သတင်းနှင့် လှုပ်ရှားမှုများ

        စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မြန်အောင်ခရိုင်မှ တာဝန်ရှိသူများသည် စည်ပင်သာယာဦးစီးဌာန၊ မီးသတ်တပ်ဖွဲ့တို့နှင့်ပူးပေါင်း၍ (၁၆.၁၂.၂၀၂၂)ရက်နေ့ နံနက် (၀၉:၃၀) နာရီအချိန်တွင် ကြံခင်းမြို့၊ မြို့မဈေးအတွင်းရှိ ကုန်မျိုးစုံဆိုင်နှင့် အလှကုန်ပစ္စည်းအ‌ရောင်းဆိုင်များအား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

          ထိုသို့ကွင်းဆင်းစစ်ဆေးခဲ့ရာတွင် ဈေးကွက်အတွင်းရောင်းချနေသော ကုန်စည်များသည် ဝယ်ယူစားသုံးသူမိဘပြည်သူများအား ဘေးအန္တရာယ်မဖြစ်စေရန်နှင့် ကုန်စည်များပေါ်တွင် ကုန်အညွှန်းအမှတ်အသားပြည့်စုံမှု ရှိ/မရှိ၊ တားမြစ်ကုန်စည်များရောင်းချမှုရှိ/မရှိခြင်း တို့ကိုစစ်ဆေးခဲ့ပြီး၊ ကုန်အညွှန်းအမှတ်အသားများဖော်ပြခြင်းနှင့် ပတ်သက်၍ မည်သည့်စီးပွားရေးလုပ်ငန်းရှင်မဆို ပုဒ်မ ၄၁၊ ပုဒ်မခွဲ(ခ)နှင့်(ဆ) တို့ပါ ကုန်အညွှန်းအမှတ်အသားဖော်ပြရာတွင်  မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့) တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည်ဖြစ်ပြီး၊  မြန်မာနိုင်ငံစားသုံးသူကာကွယ်ရေးကော်မရှင်၏ ညွှန် ကြားချက်အမှတ်(၂/၂၀၁၉)ပါ ဥပဒေများအကြောင်း၊ စီးပွားရေးလုပ်ငန်းရှင်၏ တာဝန်များအကြောင်း၊ စီးပွားရေးလုပ်ငန်းရှင်များအနေဖြင့် ညွှန်ကြားချက်များအား လိုက်နာဆောင်ရွက်ရန်နှင့် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များအကြောင်း အသိပညာပေးဆွေးနွေးခဲ့ပြီး၊ ကုန်မျိုးစုံဆိုင် (၄)ဆိုင်အား စစ်ဆေးခဲ့ကြောင်း သိရှိရပါသည်။

DOCA(ဧရာဝတီ)

        စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ဟင်္သာတခရိုင်၊ မြို့နယ်တာဝန်ခံသည် (၁၇.၁၂.၂၀၂၂)ရက်နေ့ နံနက်(၁၀:၀၀) နာရီအချိန်တွင် ဟင်္သာတမြို့နယ်၊ ရွာသာကုန်းကျေးရွာ၊ အုပ်ချုပ်ရေးမှူးနေအိမ်၌ မုန့်ဖတ်လုပ်ငန်းရှင် (၁၀) ဦးအား စားသုံးသူကာကွယ်ရေး အသိပညာပေးဟောပြောခြင်းကို ဆောင်ရွက်ခဲ့သည်။

      ဟောပြောပွဲတွင် စားသုံးသူရေးရာဦးစီးဌာန၊ မြို့နယ်တာဝန်ခံ ဦးမိုးကျော်မှ စားသုံးသူကာကွယ်ရေးဥပဒေကို ၂၀၁၉ခုနှစ် မတ်လ(၁၅)ရက်နေ့တွင် အခန်း(၂၅)ခန်း၊ ပုဒ်မ(၈၄)ခုဖြင့် ပြဌာန်းခဲ့ကြောင်း၊ ဥပဒေတွင်ပါ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏ တာဝန်များအကြောင်း၊ ကုန်အညွှန်းအမှတ်အသားဖော်ပြခြင်း အကြောင်း၊ ရောင်းချနေသောကုန်စည်များတွင် ကုန်အညွှန်းအမှတ် အသားဖော်ပြခြင်းနှင့် စပ်လျဉ်း၍ မည်သည့် စီးပွားရေး လုပ်ငန်းရှင်မဆို ပုဒ်မ(၄၁) ပုဒ်မခွဲ(ခ)နှင့်(ဆ)တို့ပါ ကုန်အညွှန်းဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့) တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည်ဖြစ်ကြောင်း၊ စားသုံးသူများလက်ဝယ်အရောက် ဘေးကင်းလုံခြုံမှု ရှိစေရေးအတွက် ဖြန့်ဖြူးရောင်းချရမည်ဖြစ်ကြောင်း၊ ပြစ်မှုနှင့်ပြစ်ဒဏ်များအကြောင်းနှင့် စားသုံးသူများအန္တရာယ်ကင်းစွာ စားသုံးနိုင်ရေးဦးစားပေးဆောင်ရွက်သင့်ကြောင်း၊ တားမြစ် ဆေးဝါးများအသုံးစွဲရေး၊ စားသုံးသူသတင်းပြန်ကြားရေးနှင့်တိုင်ကြားမှုလက်ခံ ဆောင်ရွက်ရေးစင်တာ CICC ရုံးခန်းများ ဖွင့်လှစ်ထားရှိမှု အခြေအနေကိုလည်ကောင်း၊ စားသုံးသူရေးရာဦးစီးဌာန၏ လုပ်ငန်းဆောင်ရွက်ချက် များအကြောင်း သိရှိလိုပါက www.doca.gov.mm Website တွင် ဝင်ရောက်လေ့လာ နိုင်ကြောင်း စသည်တို့ကို အသိပညာပေးဟောပြောခဲ့ပြီး၊ တက်ရောက်သူများမှလည်း သိလိုသည်များကို မေးမြန်း၍ စားသုံးသူကာကွယ်ရေး ဥပဒေစာအုပ်နှင့် လက်ကမ်းစာစောင်များ ပေးဝေခဲ့ကြကြောင်း သိရှိရပါသည်။

DOCA(ဧရာဝတီ)

       မွန်ပြည်နယ်စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှ ဝန်ထမ်းများသည် ၂၀.၁၂.၂၀၂၂ ရက်နေ့တွင် ကျိုက်မရောမြို့နယ်၊ ပိန္နဲကုန်းကျေးရွာ၊ မော်လမြိုင်မြို့၊ ဇေယျာ(၂)ရပ်ကွက်၊ ရွှေမြိုင်သီရိရပ်ကွက် တို့တွင်လည်းကောင်း ၂၁.၁၂.၂၀၂၂ ရက်နေ့တွင် မော်လမြိုင်မြို့၊ သရက်ကုန်း ရပ်ကွက်၊ ဇေယျာ(၁)ရပ်ကွက်၊ မြိုင်သာယာရပ်ကွက်တို့တွင် လည်းကောင်း၊ ၂၂.၁၂.၂၀၂၂ ရက်နေ့တွင် မော်လမြိုင်မြို့၊ အိုးရုံကြီးရပ်ကွက်၊ ကုလားဈေး၊ ငန်းတေးရပ်ကွက်တို့တွင် လည်းကောင်း၊ ၂၃.၁၂.၂၀၂၂ ရက်နေ့တွင် မော်လမြိုင်မြို့၊ ရွှေပြည်အေးရပ်ကွက်၊ ဇေယျာမြိုင်ရပ်ကွက်နှင့် မောင်ငံရပ်ကွက်တို့တွင် လည်းကောင်း ကုမ္ပဏီမှ ဖြန့်ဖြူးရောင်းချသည့် စားအုန်းဆီများအား ဈေးကွက်အတွင်း လက်လီ/ လက်ကား ဖြန့်ဖြူးရောင်းချခြင်းကို ကြပ်မတ်ဆောင်ရွက်ခဲ့ပါသည်။

          ထိုသို့ဆောင်ရွက်ရာတွင် စားအုန်းဆီတင်သွင်းသည့် ကုမ္ပဏီများမှ လက်ကားကုန်သည်များသို့ ဖြန့်ဖြူးထုတ်ပေးခဲ့သည့် စားအုန်းဆီများကို ရန်ကုန်အထိုင်ဈေး ရည်ညွှန်းလက်ကားဈေးနှုန်းအပေါ် သယ်ယူပို့ဆောင်ခကုန်ကျစရိတ်များထပ်ပေါင်း၍ ၂ ရာခိုင်နှုန်းအမြတ်ထက်မပိုသော ဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချရမည်ဖြစ်ရာ လက်လီဈေးကွက်အတွင်း ဖြစ်သင့် ဖြစ်ထိုက်သော ဈေးနှုန်းများဖြင့် ရောင်းချစေရေး၊ ဈေးနှုန်းအဆမတန်မြှင့်တင်ရောင်းချခြင်း မရှိစေရေးတို့အတွက် ကွင်းဆင်းကြပ်မတ်ဆောင်ရွက်ခဲ့ကြောင်း သိရှိရပါသည်။

DOCA(မွန်)

          မွန်ပြည်နယ် သထုံခရိုင်ဦးစီးမှူးနှင့်ဝန်ထမ်းများသည်  ၂၀.၁၂.၂၀၂၂ ရက်နေ့ တွင် သထုံမြို့နယ် မြေနီကုန်းကျေးရွာရှိ ကောင်းပြည့်ဖြိုး ဆန်စက်သို့ သွားရောက်၍ ဆန်စက်ပိုင်ရှင်  ဦးဝင်းဌေးအောင်နှင့်တွေ့ဆုံကြောင်း သိရပါသည်။

      အဆိုပါ ကောင်းပြည့်ဖြိုးဆန်စက်ပိုင်ရှင် ဦးဝင်းဌေးအောင်မှ ဆန်စက်လုပ်ငန်းအဆင့်ဆင့် ဆောင်ရွက်မှုများရှင်းလင်းပြီး စားသုံးသူရေးရာဦးစီးဌာန၊ ဦးအောင်ကျောင်မင်း (ဦးစီးအရာရှိ) မှ စားသုံးသူများအတွက် စားသုံးသူကာကွယ်ရေးဥပဒေနှင့်အညီ စီးပွားရေးလုပ်ငန်းရှင်၏ တာဝန်များနှင့် တားမြစ်ချက်များအား လိုက်နာစေရေး၊သန့်ရှင်းမှုရှိစေရေး၊ စားသုံးသူအလေးထားဆောင်ရွက်ရေးထုန်ကုန် များ လုံခြုံစိတ်ချရမှုရှိစေရေး၊ ဈေးကွက်အခြေအနေ၊ လက်ရှိဈေးနှုန်း အတက်အကျနှင့် ထုပ်ပိုးမှု အပိုင်းတွင်လည်း မိမိဆန်စက်၏ အမည်၊ ဖုန်းနံပါတ်၊ နေရပ်လိပ်စာတို့အား ရိုက်နှိပ်ပေးနိုင်ပါက ပိုမိုကောင်းမွန်ကြောင်း အသိပညာပေးဆွေးနွေးခဲ့ပြီး ဌာနမှထုတ်ဝေပေးသော စားသုံးသူကာကွယ်ရေး အသိပညာပေးလက်ကမ်းစာစောင်များ ပေးအပ်ခဲ့ကြောင်း သတင်းရရှိပါသည်။

DOCA(မွန်)

       ရခိုင်ပြည်နယ် ၊ စားသုံးသူရေးရာဦးစီးဌာန၊ တောင်ကုတ်ခရိုင်ဦးစီးမှူး ဦးကျော်မြင့် (ဦးစီးအရာရှိ)ဦးဆောင်၍ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ မြို့နယ်မီးသတ်ဦးစီးဌာန၊ မြို့နယ်လျှပ်စစ်ဓာတ်အားဖြန့်ဖြူးရေးလုပ်ငန်း၊ မြို့နယ်ရဲတပ်ဖွဲ့၊ ရပ်ကွက် အုပ်ချုပ်ရေးမှူးများပူးပေါင်းပါဝင်သောအဖွဲ့သည်(၂၁-၁၂-၂၀၂၂) ရက်နေ့မှ (၂၃-၁၂-၂၀၂၂) ရက်နေ့ အထိ နေ့စဉ် နံနက် (၀၉:၀၀) နာရီမှ (၁၁:၀၀) နာရီအထိ တောင်ကုတ်မြို့ပေါ်ရပ်ကွက်များဖြစ်သော ကံပိုင်ရပ်ကွက်၊ ဂူတာရပ်ကွက်၊ သိမ်တောင်ရပ်ကွက်၊ ချောင်းကောက်ရပ်ကွက်ရှိ စားသောက်ကုန် ရောင်းချသည့်အရောင်းဆိုင်များအား ကွင်းဆင်းစစ်ဆေးဆောင်ရွက်ခဲ့ပါသည်။

         ယင်းသို့ ကွင်းဆင်းစစ်ဆေးဆောင်ရွက်ရာတွင် တောင်ကုတ် ခရိုင်ဦးစီးမှူး ဦးကျော်မြင့်(ဦးစီးအရာရှိ)သည် စားသောက်ကုန်ရောင်းချသည့် လုပ်ငန်းရှင်များအား စားသုံးသူပြည်သူများအနေဖြင့် ကုန်စည်နှင့်ဝန်ဆောင်မှုများကို ရယူသုံးစွဲရာတွင် ဘေးကင်းလုံခြုံ စိတ်ချရမှုရှိစေရေး၊ စားသုံးသူများအခွင့်အရေးမဆုံးရှုံးစေရေးအတွက် မိမိတို့ ဦးစီးဌာနအနေဖြင့် ပြဌာန်းထားရှိသော စားသုံးသူ ကာကွယ်ရေးဥပဒေ(၂၀၁၉)နှင့် နည်းဥပဒေများအရ  ပြဌာန်းပြီး ဆောင်ရွက်လျက်ရှိကြောင်း၊ ဈေးကွက်မရောက်မီ ကုန်စည်များနှင့်ဈေးကွက်ရောက်ပြီး ကုန်စည်များထုတ်ကုန်လုံခြုံစိတ်ချရမှုစေရေးအတွက် စစ်ဆေးဆောင်ရွက်လျက်ရှိသည့် အခြေအနေများ နှင့် စားသုံးသူများဘေးအန္တရာယ်ကင်းရှင်းစေရေးအတွက် ဆောင်ရန်၊ ရှောင်ရန်အချက်များကိုလည်းကောင်း ဆွေးနွေးပြောကြားခြင်း၊ ကုန်စည်နှင့် ဝန်ဆောင်မှုများကို ရယူသုံးစွဲရာတွင် ဘေးအန္တရာယ်ကင်းရှင်းစွာ ရယူသုံးစွဲနိုင်ရေးအတွက် ကွင်းဆင်း အသိပညာပေးဆောင်ရွက်ခဲ့ကြောင်း သတင်းရရှိပါသည်။

DOCA(ရခိုင်)