သတင်းနှင့် လှုပ်ရှားမှုများ

      ရန်ကုန်တိုင်းဒေသကြီး၊တောင်ပိုင်းခရိုင် သန်လျင်မြို့တွင် (၂၀၂၂-၂၀၂၃) ရာသီပဲတီစိမ်းစိုက် တောင်သူများအတွက်(GAP&GHP) နည်းစနစ်အတိုင်းစိုက်ပျိုးနိုင်စေရန် ရည်ရွယ်၍ စိုက်ပျိုးရေး ဦးစီးဌာန၊ ကျွမ်းကျင်ပညာရှင်များမှ ပို့ချသောတောင်သူပညာပေး သင်တန်းကို (၁၆.၁၂.၂၀၂၂ မှ ၁၈.၁၂.၂၀၂၂)ရက်နေ့အထိ (၃)ရက်တိုင်တိုင်  စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာ ဦးစီးဌာန၊ ရန်ကုန်တောင်ပိုင်းခရိုင်ဦးစီးမှူးရုံး၌ ကျင်းပပြုလုပ်ခဲ့ပါသည်၊၊

        ပထမဦးစွာ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး ဒုတိယတိုင်းဒေသကြီးဦးစီးမှူး ဦးတင်မိုးအောင်က အဖွင့်အမှာစကားပြောကြားပြီး ကုမ္ပဏီများကိုယ်စား New Golden Gate Company  ၊ ပြည့်ဖြိုးအောင်ကုမ္ပဏီနှင့် အောင်ကျွန်းသာကုမ္ပဏီတို့မှ တာဝန်ရှိသူများမှလည်း ယနေ့ဖြစ်ပေါ်နေသော ပဲတီစိမ်းဈေးကွက်အခြေအနေများအား ရှင်းလင်းပြောကြားရာတွင် တောင်သူဦးကြီးများအနေဖြင့် ပဲတီစိမ်းအရည်အသွေးမြင့်မားပြီး နိုင်ငံတစ်ကာဈေးကွက်ကိုရောင်းချတင်ပို့နိုင်ရန် ပိုးမွှားကင်းစင်ပြီး ပဲတီစိမ်းပိုးသတ် ဆေးဓာတ်ကြွင်းနည်း၍ အရည်အသွေးကောင်းမွန်နိုင်မှသာ မျှော်မှန်းထားတဲ့ဈေးနှုန်း ဈေးကွက်ကို ရရှိကြမှာဖြစ်ကြောင်း အသီးသီးပြောကြားခဲ့သည်၊၊

    ဆက်လက်၍ စိုက်ပျိုးရေးဦးစီးဌာန၊ ရန်ကုန်တိုင်းသီးနှံကာကွယ်ရေး တာဝန်ခံဒေါက်တာကိုကို၊ ရန်ကုန်တိုင်းမြေအသုံးချရေးတာဝန်ခံ ဒေါ်မြင့်မြင့်မော်နှင့် ရန်ကုန်တိုင်းမျိုးစေ့ တာဝန်ခံဒေါ်ဆွေဆွေဦးတို့မှ ရာသီပဲတီစိမ်းစိုက်တောင်သူများအတွက် (GAP&GHP) နည်းစနစ် အတိုင်းစိုက်ပျိုးနိုင်စေရေးသင်တန်း ဆက်လက်ပို့ချရာတွင် တက်ရောက်လာသော တောင်သူဦးကြီး များကသိလိုသည်များကို မေးမြနးခဲ့ပြီး တာဝန်ရှိသူများက ပြန်လည်ရှင်းလင်းဖြေကြား ပေးခဲ့ကြပါ သည်၊၊အဆိုပ်သင်တန်းများကို ၁၆.၁၂.၂၀၂၂ ရက်နေ့တွင် ကျောက်တန်းမြို့နယ်ရှိကျေးရွာ(၅)ရွာမှ ပဲတီစိမ်းစိုက်တောင်သူ (၈၇)ဦး၊ ၁၇.၁၂.၂၀၂၂ ရက်နေ့တွင် သန်လျင်မြို့ရှိကျေးရွာ(၇)ရွာမှ ပဲတီစိမ်းစိုက်တောင်သူ (၉၆) ဦး နှင့် ၁၈.၁၂.၂၀၂၂ ရက်နေ့တွင် ခရမ်းမြို့နယ်ရှိ ကျေးရွာ(၇)ရွာမှ ပဲတီစိမ်းစိုက်တောင်သူ (၇၅)ဦး အသီး သီးတက်ရောက်ခဲ့ကြောင်းသိရသည်၊၊

DOCA(ရန်ကုန်)

          ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံး၊  မအူပင်မြို့နယ် ဦးစီးမှူး ဦးအောင်ဇော်ဦးနှင့် ဝန်ထမ်းများသည် (၂.၁.၂၀၂၃) ရက်နေ့ (၁၀:၀၀)နာရီအချိန်တွင် မအူပင်မြို့ပေါ်ရှိ ဆေးမျိုးစုံရောင်းချသည့်ဆိုင်များအား မိတ်ဖက်ဌာနဖြစ်သော FDA၊ ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့်အတူ ပူးပေါင်း၍ ဈေးကွက်စောင့်ကြည့် စစ်ဆေးခဲ့ကြပါသည်။

       ကွင်းဆင်းစစ်ဆေးရာတွင် မအူပင်မြို့ပေါ်ရှိ ဆေးအမျိုးမျိုးရောင်းချနေသော ဆေးဆိုင် (၈)ဆိုင်မှ ကုန်စည်များတွင် မြန်မာနိုင်ငံစားသုံးသူရေးရာကော်မရှင်၏ ညွှန်ကြားချက်အမှတ် (၂/၂၀၁၉)ပါ ကုန်အညွှန်အမှတ်အသား သတ်မှတ်ချက်များနှင့် ကိုက်ညီမှုရှိသည့် ကုန်စည်များကို ရောင်းချနေကြောင်း စစ်ဆေးတွေ့ရှိရပြီး၊ အစားအသောက်နှင့် ဆေးဝါးကွပ်ကဲရေးဦးစီးဌာနမှ တာမြစ်ထားသော ဆေးဝါးများရောင်းချခြင်းမရှိကြောင်း စစ်ဆေးတွေ့ရှိရပါသည်။ ဆက်လက်၍ ဆေးဆိုင်ရှင်များကိုလည်း ကုန်အညွှန်အမှတ်အသား သတ်မှတ်ချက်ပြည်စုံစွာ ဖော်ပြထားခြင်းမရှိသော ဆေးဝါးများကို မရောင်းချရန်၊ ဌာနတို့၏ တားမြစ်ကုန်စည်များကိုလည်း မရောင်းချရန်နှင့် သတ်မှတ်ချက် စည်းကမ်းများနှင့် မကိုက်ညီသော ကုန်စည်များကို ရောင်းချခြင်းမျိုးစစ်ဆေး တွေ့ရှိပါက အရေးယူဆောင်ရွက်ခြင်း၊ ပြစ်မှု၊ပြစ်ဒဏ်များ ခံရမည်ဖြစ်ကြောင်း လုပ်ငန်းရှင်တို့ လိုက်နာရမည့်တာဝန်များ၊ စစ်ဆေးရေးအရာရှိတို့၏ လုပ်ငန်းတာဝန်များအကြောင်းကို ရှင်းလင်းဆွေးနွေး အသိပညာပေးခဲ့ကြောင်း သိရှိရပါသည်။

DOCA(ဧရာဝတီ)

        ကယားပြည်နယ်၊ စားသုံးသူရေးရာဦးစီးဌာနမှ ၂၀၂၃ ခုနှစ်၊ ဇန်နဝါရီလ(၃)ရက်နေ့၊ နံနက် (၁၀၀၀)နာရီအချိန်တွင် လွိုင်ကော်မြို့၊ နောင်ယား(က)ရပ်ကွက်ရှိ ရွှေကယားသောက်ရေသန့်စက်ရုံ သို့ကွင်းဆင်းဆောင်ရွက်ခဲ့ပါသည်။

      ထိုသို့ကွင်းဆင်းဆောင်ရွက်ရာတွင်ပြည်နယ်ဦးစီးမှူးကစက်ရုံသန့်ရှင်းမှုရှိမရှိ၊သောက်ရေသန့် ထုတ်လုပ်ရာတွင် ကျန်းမာရေးနှင့်ညီညွတ်မှု ရှိ မရှိ၊ ကုန်အညွှန်းအမှတ်အသား ပြည့်စုံမှု ရှိမရှိနှင့် ထုတ်လုပ်ရောင်းချမှု အခြေအနေအားလည်းကောင်း၊ ဈေးနှုန်းဈေးကွက်အခြေအနေအားလည်းကောင်း၊ ထုတ်လုပ်မှုအခြေအနေအားလည်းကောင်း၊ လုပ်သားအခြေအနေအားလည်းကောင်း ဆွေးနွေးခဲ့ကြောင်းသိရှိရပါသည်။

DOCA(ကယား)

      စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ဝန်ထမ်းများသည် ၂၀၂၂ ခုနှစ် ၊ ဒီဇင်ဘာလ(၂၉)ရက်နေ့၊ နံနက်(၀၈:၀၀)နာရီအချိန်တွင်  လွိုင်ကော်မြို့၊ သီရိမင်္ဂလာဈေးအတွင်းရှိ အသား/ငါး/ကြက်ဥ/ဘဲဥရောင်းချနေသောဆိုင်များသို့ လတ်ဆက်မှုရှိ/မရှိနှင့် သန့်ရှင်းသောရောင်းချခြင်းစနစ် ရှိ/မရှိ ခရိုင်ငါးလုပ်ငန်းဦးစီးဌာန၊ မြို့နယ်ရဲတပ်ဖွဲ့၊ မြို့နယ်မွေးမြူရေးနှင့်ကုသရေးဦးစီး ဌာန၊ မြို့နယ်စည်ပင်သာယာရေးအဖွဲ့၊ မြို့နယ်ထွေထွေအုပ်ချုပ်ရေးဦးစီးဌာန၊ အစားအသောက်နှင့် ဆေးဝါးကွပ်ကဲရေးဦးစီးဌာနတို့ဖြင့် ပူးပေါင်း၍ ကွင်းဆင်းစစ်‌ဆေးဆောင်ရွက်ခဲ့ပါသည်။   ထိုသို့ ကွင်းဆင်းစစ်ဆေးရာတွင် ဈေးအတွင်းရှိ ကြက်သား/ငါးများကို ရန်ကုန်တိုင်းဒေသ ကြီးနှင့် တောင်ကြီးမြို့မှ အများဆုံးမှာယူ တင်သွင်းရောင်းချကြောင်း၊ ရှမ်းပြည်နယ်တောင်ပိုင်း ဖယ်ခုံအင်းမှ ငါးများနှင့်ဒေသငါးများလည်း မှာယူတင်သွင်းရောင်းချသည်ကို တွေ့ရှိရပါကြောင်း၊ ရောင်းချသောဈေးသည်များအနေဖြင့် Masks များနှင့် ရာဘာလက်အိတ်များ ဝတ်ဆင်ပြီး စနစ်တ ကျ ရောင်းချရန်လိုအပ်ကြောင်း၊ ဈေးသည်များအနေဖြင့် အလေးချိန်မှန်ကန်စွာ ရောင်းချရန်လို ကြောင်း၊ စစ်ဆေးနေစဉ်အတွင်း သန့်ရှင်းလတ်ဆက်မှုမရှိသော အသားအနည်းငယ်ကို တွေ့ရှိရပါသ ဖြင့် စည်ပင်သာယာရေးအဖွဲ့မှသိမ်းဆည်းကာ မီးရှို့ဖျက်ဆီးခဲ့ပါကြောင်းနှင့် သန့်ရှင်းလတ်ဆက်မှု မရှိသော အသား၊ ငါး၊ ဥများနှင့် ကူးစက်ရောဂါရနေသော အသား/ ငါးများအား ရောင်းချခြင်းမပြုရန် အသား/ ငါး/ ကြက်ဥ/ ဘဲဥများ ရောင်းချနေသော ဆိုင်(၂၆)ဆိုင်အား အသိပညာပေး စစ်ဆေးဆောင်ရွက်ခဲ့ကြောင်း သတင်းရရှိပါသည်။

DOCA(ကယား)

          စားသုံးသူရေးရာဦးစီးဌာန၊ သတင်းအချက်အလက်နည်းပညာနှင့် အရည်အသွေးစီမံခန့်ခွဲ ရေးဌာနခွဲ၊ ကုန်ပစ္စည်းစမ်းသပ်စစ်ဆေးရေးနှင့် အရည်အသွေးစီမံခန့်ခွဲမှုဌာနစု (လှည်းကူး) ၏ ဓာတ်ခွဲခန်းများမှ ၂၀၂၂ ခုနှစ်၊ ဒီဇင်ဘာလအတွင်း လုပ်ငန်းရှင်ပေါင်း(၃၀)ဦးက အပ်နှံလာသော သီးနှံအမျိုးအစား(၁၄)မျိုး၊ စုစုပေါင်းနမူနာအရေအတွက် (၅၆) ခု၊ ဓာတ်ခွဲစမ်းသပ်မှုပေါင်း (၁၉၃) ခုကို ဓာတ်ခွဲစမ်းသပ်စစ်ဆေးခြင်းများ ဆောင်ရွက်နိုင်ခဲ့ပါသည်။

              ၂၀၂၂ ခုနှစ်၊ ဒီဇင်ဘာလအတွင်း လယ်ယာထွက်ကုန်ပို့ကုန်များအား အင်ဒိုနီးရှား၊ ဂျပန်နှင့် အိုင်ယာလန်နိုင်ငံများသို့ တင်ပို့နိုင်ရေးအတွက် နှမ်းနက်(သိပ္ပံ)၊ နှမ်းနက်(ရိုးရိုး)၊ မြေပဲ ဖတ်၊ နှမ်းဖြူဖတ်၊ နှမ်းဖတ်၊ ငြုပ်၊ ရှောက်ဘီလူး၊ ဆန်ဖြူ၊ ပဲတီစိမ်း၊ မတ်ပဲ၊ ပဲတီစိမ်းအခွံချွတ်ခွဲခြမ်း၊ ပဲတီစိမ်းအခွံပါ ခွဲခြမ်း၊ ကော်ဖီ‌စေ့၊ ထောပတ်ပဲနှင့် စားအုန်းဆီတို့၏ ဓာတု အရည်အသွေး၊ ပိုးသတ် ဆေးကြွင်းပါရှိမှု၊ မှိုဆိပ်ပါရှိမှုစသည့် ဓာတ်ခွဲစမ်းသပ် စစ်ဆေးခြင်းကိုလည်းကောင်း၊ ပြည်ပ နိုင်ငံ များမှ တင်သွင်းလာသည့် စားအုန်းဆီများ၏ အရည်အသွေးများကိုလည်းကောင်း ဓာတ်ခွဲ စမ်းသပ် ခြင်းများ ဆောင်ရွက်လျက်ရှိပါသည်။

            ဓာတ်ခွဲခန်းအလိုက် ဓာတ်ခွဲစမ်းသပ်မှုအနေဖြင့် ပိုးသတ်ဆေးကြွင်းဆိုင်ရာ ဓာတ်ခွဲခန်းမှ ဓာတ်ခွဲစမ်းသပ်မှု (၁၇) ခု၊  မှိုဆိပ်ဆိုင်ရာဓာတ်ခွဲခန်းမှ ဓာတ်ခွဲစမ်းသပ်မှု (၁၂) ခု၊ ဆီနှင့်ဆီထွက် သီးနှံဓာတ်ခွဲခန်းမှ ဓာတ်ခွဲစမ်းသပ်မှု (၁၄၉) ခုနှင့် သီးနှံ(ဓာတု)ဆိုင်ရာ ဓာတ်ခွဲခန်းမှ ဓာတ်ခွဲ စမ်းသပ်မှု (၁၅)ခု၊ စုစုပေါင်း ဓာတ်ခွဲစမ်းသပ်မှု (၁၉၃) ခု ဆောင်ရွက်နိုင်ခဲ့ပါသည်။

သတင်းအချက်အလက်နည်းပညာနှင့် အရည်အသွေးစီမံခန့်ခွဲ ရေးဌာနခွဲ