သတင်းနှင့် လှုပ်ရှားမှုများ

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဉီးစီးဌာန၊ ကလေးခရိုင်၊ တမူးမြို့နယ်တာဝန်ခံ၊ ဦးစွမ်းရည်သည် ၂၀၂၃ခုနှစ်၊ မတ်လ(၁၃)ရက်နေ့၊ နံနက်(၁၀:၃၀)နာရီအချိန်တွင်  စော်ဘွား-၈ရပ်ကွက်ရှိ ဆီကြိတ်ခွဲရောင်းချသော လုပ်ငန်းရှင် ဒေါ်ခင်မျိုးနွယ်ထံသို့ သွားရောက်၍ ဆီကြိတ်ခွဲမှုအခြေအနေများကို ဆွေးနွေးမေးမြန်းခဲ့ပါသည်။

ထိုသို့တွေ့ဆုံဆွေးနွေးရာတွင် ဆီစက်လုပ်ငန်းရှင် ဒေါ်ခင်မျိုးနွယ်က မိမိတို့ဆီစက်အနေဖြင့် မုန့်ညှင်းဆီကိုသာ အဓိကကြိတ်ခွဲရပြီး မုန့်ညှင်းဆံ (၁၆) ပြည် တစ်တင်း လျှင် (၆၀၀၀၀)ကျပ်ပေး၍ ဝယ်ယူရကြောင်း၊ မုန့်ညှင်းဆံ(၁) တင်းကြိတ်ခွဲလျှင် ဆီ(၅) ပိဿာထွက်ရှိပါကြောင်း၊ တစ်ရက်လျှင် တင်း (၄၀)ခန့် ကြိတ်ခွဲရ၍ ဆီထွက်ရှိမှုအနေဖြင့် ပိဿာ ချိန်(၂၀၀)ခန့်ထွက်ရှိကြောင်း၊ ဆီ(၁၀)ပိဿာဝင် တစ်ပုံးလျှင် (၁၃၀၀၀၀)ကျပ်ဖြင့် ရောင်းချရလျက်ရှိပြီး မုန့်ညှင်းဆီများကို  မြို့နယ်တွင်းသာ ရောင်းချရပါကြောင်းနှင့် ယခုနှစ်တွင် မုန့်ညှင်းဆံများ ဝယ်ယူရာ၌ ဈေးနှုန်းကြီးမြင့်သည့်အတွက် ဆီ‌ဈေးနှုန်းများလည်း ကြီးမြင့်ရခြင်း ဖြစ်ပါကြောင်း ဆီစက်လုပ်ငန်းရှင် ဒေါ်ခင်မျိုးနွယ်ထံမှ သိရှိရပါသည်။                                              

ဇင်မိုးဝါ(ကလေး)

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကလေးခရိုင်၊ တမူးမြို့နယ်တွင် ၂၀၂၃ ခုနှစ်၊ မတ်လ (၁၃) ရက်နေ့၊ နံနက်(၁၁:၃၀)နာရီအချိန်၌  တမူးမြို့တာဝန်ခံ၊ ဦးစွမ်းရည်(ဦးစီးမှူး)က ကုန်တင်/ကုန်ချရုံးသို့ သွားရောက်၍ အသိပညာပေးဟောပြောပွဲ ကျင်းပပြုလုပ်ခဲ့ရာ ပြည်သူ ( ၇၀ ) ဦး တက်ရောက်ခဲ့ကြောင်း သိရှိရပါသည်။

အဆိုပါဟောပြောပွဲတွင်  စားသုံးသူရေးရာဦးစီးဌာန၊ တမူးမြို့နယ်တာဝန်ခံက ပထမဦးစွာ စားသုံးသူများရရှိနိုင်သည့်အခွင့်အရေးများနှင့် လိုက်နာရမည့်တာဝန်များကိုလည်းကောင်း၊  စားသုံးသူများအနေဖြင့် ကုန်စည်၊ဝန်ဆောင်မှုများနှင့်ပတ်သက်၍ နစ်နာဆုံးရှုံးမှုများနှင့်ကြုံတွေ့ရပါက စားသုံးသူရေးရာဦးစီးဌာနသို့ တိုင်ကြားနိုင်သည့်နည်းလမ်းများကို လည်းကောင်း အသိပညာပေးဆွေးနွေး ပြောကြားခဲ့ကြောင်း သတင်းရရှိပါသည်။

ဇင်မိုးဝါ (ကလေး)

      စီးပွားရေးနှင့်ကူးသန်းရောင်းဝယ်‌ရေးဝန်ကြီးဌာန၊ စားသုံးသူရေးရာဦးစီးဌာန၊ ရခိုင်ပြည်နယ်၊ စစ်တွေခရိုင်ဦးစီးမှူးရုံး၊ ခရိုင်ဦးစီးမှူး ဦးမောင်လှဝင်းနှင့်ဝန်ထမ်းများသည် (၁၇-၃-၂၀၂၃)ရက်နေ့ နေ့လည်(၁:၀၀)နာရီ မှ (၂:၃၀)နာရီထိ စစ်တွေခရိုင်၊ မီးသတ်ဦးစီးမှူးရုံး၌ မီးသတ်တပ်ဖွဲ့ဝင်များနှင့် မိသားစုဝင်များကို စားသုံးသူကာကွယ်ရေးအသိပညာပေး ဟောပြောဆွေးနွေးပွဲအား ကျင်းပပြု လုပ်ခဲ့ပါသည်။

         ရှေးဦးစွာ စစ်တွေခရိုင်၊ မီးသတ်ဦးစီးဌာန၊ ခရိုင်ဦးစီးမှူး ဦးစံထွန်းက  အဖွင့်အမှာစကားပြောကြားခဲ့ပြီး စားသုံးသူရေးရာဦးစီးဌာန စစ်တွေခရိုင်ဦးစီးမှူး ဦးမောင်လှဝင်း(ဦးစီးအရာရှိ)က စားသုံးသူကာကွယ်ရေးနှင့်ပတ်သက်၍ စားသုံးသူရေးရာဦးစီးဌာန၏ ဆောင်ပုဒ်(Motto)” ဖြစ်သော စားသုံးသူအခွင့်အရေး ဦးစားပေး” ၏ အဓိပ္ပါယ်အား ရှင်းလင်းပြောကြားခဲ့ပြီး စားသုံးသူများအနေဖြင့် မိမိတို့၏ အခွင့်အရေးများဆုံးရှုံးမှုမရှိစေရေးနှင့် ဘေးအန္တရာယ်ကင်းရှင်းစေရေးအတွက် ကုန်စည်(သို့မဟုတ်)ဝန်ဆောင်မှုကို ဝယ်ယူအသုံးပြုရာတွင် ဆုံးရှုံးနစ်နာမှုများဖြစ်ပေါ်လာပါက တိုင်ကြားနိုင်သည့် နည်းလမ်းများအားလည်းကောင်း၊ စားသုံးသူကာကွယ်ရေးဥပဒေ (၂၀၁၉)၊  အခန်း(၁၈) ၊ ပုဒ်မ(၄၁) ပြဌာန်းချက် ကုန်အညွှန်းအမှတ် အသားများ ပြည့်စုံစွာဖော်ပြပါရှိသော  ကုန်စည်များကို ဝယ်ယူသုံးစွဲကြရန်နှင့် ကုန်စည်(သို့မဟုတ်) ဝန်ဆောင်မှုကို ဝယ်ယူအသုံးပြုရာတွင် သိရှိလိုသည့်သတင်းအချက်အလက်များနှင့် စီးပွားရေး လုပ်ငန်းရှင်များမှ ကုန်စည်(သို့မဟုတ်) ဝန်ဆောင်မှုနှင့်ပတ်သက်၍ တာဝန်ယူမှု၊ တာဝန်ခံမှု ကိစ္စရပ် များအား ကြိုတင်မေးမြန်းပြီး နှစ်ဦးနှစ်ဖက် ကတိကဝတ်ပြု သဘောတူပြီးမှသာ ဝယ်ယူအသုံးပြု စေရေးနှင့် ဆုံးရှုံးနစ်နာမှုများဖြစ်ပေါ်လာပါက မည်ကဲ့သို့ တာဝန်ယူဆောင်ရွက်ပေးနိုင်မှုများအား လေ့လာမေးမြန်းပြီး စနစ်တကျ ဝယ်ယူတတ်စေ‌ရေးအား  ချပြဆွေးနွေးခဲ့ပါသည်။ဆက်လက်၍  စားသုံးသူရေးရာဦးစီးဌာန၊ ဒုတိယဦးစီးမှူး ဦးဇော်မင်းဦးက စားသုံးသူကာကွယ်ရေးဥပဒေ အခန်း(၉) ပါ စားသုံးသူ၏ အခွင့်အရေးနှင့် တာဝန်များအား ချပြဆွေးနွေးခြင်း၊ စားသုံးသူအခွင့်အရေးဆုံးရှုံးမှုများ ဖြစ်ပေါ်လာပါက စားသုံးသူရေးရာဦးစီးဌာန၊ စစ်တွေခရိုင်ဦးစီး မှူးရုံး၌ ဖွင့်လှစ်ထားရှိသည့် (CICC- Consumer Information and Complaint Center) စားသုံးသူသတင်းပြန်ကြားရေး နှင့် တိုင်ကြားမှုလက်ခံ ဆောင်ရွက်ရေးစင်တာ ဖွင့်လှစ်ထားရှိခြင်း နှင့် တိုင်ကြားမှုများပြုလုပ်နိုင်ပါကြောင်း ချပြဆွေးနွေးပြီး မြို့နယ်တာဝန်ခံ ဦးသိန်းအောင်(ဦးစီးမှူး)က လိုအပ်သည်များကို ဖြည့်စွက်ဆွေးနွေးပြီး တက်ရောက်လာသူများက သိလိုရှိသည်များကို မေးမြန်းရာခရိုင်ဦးစီးမှူး ဦးမောင်လှဝင်းမှ မေးမြန်းချက်များအပေါ် ပြန်လည်ဖြေကြားခဲ့ပြီး စားသုံးသူကာကွယ်ရေးအသိပညာပေးဟောပြောဆွေးနွေးခဲ့ကြောင်း သိရှိရပါသည်။

DOCA(ရခိုင်)

     ဧရာဝတီတိုင်းဒေသကြီး ပုသိမ်မြို့ စားသုံးသူရေးရာဦးစီးဌာန တိုင်းဦးစီးမှူးရုံးတွင် ၂၀၂၃ ခုနှစ် (၁၅.၃.၂၀၂၃) ရက်နေ့ နံနက် (၁၀:၀၀) နာရီ ကမ္ဘာ့စားသုံးသူအခွင့်အရေးများနေ့ အခမ်းအနား ကျင်းပ ပြုလုပ်ရာ တိုင်းဒေသကြီးအစိုးရအဖွဲ့ စားသုံးသူရေးရာကော်မတီဒုဥက္ကဋ္ဌ သယံဇာတဝန်ကြီး ဦးအုန်းမြင့် နှင့် စားသုံးသူရေးကော်မတီအဖွဲ့ဝင်များ၊ စီမံကိန်းနှင့်ဘဏ္ဍာရေးဝန်ကြီးဌာနနှင့်  တိုင်းအဆင့်ဌာနဆိုင်ရာများ၊ စားသုံးသူရေးရာဦးစီးဌာန တိုင်းဦးစီးမှူးဦးစိုးအောင် ၊ဒုတိယတိုင်းဦးစီးမှူး ဦးထွန်းထွန်း၊ ဒုတိယတိုင်းဦးစီးမှူးဦးစိုးဦးနှင့် အရာထမ်း/အမှုထမ်းများ၊ ၊ဧရာဝတီတိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များအသင်း ဥက္ကဋ္ဌ ဦးဝင်းမြင့်လှိုင်နှင့် အသင်းအဖွဲ့များစီးပွားရေးလုပ်ငန်းရှင် များ စုစု‌ပေါင်း (၁၀၂) ဦး တက်ရောက်ခဲ့ပါသည်။

  ဧရာဝတီတိုင်းဒေသကြီး၊ စားသုံးသူရေးရာကော်မတီ ဒုဥက္ကဋ္ဌ တိုင်းဒေသကြီးအစိုးရအဖွဲ့ သယံဇာတဝန်ကြီး ဦးအုန်းမြင့်က ယနေ့ကျရောက်သော ကမ္ဘာစားသုံးသူအခွင့်အရေးများနေ့ အခမ်းအနားဖြစ်‌ပေါ်လာပုံကို ရှင်းလင်းပြောကြား၍ စားသုံးသူရေးရာကော်မတီအတွင်းရေးမှူး တိုင်းဒေသကြီးဦးစီးမှူး ဦးစိုးအောင်မှ ဌာနလုပ်ငန်းဆောင်ရွက်ချက်များအား ရှင်းလင်းဆွေးနွေးပြီး စားသုံးသူရေးရာဦးစီးဌာန ဒုတိယတိုင်းဒေသကြီး ဦးထွန်းထွန်းမှ စားသုံးသူအခွင့်အရေး (၈)ချက် နှင့်ပတ်သက်၍ ရှင်းလင်းပြောကြားခြင်း၊ စားသုံးသူနစ်နာဆုံးရှုံးမှု တစ်စုံတစ်ရာရှိပါက www.doca.gov.mm website မှတစ်ဆင့်တိုင်ကြားနိုင်ကြောင်း၊ လူကိုယ်တိုင်ဖြစ်စေ၊ ဖုန်းဖြင့် ဖြစ်စေ တိုင်ကြားနိုင်ကြောင်း၊  မြန်မာပြည်တဝှမ်း စားသုံးသူရေးရာ တိုင်ကြားမှုများထဲမှ သိမှတ်ဖွယ်ရာ အချို့အား ဦးစီးဌာနမှ ဖြေရှင်းဆောင်ရွက်မှုများကို power point ဖြင့် ရှင်းလင်းဆွေးနွေးခဲ့ ပါသည်၊၊ထို့နောက် အခမ်းအနားတက်ရောက်လာသူများအား စားသုံးသူအခွင့်အရေးများ အကြောင်းနှင့်ပတ်သက်၍ ဗဟုသုတဖြစ်ဖွယ်‌မေးခွန်းများကို မေးမြန်းခဲ့ပြီး အမှတ်တရဆုလက်ဆောင်များပေး၍ အခမ်းအနားကို နေ့လယ် (၁၂:၀၀) အချိန်တွင် အခမ်းအနားကို ရုတ်သိမ်းခဲ့ကြောင်း သိရှိရပါသည်၊၊

DOCA(ဧရာဝတီ)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်ဦးစီးမှူးရုံး၊ ဒု-ခရိုင် ဦးစီးမှူးဦးမိုးမင်းသန်းနှင့် မြို့နယ်ဦးစီးမှူးဦးလှထွဋ်ဦးတို့သည် (၁၄.၃.၂၀၂၃)ရက်နေ့ ညနေ (၁၅:၃၀)နာရီက မြောင်းမြမြို့ မြရတနာရပ်ကွက် မကိုဋ်ဂျိုးဖြူ ဆန်စက်သို့သွားရောက်၍ ဆန်/ စပါး၊ ဈေးကွက်အခြေအနေ စီးဝင်/စီးထွက်အခြေအနေများအား ကွင်းဆင်းလေ့လာဆောင်ရွက်ခဲ့ပါသည်။

   ထိုသို့ကွင်းဆင်းလေ့လာဆောင်ရွက်ရာတွင် ဒု/ခရိုင်ဦးစီးမှူးမှ ကုန်သွယ်မှုဖွံ့ဖြိုး တိုးတက် ရေးရည်ရွယ်ချက်ဖြင့် ဆန်စက်ပိုင်ရှင်နှင့်တွေ့ဆုံ၍ လက်ရှိဖြစ်ပေါ်နေသော ဆန်စပါးဈေးကွက်၊ ဈေးနှုန်းအခြေအနေ၊ စီးဝင်/စီးထွက်အခြေအနေများ မေးမြန်းစုံစမ်းခဲ့ရာ ဆန်စက်ပိုင်ရှင်မှ ယခု အခြေအနေတွင် ပေါ်ဆန်းစပါးတင်း(၁၀၀)လျှင် (၁၉၂၀၀၀၀)ကျပ်ဖြင့်ဝယ်ယူပြီး ဆန်တစ်အိတ်ကို (၇၂၀၀၀)ကျပ်ရရှိ ပါကြောင်း၊ ဧည့်မထစပါး တင်း(၁၀၀)လျှင်(၁၅၅၀၀၀၀)ကျပ်ဖြင့်ဝယ်ယူပြီး ဆန်တစ်အိတ်(၅၃၀၀၀)ကျပ်ဈေးဖြင့် ရောင်းချလျက်ရှိပြီး နွေစပါးပေါ်ချိန်တွင် စပါးဈေးအနည်းငယ် အတက်အကျရှိနိုင်ကြောင်း ဆွေးနွေးပြောကြားမှုအရ သိရှိရပါသည်၊၊ ထို့နောက်ဆန်စက်လည်ပတ်မှု အခြေအနေနှင့် မီးဘေးလုံခြုံရေး စနစ်တကျထားရှိမှုများ၊ ဆန်/စပါးများသိုလှောင်ထားရှိမှု စနစ် တကျရှိစေရေး၊ နွေစပါးများထွက်ရှိစပြုလာပြီဖြစ်ပြီး တောင်သူများထံမှ စပါးများဝယ်ယူရာတွင် လည်း ဈေးနှုန်း၊ အလေးတင်း၊ တောင်း၊ အချိန်အတွယ်မှန်ကန်စွာဝယ်ယူနိုင်ရေး မလိုလားအပ်သော ပြသနာများမဖြစ်ပေါ်စေရေး အလေးထားဆောင်ရွက်ကြရန်  MSMEs လုပ်ငန်းများဖွံ့ဖြိုးတိုးတက်စေရန်အတွက် စက်ပိုင်၊ ကုန်သည်၊ တောင်သူတို့နှင့်ပူးပေါင်းဆောင်ရွက်မှသာ အောင်မြင်မှာဖြစ်ကြောင်း ရှင်းလင်းဆွေးနွေးတိုက်တွန်းမှာကြားခဲ့ကြောင်း သိရှိရပါသည်။

DOCA(ဧရာဝတီ)