သတင်းနှင့် လှုပ်ရှားမှုများ

         စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ တိုင်းဒေသကြီးဦးစီးမှူးရုံးမှ ဝန်ထမ်းများသည် ဝန်ထမ်းစွမ်းဆောင်ရည်မြှင့်တင်ရေးအထောက်အကူပြု အသိပညာ မျှဝေဆွေးနွေးခြင်း Thursday Talkကို (၂)ပတ်တစ်ကြိမ် ကျင်းပပြုလုပ်လျှက်ရှိပါသည်။ ၈-၁၂-၂၀၂၂ ရက်နေ့ နေ့လယ် (၂း၀၀)နာရီအချိန်တွင် တိုင်းဒေသကြီးဦးစီးမှူးရုံး အစည်းအဝေးခန်းမ၌ ဘဏ္ဍာရေးဆိုင်ရာစည်းမျဉ်း စည်းကမ်း၊ လုပ်ထုံးလုပ်နည်းများအကြောင်းသိကောင်းစရာများကို ဆွေး‌နွေးဆောင်ရွက်ခဲ့ရာ စုစုပေါင်း ဝန်ထမ်း(၃၃)ဦး တက်ရောက်ခဲ့ပါသည်။

        အဆိုပါ Thursday Talkတွင် တိုင်းဒေသကြီးဦးစီးမှူး ဦးကျော်ကျော်လွင်က ဌာန၏ရည်မှန်း ချက်တာဝန်များ အောင်မြင်စွာ အကောင်အထည်ဖော်ဆောင်ရွက်ရေးအတွက် ဘဏ္ဍာရေးဆိုင်ရာ လုပ်ငန်းများ စနစ်ကျရေးသည် အရေးကြီးကြောင်း အမှာစကားပြောကြားပါသည်။ ထို့နောက် ငွေစာရင်းတာဝန်ခံ ဒေါ်ဝေဝေ(ဦးစီးအရာရှိ)က ရသုံးမှန်းခြေငွေစာရင်း အဓိပ္ပာယ်၊ မူလခန့်မှန်းခြေစာရင်း၊ ပြုပြင်ပြီးခန့်မှန်းခြေ၊ ရသုံးမှန်းခြေငွေစာရင်းရေးဆွဲခြင်း၊ ရန်ပုံငွေ/ DL တောင်းခံရာတွင် သုံးစွဲရန်များ၊ ရန်ပုံငွေပြန်လည်အပ်နှံခြင်း၊ ရန်ပုံငွေလွှဲပြောင်းသုံးစွဲခြင်း၊ ရငွေ/ သုံးငွေအမျိုးအစားများ၊ ရငွေများ၊ အသုံးစရိတ်များ၊ ရငွေများနှင့် စပ်လျဉ်းသည့် ယေဘုယျစည်းမျဉ်းများ၊ အသုံးစရိတ်များစီစစ်ပေးချေခြင်းများ၊ ငွေစာရင်းထိန်းသိမ်းရေးနည်းလမ်းများ(ဌစပုံစံများ)အကြောင်း အကျယ်တဝင့် ဆွေးနွေးပါသည်။ တက်ရောက်လာသော ဝန်ထမ်းများမှလည်း သိရှိလိုသည်များကို အပြန်အလှန် မေးမြန်းဆွေးနွေးခဲ့ကြောင်း သိရှိရပါသည်။

DOCA(စစ်ကိုင်း)

       ( ၅.၁၂.၂၀၂၂ ) ရက်နေ့၊ နံနက် ( ၁၀:၀၀ )နာရီအချိန်တွင် တမူးမြို့နယ်တာဝန်ခံ ဉီးစွမ်းရည် (ဉီးစီးမှူး)နှင့် ဝန်ထမ်းများသည် စော်ဘွား-၁ ရပ်ကွက်ရှိ (အ.ထ.က- ၂ )ကျောင်းသို့  သွားရောက်၍ စားသုံးသူအသိပညာပေး ဟောပြောခဲ့ပါသည်။

        အဆိုပါဟောပြောပွဲ၌ စော်ဘွား-၁ ရပ်ကွက်ရှိ ( အ.ထ.က -၂ )ကျောင်းမှ ကျောင်းအုပ်ကြီး ဦးဝင်းနိုင်က အဖွင့်အမှာစကားပြောကြားပြီး  ပြန်ကြားရေးနှင့်ပြည်သူ့ဆက်ဆံရေးဉီးစီးဌာနမှ  ဉီးစီးအရာရှိ ဒေါ်သန်းထိုက်အောင်က မိမိတို့ဌာန၏  လက်ရှိလုပ်ငန်းဆောင်ရွက်မှုအခြေအနေများ ကျောင်းသား/ကျေင်းသူများ၊ စာပေများလေ့လာဖတ်ရှုသင့်ကြောင်း အလိမ္မာစာမှာရှိဆိုသကဲ့သို့ စာပေလေ့လာခြင်းအားဖြင့် မိမိတို့၏ယဉ်ကျေးမှု ဓလေ့ထုံးတမ်းအစဉ်အလာများကို စာပေလေ့လာခြင်းအားဖြင့် သိရှိလာကြမှာဖြစ်ပါကြောင်းနှင့် တမူးမြို့နယ် စားသုံးသူရေးရာဦးစီးဌာနမှ ဦးစီးမှူး ဉီးစွမ်းရည်က အစားအသောက်များကိုဝယ်ယူရာတွင် သတိပြုရမည့်အကြောင်းအရာများ၊ စားသုံးသူကာကွယ်ပေးရေး လုပ်ငန်းများကို ပြည်သူများလက်လမ်းမှီစေရေးအတွက် ရည်ရွယ်၍ စားသုံးသူအဖွဲ့ငယ်များ၊ ကျောင်းများ၊ ဈေးများ၊ ရပ်ကွက်များတွင် ဖွဲ့စည်းထားရှိမှုခြေအနေများ၊ စားသုံးသူရေးရာဉီးစီးဌာန၏ ဥပဒေအကြောင်းအရာများကို အသိပညာပေးဆွေးနွေး ပြောကြားခဲ့ကြောင်း သတင်းရရှိရပါသည်။

DOCA(စစ်ကိုင်း)

        ဧရာဝတီတိုင်းဒေသကြီး၊ မြန်အောင်ခရိုင်၊  ကြံခင်းမြို့နယ်၊ ( ၆-၁၂-၂၀၂) ရက်နေ့ နံနက်(၀၉:၃၀) နာရီအချိန်တွင် ပေါက်တောကြီးကျေးရွာ၊ တလိုင်းကွင်းအုပ်စု အုပ်ချုပ်ရေးမှုးနေအိမ်၌ စားသုံးသူရေးရာဦးစီးဌာန၊ မြို့နယ်တာဝန်ခံက မုန့်ဖက်လုပ်ငန်းရှင်နှင့် ကုန်မျိုးစုံဆိုင်လုပ်ငန်းရှင် ( ၇ )ဦးအား စားသုံးသူကာကွယ်ရေး အသိပညာပေးဟောပြောခြင်းကို ဆောင်ရွက်ခဲ့သည်။

        ဟောပြောပွဲတွင် စားသုံးသူရေးရာဦးစီးဌာန၊ မြို့နယ်တာဝန်ခံ ဦးကျော်နိုင်ဝင်းမှ စားသုံးသူကာကွယ်ရေးဥပဒေကို ၂၀၁၉ ခုနှစ် မတ်လ( ၁၅ )ရက်နေ့တွင် အခန်း( ၂၅ )ခန်း၊ ပုဒ်မ( ၈၄ )ခုဖြင့် ပြဋ္ဌာန်းခဲ့ကြောင်း၊ ဥပဒေတွင်ပါရှိသောစားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များအကြောင်း၊ ကုန်အညွှန်းအမှတ်အသားဖော်ပြခြင်းအကြောင်း၊ ရောင်းချနေသောကုန်စည်များတွင် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ( ၄၁ ) ပုဒ်မခွဲ( ခ )နှင့်( ဆ )တို့ပါ ကုန်အညွှန်းဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု( သို့ )တစ်ခုထက်ပို၍တွဲလျက်ဖြစ်စေ ရေးသားဖော်ပြရမည့်ကုန်ပစ္စည်းကိုသာ စားသုံးသူများလက်ဝယ်အရောက် ဘေးကင်းလုံခြုံမှုရှိစေရေးအတွက် ဖြန့်ဖြူးရောင်းချရမည်ဖြစ်ကြောင်း၊  မုန့်ဖက်လုပ်ငန်းရှင်များအနေဖြင့်  တားမြစ်ဓာတုဆေးဝါးမသုံးစွဲရေးအကြောင်း၊ ပြစ်မှု၊ ပြစ်ဒဏ်များအကြောင်းနှင့် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ CICC ရုံးခန်းများ ဖွင့်လှစ်ထားရှိမှုအခြေအနေကိုလည်ကောင်း၊ စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း သိရှိလိုပါက www.doca.gov.mm Website တွင် ဝင်ရောက်လေ့လာနိုင်ကြောင်း စသည်တို့ကို အသိပညာပေးဟောပြောခဲ့ပြီး၊ တက်ရောက်သူများမှလည်း သိလိုသည်များကိုမေးမြန်း၍ စားသုံးသူကာကွယ်ရေးဥပဒေစာအုပ်နှင့် လက်ကမ်းစာစောင်များ ပေးဝေခဲ့ကြကြောင်း သိရှိရပါသည်။

DOCA(ဧရာဝတီ)

        ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာခရိုင်၊  လပွတ္တာမြို့နယ် တာဝန်ခံ ဦးမြင့်ဌေးနှင့် မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ ( ၆-၁၂-၂၀၂၂ ) ရက်နေ့ နံနက် (၁၁း၃၀)နာရီက လပွတ္တာမြို့၊ အမှတ်(၇)   ရပ်ကွက်ရှိ ကုန်မျိုးစုံ၊ မုန့်မျိုးစုံဆိုင်များသို့ ဈေးကွက်စောင့်ကြည့်စစ်ဆေးဆောင်ရွက်ခဲ့ပါသည်။

      ထိုသို့ ကွင်းဆင်းဆောင်ရွက်ရာတွင် မြို့နယ်တာဝန်ခံ ဦးမြင့်ဌေးမှ လပွတ္တာမြို့၊ အမှတ်( ၇ ) ရပ်ကွက်ရှိ ကုန်မျိုးစုံ၊ မုန့်မျိုးစုံရောင်းချနေသော ဆိုင်( ၄ )ဆိုင်မှ ပိုင်ရှင်များအား စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေးဥပဒေ ၂၀၁၉ ပါ ပြဋ္ဌာန်းချက်များမှ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ ဥပဒေအခန်း( ၁၈ )ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ( ၄၁ )ပုဒ်မခွဲ ( ခ )နှင့် ( ဆ )တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု( သို့) တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ပြီး၊ စီးပွားရေးလုပ်ငန်းရှင်များအနေဖြင့် ကုန်စည်အမျိုးအစားအလိုက် သတ်မှတ်ထားသည့် ဥပဒေညွှန်ကြားချက်များနှင့်အညီ လိုက်နာဆောင်ရွက်ကြရန် ဈေးကွက်အတွင်းရောင်းချနေသော ကုန်စည်များတွင် ကုန်အညွှန်းအမှတ်အသား ပြည့်စုံစွာဖော်ပြထားမှု ရှိ/မရှိအား ဌာနမှဈေးကွက်စောင့်ကြည့်စစ်ဆေးမှုအား စဉ်ဆက်မပြတ်ဆောင်ရွက်သွားမည်ဖြစ်ကြောင်း အသိပေးစစ်ဆေးခဲ့ပါသည်။

DOCA(ဧရာဝတီ)

      စီးပွားရေးနှင့် ကူးသန်းရောင်းဝယ်ရေးဝန်ကြီးဌာနအနေဖြင့် စီးပွားရေးလုပ်ငန်းရှင်များအား စားသုံးသူကာကွယ်ရေးဥပဒေပါ အကြောင်းအရာများကိုသိရှိပြီး စီးပွားရေးလုပ်ငန်းများ ဆောင်ရွက်ရာတွင် ဥပဒေနှင့်အညီ လိုက်နာဆောင်ရွက်နိုင်စေရန် ထိန်းကျောင်းပေးခြင်းများ ဆောင်ရွက်လျက်ရှိရာ  ဒီဇင်ဘာလ(၅)ရက်နေ့၊ နံနက်(၁၀:၀၀)နာရီအချိန်တွင် ရွှေဘိုခရိုင် စားသုံးသူရေးရာဦးစီးဌာနမှ ဒု-ခရိုင်ဦးစီးမှူးနှင့် ထုတ်ကုန်လုံခြုံစိတ်ချရမှုဌာနခွဲတာဝန်ခံတို့သည် ရွှေဘိုမြို့နယ်၊ ဇီးကုန်းလေးကျေးရွာရှိ သိန်းဇော် ကိတ်မုန့်လုပ်ငန်းရှင်နှင့် တွေ့ဆုံဆွေးနွေးခဲ့ပါသည်။

     ထိုသို့တွေ့ဆုံဆွေးနွေးရာတွင်  ဒု-ခရိုင်ဦစီးမှူးမှ စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးလုပ်ငန်းများကို ဥပဒေ၊ အမိန့်၊ ညွှန်ကြားချက်များနှင့်အညီ ဆောင်ရွက်လျက်ရှိကြောင်း၊ စီးပွားရေးလုပ်ငန်းရှင်များထုတ်လုပ်သည့် ထုတ်ကုန်များလုံခြုံစိတ်ချရမှုရှိစေရေးအတွက် ဈေးကွက် မရောက်မီကုန်စည်နှင့် ဈေးကွက်ရောက်ပြီးကုန်စည်များကို ဈေးကွက်စောင့်ကြည့်စစ်ဆေးခြင်း၊ စီးပွားရေးလုပ်ငန်းရှင်နှင့် တွေ့ဆုံဆွေးနွေးခြင်းများ ဆောင်ရွက်လျက်ရှိကြောင်း၊ ကိတ်နှင့်မုန့်မျိုးစုံလုပ်ငန်းအနေဖြင့်  စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားများပြည့်စုံစွာဖော်ပြ၍ ထုတ်လုပ်ဖြန့်ဖြူးရောင်းချကြရန်လိုအပ်ကြောင်း၊  ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မြန်မာနိုင်ငံ စားသုံးသူကာကွယ်ရေးကော်မရှင်မှထုတ်ပြန်ထားသည့် ညွှန်ကြားချက်အမှတ် (၁/၂၀၁၉)ပါအကြောင်းအရာများ၊  ကုန်စည်ကို ထုတ်လုပ်ဖြန့်ဖြူးရောင်းချသည့် စီးပွားရေးလုပ်ငန်းရှင်များအနေဖြင့် ကုန်အညွှန်း အမှတ်အသားဖော်ပြခြင်းနှင့်ပတ်သက်၍ ဌာန၏အတည်ပြုချက်ရယူနိုင်ရေး ဆောင်ရွက်ကြရန်လိုအပ်သဖြင့် ကိတ်နှင့်မုန့်မျိုးစုံတွင် ထည့်သွင်းဖော်ပြရမည့် ကုန်အညွှန်းအမှတ်အသားများကို ရှင်းလင်း ဆွေးနွေးပြီး ပြည်သူတိုင်းသည် စားသုံးသူဖြစ်သဖြင့် စားသုံးသူများသိသင့်သည့် စားသုံးသူအခွင့်အရေး (၈)ချက်နှင့်  စားသုံးသူအခွင့်အရေးနှင့် အကျိုးစီးပွားနစ်နာဆုံးရှုံးမှုများရှိပါက တိုင်ကြားနိုင်သည့် အကြောင်းများ၊  စားသုံးသူများနှင့် စီးပွားရေးလုပ်ငန်းရှင်များအနေဖြင့်  ဌာနနှင့်ပတ်သက်သော သတင်း အချက်အလက်များကို အလွယ်တကူမေးမြန်းစုံစမ်းနိုင်ရန်၊ ကုန်စည်နှင့်ဝန်ဆောင်မှုများ ဝယ်ယူသုံးစွဲ ရာတွင် နစ်နာဆုံးရှုံးမှုများကြုံရပါက ဌာနသို့အလွယ်တကူတိုင်ကြားနိုင်ရန်၊ လုပ်ငန်းရှင်များအနေဖြင့် ကုန်စည်နှင့်ဝန်ဆောင်မှုများ ထုတ်လုပ်၊ ဖြန့်ဖြူး၊ ရောင်းချရာတွင် ကုန်အညွှန်းအမှတ်အသားအပါအဝင် လိုက်နာဆောင်ရွက်ရမည့်အချက်များကို စုံစမ်းနိုင်ရန်ရည်ရွယ်၍ ဌာနအနေဖြင့် Consumer Call Center ဝန်ဆောင်မှုများကို ဆောင်ရွက်ပေးလျက်ရှိရာ Consumer Call Centerနံပါတ် ၁၅၃၅ သို့ ရုံးဖွင့်ရက်ရုံးချိန် အတွင်း မည်သည့် Operator Ph No. ကဖြစ်စေခေါ်ဆို၍ သိရှိလိုသည်များကို စုံစမ်းမေးမြန်းနိုင်သည့်အကြောင်းများ ရှင်းလင်းဆွေးနွေးခဲ့ပြီး လက်ကမ်းစာစောင်များ ဖြန့်ဝေခဲ့ကြောင်း သတင်းရရှိပါသည်။

DOCA(စစ်ကိုင်း)