွင် ကလေးခရိုင်အတွင်းရှိ ကလေးဝမြို့၊ အမှတ်( ၂ )ရပ်ကွက်အတွင်းရှိ ကုန်မျိုးစုံဆိုင်သို့ စားသုံးသူရေးရာဦးစီးဌာန၊ မြို့နယ်တာဝန်ခံက ဦးဆောင်၍ စည်ပင်သာယာရေးကော်မတီနှင့်ပူးပေါင်း၍  ဈေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

     ဈေးကွက်စောင့်ကြည့်စစ်ဆေးခြင်း ဆောင်ရွက်ရာတွင် ကလေးဝမြို့အတွင်း ရောင်းချနေသည့်စားသောက်ကုန်များတွင် ကုန်အညွှန်းအမှတ်အသားပြည့်စုံခြင်းရှိ/မရှိနှင့် တားမြစ်ထားသည့်အစားအသောက်များနှင့် သက်တမ်းလွန်အစားအသောက်များ ရောင်းချခြင်း ရှိ/မရှိတို့ကို သွားရောက်စစ်ဆေးခဲ့ပါသည်။

    ကလေးဝမြို့၊ အမှတ်( ၂ )ရပ်ကွက်အတွင်းရောင်းချနေသည့် စီးပွားရေးလုပ်ငန်းရှင်များအနေဖြင့် မိမိတို့ရောင်းချနေသည့် စားသောက်ကုန်များသည် စားသုံးသူကာကွယ်ရေးဥပဒေပါ အချက်အလက်များကို အလေးထားလိုက်နာဆောင်ရွက်ကြရန်နှင့် သက်ဆိုင်ရာဌာနဆိုင်ရာများ၏ လုပ်ငန်းလိုင်စင်များကိုလည်း မြင်သာသည့်နေရာများတွင် ချိတ်ဆွဲထားကြရန် ပြောကြားခဲ့ကြောင်း သတင်းရရှိပါသည်။

DOCA(စစ်ကိုင်း)

     စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ၂၀၂၃ ခုနှစ်၊ ဖေဖော်ဝါရီလ (၂၂)ရက် ၊ နံနက်(၁၀:၀၀)နာရီအချိန်တွင် လွိုင်ကော်မြို့၊ ဈေးပိုင်းရပ်ကွက်၊ မင်္ဂလာရပ်ကွက်နှင့် ရွှေတောင်ရပ်ကွက်ရှိ စိုက်ပျိုးရေးသုံးပစ္စည်းဓါတ်မြေဩဇာနှင့် ပိုးသတ်ဆေးဆိုင်များသို့ကုန်စည် များပေါ်တွင် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူ ကာကွယ်ရေးကော်မရှင် ညွှန်ကြားချက်အမှတ် (၂/၂၀၁၉) ပါသတ်မှတ်ချက်များနှင့် ကိုက်ညီမှု ရှိ/မရှိ၊ မြို့နယ်ရဲတပ်ဖွဲ့၊ မြို့နယ်အထွေထွေအုပ်ချုပ်ရေးဦးစီးဌာန၊ စိုက်ပျိုးရေးဦးစီးဌာန၊ မြို့နယ် စည်ပင်သာယာရေးအဖွဲ့၊ အစားအသောက်နှင့် ဆေးဝါးကွပ်ကဲရေးဦးစီးဌာနတို့ဖြင့် ပူးပေါင်း၍ ဈေးကွက်စောင့်ကြည့်ကွင်းဆင်းစစ်‌ဆေးခြင်း ဆောင်ရွက်ခဲ့ပါသည်။

    ထိုသို့စစ်ဆေးရာတွင် စိုက်ပျိုးရေးသုံးပစ္စည်းဓါတ်မြေဩဇာနှင့် ပိုးသတ်ဆေးရောင်းချသောအရောင်းဆိုင်များတွင် စိုက်ပျိုးသူတောင်သူများဘေးကင်းလုံခြုံမှုရှိ စေရန် ကုန်အညွှန်းအမှတ်အသားသတ်မှတ်ချက်များကို မြန်မာစာဖြင့် တိကျစွာဖော်ပြထားသော ဓါတ်မြေဩဇာနှင့် ပိုးသတ်ဆေးများကိုသာ အများဆုံးတင်သွင်းရောင်းချသည်ကိုစစ်ဆေးတွေ့ ရှိခဲ့ရပါသည်။ ထို့နောက် သက်ဆိုင်ရာဌာနက တားမြစ်ပိတ်ပင်ထားသော ဓါတ်မြေဩဇာနှင့်ပိုးသတ်ဆေးများအား တင်သွင်းရောင်းချခြင်းမပြုကြရန်၊ တရားဝင်မှတ်ပုံတင်ထားသော ဓါတ်မြေဩဇာနှင့် ပိုးသတ်ဆေးများကိုသာ တင်သွင်းရောင်းချကြရန်နှင့် ကုန်စည်နှင့်သက်ဆိုင်သည့် ကုန်အညွှန်း အမှတ်အသားတွင်ဖော်ပြထားသည့် အချက်အလက်များနှင့်  ကိုက်ညီမှုမရှိသောကုန်စည်များကို ရောင်းချခြင်းနှင့် ကုန်သွယ်ခြင်းမပြုကြရန်၊ သတ်မှတ်ချက် နှင့်မကိုက်ညီသော ဓာတ်မြေဩဇာနှင့် ပိုးသတ်ဆေးများ ဈေးကွက်အတွင်းတွေ့ရှိပါက စိုက်ပျိုးရေးဦးစီးဌာန၏ ဥပဒေအရသော်လည်း ကောင်း၊စားသုံးသူကာကွယ်ရေးဥပဒေအရသော်လည်းကောင်းအရေး ယူခံရနိုင်ကြောင်း စိုက်ပျိုးရေး သုံးပစ္စည်းဓါတ်မြေဩဇာနှင့်ပိုးသတ်ဆေးရောင်းချသော အရောင်းဆိုင် (၃)ဆိုင်အား အသိပညာပေး ဆောင်ရွက်ခဲ့မှုကြောင်းသတင်းရရှိပါသည်။

DOCA(ကယား)

     မကွေးတိုင်းဒေသကြီး MSMEs Agency နာယက၊ တိုင်းဒေသကြီးဝန်ကြီးချုပ် ဦးတင့်လွင်နှင့် MSMEs လုပ်ငန်းရှင်များ တွေ့ဆုံပွဲအခမ်းအနားကို ၂၀၂၃ ခုနှစ်၊ ဖေဖော်ဝါရီလ (၂၃) ရက်နေ့၊ နံနက် (၁၀:၀၀) နာရီအချိန်တွင် မကွေးမြို့၊ မြို့တော်ခန်းမ၌ ကျင်းပခဲ့ရာ မကွေးတိုင်းဒေသကြီး ဝန်ကြီးချုပ်နှင့် အစိုးရအဖွဲ့ဝင် ဝန်ကြီးများ၊ စားသုံးသူရေးရာဦးစီးဌာန၊ ဒုတိယညွှန်ကြားရေးမှူး ဦးမြင့်ဝင်းအပါအဝင် တိုင်းဒေသကြီး၊ ခရိုင်/မြို့နယ်အဆင့် ဌာနဆိုင်ရာတာဝန်ရှိသူများ၊ စုစုပေါင်း (၂၅) ဦးနှင့် MSMEs စီးပွားရေးလုပ်ငန်းရှင်များ (၁၃၀) ဦး၊ စုစုပေါင်း ( ၁၅၅ ) ဦးတက်ရောက်ခဲ့ကြပါသည်။

     ဦးစွာ တွေ့ဆုံပွဲတွင် မကွေးတိုင်းဒေသကြီး MSMEs Agency နာယက တိုင်းဒေသကြီးဝန်ကြီးချုပ် ဦးတင့်လွင်က မကွေးတိုင်းဒေသကြီးအတွင်း ထုတ်လုပ်မှုလုပ်ငန်းလုပ်ကိုင်သူများ၊ ဟိုတယ်၊ မိုတယ်၊ တည်းခိုခန်း စသည့် ဝန်ဆောင်မှုလုပ်ငန်းလုပ်ကိုင်သူများ၊ ရောင်းဝယ်မှုကဏ္ဍလုပ်ကိုင်သူများ၊ ရေသန့်လုပ်ငန်းရှင်များ၊ အစားအသောက်လုပ်ငန်းရှင်များ၊ စိုက်ပျိုးရေး၊ မွေးမြူရေးလုပ်ကိုင်သူများ စသည်ဖြင့် ကဏ္ဍပေါင်းစုံပါဝင်သည့် MSMEs လုပ်ငန်းရှင်များကို ဖိတ်ကြားပြီး ကြုံတွေ့နေရသည့်အခက်အခဲနှင့်လိုအပ်ချက်များကို သိရှိပြီး MSMEs Agency အနေဖြင့် လုပ်ဆောင်ပေးနိုင်မည့်အရာများ၊ တိုင်းဒေသကြီးအစိုးရအဖွဲ့အနေဖြင့် ကူညီပေးနိုင်မည့်အပိုင်းများအား ကူညီပေးမည်ဖြစ်ကြောင်း၊ တိုင်းဒေသကြီးအစိုးရအဖွဲ့က ဆောင်ရွက်မပေးနိုင်လျှင် ပြည်ထောင်စုကို ဆက်လက်တင်ပြပေးမည်ဖြစ်ကြောင်း၊ MSMEs လုပ်ငန်းရှင်များ၏အခက်အခဲကို တစ်ဖက်တစ်လမ်းမှကူညီပေးပြီး ဖွံ့ဖြိုးတိုးတက်အောင် လုပ်ဆောင်ချင်သည့်အတွက် တွေ့ဆုံဆွေးနွေးပွဲ ကျင်းပရခြင်းဖြစ်ပါကြောင်း၊ မကွေးတိုင်းဒေသကြီးအနေဖြင့် တိုင်းဒေသကြီးအတွင်း အသေးစား၊ အငယ်စားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုးတက်ရေးကို ကျယ်ကျယ်ပြန့်ပြန့် ထိရောက်စွာအကောင်အထည်ဖော်ဆောင်ရွက်နိုင်ရန်အတွက် မကွေးတိုင်းဒေသကြီး အသေးစား၊ အငယ်စားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုးတက်ရေးအေဂျင်စီကို ပြင်ဆင်ဖွဲ့စည်းထားပြီးဖြစ်ပါကြောင်း၊ MSMEs လုပ်ငန်းများမှာ စီးပွားရေးလုပ်ငန်းများ၏ (၉၀%) ကျော်ရှိနေသဖြင့် မြန်မာနိုင်ငံ၏ အဓိကကျောရိုးမဏ္ဍိုင်ဖြစ်နေပြီး နိုင်ငံလူဦးရေ၏လေးပုံသုံးပုံကို MSMEs လုပ်ငန်းများမှ အလုပ်အကိုင်အခွင့်အလမ်းများ ဖြည့်ဆည်းပေးနေသည့်အတွက် မြန်မာနိုင်ငံအပါအဝင် အာရှနိုင်ငံများမှ  MSMEs များ၏ အခန်းကဏ္ဍသည် အလွန်အရေးပါသောနေရာတွင် ရှိနေခြင်းဖြစ်ပါကြောင်း၊ MSMEs ၏ အဓိပ္ပါယ်ဖွင့်ဆိုချက်မှာ ထုတ်လုပ်မှု၊ ရောင်းဝယ်မှု၊ ဝန်ဆောင်မှုနှင့် အခြား စသည့် စီးပွားရေးလုပ်ငန်းများအားလုံး အကျုံးဝင်သည့်အတွက် တိုင်းဒေသကြီးအတွင်းရှိ အစိုးရဌာနများတွင်  တရားဝင်မှတ်ပုံတင်ထားသည့်   စီးပွားရေးလုပ်ငန်းစုစုပေါင်း ( ၂၂၄၅၆ ) ခုရှိပြီး၊ MSMEs လုပ်ငန်းရှင်များကို SME Member Card ထုတ်ပေးမှုအနေဖြင့် အသေးစား ( ၂၈၉၈ ) ခု၊ အလတ်စား  ( ၂၆၇ ) ခု၊ စုစုပေါင်း ( ၃၁၆၅ ) ခု ထုတ်ပေးထားပြီးဖြစ်ပါကြောင်း၊ နိုင်ငံတော်ဝန်ကြီးချုပ်လမ်းညွှန်ခဲ့သည့် မကွေးတိုင်းဒေသကြီးအနေဖြင့် စားသုံးဆီနှင့်ချည်ထည်ပစ္စည်းများကို အများဆုံးထုတ်လုပ်သည့် တိုင်းဒေသကြီးဖြစ်စေရန် ကြိုးပမ်းဆောင်ရွက်ရန်နှင့် ဒေသထွက် ကုန်ကြမ်းကို အခြေခံသည့် MSMEs လုပ်ငန်းများကို အားပေးဆောင်ရွက်ရန် လမ်းညွှန်မှာကြားသွား သည့်အတိုင်း မကွေးတိုင်းဒေသကြီး MSMEs Agency နှင့် MSMEs လုပ်ငန်းရှင်များ ပေါင်းစပ်ပြီး အကောင်အထည်ဖော်ဆောင်ရွက်သွားရမည်ဖြစ်ပါကြောင်း၊ မကွေးတိုင်းဒေသကြီးအစိုးရအဖွဲ့အနေဖြင့် မကွေးမြို့တွင် စက်မှုဇုန်တစ်ခု အကောင်အထည်ဖော်ရန်အတွက် ဆောင်ရွက်လျက်ရှိပြီး သတ်မှတ်ထားသည့် ဥပဒေ၊ လုပ်ထုံးလုပ်နည်းများနှင့်အညီ လုပ်ဆောင်နေရသည့်အတွက် မကြာမီကာလတွင် မကွေးစက်မှုဇုန်အဖြစ် အကောင်အထည်ပေါ်လာမည်ဖြစ်ပါကြောင်း ပြောကြားခဲ့ပါသည်။

      ဆက်လက်၍ တက်ရောက်လာသည့် MSMEs လုပ်ငန်းရှင် (၃၄) ဦးက သိရှိလိုသည်များနှင့် ကြုံတွေ့နေရသည့်အခက်အခဲများအား  မေးမြန်းတင်ပြခဲ့ကြရာ MSMEs လုပ်ငန်းရှင်များ၏ မေးမြန်းချက်များအပေါ် သက်ဆိုင်ရာဌာနများက ပြန်လည်ဖြေကြားပေးခဲ့ကြပြီး မကွေးတိုင်းဒေသကြီး MSMEs Agency နာယက တိုင်းဒေသကြီးဝန်ကြီးချုပ် ဦးတင့်လွင်က ဆွေးနွေးတင်ပြချက်များအပေါ် ခြုံငုံသုံးသပ်၍ တိုင်းဒေသကြီးအစိုးရအဖွဲ့က ဆောင်ရွက်ပေးနိုင်မည့်ကိစ္စရပ်များနှင့်ပတ်သက်၍ ပေါင်းစပ်ညှိနှိုင်းဆောင်ရွက်ပေးမည်ဖြစ်ပါကြောင်း ဆွေးနွေးပြောကြားခဲ့ပြီး တွေ့ဆုံဆွေးနွေးပွဲကို နေ့လယ် ( ၁၄:၀၀ ) နာရီအချိန်တွင် ရုပ်သိမ်းခဲ့ပါသည်။

DOCA(မကွေး)