သတင်းနှင့် လှုပ်ရှားမှုများ

          ရှမ်းပြည်နယ်(တောင်ပိုင်း)၊ စားသုံးသူရေးရာဦးစီးဌာန၊ လွိုင်လင်ခရိုင်ဦးစီးမှူးရုံးမှ ဝန်ထမ်းများသည် ၂၀၂၅ ခုနှစ်၊ ဖေဖော်ဝါရီလ(၁၉)ရက်နေ့၊ နံနက် (၁၁:၀၀)နာရီအချိန်တွင် နမ့်စန်မြို့ပေါ်ရှိ စားသုံးသူပြည်သူ များအား အွန်လိုင်းစနစ်ဖြင့်ရောင်းချခြင်းလုပ်ငန်းများနှင့်စပ်လျဉ်း၍ အသိပညာပေးဟောပြောခြင်းများ ဆောင်ရွက်ခဲ့ပါသည်။

          ထိုဟောပြောပွဲတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ သတ်မှတ်ထားသည့် အရေးကြီးကုန်စည်နှင့်ဝန်ဆောင်မှုများအကြောင်း၊ မည်သူမဆို အွန်လိုင်းဖြင့်ရောင်းချခြင်းလုပ်ငန်းကို မှတ်ပုံတင်လက်မှတ်လျှောက်ထားရရှိပြီးမှသာ လုပ်ကိုင်ရမည်ဖြစ်ကြောင်း၊ လုပ်ငန်းရှင်များအနေဖြင့် အွန်လိုင်းမှတ်ပုံတင်ခြင်းနှင့်ပတ်သက်၍ သိရှိလိုက်နာဆောင်ရွက်ရမည့်အချက်များ၊ မှတ်ပုံတင်လက်မှတ် ရရှိသူ၏အခွင့်အရေးနှင့်တာဝန်များ၊ အွန်လိုင်းမှတစ်ဆင့်ဝယ်ယူရာတွင် လိမ်လည်မှုမခံရအောင် သိရှိရမည့်အချက်များကို ရှင်းလင်းဆွေးနွေး အသိပညာ‌ပေးဟောပြောခဲ့ပါသည်။

DOCA(ရှမ်း)

             စားသုံးသူပြည်သူများအား ထုတ်ကုန်လုံခြုံစိတ်ချရမှုရှိစေရေး ဘေးအန္တရာယ်ရှိသော ကုန်စည်များ ဈေးကွက်အတွင်းမှ ပပျောက်စေရေးနှင့် စားသုံးသူကာကွယ်ရေးဥပဒေပြဌာန်းချက်ပါ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသား ဖေါ်ပြထားမှုအခြေအနေ တို့နှင့် စပ်လျဉ်း၍ သက်ဆိုင်ရာ မိတ်ဖက်ဌာနများနှင့် ပူးပေါင်း၍ ဈေးကွက်စောင့်ကြည့်စစ်ဆေးခြင်း လုပ်ငန်းများဆောင်ရွက်လျက်ရှိရာ ၂၀၂၅ ခုနှစ်၊ ဖေဖော်ဝါရီလ (၁) ရက်နေ့မှ (၁၅) ရက်နေ့ အတွင်းတွင် ပြည်ခရိုင်၊ ရွှေတောင်မြို့နယ်တွင် ယွန်းတန်းရပ်ကွက်ရှိ သောက်ရေသန့်အမျိုးမျိုး ရောင်းချသည့် ကုန်မျိုးစုံဆိုင်များသို့လည်းကောင်း၊ ပန်းတောင်းမြို့နယ်တွင် ဥသျှစ်ပင်ဈေးအတွင်းရှိ သောက်ရေသန့်အမျိုးမျိုးရောင်းချသည့် ကုန်မျိုးစုံဆိုင်များသို့လည်းကောင်း၊ ပေါက်ခေါင်းမြို့နယ် တွင်  အမှတ် (၃) နှင့် အမှတ် (၅) ရပ်ကွက်ရှိ ဘူးသွပ်စားသုံးဆီ အရောင်းဆိုင်များသို့လည်းကောင်း၊ သက်ဆိုင်ရာမြို့နယ် တာဝန်ခံနှင့် ဝန်ထမ်းများသည် သွားရောက်၍ ကုန်အညွှန်းအမှတ်အသားပါ သတ်မှတ်ချက်များနှင့် ကိုက်ညီမှုရှိသော ကုန်စည်များကို တင်သွင်းရောင်းချခြင်း ရှိ/မရှိ၊ သက်ဆိုင်ရာဌာန၏ ထောက်ခံမှု ရှိ/မရှိ ဈေးကွက်စောင့်ကြည့်စစ်ဆေးခဲ့ပါကြောင်းနှင့် စောင့်ကြည့် စစ်ဆေးခဲ့သည့် ကုန်စည်များတွင် ကုန်အညွှန်းအမှတ်အသား ဖေါ်ပြချက်များနှင့် ကိုက်ညီမှုရှိပါကြောင်း သတင်းရရှိပါသည်။

DOCA(ပဲခူး)

             စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်ချက်အရ စားသုံးသူများ အားလုံးသည် ကုန်စည်နှင့် ဝန်ဆောင်မှုများအသုံးပြုရာတွင် ဘေးအန္တရာယ်ကင်းရှင်းစွာသုံးစွဲနိုင်ရေး အတွက် ခရိုင်အတွင်းရှိ  ထုတ်လုပ်လျှက်ရှိသော ကုန်စည်များနှင့်စပ်လျဉ်း၍ အာမခံချက်ပေးခြင်းနှင့် ကုန်အညွှန်းအမှတ် အသားများ ပြည့်စုံမှန်ကန်စွာဖေါ်ပြမှုရှိစေရေး ရည်ရွယ်၍ ဆောင်ရွက်လျှက် ရှိရာ ပြည်ခရိုင်အတွင်း ၂၀၂၅ ခုနှစ်၊ ဖေဖော်ဝါရီလ (၁)ရက်မှ(၁၅)ရက်အတွင်း ပြည်ခရိုင်၊  ပြည်မြို့နယ်တွင် ခေတ္တရာမြို့သစ်ရပ်ကွက်၊ ဘုရင့်နောင်လမ်းမကြီးဘေးရှိ  ဦးဟိန်းသူရရွှေ၏ “Smart Lady” အထည်လုပ်ငန်းဆိုင်သို့လည်းကောင်း၊ ရွှေတောင်မြို့နယ်တွင် ကြာနီကန်ရပ်ကွက် ရန်ကုန်-ပြည်လမ်းရှိ ဦးဇော်မင်းထွန်း၏ “ဇော်မင်းထွန်း”ဆီစက်သို့လည်းကောင်း၊ ပန်းတောင်း မြို့နယ်တွင် ဥသျှစ်ပင်မြို့ရှိ ဦးနေလင်းထွန်း၏ “ဆယ်စု” ဆန်/ဆီရောင်းဝယ်ရေးဆိုင်နှင့် ဒေါ်နီနီမာ ၏ “သန်းကြွယ်” ဆန်/ဆီရောင်းဝယ်ရေးဆိုင်သို့လည်းကောင်း၊ ပေါက်ခေါင်းမြို့နယ်တွင် အမှတ် (၅) ရပ်ကွက်ရှိ ဦးသန်းနိုင်၏ “ချမ်းမြေ့ပါစေ” ဣစ္ဆိတံနှင့် မုန့်ကြိုးလိမ်လုပ်ငန်းသို့လည်းကောင်း၊  သက်ဆိုင်ရာ မြို့နယ်တာဝန်ခံနှင့် ဝန်ထမ်းများသည် သွားရောက်၍ မိမိတို့ ဖြန့်ဖြူးရောင်းချလျက်ရှိ သော ကုန်စည်များတွင် အရည်အသွေး၊ အလေးချိန်၊ အချိန်အတွယ်၊ ပမာဏနှင့် အမျိုးအစားများ မှန်ကန်စွာ ဖြန့်ဖြူးရောင်းချမှုရှိစေရေး၊ စီးပွားရေးကျင့်ဝတ်၊ စည်းကမ်းနှင့်အညီ ထုတ်လုပ် ရောင်းချ မှုရှိစေရေး၊ ကုန်စည်အလိုက် ဖေါ်ပြရမည့် ကုန်အညွှန်းအမှတ်အသားများ၊ ပြည့်စုံ မှန်ကန်စွာ ဖေါ်ပြ မှုရှိစေရေး လိုက်နာဆောင်ရွက်ကြရန်နှင့် နောက်ပိုင်းကာလများတွင် ကွင်းဆင်းစစ်ဆေးမှုများနှင့် အတူ အရေးယူဆောင်ရွက်မှုများ ပြုလုပ်ဆောင်ရွက်သွားမှာဖြစ်သည့် အတွက် စီးပွားရေး လုပ်ငန်းရှင်များအနေဖြင့် အထူးအလေးထား လိုက်နာဆောင်ရွက်ကြရန် ရှင်းလင်းဆွေးနွေး ပြောကြားခဲ့ကြောင်း သတင်းရရှိပါသည်။

DOCA(ပဲခူး)

              စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် ၂၀၁၉ ခုနှစ်တွင် အတည်ပြုပြဋ္ဌာန်းခဲ့သည့် စားသုံးသူကာကွယ်ရေးဥပဒေအရ စားသုံးသူအသိပညာပေးခြင်း များကို စားသုံးသူနယ်ပယ်အသီးသီးသို့ ဟောပြောဆောင်ရွက်လျက်ရှိပါသည်။ ထိုသို့ဆောင်ရွက်လျှက်ရှိ ရာတွင် တက္ကသိုလ်/ကောလိပ်များရှိ ကျောင်းသား/သူများသို့လည်း စားသုံးသူအသိပညာပေးခြင်းများ ကိုအခါအားလျော်စွာ ဆောင်ရွက်လျက်ရှိပါသည်။

              စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မန္တလေး တိုင်းဒေသကြီးဦးစီးမှူးရုံးမှ (၁၉.၂.၂၀၂၅)ရက်နေ့နံနက်(၁၀:၀၀)နာရီအချိန်တွင်၆၂လမ်း၊၂၂×၂၃လမ်း ကြား၊ အောင်မြေသာစံမြို့နယ်ရှိ မန္တလေးနိုင်ငံခြားဘာသာတက္ကသိုလ်၊ သီရိရတနာခန်းမ၌ စားသုံးသူ ကာကွယ်ရေးအသိပညာပေးဟောပြောပွဲကျင်းပပြုလုပ်ခဲ့ပါသည်။ အခမ်းအနားတွင် စားသုံးသူရေးရာ ဦးစီးဌာန၊ မန္တလေးတိုင်းဒေသကြီးဦးစီးမှူးရုံး၊ ဒုတိယတိုင်းဒေသကြီးဦးစီးမှူး ဦးရဲလင်းထက်က အဖွင့်အမှာ စကားပြောကြားခဲ့ပါသည်။ ဆက်လက်၍ လ/ထညွှန်ကြားရေးမှူး ဒေါ်ဖြူသဲနွယ်က စားသုံးသူအခွင့်အရေးများအကြောင်း တိုင်ကြားမှုဖြစ်စဉ်နှင့်ပတ်သက်သည့် အကြောင်းအရာများ ဆက်သွယ်တိုင်ကြားရန် နည်းလမ်းများအကြောင်းရှင်းလင်းဆွေးနွေးဟောပြောခဲ့ပါသည်။

              ထိုနောက် ဟောပြောပွဲအခမ်းအနား၌ (၇၈) ကြိမ်မြောက်ပြည်ထောင်စုနေ့အထိမ်းအမှတ် အခမ်းအနားကဗျာ၊ ပန်းချီနှင့် ဆောင်းပါးပြိုင်ပွဲတွင် ပထမ ၊ ဒုတိယ နှင့် တတိယဆု အသီးသီး ရရှိခဲ့ကြသည့် မန္တလေးနိုင်ငံခြားဘာသာတက္ကသိုလ်မှ ကျောင်းသား/သူများအား  ပါမောက္ခချုပ် ဒေါက်တာတင့်တင့်၊ ဒုတိယပါမောက္ခချုပ်ဒေါက်တာ အေးသက်သက်ဝင်း နှင့်ပါမောက္ခဌာနမှူးများက ဆုများအသီးသီးချီးမြှင့်ခဲ့ကြပါသည်။ ဟောပြောပွဲတက်ရောက်လာသူများ စားသုံးသူကာကွယ်ရေးနှင့် ပတ်သက်၍ သိရှိလိုသည်များအား မေးမြန်းခဲ့ရာ ဒုတိယတိုင်းဒေသကြီးဦးစီး မှူးဦးရဲလင်းထက်မှ ပြန်လည်ရှင်းလင်းဖြေကြားခဲ့ပြီး မြန်မာ့အသံနှင့်ရုပ်မြင်သံကြားမှလည်း တက်ရောက်၍ သတင်း မှတ်တမ်းရိုက်ကူးခဲ့ကြပါသည်။ ဟောပြောဆွေးနွေးပြီးနောက် တက္ကသိုလ်ဝန်းအတွင်း ဖွင့်လှစ်ထား သည့် စားသောက်ဆို်ငများအား ကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။ အသိပညာပေး ဟောပြောဆွေးနွေးပွဲသို့ မန္တလေးနိုင်ငံခြားဘာသာတက္တသိုလ်ပါမောက္ခချုပ်၊ ဒုတိယ ပါမောက္ခချုပ်နှင့် ပါမောက္ခဌာနမှူးများ၊ ဆရာ၊ ဆရာမများ၊ စားသုံးသူရေးရာဦးစီးဌာန၊ မန္တလေးတိုင်းဒေသကြီး ဦးစီးမှူးရုံး၊ ဒုတိယတိုင်းဒေသကြီးဦးစီးမှူးနှင့် တာဝန်ရှိသူများ၊ ကျောင်းသား/ကျောင်းသူ (၃၀၀)ဦးခန့် တက်ရောက်ခဲ့ကြကြောင်း သတင်းရရှိခဲ့ပါသည်။

DOCA(မန္တလေး)       

စားသုံးသူရေးရာဦးစီးဌာနသည် စားသုံးသူပြည်သူများ ကုန်စည်နှင့်ဝန်ဆောင်မှုများ သုံးစွဲရာ တွင် ထိခိုက်နစ်နာမှုမရှိစေရေး၊ လုံခြုံစိတ်ချရမှုရှိစေရေး၊ ဥပဒေပြဌာန်းချက်များနှင့်ကိုက်ညီ မှုမရှိဘဲ မမှန်မကန်ထုတ်လုပ် ဖြန့်ဖြူးရောင်းချလျက်ရှိသော ကုန်စည်များနှင့် လုံခြုံစိတ်ချရမှု မရှိသော ကုန်စည်များ လျော့နည်းပပျောက်သွားစေရေးတို့အတွက် နေရာစုံ၌ နည်းလမ်းပေါင်းစုံဖြင့် စီးပွားရေးလုပ်ငန်းရှင်များအပါအဝင် စားသုံးသူပြည်သူတစ်ရပ်လုံးကို အသိပညာပေးလျက်ရှိသလို တဖက်မှလည်း ဈေးကွက်စောင့်ကြည့်စစ်ဆေးခြင်းများကို အစဉ်တစိုက်ဆောင်ရွက်လျက်ရှိပါသည်။

 စားသုံးသူရေးရာဦးစီးဌာန မြင်းခြံခရိုင်ဦးစီးမှူးရုံးမှ ဒု-ခရိုင်ဦးစီးမှူး၊ ဦးတင်ဇော်ထွေး (ဦးစီးမှူး)ဦးဆောင်၍ မြို့နယ်စည်ပင်သာယာရေးအဖွဲ့မှ ဈေးအရာရှိ ဒေါ်အေးအေးမြင့် (ဒု-ဦးစီးမှူး) ၊ ဈေးခေါင်း ဦးတိုးဝင်းနှင့် ဈေးအကျိုးတော်ဆောင်များပါဝင်သော ပူးပေါင်းအဖွဲ့ဖြင့် (၁၇.၂.၂၀၂၅) ရက်နေ့၊ နံနက် (၀၉:၀၀) နာရီအချိန်တွင် မြင်းခြံမြို့၊ စံပြဈေးရှိ မုန့်မျိူးစုံနှင့် အလှကုန်ပစ္စည်း အမျိုးမျိုးရောင်းချသော ကုန်စုံဆိုင်များအား ဈေးကွက်စောင့်ကြည့်စစ်ဆေးခြင်း ဆောင်ရွက်ရာတွင် လူကို ဘေးဥပဒ်အန္တရာယ်ဖြစ်စေနိုင်မှုများသည့် ကုန်ပစ္စည်းများအား ဦးစားပေး၍  ပူးပေါင်းအဖွဲ့ ဝင်များသည် ကုန်အညွှန်းအမှတ်အသားဖော်ပြချက်များ ပြည့်စုံစွာပါဝင်မှု ရှိ/မရှိ စစ်ဆေးခဲ့ရာ ကုန်အညွှန်းအမှတ်အသားဖော်ပြချက်နှင့် ကိုက်ညီမှုရှိသည်ကို စစ်ဆေးတွေ့ရှိရပြီး စားသုံးသူရေးရာ ဦးစီးဌာနအနေဖြင့် စားသုံးသူပြည်သူများ ကုန်ပစ္စည်းများကို ဝယ်ယူသုံးစွဲရာတွင် လုံခြုံစိတ်ချရမှု ရှိပြီး၊ ဘေးအန္တရာယ်ကင်းရှင်းစေရန်နှင့်ထိခိုက်နစ်နာဆုံးရှုံးမှုများမဖြစ်ပေါ်စေရေး တို့အတွက် သက်ဆိုင်ရာမိတ်ဖက်ဌာနများနှင့် ပူးပေါင်း၍စဉ်ဆက်မပြတ် ဈေးကွက်စောင့်ကြည့်စစ်ဆေးမှုများ ဆောင်ရွက် သွားမည်ဖြစ်ကြောင်း သိရသည်။

DOCA(မန္တလေး)